الأوراق المطلوبة لاستخراج جواز السفر
Planning تخطيط

الأوراق المطلوبة لاستخراج جواز السفر 2019 …دليلك الكامل

on
سبتمبر 21, 2019

زي ما اتعودت في مقالاتي و اللي بحب دايما تكون كمرجع لأي مبتدئ في مجال السفر و حابب ياخد أول خطوة

مكانش ينفع منبدأش من الأول خالص و نتكلم عن ازاي تطلع الباسبور و ايه هي الأوراق المطلوبة لاستخراج جواز السفر ..

المقالة دي موجهه لأي حد لسه معملش الباسبور , هنتكلم فيها بالتفصيل عن ازاي تطلع جواز السفر ..

مش هنتكلم بس عن جواز السفر المصري , لأ هنتكلم كمان عن جواز السفر التونسي , جواز السفر المغربي , جواز السفر الجزائري و كمان جواز السفر السعودي .

و لاحقا ان شاء الله هنضيف معلومات عن استخراج جواز السفر لجنسيات عربية أخري.

لو عمرك ما سافرت قبل كده و بتفكر تسافر أول مرة , يبقي ركز بقي معايا لأن أول خطوة هي هنا , و هي ازاي تطلع الباسبور …

 

 

 

الأوراق المطلوبة لاستخراج جواز السفر المصري أول مرة:

الأوراق المطلوبة لاستخراج جواز السفر

 

مبدأيا هتتوجه لأدارة الجوازات في محافظتك و تكون مجهز الأوراق دي :

1-استمارة نموذج 29 جوازات :

و ده بتاخده لما تروح هناك مجانا .. و تملي بياناتك بحرص ..

ملحوظة مهمة :و انت بتكتب أسمك بالأنجليزي في الاستمارة اتأكد من ال spelling علشان ميحصلكش مشاكل مع السفارات بعد كده.

و حاول دايما تخلي ال spelling بتاع اسمك واحد سواء في الباسبور و كروت البنوك و اي حاجه تانية .

بمعني لو اسمك محمد ميبقاش مثلا اسمك Mohamed  في الباسبور , وعلي كارد الفيزا بتاع البنك Muhammad , خلي دايما حروف اسمك واحدة.

 

2-بطاقة الرقم القومي:

و دي لو عمرك فوق 16 سنة , و لازم تكون سارية , بمعني لو كانت منتهية روح جددها الأول قبل ما تقدم .

أما لو عمرك تحت 16 سنة فتقدم شهادة الميلاد .

و لازم كمان تقدم صورة من بطاقة الرقم القومي أو شهادة الميلاد حسب هتقدم أيه.

 

3-المؤهل الدراسي:

لو مثبت مؤهلك في بطاقة الرقم القومي خلاص , اما لو مش مثبت ساعتها بتقدم ما يثبت حصولك علي مؤهل عالي او متوسط.

أما لو طالب : فبتقدم شهادة قيد من مكان دراستك و لو كنت ذكر يكون مثبت فيها قرار تأجيلك من التجنيد.

أما لو مش معاك مؤهل :فبتدفع 400 جنية تأمين في حساب مصلحة الجوازات , و بتسترد المبلغ عند إلغاء أو انتهاء الباسبور .

 

4- صور شخصية:

عدد 3 صور شخصية ليك 4×6 بخلفية بيضاء.

 

5-الموقف التجنيدي للذكور:

لو كنت فوق 19 سنة فلازم تقدم ما يثبت موقفك التجنيدي زي مثلا شهادة تأدية الخدمة العسكرية أو شهادة الأعفاء أو التأجيل .

 

6- ما يثبت الحالة الأجتماعية للإناث :

لو أنثي و متزوجة و اسم الزوج مش مكتوب في بطاقة الرقم القومي , بتقدمي قسيمة الزواج + صورة منها.

 

7-السجل التجاري لو تاجر:

لو عندك مشروع خاص , بتقدم السجل التجاري + صورة منه.

 

8- الرسوم المطلوبة لاستخراج جواز السفر :

-لو أول مرة 335 جنيه.

-لو تجديد أو بدل فاقد فالرسوم 485 جنيه.

