فيزا تركيا و التصريح الأمني

فيزا تركيا و التصريح الأمني للمصريين 2020… دليلك الكامل

by Mohamed Hammad
9 minutes read

فيزا تركيا و التصريح الأمني أكتر حاجتين بيتسألوا كتير علي الأنترنت , و ده بسبب شهرة تركيا سياحيا , و كمان لأن قوانين التصريح الأمني بتختلف كل شوية .

تركيا من الدول الجميلة و المشهورة سياحيا , اتكلمنا قبل كده عن أسطنبول و عن كل حاجه محتاج تعرفها قبل السفر ليها .

 

فيزا تركيا و التصريح الأمني

 

و كمان اتكلمنا عن تشيرالي اللي بعتبرها جوهرة ناس قليلة تعرف عنها و أد ايه هي مكان مميز و ينفع جدا لشهر العسل .

و برضه اتكلمنا عن أدرنة المدينة التركية اللي هتحس فيها بميكس رهيب بين التاريخ العثماني و الجانب الأوروبي من تركيا .

و أتكلمنا كمان عن المطبخ التركي و أشهر الأكلات التركية اللي لازم تجربها .

في المقال ده هحاول أجمعلك كل المعلومات اللي هتحتاجها بخصوص فيزا تركيا و التصريح الأمني .

و هحاول أخلي الموضوع متجدد أول بأول .

 

 

[lwptoc colorScheme=”inherit” borderColor=”#dd8604″]

 

 

هل محتاج أطلع فيزا تركيا و التصريح الأمني ؟

كل المواطنين المصريين محتاجين فيزا لدخول تركيا , الفكرة هل محتاج فيزا أونلاين أم فيزا من السفارة علي الباسبور .

-للمواطنين المصريين تحت سن 18 سنة و فوق سن 45 سنة دول يقدروا يطلعوا الفيزا الألكترونية من الموقع الرسمي https://www.evisa.gov.tr/ar .

 

و خلي بالك ، التصريح الامني اللي بنتكلم عنه هنا ده غير تصريح اذن السفر اللي اتكلمنا علي في مقالة : تصريح السفر الالكتروني في 6 خطوات بكل سهولة

فيزا تركيا و التصريح الأمني

-للمواطنين المصريين بين سن 18 سنة و 45 سنة ,دول لازم يطلعوا التأشيرة التركية من السفارة , و كذلك التصريح الأمني , و دول هنشرحهم بالتفصيل دلوقتي .

 

 

 

أطلع فيزا تركيا منين؟

فيزا تركيا و التصريح الأمني

 

حاليا الجهة الوحيدة اللي بتتوجهلها لاستخراج تأشيرة تركيا هو مكتب MZ VIZA التابع للسفارة التركية و عنوانه :

القاهرة : و ده خاص بالمحافظات : القاهرة، الجيزة، القليوبية، الفيوم، بني سويف، الشرقية، ومحافظات القناة ووجه قبلي.

  • فيلا نومارسي 21 – ش محمد الغزالى مسقاق الدقى – الجيزة

الأسكندرية : و ده خاص بالمحافظات : الاسكندرية، البحيرة، دمياط، مطروح، كفر الشيخ، الدقهلية، المنوفية، الغربية

  •  88 شارع فؤاد – باب شرق / الإسكندرية

 

 

 

ايه هي المستندات المطلوبة بخصوص فيزا تركيا ؟

فيزا تركيا

  • باسبور صالح لمدة لا تقل عن 6 اشهر.
  • صورة ضوئية للباسبور.
  • 2 صورة شخصية حديثة 4×6 بخلفية بيضاء.
  • حجز طيران وحجز فندق مبدأي.
  • كشف حساب بنكى ييوضح حركات اخر ستة اشهر.
  • خطاب HR من شغلك لو موظف , أو السجل التجاري و البطاقة الضريبية لو شغلك خاص.
  • لو طالب محتاج بيان قيد من المدرسة أو الجامعة.
  • لو مسافر مع زوجتك يبقي متنساش أصل وثيقة الزواج.
  • صورة من التأشيرات السابقة لو معاك.
  • وثيقة تأمين تغطي سفرك داخل تركيا و دي بتعملها أجباري داخل المكتب ب 15 دولار.
  • صورة ضوئية من كل المستندات السابقة .

