ازاي تضمن فيزا الشنجن بكل سهولة

من أكبر أساطير السفر في مجتمعنا هي اسطورة فيزا الشنجن . مين فينا مسمعش جمل زي ” كل اللي بيقدم للسفارة الفلانية بيترفض” او ” لازم يبقي معاك مبلغ فوق كذا عشان يقبلوك” و غيره و غيره …. و كل ده في الاخر بلح .

فيزا الشنجن هي 1+1=2 . السفارة عايزه تطمن انك فعلا عايز تسافر سياحه علشان تديلك الفيزا , هي دي كل الفكرة..

خلينا نتكلم الأول ايه متطلبات فيزا الشنجن :

• باسبور ساري , لم يتم استخراجه من مدة أكتر من 10 سنين , و ساري لمدة 3 شهور بعد انتهاء مدة السفر المطلوبة لمنطقة الشنجن.
• استمارة الشنجن بتنزلها من موقع السفارة اللي هتقدملها  و بتملاها و بتوقعها.
• صورتين شخصيتين بالمقاس المطلوب من السفارة اللي هتقدملها.
• حجز طيران.
• حجز فندق.
• شهادة قيد من جامعتك لو طالب , او جواب HR من شغلك لو موظف , او سجل تجاري و بطاقة ضريبية لو ليك عملك الخاص.
• وثيقة تأمين من اي شركة سياحة بمدة سفرك (معظم السفارات بتطلب انك تخلي مدة الوثيقة مدة سفرك + اسبوعين زيادة) الوثيقة دي تمنها من 100-300 جنيه حسب المكان اللي بتجيبها منه.
• في حالة أول مره بتسافر لدولة من دول الشنجن او باسبورك ضاع بيتم استخراج شهادة تحركات من مصلحة الجوازات في مجمع التحرير و ده بياخد من اسبوع لاسبوعين (بعض السفارات مبتطلبش شهادة التحركات).
• دفع رسوم الفيزا و دي حوالي 60 يورو + في بعض الاحيان بيكون فيه رسوم للمكتب التابع للسفارات اللي هتقدملها .

طبعا معظمنا عارف كل الكلام ده

اقرأ ايضا : تغييرات جديدة في اجراءات تأشيرة الشنجن من يناير 2020

نيجي بقي للنقط اللي معظمنا بيقع فيها و اللي بتخلي السفارات تلجأ للرفض :

اقناع القنصل انه يوافقلك علي فيزا الشنجن : 

اهم سبب من اسباب رفض فيزا الشنجن هو عدم اقناع القنصل سواء كان في الانترفيو لو فيه او حتي في ورقك لو مفيش انترفيو .

الناس متخيله انك لو معاك كشف حساب بمبلغ اد كده وورقك كامل هتاخد الفيزا بكل سهولة , طبعا غلط مش ده اللي هيديك الفيزا , القنصل عايز يتأكد انك فعلا رايح سياحه مش رايح تهرب , عشان كده ذاكر البلد اللي انت رايحها , اعرف انت رايح هتشوف ايه , هتركب مواصلات ايه من الفندق للاماكن دي , هتسافر ازاي من مدينة لمدينة , اديله انطباع انك رايح سياحه , لو مفيش انترفيو اكتب خطاب للقنصل فيه خطة سفرك بالتفصيل , خليه يحس انك رايح تتفسح مش رايح للمجهول .

مسافرتش قبل كده و باسبورك ابيض  :

تاني سبب هو ان باسبورك أبيض و مسافرتش خالص قبل كده , طبعا يُفضل انك تحاول تسافر الدول السهلة  الاول زي جورجيا , ماليزيا , تايلاند , فيتنام…الخ , بس طبعا مش مستحيل تاخد الشنجن اول فيزا  و ناس كتير خدتها من اول مره علي باسبور ابيض عادي ,

و فيه حركة حلوة تخلي شكل باسبورك احسن لو فاضي , مثلا انت عايز تسافر دولة من دول الشنجن , من حسن حظك ان الطيران التركي بيطير لمعظم الدول الاوروبية , قدم الاول علي فيزا تركيا و خدها  , و بعدين خطط برنامج سياحي يومين تلاته في تركيا قبل السفر للشنجن , و قدم حجوزات تركيا دي مع ورقك لسفارة دولة الشنجن اللي ناوي تقدملها مع ورق الشنجن  بحيث تبين انك هتقعد يومين في تركيا و بعدين مثلا اسبوع في الدولة دي و هيشوفوا الفيزا اللي خدتها و حجوزاتك و هيقتنعوا فعلا انك مسافر , انا شخصيا عملت كده قبل كده و كان القنصل مقتنع جدا خصوصا اني كنت قاري كويس عن البلد اللي سافرتلها.

