موقع Airbnb : دليلك الكامل لحجز أفضل و أرخص إقامة و انت مسافر

موقع Airbnb  من أكتر المواقع اللي خلت للسفر متعة في أخر كان سنة … لو عايز تجرب الحياة المحلية في البلد اللي هتزورها , يبقي عليك و علي موقع Airbnb , و الجميل في الموضوع انه ارخص بكتير من الفنادق  , الموقع ده كنت ذكرته في مقالة “5 نصائح تخليك تسافر بأقل التكاليف“, النهارده في المقالة دي هنشرح بالتفصيل ايه هو الموقع ده و ايه مميزاته و عيوبه …

ايه هو موقع Airbnb ؟

Airbnb هو موقع للأقامة , بيتيح المشاركة بين الناس اللي عندها شقق أو غرف بتعرضها للإيجار , و بين المسافرين اللي عايزين مكان يأجروه و يقيموا فيه في فترة سفرهم ..

فيه مواقع كتير ظهرت علي الساحة بتتيح للمسافرين تأجير شقق , لكن Airbnb  أضخمهم و أكثرهم أمانا … معظم دول العالم موجودة فيه يصل ل 192 دولة حول العالم …

الموقع تم إنشاؤه في 2008 , و انا شخصيا بعتمد عليه كتير في سفرياتي بجانب الهوستل , جربته في كذا بلد زي ايسلندا و كرواتيا و تركيا و اسبانيا و ايطاليا و غيرهم ..

المميز في الموقع ده أنك ممكن تلاقي جميع أنواع الأقامات عليه … من أول كنبة تنام عليها لغاية بيت كامل … ممكن تلاقي عليه قلعة ضخمة بتتأجر , او بيت خيالي علي بعد خطوات من الشاطئ … و الرائع ان معظم أسعاره اخص بكتير من الفنادق … بمعني انك ممكن تلاقي ثمن تأجير ليله في قلعة ارخص من ثمن ليلة في فندق 5 نجوم … ده غير ان اسعار إيجار  الشقق العادية رخيصة جدا … و لو اخترت انك تأجر أوضه بس في شقة حد عايش فيها السعر بيكون أرخص بكتير …

متي اعتمد علي موقع Airbnb ؟

–لو عايز تحس بالحياة اليومية المحلية في البلد اللي انت هتزورها   و تجرب احساس  كانك عايش في البلد دي , تنزل من الشقة تجيب حاجه تاكلها من السوبرماركت اللي في الحي اللي قاعد فيه , و تلاقي حواليك جيران من الحي اللي انت فيه , او تنزل تشوف اقرب موقف باص للحي اللي انت فيه علشان تنطلق … كل ده بيخلي للتجربة متعة .

–لو أنتم أسرة كبيرة , او مجموعة أصحاب كبيرة مسافرين مع بعض , ساعتها Airnbnb هيكون رائع لأنه هيخليكوا تاخدوا راحتكو و في نفس الوقت التكلفة هتبقي أرخص بكتير من الفنادق.

–لو انت رايح في مهمة عمل  و شايف ان الفندق هيكون غالي عليك و في نفس الوقت الهوستل مش هيكون مناسب .

–لو انت مسافر في أيام الأعياد او المناسبات و اسعار الفنادق ناااار , ساعتها الموقع ده هيكون افضل بكثير و هتلاقي عليه اسعار ارخص ..

في 2014  أجرت في كرواتيا شقة في وسط ميدان Ban Jelacic الرئيسي في زغرب , و كذلك أجرت غرفة بحمام منفصل في بيت عائلة في مدينة دبروفنيك في كرواتيا … و في أيسلندا في عز الشتاء و انا بطارد اضواء الشفق القطبي أجرت غرفة في مزرعة معزولة جدا كانت تجربة لا توصف (هنتكلم عن أيسلندا في مواضيع قادمة منفصلة) , و كانت اسعار الشقق او الغرف دي لا تذكر بجانب اسعار الفنادق …

ايه هي مميزات Airbnb ؟

-الأمان :

الموقع أمن جدا … مثلا كلا من اللي بيعرضوا شققهم للأيجار و كذلك المسافرين لازم يرفعوا اثبات شخصباتهم للموقع للتأكد من الشخصيات دي .