 

 

تكلفة الفيزا :

60 دولار + 30 دولار مصاريف المكتب + 15 دولار وثيقة التأمين = 105 دولار

في حال لو فيزا مالتبل بيكون تكلفتها 200 دولار

 

بعد ما تجهز الأوراق بتروح المكتب بدون حجز ميعاد , بيقابلك الموظف و بياخد منك الورق و بيسألك كام سؤال عن مسافر ليه و هتعمل ايه ..إلخ .

و النتيجة بتطلع بعد أسبوع ساعتها بتروح تستلم الباسبور بنفسك .

 

كده خلصنا الفيزا … نيجي بقي للتصريح الأمني ..

 

 

 

ايه هو التصريح الأمني ؟

هو تصريح يحصل عليه المسافر لمصري من هيئة الجوازات و الهجرة التابعة لوزارة الداخلية .

و لا يجوز سفر المواطنين المصريين إلي بعض الدول منها تركيا إلي بعد الحصول علي هذا التصريح الأمني بموجب قانون تم أصداره , و لا بصدر هذا التصريح إلي بعد موافقة بعض الجهات الأمنية .

و قد أصدر هذا القانون في عام 2014 و الغرض منه الحد من هروب الشباب إلي الخارج أو انضمامهم للمنظمات الأرهابية .

 

 

 

ايه هي شروط الحصول علي التصريح الأمني للسفر للتركيا ؟

-التصريح يجب أن يحصل عليه كل المواطنين من الجنسين ما بين عمر 18 سنة و 40 سنة  .

لذلك كل من كان عمره أقل من 18 سنة و أكبر من 40 سنة يقدر يسافر تركيا بسهولة من غير تصريح أمني .

-لازم يكون معاك تأشيرة علي الباسبور قبل ما تروح تقدم علي التصريح , و طبعا ما ينفعش تقدم علي الباسبور بتأشيرة إلكترونية , لازم تأشيرة مطبوعة علي الباسبور من السفارة زي ما شرحنا فوق.

-لازم تطبعا تحضر بنفسك للحصول علي التصريج , أنت و أي حد من عيلتك هيقدم عليه .

-مهم جدا لازم تبقي عارف أسمك الخماسي و تاريخ ميلاد والدك و انت رايح.

 

 

 

أقدم فين علي التصريح الأمني؟

الأدارة العامة للجوازات و الهجرة

حاليا و منذ 1 يوليو 2019 المكان الوحيد للحصول علي التصريح الأمني هو من الإدارة العامة للجوازات و الهجرة الموجودة في أكاديمية الشرطة في العباسية .

و مواعيد العمل طوال الأسبوع ماعدا الجمعة و الأجازات الرسمية 8 ص – 2 م .

 

 

 

ما هي الأوراق المطلوبة للتقديم علي التصريح الأمني ؟

-أصل الباسبور + 3 صور ضوئية منه .

-تأشبرة تركيا + 3 صور ضوئية منها.

-استمارة التصريح بتشتريها و انت هناك و بتملاها بدقة و بترفقها مع الورق.

-في حال إن كنت موظف حكومي أو خاص .. لازم تجيب جواب HR  + جواب من التأمينات. و لازم تكون المهنة مثبتة في الباسبور.

-لو كنت طالب او بلاعمل او “حاصل علي ..” , لازم يكون معاك فيزا زيارة علي الباسبور علشان تقدر تقدم علي التصريح الأمني , و فيه شركات سياحة كتير ممكن تعملك الدعوة لفيزا الزيارة .

-لو كنت صاحب شركة أو عمل خاص , تجيب البطاقة الضريبية و السجل التجاري .

 

بتروح و بتقدم كل الأوراق دي , و بتاخد رقم و تاريخ معين تستلم بيه الموافقة و التصريح الأمني و تقدر تسافر بعدها بسهولة.

 

 

 

هل الترانزيت في تركيا محتاج تصريح أمني ؟

بص هو مبدأيا الموضوع بيرجع لمزاج ضابط الجوازات لأن مفيش قانون واضح , بس لو الترانزيت أقل من 6 أو 8 ساعات , يبقي غالبا مش محتاج تصريح أمني و خصوصا لو مسافر دولة من دول الشنجن أو أمريكا مثلا .

أما لو الترانزيت أكثر من 8 ساعات , ممكن ضابط الجوازات ميرضاش يسفرك من غير تصريح أمني .

