الطيران الرخيص في أوروبا غير فكرة الناس عن السفر 180 درجة . من 20 سنة مثلا كانت فكرة انك تسافر دولة أوروبية لدولة اوروبية تانية هيبقي أرخص بكتير لو أخدت باص أو قطار … كانت الطائرة فقط للأغنياء لأنها الأغلي …
حاليا الموضوع أتغير خالص , شركات طيران كتير علي الساحة الأوروبية بقت بتتيج للمسافرين السفر حول أوروبا بأسعر رخيصة جدا , هتلاقي أن تذكرة الطيران أرخص من تذكرة القطار أو الباص …
في المقالة دي هنتكلم عن الطيران الرخيص في أوروبا … و ليه رخيص , و ايه المصاريف المخفية اللي ممكن تتفاجئ بيها .. و ايه النصايح اللي لازم تاخد بالك منها …
[lwptoc colorScheme=”inherit” borderColor=”#dd8604″]
أيه هي شركات الطيران الرخيص في أوروبا ؟ و ليه رخيصة كده؟
فيه حاليا ما يقرب من ال 40 شركة من شركات الطيران الرخيص في أوروبا , و كل سنة بتطلع شركات جديدة , و كل ده أدي الي وجود منافسة و أسعار أرخص…
من سنتين سافرت في رأس السنة من ليتوانيا لأسبانيا علي طيران Ryanair ب 14 يورو فقط !! , و قبلها بسنة سافرت من أوسلو في النرويج لميلانو ب 9 يورو , أسعار خيالية مش أي حد يصدقها , طيران 3 ساعات ب 9 يورو ..
بس يا تري هل شركات دي بتكسب كده؟ و ليه هي رخيصة كده ؟؟
شركات الطيران الرخيص في أوروبا رخيصة لعدة أسباب . منها :
-عندهم طراز واحد بس من الطيارات:
معظم شركات الطيران العادية بيكون عندها أكتر من طراز , انما هتلاقي شركات الطيران المنخفض بيشتروا كذا طيارة من نفس الطراز و بالتالي فبياخدوا تخفيضات من شركات صناعة الطيران.
-مفيش أي وسائل ترفية علي الطيارات:
مش هتلاقي شاشة ترفيه علي الكرسي اللي قدامك او اي وسائل ترفيه زي ما موجود في شركات الطيران العادية , فبالتالي بيوفروا في تمن تركيب الوسائل دي علي طياراتهم .
-مفيش وجبات مجانية علي الطيارات:
مينيو طيران Ryanair اللي بتتوزع علي الركاب للي حابب يطلب أكل او مشروبات أثناء الرحلة
مش هتلاقي أي وجبات مجانية علي الطيارة , هتلاقي مينيو فيها سناكس ووجبات تقدر تشتريها لو حابب و بالطبع هتبقي أغلي حتي من أكل المطارات.
-وجود شركات كتير بتنافس بعض:
Photo by Mark Harkin -Flickr
و ده مخلي الأسعار فعلا في الأرض , متوسط الأسعار بين الدول الأوروبية 20-30 يورو , و أوقات كتير ممكن تلاقي عروض توصل ل 7 يورو للتذكرة .
طيب لو فرضا قررت تسافر أوروبا , و حبيت تتنقل من دولة لدولة , و لقيت تذكرة طيران ب 16 يورو مثلا .. هل ده بس اللي هدفعه فعلا ؟؟
اجابة السؤال ده هتكون بناء عليك انت , لازم تعرف ان شركات الطيران الرخيص في أوروبا أه بتخلي التذكرة رخيصة جدا بس أي خدمات تانية أنت عايزها لازم تبقي بفلوس و دي الطريقة اللي بتخلي شركات الطيران دي تكسب … علشان كده هقولك علي المصاريف اللي ممكن تدفعها :
1-الأكل و الشرب:
أي أكل او سناكس هتطلبها علي الطيارة هتكون بفلوس , علشان كده حاول تجيب معاك أي سناكس لأن هتلاقي أسعار الأكل علي الطيارة 3 أو 4 أضعاف السعر العادي.
2-الشنط :
معظم شركات الطيران هتسمحلك بشنطة واحدة تاخدها معاك علي الطيارة وزنها 10 كيلو بأبعاد معينه تتحط في الكابينة , فبالتالي لو أنت من النوع اللي بيحب ياخد دولاب الملابس معاه و هو مسافر يبقي أعمل حسابك هتدفع 30-50 يورو علي كل شنطة لحد 20 كيلو , و لو زادت عن 20 كيلو هتدفع 10 يورو عن كل كيلو زيادة … طبعا الكلام ده بيختلف من شركة للتانية و تقدر تتأكد من سياسة الحقائب لكل شركة قبل الحجز.
