موقع Couchsurfng … يمكن يعتبر من أشهر مواقع السفر في أخر 10 سنين , أتذكر اسمه كتيييير في جروبات و مواقع السفر علي الأنترنت و ناس كتير تعرفه و جربته و ناس تانيه الموضوع بالنسبالها لغز أو حاجه مش مفهومة … علشان كده أنهارده هنتكلم بالتفصيل عن موقع Couchsurfing و هقولك كل حاجه محتاج تعرفها قبل ما تجربه …
[lwptoc colorScheme=”inherit” borderColor=”#dd8604″]
-أيه هي فكرته ؟
فكرته بسيطة جدا … هديلك 3 سيناريوهات تقدر تفهم بيها فكرة موقع Couchsurfing :
-تخيل انك واحد عايش لوحدك مثلا او عندك في بيتك غرفة أو حتي كنبة فاضية , و بتحب جدا التعرف علي الثقافات المختلفة و عندك شغف السفر , و نفسك مثلا تستضيف مسافر أجنبي جاي يزور بلدك و توريه مدينتك و تتفاعل معاه و تتعرفوا علي بعض و تكونوا صداقة بحيث انك لو يوم من الأيام سافرت بلده يستضيفك او يوريك مدينته , او حتي يحكيلك علي تجاربه و سفرياته و يديك أفكار جديدة في مجال السفر …
-تخيل أنك مسافر Backpacker لمدينة جديدة و نفسك تشوف المدينة دي بعيون أهل البلد , و في نفس الوقت توفر في تمن الأقامة و تعمل صداقات مع ناس جديدة يوروك البلد و تتبادلوا الحديث و الثقافات و كل ده , فبتدور علي حد يستضيفك عنده يوم او اكثر في الفترة اللي هتقعد فيها في المدينة اللي هتزورها …
-تخيل انك بتزور مدينة , و حاجز اقامتك في فندق , بس متعرفش حاجه عن البلد , و مش محتاج أكتر أنك تقابل حد يفرجك علي المدينة اللي هتزورها و ممكن تتعشوا سوا او تاخدوا فنجان قهوة و خلاص …
التلت سيناريوهات دول متاحين علي موقع Couchsurfing , أنت لو في بلدك و حابب تستضيف حد , أو لو مسافر و حابب حد يستضيفك , أو لو مسافر و حابب حد يقابلك يفرجك علي المدينة من غير أستضافة … هي دي فكرة الموقع ببساطة …
الموقع بيستخدمه ملايين المسافرين حول العالم في الاف المدن …
هل موقع Couchsurfing مجاني ؟
طبعا , الموقع مجاني و دي من مميزاته , الموقع عباره عن مكان بيوصل المسافرين بالمستضيفين . مفيش أي رسوم مطلوبة خالص لاستخدام الموقع ..
هل استخدام الموقع أمان ؟
لو فاكر لما اتكلمنا عن موقع Airbnb قلنا ان الموقع في حد ذاته موثوق , لكن التجربة اللي هتعملها علشان تبقي امان يبقي لازم تخلي بالك من حاجات معينة …
أنت كمسافر أيه اللي يضمنلك أن الشخص اللي هيستضيفك ده مش مجرم خطير أو شخص مجنون ؟ أو الشخص اللي هيستضيفك ده ايه اللي يضمنله أنك مش حرامي مثلا هيسرقه أو شخص مش ثقة ؟؟
الأجابة دايما هي أنك قبل ما تبعت رسالة لشخص تطلب فيها ان يستضيفك , او لو انت مضيف و هتستضيف شخص أو حتي تتقابلوا لازم تقرأ بروفايله كويس جداااااااا … شوف بروفايله مكتوب كويس وللا لأ , شوف صوره , و اهم حاجه , شوف أراء المسافرين اللي تعاملوا معاه قبل كده , لو حد ثقة هتلاقيه واخد references إيجابية كتير , و هتطمن لما تقرأ بروفايله , كل واحد فينا فيه حاسة سادسة و هي الحدس , خليك ورا حدسك دايما و ابعد عن اي حد تشك انه مش أهل ثقة …
انا جربت الموقع كذا مره قبل كده , و عمري ما صادفت أي مشكلة نهائي و ده لأني بختار بعناية الأشخاص اللي بتعامل معاهم …
ابدأ منين ؟
أول حاجه ادخل الموقع www.couchsurfing.com , و ابدأ بعمل بروفايل ليك , و اهتم أووووووي بالحاجات اللي هتكتبها في بروفايلك لأن بروفايلك هو الحاجه الوحيدة اللي هتخلي الناس توافق تستضيفك وللا لأ , أكتب معلومات عنك و هواياتك و الأماكن اللي سافرتلها قبل كده لو كنت سافرت ..
ارفع صور ليك علي بروفايلك , و أهم حاجه تكون صور حديثة ليك , مش منطقي يكون مثلا عندك 30 سنة و حاطط صور ليك من 10 سنين مثلا , حاول دايما تكون صورك حديثة لأن ده بيطمن الشخص اللي هيستضيفك ..
اهتم بالريفيوهات و ال references اللي مكتوبة عنك في بروفايلك , طبعا لو انت شخص جديد أول مرة بيستخدم الموقع هتلاقي صعوبة في ده و هتلاقي صعوبة إلي حد ما في أن حد يستضيفك من غير references مكتوبة عنك … الحل هو انك لو ليك اصحاب بيستخدموا الموقع خليهم يكتبوا عنك references إيجابية و يذكروا انهم اصحابك , ده بيطمن شوية الشخص اللي هيقرأ بروفايلك .. و متقلقش معظم المستضيفين بيتفهموا ان البروفايل لسه جديد و طبيعي مفيش references كتير , بس أهم حاجه تكون مهتم بالطريقة اللي مليت بيها بروفايلك ..
