اسطنبول من أكتر مدن العالم اللي بيتكتب عنها في كل مدونات و مواقع السفر , و اللي زار اسطنبول هيعرف السبب .
ببساطة اسطنبول غير أي مدينة ممكن تشوفها , مدينة ليها مذاق خاص و فريد …
في المقالة دي هقولك علي كل حاجه هتحتاجها للسفر لاسطنبول أول مره …
ليه اسطنبول ؟
Photo Credits to Heyfa BhM
احنا كبشر مختلفين , كل واحد فينا ليه ذوقه في السفر , في مننا بيحب التاريخ , فيه بيحب الطبيعه و المناظر الخلابة , فيه مننا بيحب الزحمة و الناس , و فيه بيحب الأكل اللذيذ … اسطنبول من المدن القليلة في العالم اللي جمعت بين كل ده …
مش بس كده , اسطنبول من المدن اللي تعتبر رخيصه , تمتلك شبكة مواصلات ممتازه صعب أوي تتوه فيها حتي لو هتزورها اول مره …
بعد ما تقرأ الدليل ده هتعرف كويس ان اسطنبول تستاهل تكون من الدول اللي لازم تزورها يوما ما …
الفيزا :
-مواطني تونس و المغرب و الأردن و لبنان : تقدروا تدخلوا تركيا من غير فيزا , فقط ختم دخول من المطار .
-معظم الدول العربية (بما فيها مواطني مصر تحت 18 سنة او فوق 45 سنة ) : تقدروا تطلعوا فيزا الكترونية اونلاين
-المصريين (من 18 ل 45 سنة) :لازم حصول علي فيزا تركيا من مكتب التأشيرات المتعاقد مع السفارة التركية .
متطلبات الفيزا التركية تشبه كتير فيزا الشنجن من حيث الحساب البنكي و جواب ال HR من مكان العمل و غيرهم , ان شاء الله هنزل مقاله فيها كل ما يخص التأشيرة التركية + التصريح الأمني لان الموضوع فيه تفاصيل كتير .
تقعد فين في اسطنبول ؟
أسطنبول فيها أحياء كتير جدا , لكن فيه منطقتين رئيسيتين السياح بيفضلوا يقعدوا فيهم :
السلطان أحمد :
و دي المدينة القديمة , ده حي اسمه “فاتح” , المنطقة دي بتمتاز انها هادية جدا و فيها معظم الأماكن السياحية زي الجامع الأزرق و أيا صوفيا و قصر توبكابو و غيرهم كتير ….
منطقة بيوغلو (جالاتا):
من أشهر المناطق في اسطنبول بالنسبة للسياح , المنطقة دي فيها ميدان تقسيم الشهير و شارع الأستقلال و برج جالاتا …
فيه طبعا مناطق تانية زي شيشلي , بشكتاش و حتي الجانب الأسيوي , بس لو دي أول مره في اسطنبول خليك احسن في المنطقتين اللي فوق ….
الأقامة:
اسطنبول من المدن اللي ممكن تلاقي فيها فنادق أو شقق رخيصة جدااا … هديلك دلوقتي كذا سيناريو :
لازم تجرب ال couchsurfing زي ما بقول دايما , غير ان حد هيستضيفك مجانا … انك تشوف اسطنبول بعيون ابن البلد احسن مليون مره من انك تشوفها بعيون السائح.
طبعا الهوستل من الحاجات اللي لازم تجربها و خصوصا في اسطنبول , في هوستلات جميلة جدا و تقييماتها رائعة ده غير ان اسطنبول مدينة عالمية و هتقابل مسافرين زيك من كل العالم و هتسفيد منهم..
فيه اوبشن انك تأجر أوضه في بيت حد تبع برنامج AIRBNB , او انك تأجر استوديو او شقة لوحدك.
اخر اوبشن هو الفندق , و فيه فنادق كتييير رخيصة و تناسب كل الميزانيات , ادخل علي بوكنج و اعمل سيرش علي حسب ميزانيتك , بس نصيحة بلاش تحجز فندق التقييم بتاعه أقل من 8 , و نفس الكلام عن الهوستلز.
المواصلات :
اللي بيسافر كتير هيعرف ان شبكة المواصلات في اسطنبول من افضل شبكات المواصلات مقارنة بمدن كتير حول العالم …
ازاي تروح من المطار لوسط اسطنبول؟
فيه مطارين في اسطنبول:
مطار أتاتورك:
-بالتاكسي : و ده أغلي حاجه , من المطار لتقسيم بحوالي 55 ليره , و للسلطان أحمد يحوالي 70 ليرة .
