ازاي تسافر ب 10000 جنية
Planning تخطيط

ازاي تسافر ب 10000 جنية ؟… دليلك الكامل لسفر بأقل ميزانية

on
يوليو 5, 2019

ازاي تسافر ب 10000 جنية (حوالي 600 دولار في تاريخ كتابة المقالة) ؟ سؤال دايما الناس فاكرة انه خيالي أو صعب التحقيق , خصوصا بعد تعويم الجنية ده غير أن الأعتقاد اللي عند الناس ان دايما اللي بيسافر ده شخص غني و معاه فلوس ..

لو دخلت معظم جروبات أو صفحات السفر علي الأنترنت , هتلاقي 50 % من الناس بتتكلم عن السفر بشغف و بتقول “سافر أنت لست شجرة” … و 50 % الباقيين بيردوا عليهم “للأسف أنا مش بنك” … بس قبل ما أتكلم في ازاي تسافر بأقل ميزانية عايز أقوللك المشكلة عمرها ما كانت في الفلوس أبدا … المشكلة في أولوياتك أنت ..

هديلك مثال : لو شخص مثلا عنده قناة علي اليوتيوب و بقاله فترة فيها و له متابعين كتير .. عنده أستعداد مثلا يشتري ميكروفون ب 10000 جنية أو كاميرا ب 30000 جنية لأنه هيعتبر أن الموضوع ده أولوية من أولوياته … أنت لو شخص عادي ممكن تقول أيه الشخص العبيط ده أزاي يدفع 10000 جنيه في ميكروفون أو 30000 في كاميرا ..

السفر نفس المثال , أنا هتكلم عن نفسي مثلا , السفر بالنسبالي مش مجرد رفاهية أو مجرد أني أروح أتصور صورتين تحت برج أيفل ..لأ خالص … السفر بالنسبالي أكتشاف ثقافات و حدود جديدة , أني أطلع بره ال Comfort Zone  بتاعتي .

السفر بالنسبالي أولوية , و لما هتعتبره أولوية هتلاقي نفسك بتسافر و بتدور أزاي تنفذه بأقل تكلفة …

لو متابع المدونة هتلاقيني كتبت مقالات كتير عن أزاي تسافر بأقل التكاليف و ازاي تحجز طيران و أقامة و كل حاجه , بس أنهارده هنعمل تجربة عملية عن ازاي تسافر ب 10000 جنية , ازاي تخطط بنفسك بدون أي شركة سياحة و تسافر بأقل تكاليف ممكنة …

 

 

1- الفلوس :

ازاي تسافر ب 10000 جنية

 

مبدأيا قرار السفر مبيجيش في يوم و ليلة , ده عايز تحضير وقت كبير قبلها , بمعني لو انت مثلا عاوز نخطط سفرية بميزانية معينة , يبقي حاول قبلها ب 6 شهور أو سنة مثلا تبدأ تجنب مبلغ كل شهر للسفر ده , ابدأ التحويش من بدري علشان متحسش أن السفر بقي حمل تقيل عليك …

كل واحد فينا هيلاقيه بيصرف في حاجات ملهاش لازمة … زي الكافيهات أو المطاعم أو أو أو … مش هقولك أحرم نفسك من حاجه بس إلي حد ما قلل المصاريف دي و حوشها لهدف السفر …

 

نيجي بقي لتجربتنا العملية , نفترض أنك حوشت الفلوس المناسبة و جاهز للسفر , نبدأ التحطيط ..

 

 

2- تذاكر الطيران :

ده أكتر بند في مقالة ازاي تسافر ب 10000 جنية هيكلف , بس لو سمعت نصيحتي هقولك ازاي تتغلب عليه ..

أولا قبل أي حاجه لازم تقرأ المقالة دي (ازاي تلاقي أرخص تذكرة طيران) لأنها هتسهل عليك جدا , أنا أخترت مثلا شهر أكتوبر كمثال لتخطيط الرحلة دي لأنه شهر بعيد عن الموسم (الصيف مثلا أو الكريسماس) , و دخلت علي Skyscanner هتلاقي فيه خيار تعمل Explore , ده بيخليك تشوف أرخص الرحلات اللي بتطلع من المدينة أو البلد اللي بتحددها …

لقيت من أرخص الرحلات اللي هتطلع من مصر هي رحلة من مطار شرم الشيخ لاسطنبول ذهاب يوم 1 أكتوبر و عودة يوم 7 أكتوبر بسعر 3040 جنية فقط علي طيران بيجاسوس ..

ازاي تسافر ب 10000 جنية

طبعا الطيران ده من شركات الطيران الأقتصادية بيسمحلك فقط بشنطة 8 كيلو , مناسب لو انت backpacker أو مبتحبش شنط كتير , لو حبيت تشحن شنطة زيادة هتدفع حوالي 500 جنية زيادة أو في الحدود دي …

يبقي كده بند الطيران هيكلفنا حوالي 3500 حنية

 

 

3- الأقامة :

اتكلمنا يالتفصيل قبل كده عن كل حاجه محتاج تعرفها قبل حجز اقامتك و انت مسافر ..  فخلينا الأول نبدأ بموقع بوكنج booking.com , هنلاقي عليه مختلف الأقامات و الأسعار , فمثلا لو بتحب الأقامة في هوستل هتلاقي أختيارات كتير متوسط الأسعار لسرير في هوستل في الفترة اللي أخترناها من 1 أكتوبر ل 7 أكتوبر حوالي 1000 جنية .