كشف الحساب البنكي :

تالت سبب ان معندكش حساب بنكي او كشف حسابك فيه مشكله , اولا لو معندكش حساب بنكي ابدا افتح حساب من دلوقتي عشان مينفعش تقدم من غير كشف حساب , تاني حاجه اسطورة ان يكون معاك 20 او 30 او 100 الف جنيه كل الكلام ده غلط اهم حاجه يكون فيه حركات علي حسابك سحب و ايداع , دي اهم من الرصيد , ودي سهلة اعمل حركات كتير علي حسابك .

تاني نقطه كل دولة من دول الشنجن طالبه حد ادني في حسابك , مثلا سفارة اسبانيا طالبه يكون حد ادني 60 يوروعن كل يوم هتقضيه هناك بحد ادني 577 يورو في حسابك , يعني اقل من 15000 , اليونان طالبه 20 يورو عن كل يوم , و هكذا , انت عشان تكون في الامان حط 100 يورو لكل يوم ناوي تقعده علي الاقل في حسابك اللي لازم يكون عليه حركات سحب و ايداع حلو أوي , و كمان لو عندك كريدت كارد صور وجهه و قدم الصوره مع اخر ستيتمنت له. بس نصيحه بلاش حسابك يقل عن ٢٥ الف جنيه خصوصا لو بتقدم اول مره مع طبعا وجود حركات علي الحساب ، و خصوصا ان فيه بعض سفارات الشنجن بتطلب ان الحد الادني في الحساب ميقلش عن ٢٥ الف جنيه.

حجز الفندق :

رابع سبب لرفض فيزا الشنجن هو حجز الفندق غير موكد , خلي بالك ان السفارات بتتصل بالفنادق تتأكد من الحجز , متحاولش تلغي حجز الفندق قبل ما الفيزا تطلع اطلاقا لان ده هيؤدي لرفض فيزتك.

تضارب المواعيد :

خامس سبب وجود تضارب في تواريخ حجز الفنادق أو الطيران و التواريخ اللي انت كاتبها في استمارة فيزا الشنجن

أو مثلا توقيعك في الاستماره غير توقيعك في الباسبور (اه لازم تكون موقع في الباسبور , فيه ناس رجعوهم من مطار طوكيو عشان مش موقعين في الباسبور)!

ملكش وظيفة :

سادس سبب ان ملكش وظيفة , دي اكتر حاجه ممكن تخوف السفارات منك , لأن وجود وظيفة أو بتدرس في جامعة ده معناه ان فيه ارتباط ببلدك و مش هتهرب , عشان كده بلاش  تقدم و انت ملكش وظيفة ,  حاول علي قد ما تقدر تخلي اي حد تعرفه يعملك جواب HR في شركته , الطرق كتير اهم حاجه متقدمش و انت ملكش وظيفة .

نيجي بقي للناس اللي عندها وظيفة و هتقدم HR , حاول تقدم و يكون عدي عليك اكتر من سنة في شغلك , دي نقطة قوه , تاني حاجه حاول دايما الجملة دي تكون مكتوبة في ال HR  : ” و نحن علي علم بأن السيد / …. سيسافر الي دولة كذا في الفتره من كذا لكذا بغرض السياحة و انه سيعود ليباشر عمله في الشركة من يوم كذا ” , الجملة دي بتبين ان شغلك عارف انك مسافر و مديك اجازة في الوقت ده , و دي نقطة قوة في صالحك قدام أي سفارة.

طيب افرض بعد كل الكلام ده قدمت و اترفضت , هل لازم تستني 6 شهور قبل ما تقدم تاني؟ لأ طبعا , انا شخصيا في اخر 2015 ايام تفجيرات باريس خدت رفض غير منطقي من سفارة فرنسا , بعدها باسبوع واحد قدمت في سفارة تانيه و طلعتلي الفيزا في 3 أيام بعد الانترفيو !! لمجرد اني اقنعت القنصل اني رايح سياحه و اني عارف انا رايح اعمل ايه.

لو خدت رفض اوعي تفتكر ان دي نهاية الدنيا , اعرف ايه نقط ضعفك و اشتغل عليها و صدقني هتوصل لهدفك في الأخر .أما لو لسه مقدمتش و ناوي تقدم , يبقي خد وقتك و خطط كويس و قوي كل نقاط ضعفك … و اقرا المقاله دي 10 غلطات حاول تتفاداهم لو هتسافر اول مره  هتساعدك كتير لو اول مره هتسافر …