تاني حاجه انت بتدفع للمؤجر فلوسه عن طريق الموقع , فبالتالي انت مبتتعاملش ماليا مع صاحب الشقة دايركت نهائيا

الموقع عامل رقم خدمة عملاء 24/7 لاي طوارئ سواء للمؤجر او المستأجر .

-الحرية في مدة الأيجار :

يعني لك الحرية انك تأجر الشقة من اول يوم او اتنين , لغاية عدة شهور لو محدش حاجز قبلك .

-التواصل مع المستضيف :

و ده بيديك فرصة للإختلاط بأهل البلد و تتعرف اكتر علي ثقافة المجتمع اللي انت بتزوره .

عيوب Airbnb :

بالنسبالي شخصيا مش شايف عيوب كتير للموقع , إلا إذا كنت محتاج في سفرك Room Services او الخدمات الفندقية , فبالتالي الموقع ده مش ليك .

خلي بالك ساعات الشقة المعروضة بتبقي مختلفة عن الصور زي مثلا اضيق او حتي مختلفة خالص … هقولك تتفادي ده ازاي لما نتكلم عن النصائح اللي تخلي بالك منها دلوقتي .

اهم النصائح اللي لازم تخلي بالك منها :

-التقييمات … اهم حاجه لازم تخلي بالك منها , اوعي تحجز اي شقة او غرفة واخده تقييمات سيئة , اقرأ اراء الناس اللي حجزوها قبلك و شوف قالوا ايه عليها و علي صاحب الشقة علشان تبقي متطمن.

-شوف بروفايل الشخص اللي هتأجر منه , و اتأكد انه verified علي الموقع , أقرأ تقييمات الناس ليه اللي اتعامل معاهم.

-تواصل مع المؤجر قبل ما تحجز .. ابعتله رسالة و اسأله اي سؤال محتاج تعرفه زي مثلا هل الأنترنت شغال كويس , المواصلات من و إلي الشقة … الخ , و اتأكد انه شخص كويس و بيرد علي الرسايل ..

-اتأكد من سياسة الألغاء لكل شقة ناوي تحجزها , علشان لو عملت حجز و حبيت تلغيه متخسرش فلوسك , فقبل ما تحجز اتأكد كويس من النقطة دي.

-خلي بالك ان ساعات  الشقق بتكون بعيدة شوية عن المناطق السياحية , علشان كده لازم تفتح الخريطة في الموقع و تشوف مكان الشقة فين , و برضه تسأل كويس المؤجر عن ازاي توصل للشقة و هل محتاج تاكسي وللا لأ و هكذا.

-اهتم ببروفايلك و املاه كويس , و لو سافرت حاول تكون مستأجر او ضيف محترم و تدي انطباع كويس عن نفسك و حتي عن بلدك و ثقافتك , و حتي علشان تاخد تقييم كويس من صاحب الشقة , لأن كل ما كان بروفايلك في تقييمات كويسة كل ما هيبقي اسهل ان اصحاب الشقق يوافقوا علي طلبك بالأيجار.

تبدأ ازاي ؟

لو لسه معملتش أكونت … حظك كويس , دلوقتي تقدر تعمل حساب عن طريق اللينك ده  و هتاخد عن طريقي كريدت 25 دولار تقدر تستخدمهم في أول حجز ليك لأي أقامة من علي موقع Airbnb 

بعد كده اهتم كويس اوي بانك تملي البروفايل بتاعك بحيث انه يكون جذاب لأصحاب الشقق اللي هتأجر منهم , لأن انت لو عارض شقتك علي الموقع و جالك طلب ايجار من شخص بروفايله فاضي و شبه مجهول هتخاف و هتفكر ألف مره من انك تأجرله …

و ابدأ اعمل سيرش علي المدينة اللي هتزورها و اختار من الفلاتر في الموقع هل عايز تأجر شقة كاملة و للا مجرد غرفة وللا حتي مجرد مساحة أو كنبة جوه شقة …. هيطلعلك الاف الخيارات تقدر تختار منهم اللي يناسبك و يناسب ذوقك …

جربت Airbnb قبل كده و حابب تشاركنا تجربتك؟ او عندك اي سؤال بخصوصه؟ شاركنا بيه في الكومنتات او في صفحات السوشيال ميديا …