هوستل بوكنج

 

أما لو مبتحبش الهوستل و عايز غرفة لوحدك فهتلاقي برضه اختيارات كتير رخيصة , ده مثال مثلا لسعر غرفة في فندق متوسط في نفس الفترة بحوالي 2800 جنية .

فنادق بوكنج

 

أما لو حابب تأجر شقة لوحدك , فالحل في Airbnb , و دي من الطرق المفضلة ليا في الأقامة بسبب الأسعار الكويسة اللي ممكن تلاقيها

 

في المثال ده لقيت شقة مثلا في أسطنبول صغيرة في مكان كويس في الفترة اللي اخترناها ب 130 $ أو ما يعادل 2160 جنية .

Airbnb

 

لو لسة معملتش حساب ل Airbnb , تقدر تشترك من اللينك ده , و هتاخد عن طريقي 34 دولار مجانا تقدر تستخدمهم في حجوزاتك علي الموقع .

airbnb

 

أما بقي لو عايز تقعد مجانا , فيبقي علي و علي الكاوتش سيرفنج , و اتكلمت بالتفصيل عنه في كل اللي محتاج تعرفه عن موقع couchsurfing .

 

فخلينا نقول انك لو بنت و هتنزلي في هوستل في غرفة بنات بس أو ولد و هتنزل في غرفة مشتركة … الأقامة في الأسبوع هتكلفك 1000 جنية في أسطنبول .

 

 

4- المصاريف اليومية :

أكتر حاجه دايما بتحير الواحد لما ييجي يخطط للسفر , انا هصرف كام هناك؟ أو هاخد معايا فلوس أد ايه ؟؟

أنا انهارده هقولك علي موقعين مهمين جدا هيخلوك تاخد فكرة عن مصاريفك اللي هناك هتبقي اد ايه , الأولاني هو موقع Numbeo و ده بتعمل بحث عليه علي أي مدينة في العالم و هيقولك أسعار السلع و المنتجات فيه , و ده هيديلك فكرة علي أسعار الحياة العادية في البلد اللي هتزورها …

تاني موقع هو Budget your trip , , و ده برضه بتعمل بحث علي المدينة اللي هتزورها و هتختار ستايل سفرك (ميزانية قليلة – متوسطة – عالية) و هو هيقولك متوسط الميزانية اللي محتاجها في اليوم أو الأسبوع أو الشهر في البلد دي …

ازاي تسافر ب 10000 جنية

 

أنا اخترت الميزانية المتوسطة , فالموقع حدد في الأسبوع محتاجين 1320 ليرة تركية أو ما يعادل 3800 جنية 

 

 

يبقي لو هنجمع أجمالي مصاريف الرحلة : 3500 + 1000 + 2800 = 7300

قول مثلا هتحتاج فلوس للمزارات أو لسوفينيرز أو أي سبب أخر = 2700

يبقي الأجمالي 10000

 

 

خلينا نتكلم علي شوية ملحوظات مهمة جدا :

 

1- الأسعار اللي ذكرتها للمثال ده كلها بتاريخ كتابة المقالة .

2- فيه أسعار أرخص زي مثلا في تذكرة لسويسرا من شرم الشيخ أو الغردقة علي طيران أيزي جيت تمنها حوالي 1900 جنية فقط … لكن أنا اخترت تركيا لسهولة فيزتها , بس لو معاك فيزا شنجن ممكن تلاقي تذاكر رخيصة لأوروبا .

3- أوعي أوعي أوعي متقراش كويس أوووي عن البلد اللي هتزورها في مواقع زي TripAdvisor أو  google Trips .

4- أحيانا لو هتسافر مع مجموعة من أصحابك ممكن توفر أكتر لأن لو حجزتوا مثلا شقة من Airbnb هتلاقي الفلوس هتتقسم عليكو و التكلفة هتقل … إلخ .

5- المقالة دي مجرد مثال , تقدر تعمل بحث عن أي شهر في شهور السنة , و كذلك من أي بلد , لو انت تونسي أو مغربي أو جزائري جرب تبحث من سكاي سكانر هتلاقي تذاكر رخيصة جدا لأوروبا , أو لو أنت عراقي أو خليجي هتلاقي تذاكر رخيصة جدا لتركيا أو لبنان … إلخ , اعمل بحث في الشهور اللي بعيد عن المواسم و هتلاقي أسعار تحفة .

6- دايما خد قرار السفر من بدري , عشان تعرف ازاي تسافر ب 10000 جنية لازم تكون مخطط من قبلها بفترة مناسبة , مينفعش تكون عايز تسافر الشهر الجاي مثلا و تلاقي سعر رخيص .

 

 

لو عندك أي أقتراحات تحب نضيفها للمقالة , أو لو عندك أي سؤال , شاركني بيه في الكومنتات أو صفحات التواصل الأجتماعي …

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.