كرواتيا
وجهات Destinations

كرواتيا : كل اللي محتاج تعرفه قبل السفر لعروس البحر الأدرياتيكي

on
ديسمبر 14, 2018

كرواتيا … تخيل نفسك في بلد علي ساحل من اشهر سواحل العالم علي البحر الأدرياتيكي , بلدات صغيره مرصوفة بالحصي , و مدن عريقة مليئة  بعبق الثقافة و التاريخ , ناس طيبة بشوشة دافيه بيبتسموا في وجهك في كل مكان بتروحه , مناظر طبيعية و شلالات و غابات , قلاع و قصور و معمار خلاب … كل ده هتشوفه في البلد البديعة دي… هرفاتسكا Hrvatska  زي ما بيسموها اهلها …

 

 

فين كرواتيا؟

 

خريطة كرواتيا

 

هي دولة من دول الاتحاد اليوغسلافي السابق , دولة من دول البلقان لها حدود مع المجر و البوسنة والهرسك و سلوفينيا و مونتينيجرو و صربيا , و يفصلها عن أيطاليا البحر الأدرياتيكي .

 

 

 

الفيزا :

كل ما يخص فيزا كرواتيا موجود في مقالة منفصلة : “فيزا كرواتيا : دليلك الكامل للحصول علي تأشيرة كرواتيا“.

كرواتيا هي من دول الأتحاد الأوروبي , و لكن ليست من دول الشنجن حتي تاريخ كتابة هذه المقالة , يمكنك الدخول للبلد بفيزا شنجن مالتي سارية , و كذلك يمكنك الدخول ليها بفيزا (رومانيا , قبرص , بلغاريا) بشرط انهم يكونوا فيزا مالتي و ساريين , و تكون دخلت الدول دي الأول قبل دخولك كرواتيا .

 

فيزا كرواتيا

 

متطلبات الفيزا  زيها زي متطلبات فيزا الشنجن : (أزاي تضمن فيزا الشنجن بكل سهولة) , التقديم في دول مصر و المغرب و الأردن و الجزائر و السعودية بيكون عن طريق مكتب VFS global في الدول دي , كل اللي عليك انك بتدخل علي موقع vfs global  الخاص بكرواتيا و بتنزل الأبليكيشن و بتملاها و بتجهز الورق و بتقدمه في المكتب

في تونس مفيش سفارة لكرواتيا في تونس , الفيزا بتطلع للتوانسة من سفارة كرواتيا في الرباط بالمغرب , لكن فيه تمثيل دبلوماسي في تونس لكرواتيا , يمكن لمواطني تونس التواصل معاهم بحيث ينسقولهم الفيزا و دي بيانات الأتصال بيهم

 

سفارة كرواتيا في المغرب

 

ملحوظة في مصر ثمن الفيزا 69 دولار بيتم دفعها في حساب السفارة بالدولار ببنك كريدي أجريكول , ده غير مصاريف المكتب vfs اللي بيتم دفعها عند تسليم الورق في المكتب.

كرواتيا بتشترط ان يكون في كشف حسابك البنكي عن كل يوم هتقعده في كرواتيا مبلغ 70 يورو , و في حالة انك حاجز برنامج سياحي مدفوع شامل الأقامة مطلوب يكون في حسابك عن كل يوم هتقعده في كرواتيا فقط مبلغ 30 يورو.

 

ايه اشهر مدن كرواتيا؟

 

كرواتيا فيها تنوع كبير في مدنها و حتي بلداتها الصغيرة , لو كنت بتحب المعمار و المباني التاريخيه و الفنون و المتاحف يبقي هتحب زغرب جدا العاصمة الخلابة لكرواتيا , متعة انك تشوف الترام القديم لزغرب او تتمشي في شارع تكالتشيشيفا Tkalčićeva Street  او الميدان الرئيسي في زغرب ميدان بان يلاتشتيش ban Jelačića .

 

زغرب

الميدان الرئيسي في زغرب

 

مدينة سبليت من أجمل مدن كرواتيا , مشهورة بالممشي الرائع علي البحر الأدرياتيكي , مدينة مشهورة بالنشاطات الليلية و المطاعم و الكافيهات اللي مبتنامش , ده غير المدينة القديمة فيها بقايا قصر الإمبراطور الروماني

 

سبليت

مدينة سبليت

 

مدينة دوبروفنيك التاريخيه الساحلية, محبي مسلسل جيم اوف ثرونز Game of Thrones عارفينها كويس لأنها مقر ال King’s Landing  في المسلسل , المدينة اكتسبت شهره كبيره عالميا بعد المسلسل , المدينة الأثرية في دبروفنيك هي موقع من مواقع اليونسكو , و مشهوره أيضا بالسور العالي المحيط بالمدينة التاريخيه و اللي بتقدر تشوف المدينة كلها من فوق.

