كام مره خططت انت و اصحابك تسافروا و الموضوع باظ بسبب انكم مش عارفين تظبطوا المواعيد ؟ تاني سبب بسمعه من الناس اللي لسه مخاضتش تجربة السفر عن ليه مسافروش – بعد سبب الفلوس طبعا – هو “لأن مفيش حد يسافر معايا” ..
أغلبية سفري بتكون لوحدي , و أكتر مرات استمتعت فيها في السفر هي لما بكون مسافر لوحدي , أكيد طبعا لما تكون مسافر مع اصحابك او اهلك هتكون مبسوط و بتكون تجربة روعة … بس أنا انهارده هقولك 10 اسباب ليه انك تسافر لوحدك تجربة لازم تجربها علي الأقل مره في العمر
1- هتقدر تخطط لرحلتك زي ما أنت عايز !
أهم سبب من اسباب انك تسافر لوحدك هو انك تبقي حر , جرب كده تشوف ايه اهتماماتك في السفر (الطبيعة او التاريخ او زحمة المدن) و اسأل اي حد حواليك عن اهتماماته , بنسبة 95% هتلاقي اهتمامتكو مختلفة , انك تسافر لوحد ده بيخليك تخطط سفريتك زي ما أنت عايز , متعملش غير اللي انت نفسك فيه , و متتجبرش انك تروح بلد او تعمل حاجه انت مش حابب تروحها .
2- هتقابل أهل البلد اللي هتسافرلها بسهولة :
لما تسافر لوحدك فرصتك انك تقابل و تتواصل مع اهل البلد اللي انت رايحلها أسهل بعكس لو كنت مع مسافر مع حد … فرصك انك تلاقي حد يستضيفك مثلا علي couchsurfing بتكون اسهل , الناس لما تسمع اني بسافر لوحدي بيسألوني “ازاي بتفضل طول السفرية لوحدك ؟ ازاي مبتزهقش؟” اللي جرب السفر لوحده هيعرف انه ممتع جدا , انت بسهولة بتتعرف علي مسافرين زيك في الهوستل مثلا , بتلاقي ناس كتير شبهك و مسافرين زيك و بتكون صداقات بسهولة .
3- هتزود ثقتك بنفسك !
ده اهم سبب من وجهة نظري , انك تسافر لوحدك ده هيخليك تزود ثقتك في نفسك بطريقة كبيرة جدا , هتلاقي نفسك بتعمل حاجات عمرك ما كنت تتخيل انك ممكن تعملها في يوم من الأيام , انك تحل مشكلة او تاخد قرار اثناء سفرك او حتي تقرر انك تخوض مغامرة , لما تكون لوحدك هتعرف تاخد القرارات دي من غير ما حد يأثر علي تفكيرك او حتي يخليك تعمل حاجه انت مش حابب تعملها.
4- تكتشف نفسك و حتي يخليك تعمل حاجات “عبيطة” مش هتعرف تعملها غير لوحدك :
السفر لوحدك هيخليك تعرف حاجات كتير عن نفسك , هتبدأ تعرف انت بتحب ايه و بتكره ايه فيما يخص السفر , هيديلك فرصة تجرب كذا حاجه براحتك … ده بالأضافة انك تعمل حاجات عبيطة مش هتعرف تعملها الا لو لوحدك .. يعني مثلا جه في بالي اركب اتوبيس بالليل في ريجا في لاتفيا لأخر الخط علشان اتفرج علي الناس و البلد و في الاخر الاتوبيس ركن في اخر محطة في اخر الخط و تهت يومها و خدت وقت طويل لغاية ما رجعت الهوستل و كانت تجربه عمري ما هنساها 😀
او مثلا يوم ما خدت العربية اللي مأجرها في ايسلندا و قررت اسوق بالليل و اطارد الشفق القطبي حوالين ركيافيك عاصمة ايسلندا علشان اشوفه لغاية ما وصلت للمناره Grotta lighthouse علي اطراف ركيافيك و قررت اقضي الليل في العربية في الجو قارص البرودة علشان استمتع بانوار الشفق القطبي طول الليل
او يوم ما و انا في كرواتيا جت في دماغي ازور مدينة موستار الساحرة في البوسنة لمدة يوم و ارجع تاني كرواتيا ..
مدينة موستار البوسنة
حاجات كتير ممكن تعملها و تنفذها و انت لوحدك , عمرك ما هتحس انك اتجننت في السفر الا لما تكون لوحدك …
5- هتبقي حر “ماليا” :
لما تكون مسافر مع حد , غالبا بتضطروا تعملوا كل حاجه مع بعض , لو الاغلبية عايزين ياكلوا في المطعم الفلاني , انت مضطر تاكل معاهم , لو الأغلبية عايزين يروحوا المكان الفلاني , انت مضطر تروح معاهم , لما تسافر لوحدك انت بتبقي حر تصرف زي ما انت عاوز , عايز تنزل في فندق خمس نجوم ؟ براحتك … عايز تروح فنادق مجانية و توفر فلوسك ؟ براحتك … لما تكون لوحدك عندك كامل الحرية تعمل اللي انت نفسك فيه.
