قبل رحلتي إلي لاتفيا مكنتش أعرف عنها غير اسم عاصمتها ريجا و انها من دول الاتحاد السوفيتي السابق , بالصدفة شفتلها كام صورة سواء لمدنها او الطبيعة الساحرة اللي فيها و اللي خلتني اقرأ عنها أكتر و ازورها مش بس مره … لأ مرتين , اللي هيزور ريجا هيعرف قد أيه المدينة الصغيرة دي هتديلك احساس نوستالجيا هتخليك بتحن انك ترجعلها تاني و تالت …
في المقالة دي هقولك علي 10 حاجات لازم تبقي عارفها قبل ما تسافر ريجا عاصمة لاتفيا …
1- ليه تسافر لاتفيا؟ :
لاتفيا هي دولة من الدول اللي في منطقة بحر البلطيك (استونيا , لاتفيا , ليتوانيا) و هي عضو من أعضاء حلف شمال الأطلسي , ليها حدود مع استونيا و ليتوانيا و روسيا و روسيا البيضاء و ليها حد بحري من الغرب مع السويد .
أول ما الطيارة هتوصل المطار هتتصدم من اد ايه صغير المطار , هتبدأ تحس باختلاف البلد دي عن بقية أوروبا الغربية أول ما توصل وسط المدينة , بشكل المباني المميز و منظر نهر دوجافا و طرقات المدينة القديمة في ريجا هتحس انها فعلا مدينة مميزة ….
لاتفيا جوها مميز في الصيف و الخضرة و الغابات و أشجار الصنوبر بتبقي في كل مكان , في الشتاء “فصلي المميز” لاتفيا بتكون كلها بيضاء و مغطاه بالثلوج , درجة الحرارة بتبقي تحت الصفر و فيه ايام ساعات بتوصل -20 و -30 كمان , الكريسماس مميز جدا في ريجا , يكفي اني اقولك ان اول مكان ظهر فيه شجرة الكريسماس و تزيينها كان في ريجا .
لاتفيا من البلاد الرخيصة جدددددا مقارنة بدول أوروبا , و هستعرض كل الكلام ده في بقية المقالة … اسباب كتير أوي تخليك تحط لاتفيا في البلاد اللي ناوي تزورها …
2– الفيزا:
لاتفيا هي دولة من دول الشنجن , لذلك علشان تدخلها لازم يكون معاك فيزا شنجن سياحة , شروطها و النصائح علشان متترفضش فيها هتلافيها كلها في المقالة دي : ازاي تضمن فيزا الشنجن بكل سهولة
بالنسبة للمصريين :
لحد تاريخ كتابة المقالة دي التقديم لفيزا لاتفيا بيكون عن طريق سفارة لاتفيا بالقاهرة في 3 شارع ابو الفدا , الزمالك … بتبعت أيميل للسفارة تقولهم انك عايز تقدم علي فيزا سياحة و تاريخ السفر , بيحددولك ميعاد برضه بالأيميل , بتدفع 60 يورو في حساب السفارة في بنك ال CIB , و بتاخد وصل الدفع و تجهز كل ورقك و تروح في ميعاد الأنترفيو في السفارة …
ملاحظاتي في المرتين اللي دخلت فيهم سفارة لاتفيا :
-القنصل و الموظفين محترمين جدا :
دي أكتر حاجه لاحظتها في تواصلي معاهم سواء بالتليفون أو الإيميل أو في الأنترفيو.
-الأنترفيو بتكون بالإنجليزي:
لو مبتعرفش تتكلم انجليزي كويس هات حد معاك يترجملك .
