السفر إلي أوسلو كان الحاجات الحلوة أوي اللي عملتها لأنها مدينة تستحق الزيارة … بالرغم من أن رحلتي إلي العاصمة النرويجية كانت قصيرة في المرتين اللي زرتها فيهم , لكن هي من المدن اللي علقت معايا جدا لأنها فعلا مدينة مميزة … بل النرويج كلها .
منظر الجبال النرويجية فوق السحاب أول حاجه هتلاحظها من الطيارة
أكيد سمعت أن النرويج من أغلي البلاد في العالم , و ده إلي حد ما صحيح , التكلفة في النرويج تعادل 3 أضعاف التكلفة في دول أوروبا العادية زي أسبانيا أو أيطاليا … لكن هل ده معناه أنك مش هتعرف تزورها بطريقة أقتصادية؟؟ أكيد هتقدر .. علشان كده قررت أعمل الموضوع ده علشان أقولك علي 5 حاجات لازم تبقي عارفهم قبل ما تقرر تسافر مدينة أوسلو ..
[lwptoc colorScheme=”inherit” borderColor=”#dd8604″]
1- الفيزا :
النرويج هي دولة من دول الشنجن فبالتالي محتاج يكون معاك فيزا شنجن قبل السفر إلي أوسلو . و اتكلمنا قبل كده عن تفاصيل فيزا الشنجن في مقالة ازاي تضمن فيزا الشنجن بكل سهولة .
2- تكلفة السفر إلي أوسلو :
أوسلو من أغلي المدن في أوروبا , و ده بسبب أرتفاع مستوي المعيشة في النرويج و في البلاد الأسكندنافية بصفة عامة , عملة النرويج هي الكرونا النرويجي NOK , في تاريخ كتابة المقالة دي الدولار الأمريكي يعادل 8.7 كرونا .
الأسعار في النرويج غالية جدا , بس لو ألتزمت بالنصائح اللي هقولهالك في المقالة دي هتقدر تزورها من غير ما تبيع كليتك 😀
3- الأقامة :
الأقامة في في أوسلو تعتبر غالية , حتي الهوستلات مش رخيصة زي بقية مدن أوروبا , علشان كده لو مسافر لوحدك حاول تستخدم الكاوتش سيرفنج couchsurfing (بمعني انك تقعد عند حد من أهل البلد ببلاش) , مش بس ده هيخليك تتفادي فندق أو هوستل غالي , لأ ده كمان هيخليك تشوف البلد بطريقة أفضل لأن اللي هيستضيفك هيديك معلومات و هيرشحلك أماكن صعب أنت كسائح تعرفها لوحدك ..
الحل التاني هو Airbnb , و هو انك تأجر شقة أو غرفة منفصلة في بيت حد من أهل البلد , أحيانا بتلاقي أسعار علي Airbnb أرخص بكتييير من الفنادق , الفكرة أنك تحجز بدري , و ارجع لمقالة Airbnb : دليلك الكامل لحجز أفضل و أرخص إقامة و انت مسافر علشان تعرف كل حاجه محتاج تعرفها قبل ما تحجز عليه…
4- كارت أوسلو City pass card :
بما ان أوسلو غالية علشان كده هتلافي كارت أوسلو مفيد جدا , الكارت ده بتشتريه بيتيح لك دخول أكتر من 30 متحف و معلم سياحي , تقدر تتنقل بين كل المواصلات العامة مجانا , ده غير خصومات علي مطاعم و محلات كتير , و تذاكر حفلات موسيقية أو تأجير أدوات التزحلق علي الجليد …
أسعار الكارت في 2019 كالأتي :
-للبالغين (18-67 سنة) : – ليوم واحد : 445 كرونا.
– ليومين : 655 كرونا .
– لثلاثة أيام : 820 كرونا.
-للأطفال (6-17 سنة) : – ليوم واحد : 235 كرونا .
– ليومين : 325 كرونا .
– لثلاثة أيام : 410 كرونا.
-لكبار السن (67 سنة فيما فوق) : – ليوم واحد : 355 كرونا .
– ليومين : 520 كرونا .
– لثلاثة أيام : 655 كرونا .
ده غير خصومات حوالي 20 % للطلبة …
دار الأوبرا
لو حسبتها هتلاقي نفسك وفرت كتير لو اشتريت الكارت ده لأنه هيتيحلك تزور أماكن كتير و تتحرك في كل المواصلات مجانا , خصوصا ان المواصلات غالية في عاصمة النرويج.
5- قبل السفر إلي أوسلو أقرأ كويس عن المزارات :
العاصمة النرويجية مميزة لأنها بتجمع بين التاريخ و الطبيعة و الحداثة و المعمار الرائع ..
مينفعش تزورها من غير ما تشوف “حصن أكيرشوس” اللي بيعتبره النروييجيون علامة من العلامات المجيدة في تاريخ النرويج …
ده غير متحف سفن الفايكنج , اللي بيحتوي علي سفن للفايكنج ترجع للقرن التاسع الميلادي …
مبني دار الأوبرا اللي يعتبر أيقونة المعمار الحديث في المدينة , ده غير خليج أوسلو الخلاب Oslo Fjord اللي بيبقي روعة في الصيف .
في الشتاء بيكون الجو قارص علشان كده اعمل حسابك علي لبس ثقيل و حذاء مناسب للتلج و الأمطار ,و بالرغم من ده فالمدينة بتكون ساحرة في الشتاء …
الشعب النرويجي من أكتر الشعوب الودودة اللي قابلتها في رحلاتي , اللغة الأنجليزية بيتحدثها الشعب النرويجي بطلاقة فمش هتلاقي مشاكل في التواصل معاهم خالص …
شوية نصايح هتفيدك قبل السفر إلي أوسلو :
- حاول دايما تشتري أكلك من السوبرماركت و تحضره في البيت أو الهوستل لأن المطاعم غالية , لو حبيت تاكل بره يبقي قدامك الشاورما أو البيتزا … غالبا هيكونوا بحوالي 80 كرونا … لاحظ أن الوجبة العادية في أي مطعم بتبدأ من 280-300 كرونا ..
- اشتري كارت اوسلو , حتي لو شايفه غالي , صدقني ميجيش حاجه جنب أسعار المزارات و المتاحف و المواصلات ..
- لما تنزل المطار و عايز تروح لوسط المدينة اللي بتبعد حوالي 50 كم من المطار , بلاش تركب تاكسي , خد القطار أرخص بكتير ..
- العاصمة النرويجية من المدن اللي ركوب العجل فيها ممتع جدا , في الصيف لو بتزورها يمكنك أنك تأجر عجلة و تستكشف بيها المدينة .
سافرت أوسلو قبل كده؟ حابب تشاركنا تجربتك ؟ عندك أي سؤال؟ شاركنا بيه في الكومنتات أو في صفحات التواصل الأجتماعي …
