جورجيا … كل اللي محتاج تعرفه قبل السفر الي جورجيا في 2020

جورجيا .. من البلاد القليلة في العالم اللي بتجمع بين الطبيعة و التاريخ و الثقافة المحلية الغنية و حاجات تانية كتير.

لو مكنتش سمعت عنها , او سمعت و بتفكر تزورها .. يبقي المقالة دي ليك. هنتكلم فيها عن حاجات لازم تبقي عارفها قبل السفر للبلد الساحرة دي .

جورجيا في أخر كام سنة أصبحت قبلة للمسافرين من كل أنحاء العالم , مش بس لأن طبيعتها ملهاش مثيل , ولا لأنها دولة رخيصة مقارنة بدول أوروبا . لكن لأن جورجيا من البلاد اللي بتسيب جواك حنين و طعم خاص هتحسه لما تزورها …

[lwptoc colorScheme=”inherit” borderColor=”#dd8604″]

فين جورجيا ؟

البلد بتقع بين أوروبا و اّسيا . و بالتحديد في جنوب القوقاز … يحدها من الغرب البحر الأسود , و من الشمال روسيا , و من الجنوب تركيا و أرمينيا , و من الشرق أذربيجان .

تغلب الجبال علي المشهد الجغرافي ليها, و ده اللي بيدي طبيعتها جمال خاص , ده غير السهول الخضراء و الطبيعة البكر اللي هتشوفها في معظم الأراضي الجورجية …

فيزا جورجيا … أهم شيئ قبل السفر الي جورجيا :

و دي حاجه ناس كتير بتسأل عليها و هنتكلم عليها بالتفصيل , خصوصا ان تأشيرة جورجيا تعتبر من أسهل التأشيرات …

الدول اللي مش محتاجه تأشيرة جورجيا :

-لو أنت من مواطني دول مجلس التعاون الخليجي (السعودية – الأمارات العربية المتحدة – الكويت – سلطنة عمان – قطر ) أو عندك مواطن أي دولة تانية و عندك أقامة في دولة من دول مجلس التعاون الخليجي …

-لو كنت من مواطني الأردن أو لبنان .

فبكل بساطة مش محتاج فيزا لجورجيا … باسبورك و حجز فندقك و طيرانك و تأمينك الصحي و سافر علي طول و تقدر تقعد فيها لغاية سنة  بدون فيزا.

الدول اللي ممكن تدخل بفيزا أونلاين :

لو أنت مصري … تقدر بكل سهولة تطلع فيزا أونلاين ب 20 دولار من الموقع ده  في خلال خمسة أيام تاخدها و تسافر .

ولكن للأسف مش هتقدر تسافر بيها من مصر لأن السلطات المصرية تشترط الحصول علي تصريح أمني قبل السفر إلي جورجيا , علشان كده لو هتحصل علي فيزا أونلاين يبقي حلك الوحيد انك تسافر لجورجيا من بره مصر عن طريق أي دولة تانية ..

أما لو هتسافر من مصر , يبقي تحصل علي الفيزا المطبوعة من السفارة الجورجية في مصر , متطلباتها سهلة جدا و بسيطة مجرد حجز مبدأي للطيران و الفنادق و تأمين صحي و جواب HR من عملك و 20 دولار ثمن الفيزا بتحطهم في حساب السفارة و كشف حساب بنكي 3 شهور.

و بعد لما بتاخد الفيزا بتروح تقدم علي التصريح الأمني , و راجع مقالة فيزا تركيا و التصريح الأمني هتلاقي فيها كل المعلومات عن التصريح الأمني بالتفصيل .

الدول اللي محتاجه فيزا جورجيا :

بقية الدول العربية محتاجه فيزا لدخول جورجيا … و لكن خلي بالك من حاجه , دول كتير عربية مفيهاش سفارة لجورجيا , فبالتالي فيه سفارات جورجية في بلاد تانية بتكون مسئولة عن اصدار التأشيرات لهم … مثلا :

–تونس و ليبيا : السفارة الجورجية في القاهرة مسئولة عن اصدار التأشيرات لهم.

–الجزائر و المغرب : السفارة الجورجية في مدريد مسئولة عن اصدار التأشيرات لهم.

