السفر بميزانية محدودة و هل اصلا ممكن اقدر اسافر في ظل الغلاء و ارتفاع الاسعار ؟؟ … حبيت اخلي الموضوع ده اول المواضيع اللي هتكلم فيها عن كيفية السفر بأقل الأسعار بعد فترة كبيرة من الانقطاع عن الكتابة في المدونة .
يمكن كتبت كذا مقالة قبل كده عن ازاي تحجز طيران او اقامة و ازاي تختار وجهتك السياحية . لكن بعد التعويم للجنيه و المشاكل السياسية و الاقتصادية في العالم بصفة عامة مؤخرا ، حبيت نرجع نتكلم في الموضوع ده ،
و هبينلك اد ايه بالرغم من كل الغلاء اللي موجود لسه تقدر تسافر بأقل الأسعار ، و ان السفر بميزانية محدودة مش حاجه مستحيلة ابدا.
– التخطيط المسبق :
لو كنت من الأشخاص اللي مبيحبوش التخطيط او من النوع اللي بتطق في دماغهم الفكرة ينفذوها ، يبقي اسمحلي اقولك انسي ده خالص الايام دي 😀 ، علشان السفر اليومين دول عايز تخطيط و تكتكة من قبلها بفترة كبيرة .
الأول حدد انت عاوز تسافر ليه .. ياتري هتتجوز قريب و عايز تخطط لشهر عسل ؟ وللا عاوز تسافر مع اصحابك يومين ؟ و للا رحالة زي حالاتي و بتحب تسافر لوحدك تنغمس جوه ثقافة البلد اللي هتزورها؟ …الخ
و بعد ما تحدد ده ، اسأل نفسك ، أنا هقدر احوش اد ايه للسفرية دي ؟ و هقدر ادفع كام في السفرية دي … انت ممكن تخطط سفرية ب ١٥٠٠٠ الف جنيه مثلا ، ، ممكن تخطط سفرية ب ٢٠٠ الف جنيه لو تحب … الفكرة كلها في هدفك و مقدرتك .
تاني حاجه بالنسبة للتخطيط و من رأيي اهم من الفلوس و هي ازاي تختار ميعاد السفر … لان انت لو هتسافر مثلا في شهر الصيف او في فترة الاعياد مثلا بميزانية معينة ،
فلو سافرت في توقيت بعيد عن الموسم ده تقدر تسافر بنص او حتي تلت الميزانية دي . و اللي سافروا كتير عارفين المعلومة دي كويس جدا
علشان كده حاول تظبط سفريتك في اوقات بعيدة عن المواسم و الاعياد ، هتلاقي الاسعار حرفيا بنص الثمن .
– السفر بميزانية محدودة يخليك تفكر في الوجهات الرخيصة :
بمعني انه مش منطقي لو ناوي تسافر بميزانية محدودة انك تختار وجهة بعيدة جدا تخليك تدفع كتير في تذاكر الطيران ليها ، او مثلا عملتها غالية او اسعار المعيشة فيها غالية .
مدينة شفشاون الساحرة بالمغرب
يعني مثلا خلينا نتكلم بطريقة عملية ، دول كتير تعتبر رخيصة للسياح زي تركيا ، المغرب ، تونس ، الهند ، جنوب شرق اسيا ، وجهات عديدة في افريقيا ، ألبانيا … الخ .
خليك دايما في البلاد اللي بتعتمد علي الطبيعة ، او البلاد اللي تعبر “ناشئة” في مجال السياحة ، هتلاقي ان الاسعار هتبقي رخيصة جدا فيها.
صدقني انت ممكن تستمتع في البلاد دي اكتر من دول الشنجن الغالية او امريكا …الخ .
انا يمكن في البلاد اللي زرتها اكتر البلاد القريبة لقلبي كانت الدول اللي مش مشهورة سياحيا ، و اكتر بلاد محبتهاش كانت البلاد المشهورة اوي سياحيا .
تاني حاجه هي انك فكر انك تزور الوجهات المحلية في بلدك اللي لسه مزورتهاش ، صدقني في اماكن في بلدك تحفة احسن بكتير من وجهات خارج بلدك و في نفس الوقت هتلاقيها رخيصة جدا بالنسبالك
مدينة طابا الجميلة ، مصر
. لو انت من مصر شوف ايه لسه مزورتوش ، هتستمتع اوي في دهب او راس شيطان او سيوة او مطروح او اسوان….
