تصريح السفر الالكتروني من أكتر الحاجات اللي بتسبب لخبطة لكتير من الشباب المصريين في سن التجنيد لما بيحب يسافر .
لخبطة مش بس لأن مش عارف يروح فين وللا يطلع التصريح منين , لكن كمان لخبطة لأنه مش عارف الفرق بين تصريح السفر و التصريح الأمني للسفر .
التصريح الأمني ده اتكلمنا علي بالتفصيل في مقالة فيزا تركيا و التصريح الأمني , و التصريح اﻷمني بيكون لكل الناس ذكور او اناث في سن معين عايزين يسافروا دول معينه .
أما تصريح السفر أو أذن السفر فده مطلوب فقط للشباب الذكور المصريين في سن التجنيد , و اللي لم يحصلوا علي اعفاء نهائي .
كان الأول بتضطر تروح ادارة التجنيد و التعبئة علشان تقدم علي اذن السفر ده قبل ما تسافر , دلوقتي أطلقت القوات المسلحة المصرية خدمة الكترونية جديدة علشان تقدر تقوم باستخراجه بكل سهولة لو كنت مطلوب او علي قوة التجنيد او للطلبة اللي لسه في سن التجنيد .
خطوات استخراج تصريح السفر الالكتروني من موقع ادارة التجنيد و التعبئة :
أولا هتدخل علي الصفحة المختصة اللي عملتها ادارة التجنيد و التعبئة , و هتتبع الخطوات التالية:
1-هتقوم بتسجيل طلب استخراج اذن السفر
2- هتقوم بملئ البيانات الأساسية زي (الأسم , الموقف من التجنيد , الرقم الثلاثي , الرقم العسكري , العنوان , الدولة اللي هتسافرلها , الغرض من السفر).
3-هتحدد مكان استلام التصريح : -( إدارة التجنيد والتعبئة بالحلمية بالقاهرة أو منطقة تجنيد القاهرة بالهايكستب ) أو (قسم تجنيد بمديرية أمن أي محافظة ).
4- هتراجع البيانات اللي كتبتها كويس , و بعدين تضغط علي (تسجيل البيانات) و تحتفظ برقم الطلب.
5- هيتم دراسة طلبك من المختصين في ادارة التجنيد و التعبئة و المناطق التابعة ليها في المحافظات , و يحددوا أحقيتك في الخدمة أو لأ.
6-تقدر تتابع طلبك و كمان تدفع الرسوم عن طريق الصفحة الخاصة بالاستعلام عن تصريح الأذن بالسفر , بعد ما تملي بياناتك الأساسية في الصفحة .
عادة بيكون الرد بأحدي الردود الأتية :
-لا مانع من استخراج تصريح السفر بعد سداد الرسوم ( رسوم تصريح السفر الالكتروني حوالي 60 جنيه).
-لا مانع من استخراجه بعد تقديم المستندات المطلوبة.
-برجاء التقدم لادارة التجنيد و التعبئة التابع لها لمراجعة موقفك و استخراج التصريح.
-برجاء التقدم لمنطقة التجنيد التابع لها لمراجعة موقفك و استخراج التصريح.
ملحوظة : تصريح بالإذن للسفر للطلبة اللي بيدرسوا جوا مصر والمؤجل تجنيدهم فى غير توقيتات الأجازة وذلك (لظروف إستثنائية) بيتم استخراجه من هيئة التنظيم والإدارة للقوات المسلحة .
هل يمكن استخراجه من المطار ؟
بعد ما تقوم بالطلب و دفع المصاريف المقررة , و بعد مراجعته و اصداره سيتم الأتي :
-النسخة الورقية هتكون متاحة في المكان اللي اخترته اثناء التسجيل لو حبيت تستلمها.
-هيتم ارسال نسخة الكترونية لأيميلك اللي سجلت بيه او علي الواتس اب علي رقم الموبايل اللي سجلت بيه و دول برضه بيغنوك عن استلام النسخة الورقية.
تصريح السفر الالكتروني كمان بيكون موجود علي سيستم الجوازات في الجمهورية , بالتالي هيكون أتوماتيك مع ظابط الجوازات و انت مسافر . و لكن احتياطي و زيادة اطمئنان يفضل ان يكون معاك النسخة الالكترونية علي إيميلك أو الواتساب بتاعك.
هل هو مطلوب لمن أدي الخدمة العسكرية او المعفي من التجنيد ؟
التصريح مطلوب فقط لمن هو في سن التجنيد أو المعفي مؤقتا من التجنيد . أما لو كنت في غير سن التجنيد أو معاك اعفاء نهائي فمش مطلوب منك التصريح.
دي كانت كل حاجه حابب تعرفها عن التصريح, لو عندك اي سؤال او استفسار متترددش تكتبلي في الكومنتات أو علي صفحات السوشيال ميديا الخاصة بالمدونة .