Advices نصائح

دليلك الكامل لتخطيط السفر لآيسلندا … ايه اللي تعمله و ايه اللي متعملوش

on
مارس 1, 2019

السفر لآيسلندا حلم لناس كتير , اتكلمنا قبل كده عن 10 اسباب تخليك لازم تزور آيسلندا  , بس آيسلندا مش من الدول السهلة بالنسبة للتخطيط للسفر ليها , ده بسبب الكنوز اللي فيها من الطبيعة و البراكين و الشلالات و الحياة البرية و المناظر الطبيعية الخلابة , و ده اللي خلاها من أحلي الوجهات السياحية للسياح في العالم .

 

 

آيسلندا زي ما هي جنة و تعتبر من أأمن دول العالم من حيث الجريمة او الأستقرار السياسي , إلا انها لازلت خطره جدا لو مش عارف انت بتعمل ايه , و ده بسبب الحياة البرية او احيانا الطقس و العواصف او المرتفعات العالية ..

سجلت حالات وفاة او اصابات كتير لسياح قبل كده بسبب حوادث , بس ده مش معناه ان السفر لآيسلندا خطر أو انك مش هتعرف تخطط سفرية آمنه للبلد اللي بعتبرها جنة علي الأرض

علشان كده انهارده هقولك علي نصايح و حاجات لازم تعملها و حاجات تانية لازم تتفاداها علشان تستمتع برحلتك لأرض الجليد و النار …

 

حاجات لازم تعملها قبل السفر لآيسلندا :

 

-خطط تزورها بعيد عن الموسم :

الموسم السياحي في آيسلندا هو ما بين يونيو لأغسطس , شهور الصيف دايما بتكون البلد زحمة بالسياح , علشان كده حاول تزورها في الشهور الفاضية علشان تعرف تستمتع , لو بتحب الشتا زيي و عايز تشوف آيسلندا في ثوبها الأبيض و تحس فعلا انك في Wonderland , يبقي هتحبها جدا في الشتا ..

 

 

 

السفر لآيسلندا

 

احسن وقت هو في الخريف في سبتمبر مثلا او في شهور الربيع زي مارس و ابريل , هتستمتع جدا بيها و حتي الأسعار هتكون ارخص.

 

-حوش كويس :

ايسلندا من الدول الغالية , زيها زي معظم الدول الأسكندنافية , مش معني انها غالية تبقي مستحيلة , بس كل ما تستعدلها ماديا كل ما هتبقي مرتاح و مش هتشيل هم و انت هناك ..

 

-قبل السفر لآيسلندا اقرأ عنها و ادرسها كويس :

قبل السفر لآيسلندا لازم تكون مذاكرها كويس , آيسلندا غير أي دولة من حيث التخطيط , و ده لانها فعلا مختلفة , هتحس ده أوي من أول ما تنزل من الطيارة  , يمكن من البلاد النادرة أوي اللي مفيش حد زارها و موقعش في حبها .. بس لازم تقرأ عنها كويس جدا و تكون عارف هتعمل ايه …

 

-فكر في تأجير سيارة :

 

دي أحسن طريقة تستكشف بيها آيسلندا خصوصا لو بتعرف تسوق , تأجير العربية أرخص طريقة تتنقل بيها في آيسلندا خصوصا لو كنتوا اصحاب او عيلة , ده غير ان لما يكون معاك عربية هتبقي حر في تحركاتك .

أنا لما كنت هناك أجرت عربية 4×4 , و دي هتحتاجها خصوصا في الشتا , و في بعض طرق مينفعش تسوق عليها إلا بعربية دفع رباعي ..

 

 

معظم رخصات القيادة في الدول العربية ممكن تسوقوا بيها في آيسلندا , مواطني بعض الدول زي مصر لازم يطلعوا رخصة قيادة دولية من نادي السيارات في شارع طلعت حرب في القاهرة , بتطلع و انت واقف بكل سهولة و بتكون لمدة سنة , في بقية البلاد لازم تتأكد انك ممكن تسوق عادي برخصة قيادتك وللا لأ قبل ما تسافر.

فيه شركات كتير عالمية و محلية لتأجير السيارات في آيسلندا , بس نصيحتي دايما دور علي الشركات المحلية المحترمة لأنك هتلاقي اسعارها كويسة ..