– اجمع معلومات عن الوجهة اللي هتروحها من قبل ما تروح :
من اكبر الغلطات اللي عملتها في اوائل المرات اللي سافرت فيها هو اني كنت مبجمعش معلومات كافية عن المكان اللي كنت بروحه ، مثلا اول مره سافرت لاسطنبول دخلت مطعم “سياحي” في منطقة السلطان احمد ،المطعم كان شبه فاضي و الاكل كان غالي جدا ووحش جداااا ،
انما لما جربت مطعم عادي عليه زحمة من المواطنين الاتراك اهل البلد ، اكتشفت ان الاكل كان تحفة و رخيص جدا.
موقع تحغة ممكن يساعدك في معرفة افضل المطاعم او الكافيهات المحلية او حتي افضل الاماكن السياحية في اي بلد هتزورها هو Trip Advisor ، و كمان هتشوف اراء اهل البلد و السياح اللي زاروا الاماكن دي.
حاجه كمان انا بحب اوي اعملها ، و هي انك دور علي الفعاليات المجانية اللي بتقام احيانا ، يعني مثلا في معظم دول اوروبا و بعض دول اسيا فيه شركات سياحية كتير بتنظم جولات سياحية مجانية ، مجرد انك تدفع بقشيش او tips للمرشد السياحي بعد الجولة و كمان بيكون الموضوع اختياريا.
برضه مشهور اوي في اوروبا موضوع ال Happy hour في المطاعم ، مثلا تلاقي مطعم محدد ساعة معينه في اليوم يكون في خصم كبير علي الأكل ،فده هيخليك توفر جدا في رحلتك.
– وفر في مصاريفك الأساسية :
يعني مثلا انسي انك تركب تاكسي مثلا لان في معظم دول العالم التاكسيات بتكون غالية جدا ، اركب دايما المواصلات اللي بيركبها اغلبية الشعب اللي عايش في الدولة اللي بتزورها.
مش بس ده هيخليك توفر ، لا كمان ده هيخليك تنغمس وسط ثقافة البلد اللي بتزورها دي و ده هيخلي رحلتك ممتعة جدا.
لما تيجي تحجز اقامة ، فكر تجرب هوستل لو كنت مسافر لوحدك ، هتلاقيها تجربة روووعة و هتتقابل مع مسافرين زيك من كل دول العالم. أما لو كنت مسافر مع عيلتك ، فعليك و علي Airbnb ، هتلاقي شقق او ستوديوهات رخيصة جدا .
اما لو كنت عايز تقيم ببلاش و كمان تتعرف علي البلد و تعمل اصدقاء ، فلازم تجرب الكاوتش سيرفنج ، بتكون تجربة روعة لاي مسافر.
لما تيجي تحب تحول فلوس لعملة البلد ، بلاش تحول من الصرافات اللي موجودة في المطار ، لان سعر الصرف بيكون غالي جدا ، يفضل تحول مبلغ صغير جدا يكفيك لغاية ما توصل وسط المدينة و حول من هناك ، هتلاقي سعر افضل لسعر صرف العملة اللي عايزها.
– دايما تابع العروض و الخصومات :
و انت بتخطط لسفريتك ، دايما دور علي العروض و الخصومات ، فمرة من المرات اللي سافرت فيها لقيت عرض علي تذكرة من ليتوانيا لاسبانيا (رحلة فوق ال ٣ ساعات) ثمنها ١٤ يورو بس علي شركة Ryan Air .
ده غير ان فيه تطبيقات كتير بتعمل عروض و خصومات تقدر تستفيد بيها في سفرك.
دي كانت نصايح بسيطة عن ازاي تسافر بميزانية محدودة و بأقل الأسعار ، و ان شاء الله المقالات الجاية هيكون فيها اسرار و معلومات كتير تهم اي حد بيحب السفر .
و افتكر دايما ان الأستمتاع بالسفر مش بالمصاريف الباهظة او الفنادق الخمس نجوم اطلاقا ، الاستمتاع بيكون بالتجارب الحقيقة و اللحظات الثمينة اللي هتقابلها و انت مسافر …