السفر في حد ذاته متعة كبيرة , بتسافر علشان تكتسب خبرات جديدة أو تفصل شوية من الحياة العملية الرتيبة اللي انت عايشها . و علشان تضمن ان التجربة دي تطلع مثالية و متنسهاش طول عمرك , قررت أكتب الموضوع ده علشان أقول علي منتجات السفر اللي لا غني عنها و انت مسافر و اللي هتخلي تجربتك فعلا مثالية ..
أنا شخصيا من النوع اللي باخد وقت طويل أوي في الترتيب لأي سفرية بعملها , بحيث أني أضمن ان السفرية تطلع بالشكل المثالي اللي دايما بكون عايزه . و حاجه من الحاجات اللي تاخد جزء كبير من الترتيب لأي سفرية هي أني ادور علي منتجات السفر اللي هحتاجها و أنا مسافر .. أو بالأحري اللي هتخلي سفريتي أسهل و أمتع ..
في المقالة دي هقولك علي 10 منتجات مهمة هتسهل عليك جدا تجربة السفر و هتبقي مفيدة أوي في رحلتك … و كمان هقولك أزاي تلاقيها أونلاين لو انت جوه مصر , أو من أمازون لو انت بره مصر …
معظم المنتجات اللي هعرضها أنا شخصيا أو حد من اصحابي جربها … طبعا مش كل المنتجات دي هتحتاجها لأن كل واحد فينا احتياجاته مختلفة … اختار منها اللي يناسبك , و أنا برضه أخترت المنتجات اللي هتناسب معظم الناس و اللي فعلا مهمة جدا أثناء السفر
لو لسه مسافرتش قبل كده و بتخطط لسفريتك يبقي أقرأ مقالة 5 نصائح تخليك تسافر بأقل التكاليف , و ياللا بينا بقي نستعرض منتجات السفر اللي هتفيدك و انت مسافر :
1- باور بانك Power Bank :
بص انا ده حطيته في بداية الليسته لسبب , ان الباور بانك مش رفاهية , الباور بانك ضرورة . لحظة ان موبايلك يفصل شحن منك و انت مسافر في بلد غريبة دي حاجه وحشة أوي … لأني بعتبر أن موبايلك مهم زي الباسبور بالضبط .. و ده بسبب التطبيقات اللي عليه المهمة جدا زي Google Maps مثلا أو حتي التليفون نفسه اللي هتحتاجه لو محتاج تكلم الفندق أو لاقدر الله البوليس لو حصلك أي مشكلة ..
فيه أنواع كتير جدا . النوع اللي بفضل هو أنكر Anker , انكر شركة محترمة جدا و هتضمن أن الباور بانك بتاعك هيتحمل كويس جدا , ده غير ان فيه ميزة الشحن السريع و ميزة الشحن الذكي اللي بتحافظ علي بطارية موبايلك .
المنتج تقدر تشتريه من : Souq – jumia – Amazon
2- محول و شاحن عالمي للسفر Travel Adapter :
حاجه بتقلقني أنا و انا مسافر و هي شكل فيشة الكهرباء في الدول اللي بزورها , خصوصا لو معاك لاب توب او أيباد أو اجهزة كهربائية و هتسافر كذا بلد و كل بلد ليها فيشة شكل , الحل هو المحول العالمي اللي بيكون فيه كذا فيشة تقدر تستخدم المناسبة للبلد اللي بتزورها …
المنتج تقدر تشتريه من : Souq – Jumia – Amazon
3- سلك شاحن للموبايل طويل :
أينعم المنتح ده مفادنيش بس في السفر لأني بستخدمه يوميا و مريح جدا علشان متبقاش متذنب جنب الكهرباء , لكن أثناء السفر هو مفيد جدا , و خصوصا في المطارات لو عندك ترانزيت كبير و محتاج تشحن موبايلك , فبدل ما تبقي حاطط موبايلك وواقف جنبه أو سايبه و خايف عليه , لو السلك طويل اتنين متر مثلا , ده هيخليك تقعد و تمسك موبايلك و هو بيشحن ..
المنتج تقدر تشتريه من : للأيفون : Souq – Jumia – Amazon
4- قفل للشنطة متوافق مع ادارة أمن المواصلات الأمريكية TSA :
طبعا سمعت ان فيه شنط كتير أتفتحت أثناء شحنها من عمال المطارات و اتسرقت , انا نفسي حصل معايا الموضوع ده علي الطيران الأيسلندي و أول ما نزلت من الطيارة في ريكيافيك لقيت شنطتي مفتوحة و مسروقة … فطبعا لازم تجيب قفل صغير لسوستة الشنطة بحيث تأمن علي شنطتك ..