و بتستلم الباسبور في اليوم الثالث بعد التقديم.

 

صلاحية جواز السفر المصري هي 7 سنوات و لا يجدد … و يتم استخراج جواز سفر جديد .

 

-هل يمكن استخراج جواز سفر مستعجل ؟

لا مفيش أمكانية لاستخراج جواز سفر مستعجل , جواز السفر في الطبيعي بياخد 3-4 أيام عمل .

 

 

 

 

الأوراق المطلوبة لاستخراج جواز السفر التونسي أو تجديده:

جواز السفر التونسي

 

لو كنت مواطن تونسي عايش في تونس , فحسب هيئة الإتصال و الإرشاد الإداري الحكومية  هتتوجه إلي مركز الأمن (شرطة أو حرس وطني) و يكون معاك الأوراق دي :

 

1-أستمارة الحصول علي جواز السفر:

هتملي البيانات و توقع في المكان المخصص في الاستمارة.

 

2-بطاقة التعريف الوطنية:

نسخة منها + الأستظهار بالأصل , و بالنسبة للقصر يقدموا مضمون ولادة.

 

3-صور شمسية :

عدد 4 صور شمسية بخلفية بيضاء , حجم 3.5×4.5 .

 

4-بالنسبة للتلاميذ و الطلبة:

تقديم ما يفيد الدراسة.

 

5-بالنسبة للقصر:

ترخيص الولي + نسخة من بطاقة تعريفه.

 

6-وصل خلاص تسلمه قباضات المالية قيمته:

-25 دينار بالنسبة للتلاميذ و الطلبة أو الأطفال تحت سن السابعة.

-80 دينار للبقية.

 

7-جواز السفر القديم:

بتقدمه في حالة التجديد.

 

8-طلب للاحتفاظ بالجواز القديم:

في حالة الرغبة في الأحتفاظ بالجواز القديم , بتقدم طلب علي ورق عادي.

 

بيتم الحصول علي الجواز الجديد في خلال 15 يوم من طلب الخدمة .

 

 

 

 

الأوراق المطلوبة لاستخراج جواز السفر المغربي:

جواز السفر المغربي

 

لو كنت مغربي و عايش في المغرب , فحسب الموقع الخاص بجواز السفر التابع لوزارة الداخلية المغربية , فيه خطوات لازم تعملها و هي :

 

1-شراء تمبر إلكتروني :

اضغط علي شراء التمبر الإلكتروني من الموقع السابق ذكره , و ثمن التمبر 500 درهم

 

2-تكوين ملف طلب الحصول علي جواز السفر البيومتري:

و ده بتملاه من نفس الموقع , اضغط علي “تعبئة الطلب” و تختار الفئة المناسبة و تملي الاستمارة .

و بعدين تطبعها علي ورقة A4-80 g/m²

3-الأوراق المطلوبة لاستخراج جواز السفر  :

-استمارة طلب الحصول علي جواز السفر السالف ذكرها معبأه و مؤرخة و مطبوعة بعد شراء التمبر الإلكتروني.

-نسخة من بطاقة التعريف الوطنية الإلكترونية سارية.

-عدد 2 صورة فوتوغرافية شمسية , خلفية بيضاء بحجم 3.5×4.5 .

-في حالة التجديد تقديم جواز السفر القديم , او ما يبرر مصيره.

-في حالة ضياع او سرقة جواز السفر، القيام بالإدلاء بشهادة التصريح بالضياع أو السرقة، مع توضيح رقم الباسبور الضائع أو المسروق، مقدمة من طرف :

  •  المصالح التابعة للأمن الوطني او للدرك الملكي لو كان الباسبور ضاع أو سرق بالمغرب.
  •  المصالح الأمنية داخل المغرب أو إذا تعذر ذلك، السفارة أو القنصلية المغربية  لو الباسبور ضاع أو سرق  بالخارج.

4-إيداع الطلب:

يتم إيداع الوثائق و الطلب لدي الملحقة الإدارية أو القيادة التابع لها محل سكن مقدم الطلب .

 

و عند أصدار جواز السفر , يتم التواصل مع مقدم الطلب برسالة نصية قصيرة أو إلكترونية لاستلام الباسبور.

