السفر في شهر العسل
Advices نصائح Planning تخطيط

السفر في شهر العسل … ازاي تخطط لرحلة العمر

on
يونيو 3, 2019

السفر في شهر العسل يعتبر أحسن حاجه ممكن يعملها العروسين في بداية حياتهم و اللي هتفضل في ذاكرتهم طول العمر .

السفر في شهر العسل كزوجين زيه زي سفرك لوحدك ممكن يبقي غالي جدا و ممكن يبقي رخيص جدا بناء علي حاجات كتبر هنتكلم عنها في المقالة دي , و ازاي انت و شريك حياتك تخططوا لرحلة العمر دي بحيث في النهاية تعملوا حاجه تفضلوا فاكرينها طول العمر …

السفر في شهر العسل حاجه خادعة جدا … اللي يسمع الكلمة دي يفتكر انها حاجه كيوت و سهلة , لكن ميعرفش ان التخطيط ليها مليان ستريس و عقبات , و لازم تكون عارف كويس انت بتعمل ايه علشان تقدر تخطط لشهر عسل بطريقة مثالية …

 

 

نصائح السفر في شهر العسل اللي هتخليك تخطط لرحلة العمر بكل سهولة :

 

في الدليل ده مش بس هقولك علي نصائح تعملها و انت بتخطط انت و شريك حياتك , أنا هقولك كمان علي جدول زمني تمشوا عليه بحيث ميكونش فيه أي مفاجآت غير سعيدة … ركز بقي معايا و ياللا نبدأ ..

 

 

1- اعرف ميزانيتك :

 

السفر في شهر العسل

 

دي أول حاجه لازم تحددها انت و شريكة حياتك و هي ميزانية شهر العسل , صدقني مش كل اللي بيسافر في ليلة العمر دي هو شخص غني .. لا إطلاقا , انا حواليا ناس كتير عرفت تحقق حلمها ده سواء حوشوا فترة أو عملوا فرح صغير بدل حجز قاعة كبيرة و سافروا , و فيه غيرهم لغي الفرح خالص و سافر شهر عسل رائع … الفكرة كلها تشوفوا انتو هتحددوا ميزانية أد ايه للسفر …

لما تيجي تخطط للميزانية , شوف الميزانية اللي هتقدر تدفعها ككل , غير كده بص برضه كل واحد فيكم هيحتاج مصاريف ايه للبنود دي :

 

  • الطيران .
  • الأقامة.
  • الأكل(فطار و غدا و عشا و سناكس و مشروبات).
  • المواصلات الداخلية(تنقلاتكم جوا المدن او بين المدن في الدولة اللي هتزوروها).
  • المزارات و الأنشطة اللي هتعملوها.
  • اي مصاريف تانية (شوبنج او هدايا …إلخ)

 

 

2- خططوا سوا :

 

السفر في شهر العسل

 

السفر في شهر العسل ده مشروع مشترك بين العروسين , يعني مينفعش تكون انت بتحب الطبيعة و الهدوء و عروستك بتحب المدينة و زحمتها فتخطط انت لوحدك و هي تحس ان الرحلة مش ممتعة بالنسبة ليها ..

التخطيط لرحلة العمر دي هتبقي اول مشروع ليكم انتو الأتنين بتعملوه سوا و بتخططوا ليه سوا , ازاي تاخدوا قرارات سوا و تنفذوها بطريقة مثالية ..

اقعدوا سوا و شوفوا كل واحد فيكو ايه رؤيته لرحلة شهر العسل , ايه اللي بتحبوه و ايه اللي مبتحبهوش , ايه البلاد المتاحة في حدود ميزانيتكم , ايه ميزاتها و عيوبها , و ابدأ بالتدريج التخطيط لرحلة العمر دي .

 

 

 

3- حطوا جدول زمني :

 

التخطيط لشهرالعسل

 

و دي أهم نقطة من نقط التخطيط , و سبب فشل أي رحلة شهر عسل و وجود مشاكل او ستريس في الرحلة هو عدم الألتزام بالجدول الزمني الخاص اللي هتحطه …

التخطيط الخاص ب السفر في شهر العسل لازم يبدأ من بدري , بحد أدني 6 شهور علي الأقل و يفضل يكون من قبل كده كمان , لو عايز شهر العسل الخاص بيك ينجح و يكون فعلا مثالي يبقي لازم تلتزم بالجدول الزمني ده …

هات ورقة و قلم بقي و اكتب ورايا …

 

 

6 شهور قبل السفر :

  • اقرأوا كتير أوووي عن الأختيارات اللي قدامكم من مصادر مختلفة سواء اونلاين او من الناس اللي حواليكو و تجاربهم لو سافروا شهر عسل .
  • حددوا ميزانية السفر بتاعكوا .
  • اختاروا الوجهة اللي هتسافرولها , و حاول دايما تختار الأماكن اللي مبيروحهاش سياح كتير و اللي تنفع لشهر العسل ,  اتكلمت قبل كده عن تشيرالي .. جوهرة تركيا المخفية , دي مثال لقرية صغيرة ساحرة في تركيا تنفع شهر عسل … دايما لما تقعدو تخططوا سوا لدولة معينه , حاولوا دايما تشوفوا المدن الصغيرة اللي تنفع شهر عسل و تتمتع بالخصوصية و في نفس الوقت جميلة .. نصيحة اتصفح منتديات Tripadvisor في القسم الخاص للدولة اللي بتدور فيها , صدقني هتلاقي معلومات و ووجهات عمرك ما سمعت عنها قبل كده جوا الدولة دي ..