أنا شخصيا أجرت عربية من شركة CarsIceland بعد ما لقيتها واخده تقييمات عالية , و بالفعل كانوا قمة في الأحترام و تم الموضوع بكل سلاسة و سهولة … علشان كده قبل ما تأجر عربية اقرأ التقييمات كويس.

 

-أحجز إقامتك من بدري :

حاول دايما تحجز اقامتك من بدري خصوصا لو هتسافر في شهور الصيف لأن معظم أماكن الأقامة بتتحجز في ثانية , ده غير أن الأسعار بتبقي نار ..

Airbnb انا بفضله في آيسلندا لأنك هتلاقي كبائن و بيوت في أماكن روعة ممكن تأجرها و بأسعار روعة , لو لسه معملتش حساب علي Airbnb تقدر تسجل من اللينك ده  و هتحصل عن طريقي علي 25 دولار كريدت تقدر تسخدمهم في أول حجز ليك علي الموقع في أي مكان حول العالم .

 

Booking  برضه عليه غالبا من أول الفنادق الخمس نجوم لغاية اوضه في مزرعة في the middle of Nowhere  😀  , هتلاقي كل أكيد اقامة تناسب ميزانيتك

و بصراحة لو كنت Backpacker زيي مينفعش تروح ريكيافيك من غير ما تجرب تنزل في Galaxy pod Hostel بسبب انه فعلا فريد من نوعه , و كنا اتكلمنا عنه في موضوع ازاي تختار الهوستل المثالي

 

أهم حاجه قبل السفر لآيسلندا بفترة لازم تكون حاجز إقامتك من بدري ..

 

-متنساش الحاجات الأساسية اللي هتحتاجها في آيسلندا :

فيه حاجات كتير هتحتاجها في آيسلندا سواء هتسافر في الصيف او الشتا هتحتاج طبقات كتير من اللبس , جاكيت ضد الرياح و المياه , بوت ضد المياه و التلج , و حاجات كتير هخلي ليها مقالة منفصلة نتكلم عنها بالتفصيل ..

الآيسلنديين عندهم مقولة شهيرة “مفيش حاجه اسمها طقس سئ , انما فيه حاجه اسمها لبس غلط” , علشان كده لازم كل لبسك يكون مضاد للمياه و ضد الرياح و خصوصا في الشتا ..

-لازم يكون معاك كريدت او ديبت كارد بشريحة و pin :

ده لأن معظم محطات البنزين انت بتحط بنزين لنفسك و بتدفع بنفسك في مكنة البنزين بالكارد بتاعك , ده غير ان آيسلاندا التعامل فيها كله بالكروت الأئتمانية شبه محدش بيستخدم الكاش , علشان كده متشيلش هم الكاش خالص لأنك شبه مش هتستخدمه غير في التواليتات العامة علي سبيل المثال.

 

-اقرأ موقع safetravel.is كويس أوي :

الموقع بيديلك نصائح عن ازاي تكون بأمان أثناء السفر لآيسلندا , مش بس كده , انت ممكن تسجل عليه بياناتك و تديلهم خط سيرك جوا آيسلندا و هما هيتابعوك و يتدخلوا لا قدر الله لو موصلتش وجهتك اللي رايحها .

 

و كمان فيه ابليكيشن للموقع بينزل علي الموبايل اسمه 112Iceland  اللي بيتيحلك في ضغطة زرار تكون عندك فرق الأنقاذ . البرنامج لازم يكون عندك علي موبايلك.

 

 

حاجات لازم تعملها لما توصل آيسلندا :

 

-توقع التغييرات المفاجأه في خططك :

أنا من النوع اللي بحب أخطط كويس اوي لأي سفرية و مبحبش أغير في خططي , بس ده مينفعش في آيسلندا , ده لأن آيسلندا زي ما قلنا مختلفة , ممكن فجأه تقوم عاصفة ثلجية تخليك متعرفش تسوق , و تضطر تغير خططك و تعمل حاجه تانية غير اللي مخططها علشان كده لازم تكون مرن.

 

-اشرب عادي من مية الحنفية:

مش محتاج تشتري ميه معدنية طول ما انت هناك , المياه في آيسلندا من أنقي المياه في العالم , علشان كده اشرب و انت مطمن .

 

-ادخل علي موقع Road.is كل يوم قبل ما تتحرك:

 

الموقع ده بيقولك أخبار الطرق بشكل لحظي في كل أنحاء آيسلندا , لازم تشوفوا كل يوم قبل ما تتحرك لأن خصوصا في الشتا في طريق كتير بتتقفل , فأثناء السفر لآيسلندا لازم تتابعه باستمرار .