 

 

 

هل ممكن أسافر بدون فيزا تركيا و التصريح الأمني؟

اه لو كنت تحت 18 سنة أو فوق 40 سنة , ساعتها ممكن تسافر بالتأشيرة الإلكترونية و مش مطلوب منك التصريح .

أما لو معاك فيزا شنجن أو فيزا أمريكا ساريين فبرضه تقدر تدخل تركيا بالتأشيرة الإلكترونية لكن متكونش مسافر من مصر , لأن ضابط الجوازات مش هيخليك تسافر من غير تصريح أمني.

 

 

صلاحية التصريح الأمني أد ايه؟

التصريح صالح لمدة شهرين , و يتم استخدامه مرة واحدة فقط .

 

فيزا تركيا

 

دي كانت كل حاجه هتحتاجها بخصوص فيزا تركيا و التصريح الأمني , لو عندك أي استفسار أو تجارب حابب تشاركنا فيها , ياريت تشاركنا بيها في الكومنتات أو صفحات السوشيال ميديا 🙂

 

اقرأ ايضا دليلك الكامل لتخطيط السفر لآيسلندا … ايه اللي تعمله و ايه اللي متعملوش

 

لو عجبتك المقالة ، يبقي هتعجبك المقالات دي

55 comments

Khaled أكتوبر 17, 2019 - 12:38 ص

ما الاوراق الطلوبه للبحار لاستخراج الموافقه الامنيه للسفر لتركيا

Reply
Mohamed Hammad
Mohamed Hammad أكتوبر 17, 2019 - 2:16 ص

للاسف معرفش ان كان فيه طلبات معينة للبحارة وللا لا ، يفضل تتصل بالادارة العامة للجوازات علي رقمهم +20227948661 هما يقدروا يفيدوك

تحياتي ليك

Reply
Tamer نوفمبر 7, 2019 - 1:37 م

انا مسافر البرازيل و عندي ترانزيت في تركيا لمدة 13 ساعة و انا سنى 42 سنة
هل محتاج تصريح امني؟

Reply
Mohamed Hammad
Mohamed Hammad نوفمبر 7, 2019 - 5:16 م

نظريا أي ترانزيت فوق 8 ساعات في اسطنبول محتاج تصريح , الموضوع بيرجع لرؤية ضابط الجوازات , بس الأضمن حضرتك تقدم علي تصريح علشان ميحصلش مشاكل .

Reply
رشا ديسمبر 16, 2019 - 1:21 م

السن ٤٠ ولا ٤٥

Reply
Mohamed Hammad
Mohamed Hammad ديسمبر 17, 2019 - 9:39 ص

٤٠ سنة للتصريح الامني
٤٥ سنة للفيزا الاونلاين

Reply
Yomma ديسمبر 27, 2019 - 1:48 م

لو هسافر تركيا و انا غير مقيمه في مصر ولكن هنزل مصر ترانزيت هل هحتاج لتصريح امني؟

Reply
Mohamed Hammad
Mohamed Hammad ديسمبر 27, 2019 - 1:51 م

لا لان ببساطة مش هتدخلي و لا هتختمي في مصر ، يعني مش هتعدي علي جوازات في مصر مجرد ترانزيت بين طيارتين فمش هتحتاجي تصريح

Reply
محمد ماهر حسن الحديدى ديسمبر 29, 2019 - 8:13 م

انا السن، 43بحار عملت فيزا تركيا من القنصليه فى اسكندريه هل لى موافقة امنيه لتركيا ولا لاا ارجو رد اكيد وشكرا

Reply
Mohamed Hammad
Mohamed Hammad ديسمبر 31, 2019 - 12:06 م

فوق ٤٠ سنة حضرتك مش محتاج تصريح

Reply
ِِAbdullah Ghazy ديسمبر 31, 2019 - 11:56 ص

الفيزا السياحية لتركيا Single entry صلاحية 3 شهور وإقامة حد أقصى شهر من خلال مكتب MZ سعرها أصبح 115 دولار لو حاجز طيران وفندق أو 120 دولار لو مش حاجز طيران وفندق عشان هما بيحجزوا لك حجز مبدئى .
الفيزا أونلاين تحت 18 سنة وفوق 45 سنة أو لو معاك فيزا شنجن أو كندا أو أمريكا أو انجلترا
التصريح الأمنى مطلوب لمن هم فوق 18 سنة وتحت 40 سنة

