لما بقرر اسافر بلد , اخر حاجه بفكر فيها هو اني ازور اشهر المدن … لاني ببساطة بكره الزحمة و الدوشة . بقرأ كتير و بذاكر البلد اللي هسافرها لغاية ما الاقي مدن او حتي قري حلوة و محدش يعرف عنها حاجه … قرية تشيرالي في تركيا هي واحده منهم اللي تعتبر من اجمل ما شافت عيني في تركيا …
لما تيجي تبحث عن مدن تركيا السياحية هتلاقي الكل بيتكلم عن اسطنبول , بورصة , انطاليا , ازمير , طرابزون …الخ , محدش بيحاول يخوض المغامرة و يجرب حاجه جديدة , انا عملت ده و اكتشفت فعلا ان تشيرالي دي تعتبر جوهرة مخفية مش واخده حقها علي الساحة السياحية في تركيا ..
فين تشيرالي ؟؟
تشيرالي هي قرية صغيرة في جنوب غرب مدينة انطاليا , بتبعد عن انطاليا بحوالي 80 كم . القرية بتقع علي شاطئ معزول علي البحر المتوسط طوله ٣ كيلو متر ، مياه البحر صافيه بطريقة رهيبة ، الجبال الخضراء علي مرمي البصر ،القرية مفيهاش فنادق كبيرة , هي بسيطة جدا و فيها بنسيونات و اكواخ صغيره مجهزة للسياح كلها في وسط الطبيعة بتخلي التجربة ليها طعم تاني …
ازاي توصل لتشيرالي ؟؟
أقرب مطار لتشيرالي هو مطار أنطاليا , في انطاليا هتروح لمحطة الأتوبيسات في انطاليا و هي محطة ضخمة , هتسأل عن الأتوبيسات اللي بتروح تشيرالي .. هما شركتين او تلاته بيتحركوا كل نص ساعة لتشيرالي اشهرهم (تشتشيك تور Cicek tour) او (باتي انطاليا Bati antalya) , تذكرة الأتوبيس 10 ليره , هتقول للسواق انك هتنزل عند مدخل تشيرالي ..
الاتوبيس هينزلك علي الطريق السريع عند مدخل القرية , هتلاقي عربيات تانية Vans واقفه كتير دي بتوصل الناس من المدخل لغاية جوا القرية (مسافة 7 كم) , تذكرتها 5-6 ليره , هتقول للسواق اسم الفندق اللي انت نازل فيه و هينزلك قدام بابه.
خلي بالك ان العربيات اللي قدام القرية دي موجودة من الساعة 8 الصبح لغاية الساعة 6 مساء , فبلاش توصل متأخر .
فيه حل تاني انك تاجر عربية بسواق من مطار انطاليا توصلك لغاية تشيرالي , و طبعا ده حل غالي لانه هيكلفك حوالي 90 يورو …
نصيحة لو رحت تشيرالي , و حبيت تسافر منها لمطار انطاليا , حاول تسأل في شركة تأجير السيارات اللي فيها عن ان كان فيه حد حابب يروح لمطار انطاليا في الوقت اللي انت هتسافر فيه , لان لو فيه عدد رايح , ممكن ال 90 يورو يتقسموا عليكو و بالتالي هتلاقي نفسك مدفعتش فلوس كتير و انت راجع من تشيرالي لانطاليا…
مين هيحب تشيرالي ؟؟
لو انت زيي بتحب الطبيعة و الهدوء , و نفسك في مكان تنسي في العالم كله وتحس فعلا بالطبيعة حواليك , او مثلا بتخطط لشهر العسل بتاعك, يبقي تشيرالي لازم تزورها , اما لو بتحب الزحمة و الناس و حياة المدينة يبقي هتحس بملل في تشيرالي , علشان كده اقرا كويس عن اي مكان هتروحه علشان تبقي عارف هتقابل ايه لما تروح .
ايه المميز في تشيرالي؟؟
في شهر سبتمبر من كل عام هو موسم فقس بيض سلاحف الكاريتا كاريتا المشهور بيها شاطئ تشيرالي , ظاهرة تستاهل انك تشوفها و تراقب السلاحف و هي بتطلع من البيضه و بتمشي ببطئ في اتجاه البحر …
علي بعد خطوات من شاطئ تشيرالي هتلاقي اطلال رومانية قديمة في مدينة اوليمبوس المشهورة … منظر النهر الجاري وسط الاطلال اللي بيجري و بيصب في البحر المتوسط منظر هيخليك تحس انك رجعت للاساطير الرومانية و الاغريقية القديمة … اللي فاكر مسلسل “هيركليز” اللي كان بيتذاع زماااان في التلفزيون … هو ده نفس الاحساس اللي حسيته و انا ماشي وسط اطلال تشيرالي … الميزة في اطلال اوليمبوس انها مش زحمة زي بقية الاماكن السياحية في تركيا , علشان كده هتبقي تجربة فريدة ..
