أكلات لازم تجربها في تركيا … المرادي المقالة دي لمحبي الأكل … الأكل من الحاجات المهمة جدا في ثقافة أي دولة , و اللي بشوف انك مينفعش تستكشف ثقافة معينة من غير ما تجري الأكل المحلي للدولة دي …
زي ما بقول دايما اني بستغرب جدا اللي بيسافر دولة جديدة و كل أكله يبقي في مطاعم الفاست فود زي كنتاكي و ماكدونالدز , انت كده تبقي بتضيع متعة أستكشاف ثقافة البلد اللي بتزورها بأنك تجرب أكلها ..
حبيت ابدأ بتركيا , اتكلمنا قبل كده عن ازاي تخطط للسفر لأسطنبول أول مره , و كمان اتكلمنا عن قرية تشيرالي اللي تعتبر من أحلي الوجهات السياحية اللي محدش يعرف عنها حاجه و اللي ممتازة للاسترخاء أو قضاء شهر العسل , بس كمان تركيا من البلاد المميزة جدا في الأكل , مش بس لأن المطبخ التركي له تأثير كبير علي مطابخنا في الشرق الأوسط و أوروبا , لكن كمان هو بالفعل مميز جدا … في المقالة دي هتكلم علي 10 أكلات لازم تجربها في تركيا , و هتتكلم بالتفصيل عنهم بحيث انك لو زرت تركيا تبقي عارف أنت هتجرب ايه 😀
[lwptoc colorScheme=”inherit” borderColor=”#dd8604″]
1- المانامان Menemen :
عجة البيض التركية , أو بالأحري النسخة التركية من الشكشوكة اللي في بلادنا العربية … الطبق ده من الأطباق اللذيذة في الفطار التركي , لما تصحي الصبح و تنزل من الهوستل أو الفندق بتاعك و في نيتك تفطر فطار تركي , هتلاقي مطاعم كتير بتقدم الطبق ده و بيتعمل قدامك ..
الطماطم و الفلفل و البصل يتطبخوا مع البيض المخفوق و مع اضافة الجبنة و السجق التركي , حاجه كده في الأحلام 😀 , مينفعش تزور تركيا من غير ما تجرب تفطر بالطبق المميز ده .
2- الدونر döner kebab … أشهر أكلة في قائمة أكلات لازم تجربها في تركيا :
في الوطن العربي في أكتر من شكل من أشكال الشاورما .. سواء المصري أو السوري … تاريخيا الشاورما تعود جذورها لبلاد الشام , و انتشرت لمعظم الشرق الأسط عن طريق الدولة العثمانية … كل اللي زار تركيا و جرب الدونر التركي هيعرف أد ايه هو مميز , غير أنه رخيص جدا , فتتبيلة اللحم و الخضار و البهارات و الثوم المستخدم بيخلوا الطعم فعلا مميز …
الأكل بصفة عامة في تركيا رخيص , لكن لو انت مسافر ملتزم بميزانية معينة , فالدونر التركي هيكون صديقك الصدوق 😀 , نصيحتي ليك خليك دايما في المطاعم الزحمة اللي عليها أقبال كبير , هتلافي الأكل فيها ألذ .