لكن أدارة المواصلات الأمريكية عاملة قانون لكل المسافرين للأراضي الأمريكية ان الشنط اللي هتتشحن علي الطيارة تكون قابلة للفتح و التفتيش حتي في عدم وجود صاحبها و الا سيتم كسر القفل..
و من هنا جه حاجه اسمها TSA approved travel locker أو قفل متوافق مع ادارة امن المواصلات الأمريكية … فكرته انك بتحطله باسوورد و بتقفل بيه شنطتك , و لو حصل و احتاجوا ضباط المطار تفتيش الشنطة , ساعتها بيقدروا عن طريق Master key يفتحوا القفل من غير ما يكسروه و يفتشوا و بعدين يقفلوه تاني …
و بيطلعلك علي القفل مؤشر لونه أحمر في حالة لو اتفتح القفل ساعتها تعرف أن حد فتش شنطتك .
المنتج تقدر تشتريه من : Souq – Jumia – Amazon
5- أهم حاجه في منتجات السفر 😀 … الشطافة المحمولة :
أهي دي أوعي اوعي اوعي تنسي تشتريها لو مسافر لأنك هتندم لو مجبتهاش … قبل أختراعها كان السفر مأساه , مش هيعرف قيمتها غير اللي سافر من غيرها قبل كده 😀
المنتج تقدر تشريه من : Souq – Jumia – Amazon
6- سماعة بلوتوث مع خاصية Noise Cancellation :
السماعة اللي اخترتها ميزتها انها مش غالية بالنسبة لكونها بلوتوث و في نفس الوقت مفيدة علشان تلغيلك أي صوت حواليك خصوصا في الطيارة أو لو في هوستل دوشة … الخ , ده غير أن جودة الصوت فيها كويس .
المنتج تقدر تشتريه من : Souq – Jumia – Amazon
7- مخدة للرقبة :
من أهم منتجات السفر من وجهة نظري برضه خصوصا لو هتسافر طيران طويل أو هتركب أتوبيس فترة طويلة , ساعتها النوم هيبقي أسهل بكتييير
المنتج تقدر تشتريه من : Souq – Jumia – Amazon
8- Tripod للموبايل :
لو مسافر لوحدك أو كنت من هواة التصوير و زهقت من أنك كل شوية بتطلب من الناس يصوروك … يبقي المنتج ده هتحبه أوي , هو عباره عن حامل للموبايل طوله و هو مش مفرود حوالي 30 سم تقدر تخليه معاك في شنطتك , و ممكن يتفرد لغاية متر … و ممكن تركب عليه موبايل أو كاميرا …
طبعا المنتج لهواة التصوير , لو مش فارق معاك أوي ممكن سيلفي ستيك تفي بالغرض …
المنتج تقدر تشتريه من : Souq – Amazon
9- مانع لفتح الباب مع انذار :
المنتج ده مفيد جدا لو نازل في فندق و حسيت انه مش أمان أو في أي مكان بصفة عامة و خصوصا لو كنتي بنت (لو هتسافري لوحدك : 10 نصائح للبنات لسفر امن ) فالمنتج ده لا غني عنه , هو عبارة عن جهاز صغير بتحطه ورا الباب بعد ما تقفله عليك بحيث يمنع أن الباب بتفتح , و مش بس كده , لو حد حاول يفتح الباب بيديك انذار علشان لو كنت نايم تاخد بالك .
المنتج تقدر تشتريه من : Souq – Amazon
10- ميزان للشنط :
من أوحش المواقف هي لما تكون في المطار في ال check-in و بتوزن شنطك و تتفاجئ ان شنطتك وزنها أكبر من الوزن المتاح و تضطر تدفع دم قلبك في كيلو او اتنين زيادة .. علشان كده حاول دايما يكون معاك ميزان صغير توزن بيه شنطتك , صدقني مفيد جدا و كمان رخيص و حجمه صغير
المنتج تقدر تشتريه من : Souq – Amazon
عندك أي اقتراحات لمنتجات مفيدة للسفر حابب نضيفها للمقالة؟؟ شاركنا بيها في الكومنتات و أو علي صفحات السوشيال ميديا …