-بالباصHAVABÜS: و ده بيطلع كل 30 دقيقة من المطار و تذكرته 11 ليره , و ده هيوصلك لغاية ميدان تقسيم , و لو عاوز تروح السلطان احمد من تقسيم ساعتها ممكن تاخد تاكسي ب 12 ليره , او تركب المترو F1 taksim/ kabatas , و بعدين تنزل و في نفس المحطة تاخد الترام من كبتاش لمحطة السلطان أحمد .
-بالمترو+الترام : و ده أول ما تطلع من المطار هتلاقي المترو قدامك , ده هيوديك لغاية ميدان تقسيم , و لو عاوز تروح للسلطان أحمد , فانزل في محطة أكسراي و خد منها الترام للسلطان أحمد .
مطار صبيحة جوكشين:
-بالتاكسي : طبعا غالي لأن المسافة كبيرة , حوالي 115 ليره لتقسيم , او 130 ليره للسلطان أحمد.
-بالباصHAVABÜS: بحوالي 14 ليره لتقسيم , و طبعا لو عايز تروح السلطان احمد يبقي هتعمل زي ما مكتوب فوق بالضبط تركب المترو F1 taksim/ kabatas , و بعدين تنزل و في نفس المحطة تاخد الترام من كبتاش لمحطة السلطان أحمد .
ده بالنسبة للانتقالات من المطار للمدينة و العكس … طب بالنسبة للمواصلات بصفة عامة ؟
اسطنبول زي ما قلت فيها شبكة مواصلات رائعة من مترو و اتوبيسات و ترام و معديات في البسفور و تاكسي …
أحلي اختراع اتعمل بقاله كام سنة هو كارد اسطنبول Istanbul Card , و ده لازم تشتريه من اي كشك او سوبرماركت او من اي محطة , تمنه 10 ليره و بيكون مشحون ب 4 ليره (يعني تمنه الفعلي 6 ليره) , و ده تقدر تركب بيه اي مواصله و بيديك خصومات بتوصل لاكتر من 50 % .
استخدامه سهل كل اللي بتعمله انك بتمشيه علي اجهزه بتقرأ الكارد عند مدخل كل محطة و بتخصم تمن التذكره منه , و طبعا بتشحنه وقت ما بتحتاج , اشحنه مثلا اول مره ب 20 ليره و بعد كده ابقي اشحنه لو احتجت و طبعا بتشحنه في ماكينات مخصصه موجوده في المحطات …
تاكل ايه في اسطنبول ؟
طبعا السؤال ده ساذج جدا ببساطة لأن اسطنبول انا بعتبرها عاصمة الأكل في العالم 😀
هتلاقي كمية مطاعم كتير جدا و المطبخ التركي بطبيعته غني جدا و متنوع , اكتر حاجه هتدمنها هي سندويتشات الدونير (الشاورما) , ده غير انواع المشويات او المعجنات التركية الكتير جدا …
انا شخصيا بعشق سندويتش سمك او بالتركي Balik Ekmek و ده تنزل في محطة أيمينونو علي البسفور و تتمشي خطوات لغاية ما توصل لكوبري جالاطا الشهير , تحت الكوبري هتلاقي محلات و مطاعم كتير بتعمل السندويتش اللذيذ ده , مينفعش تروح هناك من غير ما تجربة .
balik ekmek او سندويتش السمك المشهور
تحت كوبري جالاطا فيه مطاعم كتير بتقدم السندويتش ده و باسعار رخيصة
طبعا زي ما بقول دايما , حاول دايما تحجز هوستل او فندق يكون شامل الأفطار لأن ده هيوفرلك في الأكل , بس بصفة عامة متشيلش هم الأكل في تركيا لأن الأسعار مش غالية خصوصا لو مخطط صح.