3- سندويتش السمك Balık ekmek :
لو هتسافر أسطنبول و بتحب السمك , يبقي هيعجبك أووي السندويتش ده , اتكلمت عنه قبل كده في مقالة أسطنبول لأنه فعلا رهيب …
هو عبارة عن سندويتش من فيلية السمك الطازج المقلي أو المشوي و معاه خضروات و كل ده داخل خبز تركي لذيذ و عليهم عصير ليمون …
مطاعم سندوتشات السمك أسفل جسر جالاطا
السندويتش الشهير ده أحسن مكان تاكله فيه في ساحة Eminönü مباشرة من القارب الذي يتم إعداده عليه , أو علي بعد خطوات تحت جسر جالاطا هتلاقي مطاعم كتير علي البوسفور مباشرة بتقدم السندويتش ده …
4- أسكندر كباب Iskender Kebab :
مينفعش تسيب تركيا من غير ما تجرب أكلة من أخلي أكلات لازم تجربها في تركيا و هي الأسكندر كباب , الطبق ده عباره عن قطع لحم ضأن مقطعة قطع رفيعة و بتتقدم مع صوص الطماطم و كل ده فوق قطع من الخبز التركي … و فوق الطبق كمية كويسة من الزبادي و الزبدة … طبق هيخليك تاكل صوابعك وراه 😀
5- الكمبير Kumpir :
أو البطاطس المحشية المشوية … من الأكلات اللذيذة جدددا في تركيا , بحب أجربها دايما في منطقة Ortaköy الجميلة في أسطنبول و انت قاعد قدام البوسفور …
الكمبير عبارة عن بطاطس مشوية , ممكن تختار أضافات تحطها جواها , الأضافات كتيير مثلا زيتون أو زبدة أو ذرة, او جبنة موتساريللا أو تشيدر أو خضراوات أو لحوم أو كاتشب أو مايونيز … إلخ … في أكشاك بيع الكمبير غالبا البائع هيسألك تحب تضيف أيه و تختار انت الأضافات اللي تحبها … الأكلة لذيذه جدا و تستاهل التجربة .
6- شيش كباب Shish Kebab :
من الأطباق الكلاسيكية في تركيا و هتلاقيها في كل المطاعم , عباره عن قطع من الدجاج أو اللحم مرصوصة علي أسياخ صغيرة خشبية و مشوية … و تقدم مع الأرز البطاطس المقلية و الخضراوات .
7- لحم معجون Lahmacun :
من أبسط و ألذ الأكلات التركية أو ما يعرف أحيانا بالبيتزا التركية … خبز رفيع و كريسبي و عليه لحم مفروم و احيانا قليل من الخضراوات و عصير الليمون ..
بيتميز انه رخيص جدا و سهل تلاقيه في معظم الشوارع التركية , و يعتبر سناك خفيف بين الوجبات و انت بتتفرج علي البلد .
8- الدولما Dolma .. ملك الأكلات في قائمتي أكلات لازم تجربها في تركيا :
الدولما أو المحشي من أشهر الأكلات التركية , المحاشي بصفة عامة من الأكلات اللي بتختلف من بلد لبلد , في مصر هنا المحشي مختلف كل الأختلاف عن المحشي العراقي أو السوري أو البوسني … في تركيا المحشي التركي مختلف كمان بس لذيذ جدا … سواء ورق العنب أو الباذنجان أو الفلفل … إلخ , مينفعش تروج تركيا من غير ما تجربه ..
9- أضنا كباب Adana Kebab :
طبق كلاسيكي كمان و شكل أخر من أشكال الكباب التركي العديدة , عباره عن لحم كباب سبايسي يقدم مع خبز رفيع و الكثير من البصل 😀 .
10- المشروبات التركية :
حبيت أختتم بيها المقالة لأن تركيا فيها مشروبات كتير مميزة , القهوة التركي في تركيا رهيبة غير القهوة التركي في أي دولة تانية … و كذلك شاي التفاح , أو السحلب التركي … قائمة من المشروبات المميزة في تركيا هتستمتع جدا و انت بتجربها …
طبعا فيه أطباق تانية كتيير لأن المطبخ التركي غني جدا , ده غير أن كل مدينة في تركيا بتتميز بطبق معين , بس حبيت أتكلم عن أشهر الأطباق اللي سهل تلاقيها في أي حتة و في نفس الوقت أسعارها رخيصة … لو جربت أكله في تركيا و حابب نضيفها للقائمة أو عندك أي استفسار شاركني بيه في الكومنتات أو علي صفحة المدونة علي شبكات التواصل الأجتماعي 🙂