-خليك واثق من نفسك في الأنترفيو :
القنصل عايز يتأكد انك فعلا صادق مش واخد لاتفيا كوبري علشان تدخل اوروبا … الاسأله بتكون عادية جدا زي اشمعني لاتفيا ؟ هتقعد اد ايه و فين؟ بتشتغل ايه؟ اسرتك عامله ازاي؟ احوالك المادية؟ … الخ كلها اسألة عادية زيها زي اي سفارة … احيانا بيسألك اسألة علشان يعرف انت قارئ عن لاتفيا و مخطط وللا لأ , يعني مثلا ممكن يسألك ” لاتفيا بتقع علي بحر ايه؟” ” ريجا مدينة كبيرة وللا صغيرة؟” ” تعداد لاتفيا حوالي كام بالتقريب؟”
علشان كده لو فعلا ناوي تزور لاتفيا أقرأ عنها كويس , مش بس علشان انترفيو الفيزا , بس علشانك انت , لما تروح تبقي عارف انت هتعمل ايه …
3- تذاكر الطيران:
لحد تاريخ كتابة المقالة دي , مفيش طيران دايركت بين مصر و لاتفيا , لكن فيه شركات طيران كتير بتربط بين القاهرة و ريجا ابرزهم الطيران التركي , الطيران الأوكراني , طيران ايروفلوت الروسي , لوفتهانزا … و غيرهم , أهم حاجه انك تحجز بدري و تلتزم بالنصائح دي علشان تعرف تلاقي أرخص تذكرة ..
4- الأقامة :
لاتفيا حالها كحال معظم دول شرق أوروبا تتميز ان اسعار الفنادق او الأقامة بشكل عام رخيصه جداااا , طبعا أول حاجه هقولها هي ال CouchSurfing , لو فعلا عايز تستمتع بجد بلاتفيا يبقي جرب حد يستضيفك , مش بس انك هتوفر في الأقامة , لكن انك تشوف لاتفيا بعيون اهل البلد دي فعلا تجربة متتعوضش …
تاني حل للأقامة هو الهوستل , فيه هوستلات كتييير في ريجا واخده تقييمات حلوة جدا و هتكلفك من 10-14 يورو في الليلة بس و بتكون شاملة الفطار كمان … في الصورة هوستل MR Hostel اللي نزلت فيه اخر مره كنت في ريجا ..
ده الهوستل اللي قعدت فيه في اخر مره زرت ريجا في 2017
تالت حل من حلول الأقامة هو انك تجرب ال AirBNB , الموقع ده بيتيحلك تأجر ستوديو او شقة صغيرة جنب وسط البلد و ممكن تلاقي اسعار روعة عليه بتبدأ مثلا من 30 يورو للستوديو , او ممكن تأجر أوضه في شقة حد و دي بتكون أرخص كمان…
اخر حل و هو الفنادق , فنادق لاتفيا برضه رخيصه جدا , عن تجربة فندق Avalon هو 4 نجوم و فعلا متميز جدا و رخيص جدا الأوضه السنجل فيه عامله حوالي 40 يورو و الدابل ب 60 يورو , و طبعا الأسعار دي بتختلف من وقت للتاني …
فندق Avalon
و كده ابقي قلتلك علي كل حلول الأقامة في ريجا في فترة زيارتك ليها …
5- المواصلات :
معظم اللي هتحتاجه كسائح في ريجا موجود حوالين المدينة القديمة , علشان كده نادر اوي لما هتحتاج تركب مواصلات …
فيه كذا نوع تذاكر مواصلات :
تذاكر لعدد الرحلات او لمدة معينة :
- تذكرة لمدة 24 ساعة لأي مواصلة كل الخطوط : 5 يورو .
- تذكرة لمدة 3 أيام لأي مواصلة كل الخطوط : 10 يورو .
- تذكرة لمدة 5 أيام لأي مواصلة كل الخطوط : 15 يورو .
- تذكرة لرحلة واحده : 1.5 يورو .
- تذكرة لرحلتين : 2.5 يورو .
- تذكرة ل 4 رحلات : 4.6 يورو .
- تذكرة ل 5 رحلات : 5.75 يورو .
- تذكرة ل 10 رحلات : 10.9 يورو .
- تذكرة ل 20 رحلة : 20.7 يورو
- تذكرة ل 50 رحلة : 50.6 يورو .
من المطار لوسط المدينة :
- بالأتوبيس : التذكرة ب 2 يورو (لو هتشتريها من الأتوبيس) او 1.15 يورو (لو هتشتريها من كشك قبل ما تركب , اتوبيس رقم 22 هو اللي بيربط بين المطار و المدينة القديمة (وسط البلد) .