تزور ايه في اسطنبول ؟
قصر توبكابو
اسطنبول من المدن الدسمة بالنسبة للاماكن اللي ممكن تزورها او الحاجات اللي ممكن تعملها , لو انت بتحب التاريخ و الأثار , فهتحب أوي منطقة السلطان أحمد , المنطقة دي فيها أماكن كتير هتحبها زي متحف ايا صوفيا , الجامع الأزرق , قصر توب كابو الشهير اللي لما هتدخله هتحس انك رجعت للتاريخ العثماني الفريد , بجوارهم متحف الأثار بجوار حديقة جولهانه اللي فيها اثار كتير من العصر الفرعوني و الروماني و الاف الاثار من حول العالم …
قصر توبكابو من الداخل
و طبعا مينفعش متزورش قصر دولمابهشه اللي بناه السلطان عبدالحميد و اللي كان مركز الحكم في اوائل القرن الماضي , القصر فريد من حيث المعمار او الغرف او الحديقة اللي في الخارج , و تقدر تشوف الغرفة اللي كان عايش فيها مصطفي كمال أتاتورك مؤسس الجمهورية التركية …
قصر دولمابهشه
طبعا من علامات اسطنبول هو شارع الأستقلال , الشارع المزدحم اللي مليان محلات و مطاعم و ناس , شارع حيوي جدا و لو كنت من هواة الشوبنج فهتدمن الشارع ده , الشارع ده مبينامش …
شارع الأستقلال
البازار المصري , و ده اتسمي بالأسم ده لانه اتبني سنة 1600 ميلاديه و كان بيتباع فيه البضائع اللي بتيجي من مصر عندما كانت تحت الحكم العثماني , هتلاقي في البازار ده أنواع كتييير من البهارات و الاعشاب , ده غير المعمار بتاعه اللي هيخليك ترجع بالتاريخ لمئات السنين.
و متنساش جولة البوسفور و دي لو نزلت لمحطة أيمينونو علي البوسفور هتلاقي مراكب كتير بتقدم الجولة دي بحوالي 12-25 ليره , علي حسب طول الجولة … و ممكن تاخد الفيري ferry للجانب الأسيوي و اللي هتلاقيه مختلف عن الجانب الأوروبي من اسطنبول و ليه طعم خاص …. و ممكن تاخد فيري برضه لجزر الأمراء و دي هنعرضها في مقالة لوحدها علشان ناخدها بالتفصيل …
طبعا فيه حاجات تانية كتير ممكن تتعمل في المدينة الرائعة دي , انصحك تدخل علي Tripadvisor و تقرأ اكتر عن الحاجات اللي ممكن تعملها في اسطنبول و هتختار الأنشطة اللي بتناسب اهتماماتك
بس اهم نصيحة هي انك لازم تعمل جولة مجانية free tour , كل اللي عليك انك تحجز مكانك في الجولة من موقع الشركة اللي بتعمل الجولة دي مجانا , و تقابل المجموعة غاليا بيكون قدام ايا صوفيا في منطقة السلطان احمد , و الجولة دي بتكون في حدود ساعتين بتعرفك معلومات قيمة جدا هتفيدك انك تعرف المدينة أكتر..
نيجي بقي لحاجه اخيره و دي للي عايز يشوف كل متاحف اسطنبول و يستفيد بخصومات كتير , فيه حاجه اسمها Istanbul pass , و دي بتكلفك حوالي 100-140 يورو (حوالي 2000 جنيه) و دي بتخليك تدخل معظم متحف اسطنبول + توصيل للمطار + تذكرة الاتوبيس المكشوف اللي بيخليك تشوف اسطنبول + انترنت مجاني معاك + جولات في البوسفور + حاجات تانية كتير كل ده لمدة 3-7 ايام حسب نوع حجزك , دي بتحجزها لو عايز تريح دماغك و كل حاجه تبقي متاحة , بس لو انت مخطط كويس و عارف هتزور ايه و هتعمل ايه , مش محتاجها و ادفع بس للحاجه اللي حابب تروحها …
هل اسطنبول أمان ؟
بالرغم من بعض التفجيرات القليلة اللي حصلت قبل كده في اسطنبول , إلا اني بعتبر اسطنبول من المدن الامان و اللي تعتبر سهلة بالنسبة للسائح , بعكس مدن تانية كتير او دول بصفة عامة مكانتش سهلة علي السائح انه يتنقل فيها او يتعامل فيها مع اهل البلد …
اهم حاجه دايما زي ما ذكرت في في مقالة 10 غلطات حاول تتفاداهم لو هتسافر اول مره هي انك بلاش تمشي بالباسبور بتاعك في الشارع , خلي دايما الباسبور في خزنة الفندق او الهوستل و امشي بس بصورة من الباسبور و الفيزا بتاعتك , و لو خارج خد بس جزء من الفلوس اللي هتكفيك في الخروجة دي و سيب بقية فلوسك في الخزنة في غرفة الفندق او الهوستل بتاعك …
ده غير ان فيه طرق للنصب موجوده في اسطنبول و دي هسردها بالتفصيل في مقالة منفرده …
دي كانت أهم الحاجات اللي محتاج تكون عارفها قبل السفر لاسطنبول , هيكون فيه مقالات لحاجات تانية بخصوص اسطنبول هنتكلم عنها بالتفصيل .
عجبتك المقالة ؟ زرت اسطنبول و عندك نصائح حابب نضيفها للمقالة ؟ شاركنا بيها في الكومنتات او علي صفحات المدونة علي السوشيال ميديا ..