3-اختيار الكراسي :
اختيار الكراسي مش مجاني علي شركات الطيران الرخيص في أوروبا , لما تحجز تذكرة طيران رخيصة هتلاقي تم أختيار كرسي عشوائي ليك في الطيارة , ودي حاجه مش حلوة لو مسافر مع عيلتك أو مع اصحابك , لكن لو حابب تحجز كرسي معين , هتضطر تدفع حوالي 5 يورو زيادة .
4- غرامات ال checkin :
معظم شركات الطيران العادية من حقك تعمل checkin في المطار عادي , انما في شركات الطيران الرخيص دي أنت مجبر تعمل Checkin online قبل الرحلة و تطبع ال boarding pass او تنزله علي موبايلك علشان يتعمله scan قبل ما تطلع الطيارة …
شكل الBoarding pass علي موبايلك بعد ما تعمل online Checkin
في حالة انك نسيت تعمل online checkin هتدفع غرامة ممكن توصل في بعض الشركات ل 140 يورو !
طب ايه النصائح اللي لازم تاخد بالك منها قبل ما تحجز علي شركات الطيران دي؟
1-خليك مرن في حجوزاتك : لو فاكر في مقالة ازاي تلاقي أرخص تذكرة طيران قلنا أن اهم حاجه هي المرونة في الحجز , بمعني نفترض مثلا انك بتخطط رحلة لأوروبا , و مثلا هتكون في مدريد و عايز تسافر لروما , و لقيت ان التذكرة من مدريد لروما ب 50 يورو مثلا … حاول تعمل بحث عن كل أسعار التذاكر من مدريد لكل المدن الإيطالية القريبة , ممكن تلاقي تذكر مثلا من مدريد لبيزا أو لميلانو ب 10 يورو مثلا , ساعتها ممكن تحجزها و تاخد باص من المدينة دي لروما , و هتلاقي نفسك وفرت ..
في 2016 و انا راجع من أيسلندا كانت محطتي بعد كده اوسلو في النرويج, كنت هوصل اوسلو عن طريق مطار اوسلو الرئيسي في منطقة جاردرموين (تبعد عن اوسلو ب 50 كيلومتر) , و انا بخطط للرحلة لقيت اني لو حجزت تذكرة خروجي من اوسلو للوجهة اللي بعد كده من مطار فرعي (مطار تورب ساندفيورد علي بعد 110 كيلومتر من أوسلو) هوفر اكتر من 70 يورو لأن المطار ده في شركات كتير رخيصة بتطير عن طريقه …
2-تابع أعلانات شركات الطيران : معظم شركات الطيران الرخيص في أوروبا بتنزل اعلانات كتير أونلاين لرحلات كتير جدا , و مش بس في أوروبا , انا فاكر من كام سنة شركة Airasia اللي بتلف معظم جنوب شرق اسيا , كانت عامله عرض انك تحجز رحلة جوية معاهم (بدولار واحد فقط) بس تسافر بيه السنة اللي بعدها , يعني بتحجز لسنة قدام …
Ryanair و معظم الشركات الرخيصة دي بتعمل اعلانات كده , اسعار رخيصة جدا ل 6 شهور قدام , علشان كده حاول دايما تشترك في القائمة البريدية للشركات دي أو تابع مواقعهم علشان تشوف الأعلانات دي .
3- طبعا أفضل حاجه لازم تحجز من بدري و تبعد عن المواسم أو نهايات الأسبوع لأن في الوقت دع بتكون الأسعار غالية عن الطبيعي ..
4-خلي بالك من المطارات اللي هتركب أو هتنزل منها : معظم المطارات اللي بتشتغل عليها شركات الطيران الرخيص في أوروبا بتكون دايما مطارات ثانوية بعيده عن المدن الرئيسية , علشان كده قبل ما تحجز رحلتك اتأكد المطار ده بيبعد اد ايه , و شوف فيه مواصلات عامة وللا لأ من و إلي وسط المدينة , لأن لو رحلتك هتوصل مثلا الساعة 3 الفجر مش هتلاقي مواصلات عامة هتضطر تاخد تاكسي ثمنه 3 أضعاف ثمن التذكرة الرخيصة اللي اشتريتها !
5- قارن بين أسعار الشركات المختلفة قبل ما تحجز علي مواقع الحجوزات , أشهرهم و اللي بفضله Skyscanner.
دي كانت كل حاجه محتاج تعرفها عن شركات الطيران الرخيص في أوروبا , لو عندك أي سؤال اكتبه في الكومنتات أو شبكات التواصل الأجتماعي ..