6- انك تسافر لوحدك ده هيخليك مسافر محترف :
أفضل حاجه تخليك تبقي مسافر محترف هو انك تسافر لوحدك , حتي لو كنت في حياتك من النوع اللي بيعتمد علي غيره او زي ما بيقولوا ” بيغرق في شبر ميه” , السفر لوحدك هيخليك تقرأ و تخطط صح لسفريتك , تتعلم كل صغيره و كبيره عن المكان اللي هتروحه , و تبني تجربه عمرك ما هتنساها طول عمرك , شوف معظم الرحالة العرب أو الأجانب او اي حد بيسافر كتير وواخد السفر هواية … هتلاقي ان معظم سفرياته بتكون لوحده … علشان كده دي تجربة لازم تجربها مره علي الاقل.
7- بيعلمك التواضع و بيخليك تعرف يعني ايه اقلية و اد ايه قبيحة العنصرية :
دي أهم حاجه اتعلمتها من السفر لوحدي , هو التواضع و ازاي تلغي العنصرية جواك … بمعني انك لما تكون مسافر لوحدك في بلد غريب , بتكون مختلف عن اهل البلد في ملامحك او لغتك او عرقك او خلفيتك الثقافية . فبالتالي بتفرح لما تلاقي اهل البلد “الاغلبية” بيعاملوك بترحاب و احترام … و في نفس الوقت بتقابل انت اثناء سفرك ناس من اديان و ثقافات و معتقدات تانية مختلفين عنك , و بتعاملوا بعض بكل احترام ….
ده بيخليك لما ترجع بلدك تعامل الأقليات اللي في بلدك بنفس الطريقة اللي حابب تتعامل بيها انت و انت مسافر , و هتعرف اد ايه العنصرية حاجه قبيحة , صعب اوي تلاقي حد سافر كتير و في نفس الوقت عنصري او تفكيره محدود , السفر دايما بيعلم التسامح و الرقي.
8- هيعلمك ازاي تتصرف في الأزمات المفاجأه :
مفيش حد فينا بيسافر الا و جرب موقف أو اكتر كانوا صعبين و اتعلم منهم كتير … زي مره اتلغت رحلة طيران العودة من لاتفيا بسبب الطقس , و المشكلة ان ده كان اخر يوم ليا في منطقة الشنجن و كان لازم اطلع من الشنجن يومها و الا هيعتبر اني كسرت الفيزا و دي مشكلة (فيها غرامة كبيره و بلوك من الشنجن لمدة خمس سنين) يومها كلمت سفارة لاتفيا في القاهرة و قالولي طالما مشكلة شركة الطيران يبقي تجيب منهم ورقة تثبت ده و مش هتبقي مشكلة … بس برده مستكفتش بده و رحت للطيران التركي و اصريت انهم يلاقوا حل , و ساعتها حجزولي علي رحلة علي الطيران الروسي بديله علي حسابهم و قدرت اخرج من الشنجن في نفس اليوم …
علشان كده لما تكون متحمل مسئولية نفسك ده هيخليك تتعلم حاجات جديدة و تنمي قدرتك في التعامل مع الازمات. , و لو ناوي تسافر اول مره , اقرأ الموضوع ده : 10 غلطات لازم تتفاداهم لو هتسافر اول مره
9- لأنه أمان جدا !
أكتر حاجه بتضايقني لما حد يقول “لا يا عم السفر لوحدك مش امان!” , الكلام ده غلط جدا , السفر لوحدك أمان جدا , و الكلام ده ينطبق عليكي لو بنت و هتسافر لوحدها , السفر لبلد تانية ميفرقش نهائي عن سفرك لمدينة تانية جوا بلدك , بالعكس ده يمكن في بلاد كتييير أأمن بكتير بلادنا العربية , طول ما انت مخلي بالك من نفسك و من متعلقاتك الشخصية يبقي متشيلش هم الأمان خالص , سافر و حط في بطنك بطيخة صيفي 😀
10- لأنك هترجع مبسوط من السفرية :
حتي لو قابلك مشاكل كتير في سفرك , تجربة انك تسافر لوحدك فعلا فريدة , و اكيد هترجع مبسوط من السفرية , يمكن لما بفكر في كل تجاربي و سفرياتي لما كنت لوحدي , مفيش ولا سفرية فيهم كانت وحشة او رجعت متضايق منها , بالعكس حسيت اني اتعلمت كتييير منهم و خدت خبرات كتير فادتني جدا في حياتي..