 

-دور علي أنوار الشفق القطبي:

ده كان من الأسباب الرئيسية اني ازور آيسلندا , الأورورا او الشفق القطبي تقدر تشوفه من شهر سبتمبر لغاية شهر أبريل , طبعا بيكون افضل في شهور الشتا .

 

 

ا

لأورورا علشان تشوفها لازم تكون السما صافية , علشان كده بتظهر عشوائيا في أماكن معينه , احسن موقع تقدر تعرف الأورورا هتظهر فين و انت هناك علشان تطاردها هو موقع vedur.is , الموقع مفيد جدا و بيديك التوقعات اليومية لأماكن ظهور أنوار الشفق القطبي.

 

-لف حوالين ال Ring Road أو ال Golden Circle :

آيسلندا عباره عن جزيره كبيره بيلف حواليها طريق دائري Ring Road لو معاك عربية و معاك علي الأقل 10 أيام و الجو يسمح يبقي لازم تلف حوالين الطريق الدائري ده و صدقني هتبقي رحلة عمرك ما هتنساها ..

 

 

أما لو أيامك أقل أو الطقس مش مناسب , يبقي تخليك في الساحل الجنوبي , و تلف حوالين طريق ال Golden Circle  و ده طريق دائري في جنوب آيسلندا طوله حوالي 300 كم , فيه حاجات كتير هتشوفها بس أهمهم شلالات Gullfoss , و منطقة ينابيع Haukadalur الساخنة , كذلك حديقة  Thingviller الوطنية و اللي تعتبر منطقة من مناطق اليونسكو للتراث.

 

-املأ بنزين لعربيتك كل ما تعدي علي بنزينة :

 

النصيحة دي أهم نصيحة تحطها قدام عينك أثناء السفر لآيسلندا و خصوصا لو هتأجر عربية , انت ممكن تلاقي بين أقرب مدينة ليك 30 او 50 كيلومتر مثلا علي الطريق السريع ..

حصلت معايا و انا سايق و قلت هحط بنزين في البنزينة اللي بعد كده , و فضلت سايق و العربية كان فاضل فيها بنزين يمشيني 10 كيلو بس , اضطريت أركن علي جنب الطريق ووقفت عربية حد آيسلندي دلني علي أقرب بنزينه في الطرق الفرعية خارج الطريق الرئيسي , لولاه كان زماني وقفت من غير بنزين و كانت هتبقي مشكلة , علشان كده كل ما تلاقي بنزينه ادخل فول عربيتك حتي لو كانت شبه كاملة ..

 

-اشتري خط موبايل اول ما تنزل المطار :

معظم دول العالم ممكن متحتاجش خط موبايل تشتريه , انما ضروري جدا تشتري خط يكون معاك أثناء السفر لآيسلندا , الخط ممكن تشتريه من المطار اول ما تنزل , و هيكون مفيد جدا لأنك هتحتاج انترنت يكون معاك سواء لل GPS أو لمتابعة المواقع الهامة اللي ذكرناها فوق , او التواصل مع الفنادق او اماكن الأقامة بتاعتك لو اضطريت تغير خططك .

 

-لو هتسوق لازم نور السيارة الأمامي يكون شغال طول الوقت حتي لو فيه شمس .

 

-ادخل التواليت كل ما يقابلك واحد :

نفس اللي قلناه علي البنزين هقوله علي التواليت , الأستراحات اللي علي الطريق مش كتير و انك تلاقي تواليت مش سهل , علشان كده ادخل التواليت في أي مره تشوف واحد و انت ماشي .

 

-تفاعل من الخيول البرية :

 

طول ما انت سايق هتلاقي علي جانبي الطريق اسراب من الخيول البرية , هتلاقي نفسك لا إراديا بتركن العربية و بتنزل تتأمل في جمالهم و تتصور معاهم , الحصان الآيسلندي ودود أوي , تجربة حلوة أوي لما تتفاعل معاه و تتصور معاه , ده غير ان فيه مزارع في آيسلندا بتتيحلك انك تجرب تركب الحصان و دي تجربة حميلة أوي .

