بتحلم تزور الأهرامات؟ الشواطئ الرائعة و تستمتع بالغوص و الشعب المرجانية ؟ تشوف ثقافة غنية و حضارة الاف السنين ؟ تشوف نهر النيل أطول و اعظم نهر في العالم؟ وللا تشوف خان الخليلي اكبر بازار في الشرق الأوسط و من أقدمهم؟ و للا تزور الأسكندرية عروس البحر المتوسط اللي بناها الأسكندر الأكبر؟ ، وللا واحة سيوة الساحرة… وللا شرم الشيخ وللا الغردقة و شواطئهم المميزة؟؟ كل ده هتلاقيه في أم الدنيا … مصر
ناس كتير بعتولي علي صفحات التواصل الإجتماعي سألوني عن مصر و ايه احسن المدن اللي تتزار , علشان كده قررت اكتب كذا مقالة بتغطي الجوانب دي , و انهارده هقولك علي 10 أسباب تخليك لازم تزور مصر علي الأقل مره في العمر …
بما إني مصري , و المقالة دي تعبر عن رأيي , فحبيت ان النقط اللي هكلمك فيها تكون عشوائية , اخترت اكتر 10 حاجات بحبها في بلدي , حاجات هتخليك فعلا تحب تزور مصر اللي متأكد انك حتحبها و هتعوز ترجعلها تاني , اللي يشرب من مية النيل لازم يرجعله تاني 😀
[lwptoc]
1-الأهرامات :
أعظم اثر في العالم , مين مسمعش عن أهرامات الجيزة او مشافهاش في التليفزيون او قرأ عنها في الكتب او الروايات … اتخيل انك تقف قدام الأهرامات اللي اتبنت من الاف السنين , الفكرة مش بس في انها اتبنت من الاف السنين و لسه صامدة , الفكرة اللي هتيجي في بالك ان ازاي الفراعنة نفسهم بنوها ؟ كل حجر يزن اطنان من الكيلو جرامات , اعجاز هندسي رهيب … لازم تجرب عرض الصوت و الضوء في الأهرامات , تجربة رهيبة …
مينفعش تزور مصر و متزورش الأهرامات و تركب جمل او خيل لانها فعلا تجربة مش هتتكرر في أي حتة في العالم .
2-الأسكندرية :
الأسكندرية العظيمة اللي بناها الأسكندر الأكبر سنة 300 قبل الميلاد , اللي كانت يوم من الأيام اسمها مدينة المعرفة … اللي بيسافر كتير بيعرف ان في كل دولة فيه مدينة كده جوها مميز و بيخليك تحسله بالحنين دايما , في مصر المدينة دي هي الأسكندرية , لازم لما تزور مصر تقضي علي الأقل يوم او يومين في الأسكندرية لأنك عمرك ما هتنساها…
3-خان الخليلي :
من المناطق المحببه اوي للسياح هو خان الخليلي , اكبر بازار في الشرق الأوسط و متعة البحث عن الكنوز اللي فيه و المفاصلة في الشراء مع البائعين … طول ما انت ماشي في سوق خان الخليلي هتشوف الاف القطع و التحف المصنوعة بدقة منها الفرعوني او الأسلامي او حتي القبطي , تحف و تذكارات و تماثيل و حاجات كتير مينفعش متشوفهاش …
جنب خان الخليلي لازم تشوف شارع المعز , اللي بيعتبر اكبر متحف اسلامي مفتوح , شارع مليان بيوت و مباني و مساجد ترجع للعصور الوسطي ايام الفاطميين و المماليك و العثمانيين … هتحس انك رجعت بالتاريخ مئات السنين …
photo by Christopher Rose , Flickr
ولازم تشوف حي الحسين و مسجد سيدنا الحسين , و تشرب شاي في قهوة الفيشاوي التاريخية … اجواء عمرك ما هتنساها طول عمرك …
4-شرم الشيخ و الغردقة و مرسي علم :
مصر بتطل علي البحر المتوسط و البحر الأحمر … سواحل مصر علي البحر الأحمر رائعة … لما تزور مصر لازم تختار مدينة زي شرم الشيخ او الغردقة أو مرسي علم و تقضي كام يوم في منتجع من منتجعاتها علي البحر الأحمر … لازم تجرب الغوص و تشوف بعينك الشعب المرجانية و الحياة البحرية الفريدة … شواطئ البحر الأحمر تعتبر من أحسن شواطئ العالم لممارسة رياضة الغوص و مشاهدة الشعب المرجانية …
لو بتحب الهدوء و الطبيعة لازم تجرب تزور مدينة دهب او راس شيطان جنبها او نويبع… هتخيم هناك و هتنسي العالم كله وسط الطبيعة و البحر و الصحرا …
photo By Mohammed Moussa . CCby-SA 4.0
5-الأقصر و أسوان و نهر النيل:
مدينة الأقصر من أكتر المدن اللي بيحب يزورها السياح علشان يشوفوا معبد الكرنك و بقية المعابد اللي فيها , زمان ايام الفراعنة كانت بتسمي “طيبة” و كانت العاصمة السياسية تاريخيا …
لما تيجي مصر لازم تجرب البواخر النيلية اللي بتبقي فنادق عائمة , بتاخدها من الأقصر لأسوان لمدة 3 او 4 أيام بتزور فيهم المدينتين , شركات سياحية كتير تقدر من خلالهم تحجز الرحلة دي .