علي بعد حوالي 4 كم يوجد جبل التشيميرا التاريخي , الجبل ده علي قمته نار لا تنطفئ ابدا , التفسير العلمي لهذه الظاهرة هو انبعاث غاز الميثان من فتحات علي قمة الجبل ده , الجبل ده مشهور في الاساطير الرومانية القديمة حيث انه طبقا للأساطير القديمة هو بيت المخلوق الاسطوري (التشيميرا) اللي بينفث النار …
النار التي لا تنطفئ ابدا
علشان تروح الجبل ده يفضل تأجر عربية من شركة تأجير سيارات في قرية تشيرالي , و تسوق طريق ضيق لغاية الجبل , او فيه رحلات بتطلع من القرية للجبل ..
الجبل ارتفاعه حوالي 1.5 كم , فيه درجات صخرية قديمة ممكن تطلع عليها هي مش متسوية علشان كده لازم يكون عندك قدر من اللياقة البدنية علشان تطلعه , طبعا يفضل انك تطلع قبل الغروب بساعة مثلا لان منظر النار بالليل روعة … و متنساش تاخد معاك كشاف علشان و انت نازل من الجبل بالليل تعرف تشوف الدرجات اللي هتنزل عليها …
طبعا فيها رحلات بحرية بتتعمل و تقدر تعمل سنوركلينج Snorkeling في مياه البحر الصافية , غالبية الرحلات بتكون شاملة وجبة غداء في وسط المياه و بتكون اجواء حلوة اوي , اسأل في الفندق اللي هتنزل فيه غالبا بيكونوا منظمين الرحلات دي
أنزل فين في تشيرالي ؟؟
فيه فنادق و بانسيونات كتييير جدا في تشيرالي كلها بتدار عن طريق عائلات و معظهم واخدين تقييمات عالية , أنا اللي جربته كان بانسيون اسمه Porto Ceneviz Pansiyon , المميز فيه انه حرفيا وسط الطبيعة , اتخيل نفسك بتفطر و جنبك جبل عالي و بينك و بين الجبل نهر صغير بيجري , و اشجار … البنسيون عباره عن اكواخ من الخشب و الطوب مجهزة و مكيفة , و بيديره راجل شخصيته ظريفه جدا اسمه قدير , الراجل ده بيدير المكان لوحده من كل حاجه من النظافة و تجهيز الفطار (اللي بالمناسبة افطار اسطوري) ده غير انه مبيبخلش عليك بأي مساعدة او نصيحة في القرية …
اخيرا معلومات لازم تخلي بالك منها قبل ما تروح تشيرالي :
-لو هتروح عن طريق الأتوبيس اعمل حسابك انك توصل بدري علشان تعرف تلاقي الميني باص اللي هيوصلك للقرية .
-في 2 ATM في وسط القرية عند أول الكوبري المشهور في أول القرية , غالبية التعامل هيكون بالكاش لانه قرية بسيطة .
-اغلبية الفنادق بتكون شاملة الفطار , فيه مطاعم موجودة في القرية كتير , دايما حوال تاكل في المطاعم اللي بتديرها العائلات , هتلاقي الأكل احلي و ارخص , ده غير ان فيه سوبرماركت في القرية تقدر تشتري من حاجات تاكلها.
-مفيش مستشفيات و لا عيادات في القرية , فيه طبيب واحد مكتبه موجود بجوار الحلاق موجود للاستشارات , طبعا لو احتجت اي مساعدة اسأل اي حد في القرية أو حتي في الفندق و كلهم هيساعدوك.
-القرية أمان جدددا , بس ده ميمنعش انك تاخد حذرك و متسيبش اي متعلقات ثمينه مثلا علي الشاطئ .
ده كان تقريري بخصوص تشيرالي ….اتمني اكون غطيت كل الحاجات اللي بيحتاجها المسافر للقرية الرائعة دي , لو عندك اي سؤال ابعتلي في الكومنتات أو علي صفحات السوشيال ميديا و أكيد هجاوبك علي طول ..