ازاي اختار الشخص المناسب اللي ابعتله طلب الأستضافة ؟
لو انت مثلا مسافر الشهر الجاي مدينة زي ميلانو مثلا , خلاص عملت بروفايلك و مليته كويس , و دلوقتي في مرحلة انك تدور علي حد يستضيفك , فهتدخل علي البحث و تكتب Milano , هتلاقي كل الناس اللي عندها استعداد تستضيفك او تقابلك في ميلانو …
هنا لازم تفلتر بالضبط الناس دي علشان توصل للشخص المناسب , انا هقولك انا بعمل ايه بالضبط :
-بحدد عمر الشخص اللي هيستضيفني يكون قريب من عمري (4 أو 5 سنين أكبر أول أصغر مني)
-بحدد انه يكون اخر مره دخل علي الموقع مش اكتر من اسبوع , بحيث تطمن انه Active علي الموقع .
-لو انا مثلا معايا واحد او اتنين اصحابي مسافرين معايا , بعمل في فلترة البحث اني عايز حد عنده القدرة علي استضافة العدد اللي معايا …
-بتحدد ان كان ولد وللا بنت اللي يستضيفك أو اللي الأتنين.
بعد كده بعمل بحث بالفلترة دي بيطلعلك النتايج , بتبدأ تختار البروفايلات اللي واخدة references كتير و ايجابية , اقرأ كويس المعلومات عن الشخص , شوف اهتماماته هل هي زي اهتماماتك وللا لأ , لأن انت هتقضي معاه الفترة اللي هتقعدها عنده فمش طبيعي تبعت طلب لحد مختلف عنك … اعتمد دايما علي حدسك و انت بتختار …
لو انتي بنت مثلا و لقيتي بروفايل ولد و كاتب في بروفايله انه مبيقبلش غير استضافة بنات فقط .. دي حاجه تخليكي تشكي في الشخص ده … علشان كده لو انتي بنت خلي بالك كويس اوي و انتي بتختاري البروفايل الشخص اللي هيستضيفك ..
حاجه خلي بالك منها , هي مكان شقة الشخص اللي هيستضيفك , ممكن تبقي شقته في حي بعييييد عن وسط البلد او بعيد عن المواصلات العامة , فدي هتبقي حاجه صعبة ليك كمسافر …
ازاي اكتب طلب مثالي للمستضيف ؟:
خلاص لقيت شخص مناسب … و دلوقتي هتبعتله رسالة تطلب فيها انه يستضيفك , خلي بالك ان الشخص اللي هتبعتله ده لو كان عايش في مدينة كبيرة زي باريس او مدريد او اسطنبول مثلا , هتلاقي بيجيله مئات الرسايل من طلبات استضافة , اسأل نفسك ايه اللي هيخليخ يوافق علي طلبي؟
اتبع النصايح دي و صدقني صعب اوي ان حد يرفض طلبك :
-اهتم اوي ببروفايلك قبل ما تبعت زي ما قلنا .
-اقرا بروفايل الشخص اللي هتبعتله كويس جدا , شوف اهتماماته اللي كاتبها , شوف سافر فين , شوف صوره , شوف الجروبات المشترك فيها , اقرأ ال references اللي اتكتبت عنه .
-و انت بتكتب الطلب , قوله ايه اللي خلاك تبعتله هو الطلب , جايز بسبب اهتمامات مشتركة مثلا , بلاد معينه سافرها , حاجه مضحكة في صورة من صوره …ألخ , حسسه ان الرسالة اللي بتبعتهاله هي رسالة شخصية مش مجرد بتبعت لأي حد .
-اوعي ثم اوعي ثم اوعي تبعت رسالة copy paste اللي بتبعتها لكذا شخص , لأنهم هيعرفوا , خلي دايما رسالتك شخصية , اذكر اسمه , خليه يحس انك كاتب الرسالة دي ليه ..
اعمل ايه اول ما اوصل للشخص اللي هيستضيفني :
خليك اجتماعي و مؤدب , اسأله أسأله عنه و عن ثقافته و بلده , هو عايز ده , الشخص اللي هيستضيفك هدفه من استضافتك مش انه يوفرلك أوضه او كنبه تنام عليها , لو كده كنت رحت Airbnb , انما هدفه هو انه هو كمان يتفاعل معاك و يتعرف علي ثقافتك , فحاول دايما تتفاعل معاه ..
حاول وانت جاي من بلدك تجيب معاك سوفينير ليه من بلدك , دي لفتة بتبقي لطيفة أوي , حاول مثلا تطبخله مره و انت عنده و يا حبذا لو اكله من بلدك , بتبقي لفتة حلوة ك Thank you gesture منك .
حافظ علي اي قواعد هو حاططها في بيته , حافظ علي نظافة الغرفة اللي هتبقي فيها و الحمام , اخرج معاه , و لو هو مشغول مثلا يبقي اطلب منه اقتراحات لحاجات تعملها و انت في المدينة دي هتسهل عليك كتير …
هل لو حد استضافني علي موقع Couchsurfing يبقي لازم انا كمان استضيف حد ؟
اكيد لأ , لو انت مثلا في بلد معندكش مكان تستضيف حد و حد بعتلك رسالة عشان تسضيفه عادي جدا تعتذرله , لو حابب تقابل مسافرين جايين يزوروا مدينتك ممكن توضح ده في بروفايلك انك available for meet up , و لو حد جه مدينتك تقدر توريه المدينة … مش حابب برضه كل الحرية ليك …
دي كانت معظم المعلومات اللي ممكن تحتاجه عن موقع couchsurfing لو عندك اي سؤال او حابب تشاركنا تجربتك شاركنا بيها في الكومنتات أو في صفحات التواصل الأجتماعي …