- بالتاكسي : 11-15 يورو .
بتلاقي التذاكر دي في أكشاك نارفيسين Narvesen اللي منتشره في كل شوارع و محطات ريجا , و برضه ممكن تشتري التذاكر دي من الفندق أو الهوستل بتاعك .
6- الأكل :
أكتر حاجه هتعجبك في لاتفيا هي المطبخ اللاتفي , الأكلات الشعبية عندهم فهلا جميلة جدا , الأكل بصفة عامه رخيص جدا …
يعني مثلا لأسعار الأكل (ملحوظة معظم الفنادق او الهوستلز بيكون فيها فطار مجاني ضمن ثمن الغرفة او السرير) فيه مثلا محلات للمخبوزات او الكرواسون بيكلفك مثلا يورو و نص للقطعة , فنجان القهوة مثلا ب 1.5-2 يورو , سندويتشات الشاورما او الفلافل مثلا بحوالي 3-5 يورو , في سوق ريجا الرئيسي فيه ناس بتبيع أكل الوجبة ممكن تكلفك 3-5 يورو …
السوق المركزي في ريجا This photo by Pete Rojwongsuriya
برشحلك سلسلة مطاعم ليدو Lido, دي عباره عن بوفيه مفتوح من اصناف كتير من المطبخ اللاتفي , بتختار اللي عايزه و بتحاسب علي اللي اخترته , أكله جميل جدا و اسعاره رخيصة …
و برضه لازم تجرب مطعم Folkklub Ala Pagrabs , الجو العام بتاع المطعم مميز اوي و ديكوراته هتخليك تحس انك في عالم تاني مع الموسيقي و الأكل اللاتفي المميز.
ملحوظة أخيره : دايما اسأل علي نوع اللحم اللي بتتقدملك و المشروبات , الشعب اللاتفي بيستهلك لحم الخنزير في أطباق كتير علشان كده اتأكد من نوع اللحم , و برضه اتأكد من أي مشروب بيتقدملك خالي من الكحول .
7- المزارات :
معظم المزارات في ريجا رخيصة جدا و فيه منها كتير مجانا , مش هتكلم كتير في ايه اللي تشوفه هناك لأن TripAdvisor مغطي كل حاجه , لكن هتكلم في 3 حاجات مينفعش متعملهمش …
– تشوف ريجا من فوق :
فيه 4 أماكن تقدر تشوف منهم ريجا من فوق …
- كنيسة سانت بيتر … و دي التذكرة ليها 9 يورو , تقدر تشوف الكنيسة و تطلع فوق تشوف منظر تحفة لريجا من فوق.
- Radisson Blue skyline bar: و ده مكانه في الدور ال 26 , الدخول ليه مجانا قبل الساعة 9 مساء , و طبعا فيه مشروبات كتير غير كحولية تقدر تطلبها , يستاهل انك تشوف ريجا من فوق.
- الأكاديمية اللاتفية للعلوم : الدور ال17 مفتوح تقدر تشوف منه المنظر , التذكرة ب 5 يورو.
- المكتبة الوطنية اللاتفية : صالات القراءة فيها بتطل علي مناظر تحفة للمدينة .
-تعمل ال Free tour :
ريجا زيها زي مدن العالم فيها جولات سياحية مجانية بتتعمل , لازم تحجز واحده و تعملها , الجولات دي بتخليك تعرف حاجات كتير عن ريجا , و ممتعة جدا ..
-تتمشي في حي الأرت نوفو Art Nouveau :
لو كنت زيي بتحب المعمار و المباني التاريخية , يبقي مينفعش متتمشاش في حي الفن الحديث , مبانيه اتبنت في أوائل القرن الماضي علي طراز الفن الحديث , و انت ماشي هتحس انك ماشي في متحف مفتوح , فعلا روعة …
مبني ال Black Cat الشهير في ريجا This photo by Jerzy Kociatkiewicz
8- المصاريف :
و ده السؤال اللي بييجي في بال الكل , يا تري هصرف كام في اليوم , اولا لازم تعرف ان ده بيعتمد علي كل شخص فينا , فيه واحد مثلا مبيحبش يقعد في هوستل عايز يقعد في فندق فبالتالي هيصرف اكتر , فيه واحد تاني بيركب تاكسي بدل الباص , و هكذا
لكن لو هنقول مثلا انك واحد Backpacker , خلينا نقول متوسط اللي هتصرفه كالأتي :
- الأقامة : هوستل = 15 يورو .
