تكاليف السفر إلي أوروبا دايما من المواضيع اللي بتشغل بال أي حد بيفكر يسافر للقارة العجوز . مش بس لأن من معظم الدول الأوروبية تعتبر من الوجهات المحببة للمسافرين العرب , كمان لقرب أوروبا من معظم دولنا الأوروبية فسهل تلاقي عروض حلوة للسغر لأوروبا .
اتكلمنا قبل كده عن 5 نصائح تخليك تسافر بأقل التكاليف , في المقال ده هنتكلم أكتر عن ازاي تسافر أوروبا بالتحديد بأقل التكاليف و ازاي توفر و انت مسافر لأي بلد أوروبي سواء لغرب أوروبا الأغلي نسبيا أو شرق أوروبا الرخيص …
[lwptoc numeration=”none” colorScheme=”inherit” borderColor=”#dd8604″]
اختار وجهتك صح :
لو لسه مقررتش تسافر فين في أوروبا , يبقي اقرا كويس و اختار وجهتك صح , في أوروبا التكلفة بتختلف جدا بين كل دولة و التانية , غرب أوروبا أغلي بكتير من شرق أوروبا , و حتي في غرب أوروبا دول مثلا زي إيطاليا و أسبانيا أرخص بكتير من دول زي سويسرا و النرويج .
علشان كده لو عايز تسافر بميزانية محدودة و لسه متردد في اختيار البلد , حاول تختار بلد أرخص .
رتب وجهاتك حسب المواصلات الأرخص :
لنفترض انك مثلا ناو تزور كذا مدينة أوروبية في نفس الرحلة . يبقي اعمل حسابك ترتب المدن اللي هتزورها علي حسب المواصلات بين المدن دي .
Photo by Mark Harkin -Flickr
بمعني لو مثلا في رحلة ناوي تزور ميلانو و برشلونة و أوسلو و باريس مثلا … و لنفترض انك هتوصل اوروبا لميلانو أولا , ساعتها و انت بتخطط تشوف أيه ارخص مدينة ممكن تسافرلها من ميلانو ,,,
فمثلا ممكن تلاقي تذكرة طيران رخيص من شركة مثل رايان أير أو ويز أير أو غيرهم من ميلانو إلي اوسلو ب ٢٠ يورو , و من ميلانو لبرشلونة ب ٥٠ يورو , و من ميلانو لباريس ب ١٤ يورو , فساعتها هتقرر تخلي المدينة الثانية باريس علشان تستفيد من السعر الرخيص ده , و تعمل كده مع بقية المدن .
خليك ذكي في اختيار الأقامة:
شرحت بالتفصيل ازاي تختار الأقامة المناسبة قبل كده , بند الأقامة ده تقدر توفر بيه كتير من تكاليف السفر إلي أوروبا لو عرفت تختار صح .
بمعني لو أنت مثلا مسافر لوحدك , فالهوستل هو الأختيار الأمثل لأن الهوستلات في أوروبا رخيصة جدا … أما لو كنت مسافر مع اصحابك أو عيلتك , فممكن تلاقي شقق رخيصة جدا علي موقع Airbnb
بوكنج من وجهة نظري أفضل المواقع اللي لو حبيت تحجز فندق من عليه , مش بس فنادق فيه عليه شقق فندقية و هوستلات و اختيارات كتير . الميزة في بوكنج أن أراء المسافرين عليه كلها موثوقة لأنه مبيسمحش لحد يحط review لفندق إلي لو كان الشخص ده حجز و نزل فعلا في الفندق ده .
أهم نقطة لاز تخلي بالك منها هي أنك تهتم بقراءة تقييم المكان اللي ناوي تحجزه , مش بس لأنك هتخلي تجربة سفرك مثالية .. لأ كمان لأنك هتوفر لأنك أحيانا من كتر سوء الفندق اللي اخترته عن عدم بحث كافي بتضطر تغيره بفندق أخر اغلي أضعاف لمجرد انك حاجزه متأخر .
و طبعا لو عايز تجرب أفضل تجربة تعيش بيها كأهل البلد و مجانا كمان , يبقي عليك و علي ال موقع ال couchsurfing
المزارات و المتاحف من أهم بنود تكاليف السفر إلي أوروبا :
دول أوروبا متميزة جدا بخصوص المتاحف و المزارات في المجالات المختلفة . لو مثلا حبيت تزور مدينة زي روما أو باريس و قررت تزور كل متاحفها بالسعر الطبيعي للتذكرة هتلاقي التكلفة بقت غالية جدا …
علشان كده في شوية نصائح تخلي بالك منهم لو عملتهم هتقدر تزور اللي نفسك فيه و بأقل تكلفة :
-شوف الأيام الفري , في كل بلد ساعات بيخلوا يوم في الشهر أو الأسبوع يكون المتاحف أو المزارات فيه مجانا للزوار . حاول تقرأ و تخطط ازاي تستغل اليوم ده .