 

-حاول دايما تاخد معاك اكل و سناكس و عصير من اي سوبرماركت قبل ما تبدأ اي رحلة :

لأن مش بسهولة ممكن تلاقي استراحات او اماكن لبيع اي اكل علي الطريق , علشان كده اعمل حسابك , الأكل في آيسلندا غالي , علشان كده في معظم السوبرماركت الكبيرة هتلاقي ساندويتشات و سناكس هتقضي الغرض اثناء رحلتك للمكان اللي رايح تزوره .

 

-لازم تجرب الشيكولاته بملح البحر الآيسلندي , تحفة 😀

 

-استرخي في واحده من الينابيع الساخنة :

هتلاقيهم في كل مكان حتي في اصغر البلدات , احساس حلو لما تجرب تعوم في ميه دافية وسط جو برد .

 

 

حاجات اوعي تعملها لما توصل آيسلندا :

 

-اوعي تستهون بالطقس :

الطقس الآيسلندي خصوصا في الشتا فعلا صعب , علشان كده دايما تابع المواقع اللي ذكرتها فوق علشان تعرف الطقس عامل ايه قبل ما تتحرك . ده غير انك تلبس كويس جدا كذا طبقة من اللبس قبل ما تتحرك .

 

-اوعي تفكر تسوق علي طرق F Roads من غير عربية دفع رباعي :

معظم طرق آيسلندا ممكن تسوق عليها بعربية عادية , لكن في كذا طريق بيطلق عليهم F Roads جوا آيسلندا ممنوع القيادة عليهم بعربية عادية متكونش 4×4 .

 

ده غير انه ممنوع تسوق عربيتك off-road لأن ده هيتلف الطبيعة و عليها غرامة كبيرة .

و برضه خلي بالك و انت سايق لان ساعات بيكون فيه خرفان او اي حيوانات بريه ماشية علي الطريق , و لو حصل و خبطت حيوان منهم بعربيتك متقلقش , بلغ البوليس عادي جدا و متخافش مش هيكون فيه اي غرامة .

 

-أوعي تتجاوز السرعات المقررة أثناء القيادة :

الموضوع ده مفيهوش هزار و خصوصا في الشتا , كانت السرعة 50 كيلو متر في الساعة , و الطريق كان مغطي بالجليد , لو فكرت تزود عن كده هتلاقي العربية بتلف حوالين نفسها ..

 

-أوعي تسوق في العواصف الجليدية :

حصلت معايا مره كنت في نص الطريق و هبت عاصفة جليدية حجبت عني الرؤية نهائيا و كنت حاسس بان العربية هتنقلب من قوة الرياح , كل اللي عملته اني ركنت علي جنب و استنيت تعدي العاصفة , كانت تجربة فعلا مرعبة .

 

-أوعي تقف في نص الطريق بعربيتك:

الطريق في آيسلندا مغري جدا لأن كل ما تبص يمين او شمال هتلاقي منظر يستاهل تنزل و تصوره , علشان كده لو حبيت تقف لازم تركن علي جنب الطريق في الأماكن الخاصة بالأنتظار , و اوعي تركن في نص الطريق لأن ده ممكن يؤدي لحوادث انت في غني عنها .

 

-مترميش زبالة في الطريق:

آيسلندا فعلا جنة و طبيعة بكر , فأرجوك حافظ علي الطبيعة .

 

-متمشيش علي التلج في بحيرة يوكولسارلون الثلجية :

التلج اللي فيها مش ثابت و المياه فيها متلجة , فمتحاولش تخاطر بنفسك .

 

-متقربش أوي من المرتفعات :

سياح كتير أوي وقعوا و اتصابوا بسبب وقوعهم من المرتفعات , علشان كده خليك دايم بعيد عن حدود المرتفعات و حافظ علي توازنك .

 

-أوعي تستعجل :

آيسلندا جنة بمعني الكلمة , علشان مده لازم تتأمل كل حاجه فيها , خد وقتك في استكشافها و استمتع بسحرها , لأنك مش هتلاقي ليها مثيل علي الكره الأرضية ..

السفر لآيسلندا

 

 

 

اتمني يكون الدليل ده ساعدك و اداك فكرة عن ازاي تبدأ تخطط السفر لآيسلندا , لو عنك اي سؤال أو حابب تشاركنا بتجربتك في آيسلندا , يا ريت تشاركنا في الكومنتات او صفحات السوشيال ميديا ..

 

 

 

 

 

 

TAGS
RELATED POSTS
محمد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.