- الأكل : فطار (3 يورو) -غداء (5 يورو) – عشاء (8 يورو) – قهوة او عصير (2 يورو) = 18 يورو
- المواصلات : 1.5 يورو
- المزارات : 5 يورو ( لو الأغلبية هتكون مجانية)
يبقي المجموع حوالي 40 يورو … ده المتوسط , طبعا يزيد أو يقل ده حسب كل واحد فينا …
9- الناس :
الشعب اللاتفي شعب لطيف جدا , بيفرح لما يلاقيك جاي تزور بلده , عمري ما حسيت بأي عنصريه او مواقف تضايق في لاتفيا أطلاقا , و لما كنت بحتاج أي مساعده او لو حبيت اسأل علي اي حاجه كان الكل بيساعدني , 30 % من الشعب اللاتفي اصلهم روس , علشان كده هتلاقي ان الروسية ساعات بيتكلموها هناك , بس اللغة الأولي طبعا هي اللغة اللاتفية …
10- لاتفيا مش بس ريجا :
ناس كتير بتسافر لاتفيا و مبتروحش غير ريجا بس , لاتفيا مليناه مدن كتير جميلة جدا , مدينة زي سيجولدا , او مدينة يورمالا الشاطئية , او سسيس أو ليبايا … كل مدينة من دول عايزالها مقالة زي دي لوحدها … علشان كده لو زرت لاتفيا لازم تزور المدن دي …
سوفينير ال Black cat , رمز المبني الشهير في ريجا و اللي اصبح رمز ريجا
سافرت ريجا قبل كده؟ ايه اللي عجبك فيها؟ ايه اللي ممكن تضيفه للمقالة دي؟
لو عجبتك المقالة قولي رأيك في الكومنتات , او شيرها علي الفيسبوك او تويتر
5 comments
كلام جميل جدا .. انت فعلا غطيت زيارة ريجا والإقامة فيها بشكل جيد وسلس انا فعلآ زرتها كتير ولما قريت مقالك تذكرت كل لحظة حلوة فيها وتذكرت اد ايه هي مدينة جميلة وناسها حلوين ومحترمين ، انا باحتفظ بصور جميلة من ريجا .. اختيار موفق لكل من يرغب في زيارة مدينة أو دولة رائعة .
إذا كنت نفسك تلف العالم وتسجل انطباعاتك عن كل دولة وكل مدينة فأنا بقي زرت العالم اكتر من ست مرات بس مش زيك لأ ده كان لطبيعة عملي مدير تصوير علي متن بواخر الركاب العالمية لأكثر من 25 سنة فمعظم دول العالم ومدنها خاصة المطلة علي البحار والأنهار زرتها وممكن تستعين بي في معرفة معلومات تهمك قبل ما تقرر تزور دولة ما .. بطبيعة الحال أملك مكتبة غزيرة من الصور حول العالم لأهم معالم المدن السياحية .. وربنا يوفقك.
ما شاء الله ، ياريت يا فندم نستفيد بخبرات حضرتك و هستشير حضرتك -لو تسمحلي- في بلاد كتير ناوي ازورها خصوصا اني بحب ازور البلاد اللي مبتكونش مشهوره سياحيا و اللي دايما بتكون زي ممتعة اكتر زي لاتفيا و ايسلندا و كرواتيا و بلاد كتير .
السلام عليكم ممكن حد يفيدني لو سمحتو
عايزة اعرف ايه هو الايميل اللي بيتبعت ليه تضلم فسزا لاتفيا لو سمحتو لو حد ليه علم وشكرا ليكم
و عليكم السلام ،
علي حسب القنصلية ، قصدك قنصلية لاتفيا في اي بلد؟ كل قنصلية ليها ايميل