Reply
Mohamed Hammad
Mohamed Hammad ديسمبر 31, 2019 - 12:08 م

علي موقعهم مفيش اي تغيير في الاسعار لحد هذه اللحظة

Reply
سارة ديسمبر 31, 2019 - 4:03 م

هل الفيزا لتركيا بتبقى سارية من تاريج ماباخدها ولا من تاريخ السفر؟ يعني هل ممكن استخراج الفيزا فبل ميعاد السفر ب5 شهور؟

Reply
Mohamed Hammad
Mohamed Hammad يناير 2, 2020 - 9:08 م

الفيزا بتكون سارية لمدة ٣ شهور ، فيفضل تطلعيها قبل سفرك بشهر مثلا

Reply
أسماء يناير 3, 2020 - 10:44 م

هل ينفع أسافر لوحدى بدون زوج أو ابن عمرى 36 سنه
لغرض السياحه ؟
ولو لا يوجد عندى حساب بنكى اعمل ايه؟

Reply
Mohamed Hammad
Mohamed Hammad يناير 4, 2020 - 7:27 م

ينفع طبعا ، بس لازم كشف حساب و لو مفيش ممكن كشف حساب الزوج او قريب من الدرجة الاولي و يكتب ورقة انه مسئول عن تكالف سفرك

Reply
ن.ش يناير 11, 2020 - 4:56 م

لو انا مطلقة وعندي ولادي سيباهم في مصر لازم حد يسافر معايا

Reply
Mohamed Hammad
Mohamed Hammad يناير 11, 2020 - 9:26 م

لا تقدري تسافري عادي جدا

Reply
امير يناير 18, 2020 - 4:05 م

هل لو راجع من شنجن وهقعد في تركيا لازم اكون طالع من مصر بتصريح امني ؟؟؟

Reply
Mohamed Hammad
Mohamed Hammad يناير 18, 2020 - 4:12 م

لا مش لازم تقدر تدخل عادي تركيا بفيزا الاونلتين اهم حاجه تكون الشنجن سارية

Reply
امير يناير 18, 2020 - 6:53 م

انا اسف معلش بس سؤالي حد هيكلمنى على التصريح الامني ؟ انا مش طالع على تركيا علي طول انا هقعد فيها في العوده 5 ايام بعد دوله الشنغن وشكرا

Reply
Mohamed Hammad
Mohamed Hammad يناير 18, 2020 - 11:57 م

بص علشان متلخبطش نفسك ، مصر مش هتطلب منك التصريح الامني الا لو طالع من مصر لتركيا او مسافر دولة ليها ترانزيت طويل في تركيا

غير كده محدش هيكلمك متقلقش

Reply
shayma فبراير 17, 2020 - 5:16 م

لو فى حد معاه الفيزا شنغن صالحة لمدة شهر و اقامة 15 يوم و هيخلص ال 15 يوم فى اوروبا و بعد كده يروح تركيا بس هيكون لسه فى فترة الشهر ده تمام للفيزا الاون لاين و هيدخل البلد تمام ؟

Mohamed Hammad
Mohamed Hammad فبراير 28, 2020 - 12:10 ص

لازم تكون الفيزا مالتي ، مش مهم خلصتي ايامك جوه المهم تكون سارية و مالتي و دخلتي بيها اوروبا ، اما لو سنجل مينفعش

محمد يناير 26, 2020 - 12:09 م

طيب انا مصري و فرنساوي و معايا باسبور فرنساوي المفروض هسافر فيه و عندي 21 سنة و رايح تركية 10 ايام و انا من مصر بقالي اربع شهور راجع من فرنسا و دخلت بالبسبور الفرنساوي هل احتاج تصريح أمني و انا هروح تركيا بالفرنساوي

Reply
Mohamed Hammad
Mohamed Hammad يناير 27, 2020 - 7:43 م

مادام مسافر بالباسبور الفرنسي مش محتاج

Reply
Naglaa يناير 27, 2020 - 8:24 م

لو سمحت لو انا الباسبور بتاعى مكتوب فيه حاصل على بكالوريوس صيدلة وهقدم على فيزا زياره لتركيا … هل الدعوه المطلوبه لاستخراج التصريح الامنى ممكن تكون دعوه من جامعه رسمية معتمده فى تركيا لحضور مؤتمر وانها هتتكفل بالبرنامج؟ برجاء الرد للضرورة

Reply
Mohamed Hammad
Mohamed Hammad يناير 28, 2020 - 8:52 م

بصراحة مقدرش افيدك بس يفضل تسالي المركز الخاص بتاشيرة تركيا هما هيفيدوكي باجابة ادق

