وجهات Destinations

7 حاجات لازم تعرفها عن حديقة بحيرات بليتفيتسا Plitvice Lakes بكرواتيا

on
ديسمبر 25, 2018

بتفكر تسافر كرواتيا؟ او تعرف حد لسه راجع من كرواتيا و حكالك عن حديقة بحيرات بليتفيتسا plitvice lakes الرائعة ؟ سبب من أهم اسباب زيارة البلد الجميلة كرواتيا هي حديقة بحيرات بليتفيتسا , في المقالة دي هنتكلم عن 7 حاجات لازم تبقي عارفهم عن حديقة بحيرات بليتفيتسا  و انت بتخطط رحلتك لكرواتيا  ده طبعا بجانب الحاجات الأساسية اللي اتكلمنا فيها قبل كده عن كرواتيا

 

1-ليه لازم تزور حديقة بحيرات بليتفيتسا Plitvice lakes ؟

 

حديقة بحيرات بليتفيتسا

 

حديقة بحيرات بليتفيتسا هي حديقة طبيعية مكونة من 11 بحيره , الحديقة هي منطقة من مناطق التراث لليونسكو و ده بسبب المناظر الطبيعية اللي ملهاش مثيل في حتة تانية , و الشلالات و المياه التركوازية الصافية و الغابات …

تاني سبب انها بتقع في وسط كرواتيا حوالي ساعتين بالعربية من زغرب العاصمة , يعني سهل توصلها لو كنت في زغرب او في مدينة سبليت .

لازم تزور الحديقة لانها مختلفة عن بقية كرواتيا , زي ما اتكلمنا قبل كده قلنا ان كرواتيا مدنها مختلفة , زي ما هتلاقي التاريخ و العراقة , هتلاقي الحياة الليلية و الكافيهات , زي ما هتلاقي المدن الساحلية و الشواطئ , الحديقة دي هتلاقي فيها الطبيعة و الهدوء بعيد ان جو المدن .

 

2-ايه احسن وقت ازور فيه الحديقة ؟

الحديقة لها رونقها في كل فصول السنة , كل فصل شكلها بيختلف , في الصيف و الربيع الحديقة بتكون خضراء و البحيرات تركوازية و صافية , في الخريف الشجر بياخد المظهر الخريفي و بتقع أوراق الشجر , في الشتاء بتتحول الحديقة للون الأبيض بسب التلج , او في اوائل او اواخر الشتا بيكون في امطار و رائحة المطر المميز …

 

الحديقة في الشتاء photo by Guido.Menato

 

بس خلي بالك في الموسم السياحي في الصيف الحديقة بتكون زحمة جدا و طوابير علي شباك التذاكر او حتي في الممرات اللي جوه , علشان كده في وجهة نظري احسن وقت هو في الربيع من شهر مارس لمايو , او الخريف من شهر سبتمبر لنوفمبر … هتستمتع بالحديقة من غير زحمة ..

 

الحديقة في الخريف photo by Mopemedia

 

 

3-ازاي اوصل لحديقة بحيرات بليتفيتسا ؟

الحديقة بتقع في وسط كرواتيا حوالي 130 كم من زغرب العاصمة . قدامك 3 حاجات تقدر تروح بيهم للحديقة :

 

-تأجر سيارة :

و دي في حد ذاتها جزء من المتعة , الطريق بياخد ساعتين من زغرب … القيادة في كرواتيا ممتعة جدا , و تعتبر من أسهل البلاد اللي جربت اسوق فيها عربية , لو انت نازل في زغرب او سبليت تقدر تأجر عربية تروح بيها الحديقة و ترجع , انا عملت كده لما كنت في مدينة سبليت .

نصيحة في كرواتيا لما تيجي تأجر سيارة , اختار المكاتب المحلية مش الشركات الكبيرة الدولية , هتلاقي سعر افضل و معاملة كويسة .

معظم بلادنا العربية رخصة القيادة مكتوب فيها اسم الشخص بالحروف اللاتينية , فمش محتاج تطلع رخصة دولية تقدر تسوق عادي برخصتك الأصلية , لو رخصتك مكتوب فيها اسمك بالعربي فقط , فمحتاج تطلع رخصة قيادة دولية قبل السفر .

طريق A1 بين زغرب و سبليت , هتسوق عليه و انت رايح الحديقة , من أمتع الطريق اللي ممكن تسوق عليها

 

-المواصلات العامة :

فيه اتوبيسات بتطلع بصورة منتظمة من زغرب و معظم مدن كرواتيا الرئيسة من و إلي الحديقة , اتوبيسات كرواتيا معظمها كويسة جدا و الخدمة فيها رائعة , لو عايز تشوف المواعيد المظبوطة للأتوبيسات او تحجز شوف الموقع الرسمي لمحطة اتوبيسات زغرب .

