طيارتك اتلغت ؟ او حتي اتاخرت؟ مين فينا مبيقابلش الموقف ده و هو مسافر , زي ما السفر ممتع جدا بس ساعات بتقابلنا مواقف صعبة , انهارده هنتكلم عن موقف بسهولة أوي ممكن يقابلك و انت مسافر و ايه حقوقك اللي لازم تبقي عارفها و نصائح لازم تخلي بالك منها …
لازم تبقي هادي :
خلينا نتفق ان موقف زي ده فعلا بيكون صعب , لما تكون رايح المطار و تكتشف ان طيارتك اتلغت او هتتأخر لمدة طويلة دي حاجه بتنرفز و خصوصا لو فيه عندك ميعاد او محتاج توصل لوجهتك في اسرع وقت … بس اهم حاجه علشان تعرف تاخد حقك في الموقف اللي زي ده انك تكون هادي جدا و حازم في نفس الوقت , لما تكون هادي و بتتكلم بطريقة كويسة مع موظف شركة الطيران هيحاول يساعدك بعكس لو اتكلمت بطريقة مش كويسة لان في الأول و في الأخر الموضوع بيكون خارج عن ارادته هو كمان ..
اعرف حقوقك :
بصفة عامة لو طيارتك اتلغت قبل مده قصيرة من ميعاد الرحلة , فشركة الطيران مسئولة انها توصلك لوجهتك النهائية عن طريق طريقة بديلة اخري ,طبعا القوانين بتختلف اذا كانت الشركة اللي هتسافر معاها داخل الأتحاد الأوروبي وللا خارج الأتحاد الأوروبي , لو مسافر داخل الأتحاد الأوروبي , فلو مثلا طيارتك اتأخرت 3 ساعات او اكتر فالتعويض اللي هتاخده هيكون بالضبط كأن طيارتك اتلغت …
اما لو كنت حارج الأتحاد الأوروبي , فبيبقي حسب الشركة اللي انت اللي مسافر عليها و قوانينها , بس غالبا بيحجزولك علي رحلة بديله توصلك وجهتك النهائية .
امتي استحق التعويض ؟
خلينا نتفق أولا ان شركات الطيران مبتدفعش تعويضات في حالات الغاء او تاخير رحلات بسبب الطقس السئ او الإضرابات او اي سبب تاني خارج عن ارادة شركة الطيران … اي سبب تاني بسبب خطأ من الشركة فهي مسئولة عن تعويضك ..
لو الرحلة اتأخرت اكتر من ساعتين في الرحلات القصيرة او 4 ساعات في الرحلات الطويلة , فالشركة ملزمة بتقديم قسيمة لشراء وجبة meal voucher و برضه توفرلك اقامة لو التأخير هيبقي اطول .
طريقة التعويض ؟
-في الرحلات القصيرة و اتأخرت الطيارة اكتر من 3 ساعات : 250 يورو
-في الرحلات المتوسطة (1500-3500 كم) اكتر من 3 ساعات : 300 يورو
-في الرحلات الطويلة , التأخير 3-4 ساعات : 300 يورو , لو اكتر من 4 ساعات : 600 يورو
-لو اتلغت طيارتك : بترجعلك الشركة فلوسك حتي لو كانت تذكرتك غير قابلة للأسترداد , او بتحجزلك رحلة بديلة علي أي شركة طيران تانية .
تعمل ايه لو اتلغت طيارتك الأولي لو مسافر ترانزيت ؟
لنفترض مثلا انك حاجز رحلة ترانزيت , هتركب طيارة و بعدين تنزل ترانزيت قبل ما تركب طيارتك التانية علشان توصل وجهتك النهائية … افرض ان طيارتك الأولي اتلغت او اتأخرت؟ تعمل ايه؟
هنا فيه سيناريوهين … السيناريو الأول انك تكون حاجز الرحلتين بتذكرة واحده او من جهة واحده , ساعتها شركة الطيران ملزمة تحجزلك الرحلة التانية اللي هتروح عليك بسبب تأخير أو إلغاء الرحلة الأولي ..