 

 

 

 

الأوراق المطلوبة لاستخراج جواز السفر الجزائري:

جواز السفر الجزائري

 

لو كنت جزائري و عايش في الجزائر , فحسب الموقع التابع لوزارة الداخلية الجماعات المحلية , الوثائق المطلوبة كالأتي:

استمارة معبأه و موقعه من مقدم الطلب , او من ولي الأمر في حالة القصر , و مرفقه بالوثائق التالية :

-مستخرج خاص من عقود شهادة الميلاد (12 خ) و يسلم في مطبوع خاص.

-لو بتقدم أول مرة تقدم شهادة الجنسية.

-في حالة التجديد بتقدم جواز السفر المنتهي , مرفق بشهادة ميلاد الأب و الأم , و إن تعذر ذلك تقدم شهادة وفاة احدهما.

-شهادة الإقامة بشرط ان يقل تاريخ إصدارها عن ستة أشهر.

-شهادة عمل , أو شهادة مدرسية للطلبة.

-عدد 4 صور شخصية , بخلفية بيضاء و بدون إطار.

-طابع جبائي أو قسيمة جبائية بمبلغ يماثل نوع الوثيقة المطلوبة.

-نسخة من بطاقة فصيلة الدم.

 

توضع الطلبات علي مستوي الدائرة الإدارية أو دائرة الإقامة , و يمكن لمقدم الطلب متابعة الطلب عن طريق الموقع السالف ذكره.

و تسحب الجوازات المنجزة من نفس مكان تقديم الطلب.

 

 

 

 

الأوراق المطلوب لاستخراج جواز السفر السعودي:

جواز السفر السعودي

لو كنت سعودي و عايش في السعودية , فحسب موقع المديرية العامة للجوازات التابع لوزارة الداخلية يجب ان تتبع الاجراءات التالية :

أ‌- يشترط للحصول على الباسبور لمن فوق 15 عاماً فأكثر ما يأتي:

1-الخصائص الحيوية تكون مسجلة بالنظام.

2- التسجيل بخدمة (أبشر).

3- التسجيل في العنوان الوطني.

4- تسديد رسوم استخراج جواز السفر آلياً.

5- موافقة ولي الأمر على إصدار جواز السفر لمن عمره تحت ال21 عام، ويجوز التفويض عبر خدمة (أبشر).

6- الدخول على خدمة (أبشر)، والتأشير على التعليمات والتعهدات، وتكمل باقي خطوات إصدار الجواز.

7- عند طلب باسبور بديل لازم تحضر الباسبور القديم لمكاتب الجوازات عند إستلام جواز السفر الجديد. ويجوز التفويض عبر خدمة (أبشر).

ب- يشترط للحصول على جواز السفر لمن هم تحت 15 عاماً ما يأتي:

1-إضافة الأولاد في سجل الأسرة.

2- تسديد رسوم إصدار جواز السفر آلياً.

3-موافقة ولي الأمر على إصدار جواز السفر، ويجوز تفويض من يراه في خدمة (أبشر).

4-إحضار صورتين حديثتين، ملونة و بخلفية بيضاء، غير فورية أو مسحوبة لصاحب الجواز.

5-تعبئة استمارة إصدار جواز السفر إلكترونياً، وإرفاق صورة من هوية ولي الأمر وسجل الأسرة مع إحضار الأصل منهما للمطابقة.

6- عند طلب جواز سفر بديل يجب إحضار الجواز القديم لدى مكاتب الجوازات. ويجوز التفويض من خدمة (أبشر).

7 –استلام الجواز الجديد من إدارات الجوازات من قبل ولي الأمر ، ويجوز التفويض من خدمة (أبشر) .

دي كانت كل المعلومات اللي هتحتاجها لو كنت مصري , تونسي , مغربي , جزائري أو سعودي لاستخراج جواز السفر و تبدأ أول خطوة في طريق السفر و استكشاف العالم ..

لو عندك أي معلومات حابب تشاركنا بيها أو عندك اي استفسار يا ريت تشاركنا بيه في الكومنتات أو علي صفحات السوشيال ميديا للمدونة 🙂

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.