 

 

3 شهور قبل السفر :

 

 

شهر واحد قبل السفر :

  • اتأكد تاني من كل حجوزاتك سواء الطيران او الأقامة , حاول تتواصل مع الفنادق و اتأكد ان الحجز قائم علشان متتفاجئش.
  • ابدأ خطط للجولات السياحية أو الأنشطة اللي ناويين تعملوها في شهر العسل و شوف لو ينفع تحجزهم اونلاين .
  • اشتروا اي حاجه هتحتاجوها معاكوا في السفر .

 

 

اسبوع قبل السفر :

  • اعمل نسخ ضوئية من باسبورك و كروت الفيزا و حجوزات الطيران و الفنادق و أي مستند مهم له علاقة برحلتك.
  • شوف لو محتاج تغير فلوس لدولار أو يورو أو لعملة البلد اللي هستافرولها.
  • جهز الأدوية اللي ممكن تحتاجوها  و انتو مسافرين
  • اكتب قايمة بالحاجات اللي هتاخدوها معاكو في الشنطة علشان متتلخبطش قبل السفر .

 

صدقني لو ألتزمتوا بالجدول الزمني ده , هتلاقي التخطيط لشهر العسل هتيم بكل سلاسة و كفاءة .

 

 

 

4- قارنوا بين الأسعار و العروض :

 

السفر في شهر العسل

 

علشان تجربة السفر في شهر العسل تنجح , لازم تضمن انك تكون حجزت أحسن حاجه بأحسن سعر , و ده مش هييجي غير بأنك تقارن الأسعار علي المواقع المختلفة و تشوف ايه الأحسن ليك و لميزانيتك ..

و لما تيجي تقارن و تحجز دايما خلي بالك من النقط دي :

  • ايه البلاد اللي بتفكروا فيها .
  • هتسافروا للبلد دي في الصيف وللا الشتا .
  • الطقس هناك هيبقي عامل ازاي ؟ .
  • هتاكلوا ايه و انتو هناك .
  • ايه الأنشطة و الجولات المشهورة في البلد اللي هتزوروها.

 

و نصيحة مهمة : لما تيجي تحجز طيران أو فنادق  أو اي حاجه , دايما اذكر للي بتحجز منه أنكم مسافرين لقضاء شهر العسل … أوقات كتير شركات الطيران أو الفنادق بيعملوا خصومات أو Upgrades مجانية ليكو , علشان كده مش هتخسر حاجه لما تقول ده ..

 

 

5- اختار أقامتك صح :

 

الأقامة

 

لما تيجي تحجز الأقامة … دايما لازم تحط في بالك كذا نقطة :

  • مكانها يكون كويس و تكون في وسط المزارات المهمة اللي ناوي تروحها .
  • شكل الغرف , و الفيوهات من الغرفة .
  • الفطار أو الأكل بصفة عامة يكون مستواه كويس . و هل فيه مطاعم قريبة من الفندق أو لأ.
  •  المزايا اللي بيقدمها الفندق أو الريزورت زي الجاكوزي او حمام سباحة.
  • هل المكان بيقدم عروض أو هدايا مجانية للعروسين في شهر العسل وللا لأ .

 

طبعا الحاجات دي لازم تهتم بيها أثناء تخطيط السفر في شهر العسل , لو كنت مسافر لوحدك أو مسافر مع شريك حياتك في وقت تاني مش هتهتم بالتفاصيل دي كلها , انما رحلة العمر دي لازم كل حاجه فيها تكون مميزة .

 

 

6- تحضير الشنط :

الشنط

 

أكتر حاجه ممكن تخلي السفرية عذاب هي لما تلاقوا نفسكوا ماشيين بدولاب اللبس كله معاكو , افتكروا دايما انكم رايحين تستمتعوا , ملوش أي لازمة تاخدوا معاكو لبس كتييير لأنكم فعلا هتتعذبوا في التنقل بالشنط التقيلة دي , و كلامي ده موجه أكتر للبنات لأن أغلبية البنات بيكونوا عايزين يلبسوا حاجه مختلفة في كل يوم ده غير الميك اب و ال Accessories و كل الكلام ده  😀 .. صدقيني لما تمشي خفيفة هتستمتعوا أكتر .

 

 

 

7-اعمل لشريكة حياتك مفاجأة:

 

السفر في شهر العسل

 

خلصتوا تخطيط سوا ؟ حجزتوا كل حاجه و كله تمام؟ حاول بقي تعمل لشريكتك مفاجأة تفاجأها بيها و انتو هناك , احجز مثلا عشا رومانسي ساعة الغروب علي الشاطئ , فاجأها برحلة بحرية مثلا أو اي نشاط من الأنشطة الرومانسية اللي ممكن تتعمل في البلد اللي هتسافرولها … صدقني هتبقي ذكري مميزة مش هتنسوها ابدا …

 

 

سافرت شهر العسل بتاعك قبل كده؟ عندك اي نصائح حابب نضيفها ؟ عندك أي سؤال ؟ شاركنا بيه في الكومنتات أو علي صفحات التواصل الأجتماعي …

 

 

 

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.