في مدينة أسوان هتشوف معابد كتير و اثار رائعه اشهرها معبد ابوسمبل العظيم اللي بناه رمسيس التاني لعبادة الأله امون … من اعظم المعابد في العالم , مينفعش تزور مصر من غير ما تزوره
في اسوان كمان هتشوف البيوت النوبية الجميلة و اهل النوبة الطيبين و هتتعرف علي عاداتهم و تقاليدهم … و هتعرف اد ايه مصر فيها ثقافات غنية جدا و اد ايه اهلها طيبين.
6-القاهرة:
أكبر مدينة في الشرق الأوسط و ثاني أكبر مدينة في أفريقيا بعد لاجوس النيجيرية , في سفرياتي دايما بحاول انغمس في الحياة العادية لأهل البلد اللي بزورها لأن دي متعة في حد ذاتها , في القاهرة هتقدر تعمل ده , تشوف الناس العادية عايشه ازاي , تدوق الأكل المصري و حلاوته , و تشوف اسواقها و شوارعها و زحمتها و كل حاجه فيها …
في القاهرة هتشوف الأهرامات و شارع الحسين و خان الخليلي , هتشوف مجمع الأديان و قلعة صلاح الدين الأيوبي و قصر عابدين , هتشوف حديقة الأزهر و جامع الأزهر , تزور المتحف المصري و تشوف القاهرة من فوق برج القاهرة و دير الأنبا سمعان الخراز اللي محفوره داخل جبل المقطم بالقاهرة…
حاجات كتير ممكن تعملها في القاهرة لما تزور مصر , دي عايزالها موضوع منفصل علشان نتكلم بالتفصيل …
7-الناس :
photo by Mark Fischer-Flickr
و الله مش بسبب أني مصري هقول الكلام ده , بس فعلا الشعب المصري من أطيب الشعوب اللي هتقابلها في سفرياتك حول العالم … جرب كده توقف أي حد في الشارع تسأله اي سؤال هتلاقي الناس كلها اتجمعت و كل واحد هيعرض يساعدك او يدلك علي المكان او الحاجه اللي انت عايزها …
في مصر هتحس انك في وسط اهلك و ناسك … في أي بلد في العالم هتقابل اللي ممكن يحاول يستغلك او ينصب عليك لأنك سائح ده طبيعي… علشان كده أول نصيحة هديهالك … قبل ما تعمل اي حاجه او تشتري أي حاجه اسأل اي حد عن الحاجه دي …
مثلا لو هتركب جمل في الأهرامات , او هتشتري حاجه مثلا … اسأل اي صديق مصري او حتي اي حد ماشي في الشارع و استفسر منه عن الحاجه دي و خليك واثق انه هيدلك علي الصح علشان متنخدعش … في مصر كل اللي هيقابلك هيقولك “نورت مصر” 😀
8-التكلفة:
من سنتين تم تعويم الجنية المصري , مع ان ده أثر علي المواطن المصري لأن الدولار بدل ما كان ب 8 جنيه اصبح ب 17 حنيه , بس ده من حسن حظك انت كسائح جاي تزور مصر 😀
مصر تعتبر حاليا من أرخص دول العالم للسياح , في تاريخ كتابة المقالة دي الدولار الأمريكي =17,9 حنيه مصري , و اليورو = 20.5 جنيه مصري .