 

-رحلة سياحية تبع شركة سياحة:

تالت طريقة هي انك تحجز رحلة سياحية مع شركة سياحة في زغرب او سبليت , فيه شركات كتير بتعمل رحلات يوم واحد للحديقة , و ساعتها هما هيبقوا مسئولين عن الاتوبيس اللي هيوصلك و تذاكر الدخول و كل حاجه .

 

حديقة بحيرات بليتفيتسا

 

 

 

4-أسعار تذاكر دخول الحديقة :

أسعار التذاكر بتختلف باختلاف الموسم  , يعني مثلا في موسم الصيف التذكرة بتوصل تمنها ل 250 كونا (حوالي 33 يورو بتارخ كتابة المقالة) و في الشتا تمنها بيكون حوالي 55 كونا (7.5 يورو بتاريخ كتابة المقالة) , و طبعا الأطفال تحت ال 7 سنين بيدخلوا مجانا

 

لو حبيت تشوف اخر الأسعار ادخل علي الموقع الرسمي للحديقة فيه اخر التحديثات .

 

التذكرة شاملة دخولك للحديقة و شاملة القارب ferry و القطر اللي هينقلوك من مكان لمكان داخل الحديقة .

 

5-هتقعد اد ايه في الحديقة ؟

معظم الناس بتزور حديقة بحيرات بليتفيتسا يوم واحد , يعني تحاول توصل بدري و تشوفها و تتمشي فيها و ترجع اخر اليوم .

حديقة بحيرات بليتفيتسا passport trails

 

فيه ناس تانيه حابه متكونش مستعجلة و تاخد وقتها و تستمتع بهدوء الطبيعة و منظر البحيرات و الشلالات … فبيفضلوا يباتوا يوم في فندق قريب بحيث تكون الرحلة علي يومين

طبعا الأختيار ليك حسب رغبتك , بالنسبالي كان يوم كافي جدا خصوصا لو هتروح من بدري .

 

6-تقعد فين في الحديقة؟

فيه فنادق كتير داخل و حوالين الحديقة , بيتراوح اسعارهم بداية من 40 دولار لغاية فوق 100 دولار بناء علي الفندق و قربه او بعده عن الحديقة , فيه حوالي 80 فندق حوالين المنطقة تقدر تختار منهم بناء علي ميزانيتك و تقييمهم ..

 

Booking.com

 

7-خريطة الحديقة مهمة جدا :

 

خريطة حديقة بحيرات بليتفيتسا

 

جوه الحديقة هتلاقي عشرات من المسارات اللي بتمشي فيها وسط الغابات و الشلالات و البحيرات , فلازم يكون معاك خريطة للحديقة علشان تقدر توصل لأفضل الأماكن فيها من غير ما تتوه , هيدوك خريطة مجانية لما تيجي تشتري تذكرة الدخول , بس نصيحة اشتري من هناك خريطة تانية هتلاقيها بتتباع هناك لأنها اوضح بكتير.

ده غير ان الموقع الرسمي للحديقة بيشرح كويس اوي المسارات بتاعة الخريطة , حاول تشوفها قبل ما تروح.

 

 

 

في الاخر عايز اقول شوية نصائح تخلي بالك منها لو هتروح الحديقة:

 

photo by Travis Wiens

 

-حاول تروح بدري علشان تتفادي الزحمة , الزحمة بتبدأ تخف بالتدريج من بعد الساعة 3 مساء.

-حاول يكون الحذاء بتاعك مريح في المشي , لانك هتتمشي كتير في مسارات الحديقة.

-فيه ناس بتكون مسافره من زغرب لسبليت و بتعدي في النص علي الحديقة تشوفها , فلو مسافر بالأتوبيس و معاك شنط , تقدر تسيبهم في خزنة للشنط مخصوصة في الحديقة مجانا . بشرط انك تكون بدري لأن عدد الخزن محدود .

-السباحة في البحيرات ممنوعة بتاتا.

-لو حبيت تأجر قارب صغير , ممكن بحوالي 50 كونا في الساعة .

 

 

دي كل المعلومات اللي محتاج تعرفها عن حديقة بحيرات بليتفيتسا …

قررت تزور الحديقة؟ زرتها و عندك معلومات حابب تشاركنا بيها؟ شاركنا بيها في الكومنتات او صفحات التواصل الأجتماعي و هنضيفها للمقالة ..

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.