السيناريو التاني هو انك تكون حاجز رحلتين الترانزيت منفصلين بمعني لو مسافر باريس عن طريق اسطنبول مثلا , فتحجز الرحلة الأولي من بلدك لاسطنبول علي الخطوط التركية مثلا , و بعدين تحجز من اسطنبول لباريس علي الخطوط الفرنسية … بمعني ان التذكرتين منفصلتين …
في الحالة دي لو الطيارة الأولي اتأخرت و هتروح عليك الطيارة التانية ساعتها الشركة مش ملزمة تحجزلك الرحلة التانية و لا تعوضك عنها , هتعوضك بس عن الرحلة الأولي اللي اتأخرت او اتلغت …
علشان كده لو ناوي تسافر ترانزيت , احجز دايما من جهة واحده الرحلة كلها , عشان الشركة تبقي مسئولة لو حصل حاجه …
ليه لازم توصل المطار بدري قبل رحلتك ؟
المفروض تكون في المطار تعمل check in قبل رحلتك الدولية ب 3 ساعات علي الأقل , و قبل رحلتك الداخلية بساعتين علي الأقل … مش بس علشان تلحق تعمل check in و تتجنب الزحمة و تعرف توصل للبوابة بتاعتك و تبقي عامل حسابك لو اي رحلة اتلغت او اتأخرت , لأ و كمان شركات الطيران علشان تديلك التعويض بتشترط انك تكون عامل check in قبل المدة دي ,
بمعني لو رحلتك اتأخرت او اتلغت و انت كنت عامل check in قبل ميعاد الطياره بنص ساعة بس مثلا, فمن حق شركة الطيارة متديلكش تعويض …
اتواصل مع شركة الطيران لو اتلغت طيارتك :
picture by WestportWiki
لو كنت في المطار و اتلغت طيارتك , طبعا هتتوجه لمكتب شركة الطيران في المطار و هتلاقي طابور طويل من مسافرين زيك بيشوفوا حل , اقف في الطابور بس في نفس الوقت اتصل بشركة الطيران و انت واقف , و حاول تلاقي حل مع موظف شركة الطيران علي التليفون , لانك لو استنيت لغاية ما تاخد دورك في الطابور ساعتها ممكن كل التذاكر القريبة المتاحة تكون خلصت …
مواقف حصلت معايا :
حصل معايا موقفين قبل كده … أصعبهم كان في لاتفيا … كان فاضل يوم واحد ليا في لاتفيا و كان المفروض اسافر من لاتفيا لاسطنبول في اليوم اللي بعده اللي هو اخر يوم ليا في فيزا الشنجن … في اليوم القبل الأخير جالي رسالة علي تليفوني من الطيران التركي بيبلغني ان طيارتي اتلغت بسبب سوء الأحوال الجوية و اني اتواصل مع الطيران التركي ” ..
طبعا كان موقف صعب لأني لو مكنت خرجت بره منطقة الشنجن اليوم ده هكون بكره كسرت الفيزا و دي عواقبها سيئة علي أي حد بيحب السفر …
أول حاجه عملتها هي اني اتصلت بسفارة لاتفيا في القاهرة اللي اصدرت ليا الفيزا في المره دي و شرحلتهم الموقف كاملا , ساعتها طمنوني ان مادام انه بسبب شركة الطيران فالموضوع مفيهوش مشكلة , كل اللي المفروض اعمله اني اخد ورقة من شركة الطيران التركي تثبت انهم هم اللي لغوا الرحلة و بالتالي مش هيكون فيه مشكلة …
لكني مكتفتش بده , بعدها رحت لمكتب الطيران التركي في مطار ريجا , و قلتلهم ان رحلتي اتلغت , ساعتها قالولي انهم هيحجزولي علي الطياره التالية تاني يوم , ساعتها وضحتلهم ان ده اخر يوم ليا في منطقة الشنجن و اني مينفعش استني لتاني يوم ….
الموظفة في مكتب الخطوط التركية كانت متعاونة جدا , و بعد البحث قرروا يحجزولي رحلة لموسكو و بعدين ترانزيت 12 ساعة في مطار شيريميتييفو بموسكو و بعدين تذكرة تانية من موسكو لاسطنبول … علما بأني لما شفت تكلفة الرحلة دي لقيت ان تمنها اكتر بكتير من الرحلة من ريجا لأسطنبول … بس ده حقك كمسافر اتلغت رحلته و هيتسببلك ضرر بسبب إلغاء الرحلة دي -بالرغم ان الإلغاء خارج عن ارادتهم .
الموقف التاني كان في مطار Oslo Sandefjord في النرويج , كان عندي رحلة علي طيارات Wizzair بعد ال Check in و مستنيين اعلنوا ان الطياره هتتأخر ساعتين و مأعلنوش السبب , بعد الساعتين اعلنوا انها هتتأخر 3 ساعات و ساعتها وزعوا علينا فاوتشر Voucher نشتري بيه وجبات من المطار , بعدها اعلنوا انها هتتأخر كمان ساعة , يعني اجمالي 6 ساعات قاعدها في المطار مستني الطياره …
بعد لما رجعت مصر قررت اني اطالب بتعويض عن التأخير ده خصوصا انه من حقي و برضه لانهم مأعلنوش سبب التأخير ده , اتواصلت مع شركة من الشركات الأونلاين اللي بتديها كل بيانات رحلتك و هما بيتفاوضوا مع شركة الطيران بيدوك التعويض مقابل عمولة بسيطة ليهم ,
و بعد كذا يوم ردوا عليا ان مش منطبق عليا التعويض لأن التأخير ده كان بسبب سوء الأحوال الجوية و هو خارج عن إرادة شركة الطيران …
النصيحة الأخيرة :
لازم تقرأ كويس اوي القوانين الخاصة بالشركة اللي مسافر عليها و تعرف ايه حقوقك و واجباتك كمسافر علي طيارة الشركة دي , لأن في أوقات كتير بيحقلك حاجات بس للأسف انت متعرفش الحقوق دي فبالتالي بتروح عليك …
علشان كده اقرأ كويس قبل السفر … و برضه اهتم بتأمين السفر , في وثائق تأمين بتغطي الغاء الرحلات او حتي تأخيرها و بتوفرلك اقامة او وجبات لو اتحطيت في مواقف زي دي …
اتحطيت في مواقف زي دي قبل كده؟ عندك نصائح تحب تضيفها ؟ شاركنا بيها في الكومنتات هنا او علي صفحات التواصل الإجتماعي …