–العراق : السفارة الجورجية في الأردن مسئولة عن اصدار التأشيرات لهم.

فانت تقدر تتواصل مع موقع السفارة الجورجية , او تتجه لشركات السياحة ممكن عن طريقهم يصدرولك التأشيرة من السفارة المعنية , بس في كل الأحوال الموضوع مش صعب .

ايه احسن وقت للسفر الي جورجيا ؟ :

جورجيا من البلاد المميزة طوال العام للزيارة , و خصوصا العاصمة الجورجية تبيليسي .

جورجيا في الشتاء :

البلد ليها طعم خاص في الشتاء , فيها منتجعات كتير للتزحلق علي الجليد Ski , من أشهرهم مدينة جودوري علي بعد حوالي 3 ساعات من العاصمة تبيليسي .

جورجيا في الصيف:

و ده الفصل اللي هتشوفها فيه خضره , تتمتع بالجبال و الشواطئ  و مدنها الساحلية .

تكلفة السفر :

جورجيا من البلاد الرخيصة جدا .. سواء الأكل أو الأقامة أرخص بكتييير مقارنة بدول أوروبا .

العملة الجورجية هي اللأري الجورجي …

اللاري الجورجي

خلي بالك انك صعب تلاقي ATM خارج المدن الكبري , علشان كده خلي دايما معاك فلوس كاش … ده غير ان معظم المحلات الصغيرة مبتقبلش الكروت الأئتمانية .

في تاريح كتابة المقالة دي :

الدولار الأمريكي = 2.98 لاري

اللاري = 5.4 جنية مصري = 1.25 ريال سعودي = 0.95 دينار تونسي = 3.2 درهم مغربي .

التنقل في جورجيا :

أحسن طريقة للتنقل جوه البلد هو انك تأجر عربية , بس خدها قاعدة … البلد اللي كلها طبيعة يبقي لازم تأجر فيها عربية … لو فاكر لما تكلمنا عن ايسلندا و ليه لازم تزورها .. قلتلك ان السواقة بس فيها متعة , لأنك بيكون ليك الحرية تقف في أي وقت , تتفرج علي حتة معينة أو تزور مكان معين … بعكس لو راكب اتوبيس أو اي مواصلات عامة مش هيكون ليك الحرية دي .

كمان ميزة في جورجيا البنزين رخيص , بمكن تمنه نص تمنه في أوروبا , و دي ميزة خصوصا لو كنتوا مجموعة أصحاب فثمن تأجير السيارة هيكون رخيص جدا لما يتقسم عليكم.

الشعب الجورجي :

الشعب الجورجي من الشعوب الطيبة جدا و المرحبة بالسياح . الشعب الجورجي من الشعوب المحافظة المتدينة , الديانة الشائعة في جورجيا هي المسيحية أرثوذكسية ,تاريخيا جورجيا تعتبر من أوائل الدول اللي أعتنقت المسيحية.

الأكل الجورجي:

المطبخ الجورجي كمان من المطابخ المميزة جدا , غير أن الأكل رخيص جدا في جورجيا … فكمان فيه أطباق مينفعش تروح هناك من غير ما تجربها زي مثلا الخينكالي و ده نوع من أنواع المعجنات المحشوه باللحم أو الخضراوات و بتكون بحجم قبضة اليد و دي من الأطباق المشهورة جدا في معظم مدن جورجيا .

الخشبوري

الخشبوري و ده كمان من الأطباق الشهيرة جدا اللي ينفعش تروح جورجيا من غير ما تجربه , و هو عبارة عن خبز و عايه جبن و بيض , فيه أشكال كتيرة من الخشبوري ممكن تجربها و انت هناك .

ده غير أطباق تانية كتير تقدر تجربها و انت هناك .

جورجيا من البلاد اللي هتستمتع بيها جدا لما هتزورها , ده غير التنوع الكبير في مدمنها و اللي هنتكلم عنهم بالتفصيل في مقالة منفصلة أن شاء الله

سافرت جورجيا قبل كده؟ حابب تشاركنا بتجربتك في السفر؟ عندك اي سؤال او استفسار؟ شاركني بيه في الكومنتات او علي صفحات السوشيال ميديا .