ارقام تليفوناتهم هنا : http://mzvize.com/ar/iletisim/

تحياتي ليكي

Reply
ريهام يناير 29, 2020 - 5:06 م

معايا دعوه تجاريه هل محتاجه تصرسح امني وفيزا
وانا محاميه ايه الاوراق المطلوبه

Reply
Mohamed Hammad
Mohamed Hammad يناير 31, 2020 - 2:51 ص

اكيد محتاجه تصريح امني و فيزا
الاوراق هي هي زي المقالة

Reply
aboeelbanat@gmail.com فبراير 2, 2020 - 8:25 ص

احي الكريم
اولا اشكرك علي المعلومات الرائعه وبارك الله فيك
ثانيا بخصوص موضوع الترانزيت معلش انا اسف محتاج توضويح شويه بمعني :-
حضرتك الان انا مسافرب الي تركيا وعندي 45 سنه فهجيب التاشيره اون لاين تمام
وانا ان شاء الله مسافر علي الخطوط الجويه الاوكرانيه وفتره الترانزيت تقريبا 16 ساعه فحضرتك تقصد فتره الترانزيت دي ولا تقصد لو حد مسافر دوله تانيه وهينزل ترانزيت في تركيا ؟
افادكم الله
وشكرا
محمد الوكيل

Reply
Mohamed Hammad
Mohamed Hammad فبراير 28, 2020 - 12:16 ص

اهلا بحضرتك و بعتذر علي التاخير

بص علشان متلخبطش نفسك ، حضرتك مادمت فوق ٤٥ يبقي مش محتاج تصريح امني ، التصريح الامني بيطلبوه من الاشخاص من ١٨-٤٠ اللي مسافرين تركيا او مسافرين اي دولة تانية و نازلين ترانزيت في تركيا اطول من ٨ ساعات

Reply
محمد فبراير 2, 2020 - 8:10 م

طيب هل احجز الطيران قبل التصريح الامني ولا بعده علشان الوقت ضيق ومش عاوز سعر الطيران يغلى هل في حد بيترفضله الطلب بتاع التصريح فعلا

Reply
Mohamed Hammad
Mohamed Hammad فبراير 14, 2020 - 5:26 ص

خليك بعد التصريح اضمن

Reply
This comment form is under antispam protection فبراير 27, 2020 - 11:16 ص

انا حاليا مقيم في الكويت ونازل مصر اجازة ومعي تاشيرة تركيا صالحة 3 شهرر صادرة من الكويت هل عند العودة ممكن موظف الجوازت يلغي التاشيرة تركيا انا سمعت الكلام دة هل هذا صحيح , واذا حبيت اطلع من مصر ماهي اوراق المطلوبة للتصريح وانا اعمل في الخارج

Reply
Mohamed Hammad
Mohamed Hammad فبراير 28, 2020 - 12:08 ص

بيلغوا الفيزا ساعات لو شكوا انك مثلا مسافر دولة زي دبي مثلا علشان تطلع منها لتركيا من غير تصريح ، انما انت معاك اقامة في الكويت فان شاء الله محدش هيضايقك ، و برضه يفضل تسال في ادارة الجوازات في العباسية

Reply
Habiba فبراير 11, 2020 - 1:49 م

طيب لو شاب عنده 30 سنة ومعاه تأشيرة امريكا وهياخذ تأشيرة تركيا اونلاين . ينفع يطبع التأشيرة ويقدم بيها ع التصريح الأمنى لان بيبقى لها رقم عادى زيها زيى المطبوعة على جواز السفر

Reply
Mohamed Hammad
Mohamed Hammad فبراير 28, 2020 - 12:14 ص

لا للاسف التصريح الامني لازم التاشيرة تكون من السفارة

Reply
Amr فبراير 17, 2020 - 2:01 م

هل لو المهنة مثبتة في الجواز والبطاقة هحتاج برضوا خطاب من جهة العمل فيما يخص التصريح الأمني؟

Reply
Mohamed Hammad
Mohamed Hammad فبراير 28, 2020 - 12:09 ص

اه

Reply
Amr فبراير 28, 2020 - 12:12 ص

طيب بخصوص لو مفيش أي تأشيرات مسبقة لسفر هل ده معيار للرفض؟ ولا عادي ممكن تعدي لو كشف الحساب حركته كويسة وباقي الأوراق متاحة وسليمة