-احجز بدري , ساعات فيه متاحف او مزارات معينة بيكون متاح الحجز فيها أونلاين و بسعر أقل من سعرها الطبيعي .
-اشتري كارد المدينة , فيه مدن أوروبية كتير بتبيع كارد بتشتريه بسعر معين , بيتيح ليك تدخل كل المتاحف مجانا أو بسعر مخفض , و حتي كمان بيديلك تخفيضات علي المواصلات أو المطاعم .
-لو أنت طالب , حاول تطلع كارت الطالب الدولي ISIC card , الكارت بيديلك تخفيضات كبيرة جدا علي المتاحف و المزارات و المواصلات و المطاعم و حاجات كتير جدا .
عيش زي أهل البلد في الأكل:
زي ما بقول دايما , الأكل بعتبره من أهم الحاجات اللي تخليك تفهم و تعيش ثقافة أي دولة . فمن وجهة نظري الشخصية البحتة عيب جدا تكون في فإيطاليا و تسيب البيتزا و الباستا و لازانيا و تخلي أكلك كله من كنتاكي أو ماك !! …
اتعود لما تسافر دايما يكون أكلك في الدولة اللي مسافرلها في المطاعم الشعبية في الدولة دي اللي أهل البلد بياكلوا منها . مش بس لأنك بتتعرف علي ثقافة البلد , لأ كمان لأنك هتوفر جدا .
فيه شوية نصائح لو خليت بالك منها هتوفر كتير برضه من تكاليف السفر إلي أوروبا :
-لما تيجي تحجز فندق او هوستل , اتأكد ان الحجز شامل الافطار , ده هيخليك توفر ثمن وجبة الفطار و انت مسافر .
-اسأل علي ال happy hour , مطاعم كتبر في أوروبا بتعمل ساعة في اليوم بيكون فيها تخفيضات كتير علي الأكل و المشروبات مثلا من ٤-٥ مساء , أو من ٥-٦ مساء . لو لقيت حاجه زي دي هتوفرلك كتير .
-لو كنت طالب و معاك كارد ISIC زي ما شرحت فوق , هتلاقي مطاعم كتير بتعمل تخفيضات لحاملي الكارد.
-حاول تشتري أكلك من السوبرماركت لو حبيت توفر أكتر , خصوصا لو كنت بتزور دولة غالية زي النرويج أو ايسلندا أو سويسرا .
فيه شوية نصائح خلي بالك منهم :
-قبل ما تسافر حاول دايما تحول عملة بلدك ليورو مش دولار , علشان متضطرش تخسر عمولة كمان لتحويل الدولار إلي يورو في صرافات أوروبا . و لو احتجت تغير عملة ابعد عن صرافات المطارات لأنها بتكون الأغلي من حيث العمولة.
-لما تيجي تشتري حاجه من أي محل أو مول , اطلب دايما نموذج التاكس فري tax free form , لأن ده هيتيحلك أسترداد الضريبة من المطار و انت مسافر .
-قبل ما تسافر لبلد معينة شوف أسعار خطوط الموبايل و الداتا فيها أد ايه , في ٩٠٪ من الأوقات بيكون لو اشتريت خط من الدولة اللي انت رايحلها أرخص بكتير من لو استخدمت خدمة الجوال . ده غير أنك هتحتاج أنترنت و انت مسافر سواء لل gps أو لو حبيت تعمل بحث عن أي حاجه .
-لو حبيت تأجر سيارة , حاول دايما تختار الشركات المحلية الصغيرة اللي واخده تقييمات عالية علي الأنترنت . هتلاقي السعر فيها أرخص بكتير من الشركات العالمية .
و كمان حوال تختار السيارات اللي بتعمل بالديزل مش البنزين لأنها أوفر , و كمان السيارات المانوال أرخص في تأجيرها من السيارات الأتوماتيك.
اخيرا يا تري رحلة أوروبا هتكلفني كام ؟
و ده أكتر سؤال الناس بتسأله , و اللي صدقني إجابته مش عندي و لو حد قالك إجابة عليه اعرف إنه بيخدعك , لأن ببساطة كل واحد فينا له اهتمامات مختلفة و متطلبات مختلفة , علشان كده متحاولش تسأل حد و اقرأ انت و ابحث …
فيه موقع جميل اسمه Budget Your Trip , الموقع ده انا ذكرته قبل كده في مقالة من المقالات. , و مهم أوي لما تيجي تخطط لأي بلد , الموقع بتكتب فيه اسم البلد اللي ناوي تزورها و بيديلك متوسط اللي تصرفه في اليوم او الأسبوع أو المدة اللي هتقعدها في البلد .
الموقع ده بيكون استرشادي , طبعا انت ممكن تصرف أكتر أو أقل حسب ظروفك انت . بس علي الأقل بيساعدك و انت بتخطط …
دي كانت كل حاجه أقدر أقولهالك بخصوص تقليل تكلفة السفر إلي أوروبا , لو عندك أي اقتراحات أو اسألة شاركنا بيها ف الكومنتات أو صفحات السوشيال ميديا