 

دبروفنيك

مدينة دبروفنيك التاريخية

 

جزر زادار و هفار و كورتشولا و غيرهم كتير جدا , كرواتيا بتحتوي علي عدد ضخم من الجزر كل جزيرة احلي من التانية .

ده غير منطقة إستريا الخلابة , اللي مليانه غابات و قلاع تاريخية , كتير منها ممكن تأجرها و تقيم فيها , ثمن الليلة في قلعة منهم يساوي احيانا ثمن ليلة في غرفة بفندق 5 نجوم !

 

و طبعا مينفعش مذكرش أهم سبب من اسباب الزيارة لكرواتيا و هي حديقة بحيرات بليتفيتسا Plitvice lakes national park

 

بحيرات بليتفيتسا

حديقة بحيرات Plitvice

 

كل مدينة من دول هيتم التطرق ليهم في مقاله منفصله علشان نتكلم عنهم بالتفصيل .

 

 

ايه أحسن وقت أزور فيه كرواتيا ؟

كرواتيا مدينة ساحلية لذلك الموسم فيها هو شهور الصيف من شهر 6 لغاية شهر 8 , و طبعا كالعادة الأسعار بتكون الضعف في الموسم ده  ,ده غير الزحمة الكبيرة من السياح في الأماكن السياحية , في مواسم اسمها shoulder seasons و دي ما قبل او ما بعد موسم الصيف و دول من (شهر 3 لغاية شهر 5) او من (شهر 9 لغاية شهر 11) , دي احسن شهور تسافر فيه كرواتيا لان الجو بيكون معتدل و في نفس الوقت مفيش زحمة أوي و كمان الأسعار بتكون ارخص …

 

دبروفنيك في الشتاء

المدينة القديمة في دبروفنيك في الشتاء

و طبعا في الشتاء كرواتيا بتكون حاجه تانية , لمحبي فصل الشتاء هيستمتعوا جدا لأن كرواتيا بتكون فاضية جدا و تقدر تستمتع جدا بالبلد و كمان الأسعار بتكون رخيصة جدا ..

 

 

نصائح لازم تاخد بالك منها قبل ما تخطط تسافر كرواتيا :

 

-عملة كرواتيا هي الكونا (الدولار الأمريكي =6.5 كونا)

 

عملة كرواتيا

 

-حاول تبعد عن موسم الصيف في كرواتيا , مش هتستمتع لما تلاقي زحمة في كل مكان هتروحه و تستني بالساعات في الطوابير قدام الأماكن السياحية , شهر ابريل او مايو او سبتمبر او اكتوبر احسن شهور ممكن تسافر فيها.

-لو بتعرف تسوق سياره , يبقي حاول تأجر سيارة في كرواتيا , القيادة في كرواتيا ممتعة جدا بين المدن , خصوصا علي طريق A1 Motorway بين مدينة زغرب و سبليت , الطريق مصنف من أفضل طرق اوروبا , ده غير ان بصفة عامة القيادة سهلة جدا بين مدن كرواتيا.

 

طريق A1

طريق A1 بين زغرب و سبليت

 

-لو كنت في دبروفنيك حوال تعمل رحلة ليوم واحد لمدينة موستار الساحرة في البوسنة و الهرسك .

 

موستار - البوسنة

مدينة موستار بالبوسنة و الهرسك

 

-بلاش تاخد معاك شنط كتير و انت بتزور كرواتيا , في كرواتيا انت هتتنقل كتير بين المدن المختلفة , خليك خفيف علشان تستمتع .

-حاول تتعلم كام كلمة زي مرحبا Zdravo أو شكرا Hvala ….الخ , الشعب الكرواتي بيفرح اوي لما يلاقيك سائح و بتقول كام كلمة من لغتهم , الشعب الكرواتي من اطيب الشعوب اللي قابلتهم في سفرياتي , ناس بسيطة و جميلة.

 

 

كرواتيا

 

 

دي كانت النقاط الرئيسية بخصوص السفر لكرواتيا , ان شاء الله هيكون فيه مقالات لأهم المدن في كرواتيا بالتفصيل علشان لو حبيت تسافر يكون عندك الدليل الكامل لكرواتيا :))

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.