Reply
Mohamed Hammad
Mohamed Hammad فبراير 28, 2020 - 12:13 ص

في تركيا بيهمهم كشف حسابك و ووضعك الوظيفي ، نقطة الباسبور الابيض مش هتفرق اوي

Reply
محمد عماد فبراير 26, 2020 - 6:37 ص

لو حد مسافر تركيا سياحة ٥ ايام وفوق ٤٥ مواليد ٧٤ومحجوز له الفندق والفيزا بتاعة تركيا سياحة وعدى ٤٥ مطلوب تصريح امنى ولا عادى يا فندم

Reply
Mohamed Hammad
Mohamed Hammad فبراير 26, 2020 - 5:19 م

فوق 45 سنة مش محتاج تصريح أمني

Reply
Ahmed Licht فبراير 27, 2020 - 11:52 م

بعد اذنك انا جاي من المانيا علي مصر وبعمل ترانزيت في تركيا 13 ساعه هل وانا راجع لازم تصريح امني علشان 13 ساعه؟ ازاي اطلع التصريح في حين عمري 31 سنه وجواز السفر مكتوب فيه طالب؟ هل ممكن اطلع تصريح عادي ولا لازم اعمل زيارة؟ شكراً

Reply
Mohamed Hammad
Mohamed Hammad فبراير 28, 2020 - 12:06 ص

لو انت طالب في المانيا و معاك تاشيرة شنجن اقامة للدراسة و جاي مصر و راجع تاني المانيا للدراسة بنسبة كبيرة محدش هيكلمك متقلقش ، عايز تتاكد ١٠٠٪؜ تقدر تسال ضابط هناك ، بس متقلقش من النقطة دي لانك بتدرس في المانيا و جاي و راجع تاني

Reply
Esraa مارس 2, 2020 - 3:29 ص

ممكن سؤال لو انا جوزي بريطاني مصري واحنا مسافرين اجازه بس انا مش بشتغل ده ممكن يكون سبب رفض

Reply
Mohamed Hammad
Mohamed Hammad مارس 2, 2020 - 8:00 م

لو مقدمه مع زوج حضرتك ان شاء الله مش هيكون فيه مشكلة

Reply
Esraa مارس 2, 2020 - 10:47 م

شكرا لحضرتك

Reply
محمود مارس 6, 2020 - 11:31 ص

الاول بشكرك جدا على وقتك في كتابة الشرح ده ببساطة و صبرك على الردود ..
ثانيا انا عندي استفسار غريب شوية – انا طالع سياحة لتركيا و اخدت الفيزا فعلا و كله تمام بس الباسبور مثبت عليه وظيفتي القديمة غير الوظيفة الحالية اللي هيكون معايا الHR بيه . خايف من التصريح الامني جدا انهم يوافقوا يعملوه بسبب الموضوع ده و طبعا مش هعرف اغير الباسبور اللي عليه الفيزا .. تفتكر دي ممكن تبقى مشكلة في استخراج التصريح الامني ؟

Reply
Mohamed Hammad
Mohamed Hammad مارس 6, 2020 - 5:10 م

اهلا بيك ,
بص متقلقش من جزئية ان الوظيفة الجديدة مش موجودة في الباسبور مادام هتجيب HR من الوظيفة خلاص , بس خلي بالك هما بيحتاجوا برنت تأمينات كمان للشغل الجديد , غير كده مش هتلاقي اي مشاكل ان شاء الله

Reply
عمرو مارس 8, 2020 - 2:44 م

خطاب جهة العمل بيكون بأي لغة؟ ومكتوب في الموقع تبع mz صورك من شهادة القيد العائلي، ده متطلب حقيقي؟

Reply
Mohamed Hammad
Mohamed Hammad مارس 11, 2020 - 4:50 ص

خطاب جهة العمل بالانجليزي

و اه اي متطلبات مكتوبة حقيقية

تحياتي ليك

Reply
يوسف مارس 23, 2020 - 2:04 ص

انا مصري مقيم فالسعودية وسني ٢٧ ، اقدم عالفيزا منين ؟

Reply
Mohamed Hammad
Mohamed Hammad أبريل 3, 2020 - 3:56 م

من سفارة تركيا في السعودية

Reply

Leave a Comment

ثمانية عشر − 5 =

This website uses cookies to improve your experience. We'll assume you're ok with this, but you can opt-out if you wish. Accept Read More