لما تيجي تحجز مكان الإقامة بتقع في في الحيرة المعتادة .. أحجز فندق وللا هوستل؟ احجز من بوكنج وللا من موقع الفندق ؟, هل الكاوتش سيرفنج أمان ؟ هل Airbnb أحسن وللا الفندق ؟
لما تيجي تحجز مكان الإقامة كل الأسألة دي هتلاقيك أتوماتيك بتفكر فيها , علشان كده انهارده هكلمك علي كل النقط دي و هحاول أغطيها بحيث تكون علي علم بكل المعلومات اللي هتحتاجها قبل ما تحجز مكان الإقامة بتاعك و كمان هقولك علي شوية نصائح تخلي بالك منها و انت بتحجز أي إقامة ..
1- القاعدة الأولي لما تيجي تحجز مكان الإقامة … ابعد عن الموسم :
لما تيجي تحجز مكان الإقامة حاول دايما تبعد عن الموسم , طبيعي انك مثلا تلاقي الأسعار أضعاف الأضعاف في الصيف مثلا , أو تلاقي أسعار الفنادق في ريو البرازيلية في شهر فبراير نااار بسبب الكرنفالات الشهيرة , و برضه أحيانا تلاقي ان الأسعار اغلي في الويك اند عن وسط الأسبوع …
علشان كده لما تيجي تحجز حاول دايما تبعد عن المواسم و تكون مرن علي قد ما تقدر في مواعيد سفرك بحيث تختار الوقت اللي الإقامة فيه هتكون أرخص …
2- اتأكد دايما من مكان الإقامة و بعده عن وسط المدينة :
معروف دايما ان كل ما بعد الفندق او مكان اقامتك من وسط المدينة كل ما كان سعره أرخص , بس حط في بالك دايما حاجه و هي المواصلات بين مكان الإقامة و بين وسط المدينة ,
فمثلا مش منطقي تحجز فندق أو هوستل رخيص و بعيد عن وسط المدينة و كل مرة هتيجي تخرج هتضطر تركب تاكسي مثلا او أوبر لأن مفيش مواصلات عامة , فهتلاقي نفسك صرفت أكتر بكتير من أنك لو كنت حجزت فندق أو هوستل أقرب و أغلي قليلا …
علشان كده دايما لما تيجي تحجز مكان الإقامة تخلي بالك من النقطة دي لأنها مهمة جدا .
3- حاول تشوف ايه نوع الإقامة اللي محتاجها :
أكتر سؤال دايما الناس بتسألهولي , ايه الأحسن فندق وللا هوستل؟ فندق وللا شقة Airbnb ؟ … صدقني الأجابة دايما هي حسب ظروف سفريتك أنت …
يعني مثلا لو انت Backpacker و كمان عايز توفر , يبقي أحسن حاجه ليك هي الهوستل .. أما لو كنت مسافر مثلا شهر عسل فأحسن حاجه هتكون منتجع أو مثلا فيلا بحمام سباحة خاص و دي اسعارهم مش غالية خصوصا في جنوب شرق أسيا , او طبعا فندق ..
أما لو كنتم عيلة فأحسن حاجه شقة من Airbnb , أما لو كنت مسافر لوحدك و مش عايز تدفع حاجه في الإقامة يبقي جرب Couchsurfing و هتلاقيها تجربة حلوة أوي …
4-حاول دايما لما تحجز مكان الإقامة يكون فيه مطبخ :
و ده هيبقي متاح أكتر لو حجزت هوستل أو شقة من Airbnb او نزل أو حتي لو حد استضافك من موقع couchsurfing لأن صدقني ده هيخليك توفر كتيييير أوي بالنسبة للأكل ..
لأن ببساطة ممكن تشتري أكل من السوبرماركت و تحضره بسهولة في المطبخ أو تسخنه في المايكرويف و او تحفظه لبعد كده في التلاجة …
5- دايما ابدأ بالبحث عن الهوستلات :
اسأل أي حد سافر كتير , هيقولك دايما ان المتعة كلها في النزول في الهوستل , لأنك بتقابل مسافرين كتير زيهم زيك و بتتعرف علي ثقافات كتير مختلفة …
لو كنت مسافر مع حد أو بتكره الغرف المشتركة , فيه هوستلات كتييير فيها غرف زوجية او ثلاثية منفصلة , و هتلاقيها أرخص بكتير من أسعار الفنادق , علشان كده حاول دايما تبدأ بالبحث عن الهوستلات لعلي و عسي تلاقي حاجه مناسبة تعجبك …
كتبت مقالة كاملة قبل كده عن ازاي تختار الهوستل المثالي , لازم تقراها قبل ما تحجز الهوستل علشان تبقي مطمن ان أقامتك هتبقي مثالية من غير أي مشاكل ..
6-بص علي Airbnb , ممكن تلاقي عروض تحفة :
كتبت برضه مقالة كاملة عن دليلك لتأجير إقامة علي Airbnb و ميزة Airbnb أنه عليه حاجات كتييير متنوعة ممكن تأجرها من أول كوخ صغير علي شجرة لغاية قلاع و قصور مرورا بشقق و فلل و اقامات كتير متنوعة في كل مدينة حول العالم ..
Airbnb ممكن تلاقي عليه أسعار حلوة جدا , يعني ممكن مثلا تلاقي فيلا كاملة بثمن غرفة في فندق 5 نجوم مثلا , او مثلا شقة في موقع كويس جدا في أي مدينة هتزورها بثمن غرفة في فندق
لو لسه معملتش أكونت … حظك كويس , دلوقتي تقدر تعمل حساب عن طريق اللينك ده و هتاخد عن طريقي كريدت 25 دولار تقدر تستخدمهم في أول حجز ليك لأي أقامة من علي موقع Airbnb
7- قارن سعر أي إقامة بأسعار Booking :
بلا شك booking.com هو عملاق الحجوزات بالنسبة للإقامات , لما تيجي تحجز مكان الإقامة اللي عايزه لازم تبص علي booking
الموقع فيه كل أنواع الأقامات من فنادق و هوستلات و نزل و فلل و حاجات كتير منوعة , مش بس كده , بوكنج بيضمنلك ان السعر اللي هتحجز بيه هو أقل سعر , و لو حجزت مثلا غرفة بسعر معين من بوكنج و لقيت نفس الغرفة بنفس الشروط أرخص علي موقع تاني … تقدر تتواصل مع بوكنج و توريهم اللينك و ساعتها هيرجعولك الفرق …
8- جرب الcouchsurfing :
عايز تسافر بأقل التكاليف و الاقامة تبقي ببلاش؟ , موقع couchsurfing موقع عالمي بيتيحلك الفرصة دي , فيه ملايين من المشتركين في الموقع من كل انحاء العالم عندهم استعداد يستضيفوا مسافرين لمدة كام يوم ببلاش , كل الفكرة انك بتسجل في الموقع و تعمل لنفسك بروفايل و تكتب معلومات عن نفسك , و تشوف انت هتسافر فين و تشوف الناس اللي في المدينة اللي هتسافرلها و تبعتلهم رسالة لطيفة تطلب فيها انهم يستضيفوك و انت و حظك يوافقوا وللا لأ .
تجربة الكاوتش سيرفنج مش بس هتخليك تسافر بأقل التكاليف و ببلاش, هي كمان تجربة في حد ذاتها هتخليك تنغمس في ثقافة البلد اللي هتزورها لانك هتتعامل مع اهل البلد .