ده معناه انك ممكن تفطر فطار مصري اصيل محترم بدولار و نص مثلا , ممكن تتغدي في مطعم كويس بما يعادل 5-10 دولار
لو بتسافر backpacker (زي ما شرحنا ازاي تسافر بأقل التكاليف)و هتقتصد في المصاريف جدا و هتنزل في هوستل و كل ده , ممكن ب 30-40 دولار في اليوم يعيشوك كويس جدا ..
حاول تقرا كتير عن مصر و اسال دايما اي سؤال ييجي في بالك علشان تعرف تخطط صح … و ان شاء الله هنزل كذا مقالة هتغطي السفر لمصر و كل المعلومات اللي هتحتاجها.
9-المطبخ المصري:
الكشري Photo by Dina Said . CC BY-SA 4.0
الأكل المصري ده سبب لوحده يخليك تيجي تزور مصر 😀 , المطبخ المصري غني اوي , موقع مصر الجغرافي و التاريخي مخلي المطبخ المصري فريد لانه متأثر بمطابخ الدول المجاوره زي حوض المتوسط و تركيا و شمال افريقيا … بس زي ما بنقول هنا في مصر “حطينا التاتش بتاعنا” 😀
يعني عندك مثلا المحشي او الدولما اللي تلاقيها في بلاد زي تركيا او العراق او البوسنة … في مصر مختلف , مبنستعملش فيه اللحم المفروم و خلطته المصرية مميزة , او الملوخية مثلا , الملوخية من الأصناف اللي موجودة في معظم الدول العربية زي تونس و سوريا و فلسطين و و و , كل بلد ليها طريقتها اللي بتكون مميزة فيها ..
مينفعش تزور مصر من غير ما تجرب الملوخية المصرية بالأرانب , او الحمام المحشي , او الكباب و الكفتة او البامية المصرية , او طبعا ملك المطبخ المصري الكشري ….
10-الأمان:
طبعا بعد ثورات الربيع العربي السياحة مش بس في مصر بل في كل بلاد الشرق الأوسط قلت جدا و ده بسبب الشحن الأعلامي و التقارير الأعلامية اللي 90% مش دقيق علي أرض الواقع …
محطة رمسيس بالقاهرة Photo by Mark Fischer -Flickr
كتير من رواد المدونة من تونس و المغرب و العراق و الأردن و غيرهم بيتقال عن بلادهم برضه نفس الكلام بخصوص السياحة بس علي أرض الواقع الحال مش كده خالص و كل البلاد دي أمان جدا للسياح .. مصر كذلك أمان جدا للسائح العادي , مش بس كده , مدن مصر يمكن أأمن من مدن كتير في أوروبا او أمريكا و ده مش كلامي ده كلام تقارير منظمات دولية ..
ده مثلا التقرير السنوي لمنظمة جالوب اللي يتعمل تقارير سنوية عن الأمن و القوانين في الدول , عملت استفتاءات بين مواطنين و مسافرين ل 135 دولة يشوفوا هل بيشعروا بالأمان في الدول دي وللا لأ … مصر خدت المركز ال16 من حيث الشعور بالأمان , و سبقت دول زي بريطانيا اللي خدت المركز ال21 , او امريكا اللي خدت المركز ال35
غير كده اسأل اي حد سافر مصر مؤخرا هيقولك اد ايه هو حس بالأمان في مصر و بين المصريين , انت نفسك هتحس بده لما تزور مصر , مش هتحس انك سائح , بالعكس هتحس انك بين أهلك و ناسك …
اتمني تكون المقالة دي ادتك فكرة و لو بسيطة عن الحاجات المميزة في مصر و اللي ذكرته ده جزء بسيط جدا من اللي موجود في مصر .. لو زرت مصر و حاجه عجبتك و حبيت تشاركنا بيها نضيفها للمقالة يا ريت تشاركنا بيها في الكومنتات هنا او في السوشيال ميديا … و لو عندك اي سؤال متترددش في أنك تسأله … و مقدما “نورت مصر” 😀
