فيزا أوزباكستان .. أزاي تطلعها أونلاين بكل سهولة

فيزا أوزباكستان أصبحت حديث الكثير من الناس مؤخرا بعد ما بقت أونلاين لمعظم مواطني الدول العربية في 2019.

أوزباكستان الدولة المظلومة سياحيا و اللي من وجهة نظري في الكام سنة الجايين هتكون محطة سياحية مهمة جدا في وسط أسيا , مين فينا مزهقش من السفارات و تجهيز الورق و المواعيد و التوتر اللي بيجيلك لما تكون مستني الرد علي الفيزا , و احيانا الأكتئاب اللي بيجيلك لو لا قدر الله اترفضت فيزتك ..

ده يخلينا نفكر في دول أحلي بكتر و تستاهل فعلا أنك تزورها , فيه دول كتير تأشيراتها سهلة جدا أونلاين  و كنت قلتلك قبل كده عن أفضل و أرخص خمس بلاد تقدر تزورهم في الشتاء القادم ,  في المقالة دي أخترت أوزباكستان و هقولك أزاي تطلع فيزا أوزباكستان و أنت قاعد في بيتك و حاطط رجل علي رجل …

[lwptoc colorScheme=”inherit” borderColor=”#dd8604″]

بس الأول … ليه أسافر أوزباكستان؟

مش كتير اللي يعرفوا قيمة بلد زي أوزباكستان سياحيا أو تاريخيا … بلد فعلا فريدة في وسط أسيا , عاصمتها طشقند , و أسباب كتير تخليك تفكر تزورها زي مثلا :

القيمة التاريخية لأوزباكستان:

أوزباكستان من أهم محطات طريق الحرير التاريخي , منذ مئات السنين سافر التجار و الغزاة و الثقافات و الأديان ما بين الشرق و الغرب في هذا الطريق مرورا بأوزباكستان …

فلما تزور مدنها القديمة زي بخاري , سمرقند , خوارزم (خيوة) و غيرهم هتحس فعلا أنك دخلت التاريخ , بلد عظيمة و فريدة و موطن لكبار العلماء و المفكرين …

الطبيعة البسيطة الفريدة:

تتميز أوزباكستان بطبيعتها الفريدة من صحاري و أنهار و غابات .. هتستمتع جدا بالسفاري و استكشاف حياة البدو الرحل ..

الثقافة و العادات الأوزبكية :

الثقافة الأوزبكية من أغني الثقافات اللي ممكن تشوفها و ده لكون أوزباكستان علي طريق الحرير زي ما ذكرنا من قبل , علشان كده هتلاقي تأثير كتير علي ثقافتها من ثقاقات أخري زي الثقاقات الأسلامية و الصينية و العربية و غيرهم … ده غير طبعا المطبخ الأوزبكي اللي بيتميز بأطباق مميزة تستاهل نسردها في مقالة منفصلة …

أزاي أقدر أطلع فيزا أوزباكستان أونلاين ؟

من حوالي عام كان صعب علي معظم مواطني الدول العربية الحصول علي فيزا أوزباكستان و ده لقلة تمثيل الدولة الدبلوماسي في معظم الدول العربية , لكن في 2019 أتاحت أوزباكستان الحصول علي الفيزا أونلاين لجنسيات كتير , أغلبية مواطني الدول العربية زي المصريين و التوانسة و المغاربة و الجزائريين و غيرهم يقدروا يقدموا أونلاين و ياخدوا الفيزا في خلال يومين , بعض الجنسيات مازال غير متاح ليهم التقديم أونلاين فبالتالي مضطرين يقدموا عن طريق السفارات الأوزبكية في بلادهم ..

ايه اللي محتاج تجهزه قبل التقديم علي فيزا أوزباكستان ؟

3 حاجات محتاج تكون مجهزها قبل التقديم علي الفيزا :

المصدر : الموقع الرسمي لفيزا أوزباكستان الألكترونية

-بطاقة دفع ألكترونية (كريدت كارد) لدفع مصاريف الفيزا علي الموقع و المصاريف هي (20 دولار أمريكي للدخول الواحد – 35 دولار أمريكي لدخول مرتين – 50 دولار أمريكي لدخول متعدد) .

-صورة شخصية ليك بخلفية بيضاء مقاس 3.5×4.5 cm و بمواصفات معينة كما في الصورة .

-صورة ضوئية scanned من باسبورك و برضه تكون بمواصفات معينة كما في الصورة.

طيب دلوقتي جهزت كل حاجه , اعمل ايه بعد كده ؟

-هتدخل علي الموقع الرسمي لفيزا أوزباكستان من هنا 

-هتضغط علي  Application for e-visa

-و بعدين تختار بلدك و نوع الفيزا اللي عايزها و الفترة اللي هتسافرها لأوزباكستان.

-بعدين تدخل بياناتك المطلوبة من أسمك – تاريخ ميلادك – بيانات باسبورك – وظيفتك – عنوانك …إلخ

-و بعدين ترفع صورتك الشخصية و صورة باسبورك.

-و بعدين تفعل التسجيل عن طريق بريدك الألكتروني .

-و أخيرا تدفع مصاريف الفيزا بكارد فيزا أو ماستركارد.

و بعد كده تستني الفيزا توصلك علي الأيميل في خلال أيام قليلة , تطبعها و تسافر بكل سهولة …

شوية حاجات لازم تبقي عارفها عن فيزا أوزباكستان الأونلاين :

-لازم تطبع الفيزا أول ما توصلك علي الأيميل .

-لو عيلة و هتسافر مع أطفال , لازم تعمل فيزا لكل شخص حتي لو طفل عنده يوم واحد.

-و انت مسافر لازم يكون معاك حجوزات فنادق و فلوس تكفي رحلتك في أوزباكستان علشان ضابط الجوازات هناك يكون مطمن و انت داخل.

دي كانت كل حاجه محتاج تعرفها عن التقديم علي تأشيرة أوزباكستان , لو خضت التجربة دي قبل كده يا ريت تشاركنا بيها , أو لو عندك سؤال أو استفسار شاركنا بيه في الكومنتات أو في صفحات السوشيال ميديا