الأوراق المطلوبة لاستخراج جواز السفر 2026 …دليلك الكامل

زي ما اتعودت في مقالاتي و اللي بحب دايما تكون كمرجع لأي مبتدئ في مجال السفر و حابب ياخد أول خطوة, مكانش ينفع منبدأش من الأول خالص و نتكلم عن ازاي تطلع الباسبور و ايه هي الأوراق المطلوبة لاستخراج جواز السفر 2026. المقالة دي موجهه لأي حد لسه معملش الباسبور, هنتكلم فيها بالتفصيل عن ازاي تطلع جواز السفر.

مش هنتكلم بس عن جواز السفر المصري, لأ هنتكلم كمان عن جواز السفر التونسي, جواز السفر المغربي, جواز السفر الجزائري و كمان جواز السفر السعودي و الكويتي. حبيت أكتب المقالة دي علشان تكون مرجع شامل ليك لو بتفكر تسافر و لسه معملتش أول خطوة.

لو عمرك ما سافرت قبل كده و بتفكر تسافر أول مرة, يبقي ركز بقي معايا لأن أول خطوة هي هنا, و هي ازاي تطلع الباسبور …

الأوراق المطلوبة لاستخراج جواز السفر المصري 2026 أول مرة

مبدأيا هتتوجه لإدارة الجوازات في محافظتك و تكون مجهز الأوراق دي:

1- استمارة نموذج 29 جوازات: و ده بتاخده لما تروح هناك مجانا .. و تملي بياناتك بحرص.

ملحوظة مهمة: و انت بتكتب أسمك بالإنجليزي في الاستمارة اتأكد من ال spelling علشان ميحصلكش مشاكل مع السفارات بعد كده. و حاول دايما تخلي ال spelling بتاع اسمك واحد سواء في الباسبور و كروت البنوك و اي حاجه تانية. بمعني لو اسمك محمد ميبقاش مثلا اسمك Mohamed في الباسبور, و علي كارد الفيزا بتاع البنك Muhammad, خلي دايما حروف اسمك واحدة. و دي معلومة ناس كتير مبتعرفهاش و بتعمل مشاكل كتير بعد كده.

2- بطاقة الرقم القومي: و دي لو عمرك فوق 15 سنة, و لازم تكون سارية و البيانات عليها محدثة. بمعني لو كانت منتهية أو فيه بيانات اتغيرت روح حدثها الأول قبل ما تقدم. أما لو عمرك تحت 15 سنة فتقدم شهادة الميلاد المميكنة برقم قومي. و لازم كمان تقدم صورة من بطاقة الرقم القومي أو شهادة الميلاد حسب هتقدم أيه.

3- المؤهل الدراسي: لو مثبت مؤهلك في بطاقة الرقم القومي خلاص مش محتاج حاجة تانية. أما لو مش مثبت ساعتها بتقدم ما يثبت حصولك علي مؤهل عالي او متوسط. أما لو طالب: فبتقدم شهادة قيد دراسي من مكان دراستك عن العام الدراسي الحالي, و لو كنت ذكر يكون مثبت فيها قرار تأجيلك من التجنيد. أما لو مش معاك مؤهل: فبتدفع ضمان مالي في حساب مصلحة الجوازات, و بتسترد المبلغ عند إلغاء أو انتهاء الباسبور.

4- صور شخصية: عدد 3 صور شخصية حديثة ملونة 4×6 بخلفية بيضاء.

5- الموقف التجنيدي للذكور: لو كنت فوق 19 سنة فلازم تقدم ما يثبت موقفك التجنيدي زي مثلا شهادة تأدية الخدمة العسكرية أو شهادة الإعفاء أو التأجيل. و لمن بلغ 29 سنة لازم يقدم شهادة “غير مطلوب للتجنيد” أو شهادة تأدية الخدمة أو الإعفاء.

6- ما يثبت الحالة الاجتماعية للإناث: لو أنثي و متزوجة و اسم الزوج أو الحالة الاجتماعية مش مكتوبين في بطاقة الرقم القومي, بتقدمي قسيمة الزواج + صورة منها.

7- السجل التجاري لو تاجر: لو عندك مشروع خاص, بتقدم السجل التجاري + صورة منه.

8- البيانات البيومترية: و دي حاجة جديدة, لما تروح مصلحة الجوازات هتسجل بصمة الإصبع و الصورة الرقمية في النظام. الموضوع بسيط و بياخد دقايق.

رسوم استخراج جواز السفر المصري 2026 (محدثة)

خلي بالك, الرسوم اتغيرت من يوليو 2025 و بقت أعلى من الأول. دي الرسوم الجديدة:

جواز سفر عادي (أول مرة أو تجديد): حوالي 705 لـ 900 جنيه شاملة كل الرسوم و الدمغات. بتستلمه في خلال 3 لـ 7 أيام عمل.

جواز سفر بدل فاقد أو تالف: حوالي 1155 لـ 1450 جنيه. و الرسوم أعلى علشان يقللوا حالات الإهمال.

خدمة الجواز المستعجل (نفس اليوم): بتدفع 500 جنيه إضافية فوق الرسوم العادية, و بتستلم الجواز في نفس يوم التقديم. و دي خدمة اختيارية لمن يرغب من غير التقيد بالاختصاص المكاني.

خدمة الجواز العاجل (اليوم التالي): بتدفع 100 جنيه إضافية, و بتستلم الجواز في يوم العمل التالي. و دي كمان من غير التقيد بالاختصاص المكاني.

ملحوظة مهمة: في المقالة القديمة كنا ذكرنا إن مفيش إمكانية لاستخراج جواز سفر مستعجل, بس الوضع اتغير و بقى متاح دلوقتي بالرسوم اللي ذكرناها فوق. و ده تطور كويس جدا خصوصا لو عندك سفر مفاجئ.

ازاي تطلع جواز السفر المصري أونلاين 2026

و دي معلومة مهمة جدا ناس كتير مبتعرفهاش … دلوقتي تقدر تبدأ إجراءات استخراج جواز السفر أونلاين من البيت عن طريق موقع وزارة الداخلية المصرية. الخطوات بسيطة:

1- ادخل على موقع وزارة الداخلية المصرية.
2- روح لقسم “دليل الخدمات الحكومية” و اختار “الهجرة والجنسية”.
3- اعمل حساب جديد أو سجل دخول لو عندك حساب.
4- ابدأ ملي البيانات المطلوبة لاستخراج جواز السفر.
5- ارفع المستندات المطلوبة بصيغة واضحة.
6- ادفع الرسوم إلكترونيا بأي وسيلة دفع إلكتروني معتمدة.

بعد كده هتحتاج تروح مصلحة الجوازات مرة واحدة بس علشان البصمة و الصورة الرقمية و استلام الجواز. يعني الموضوع بقى أسهل بكتير من الأول.

صلاحية جواز السفر المصري

صلاحية جواز السفر المصري هي 7 سنوات و لا يجدد, يعني بعد ما ينتهي بتطلع جواز جديد. و لو طلعت الجواز من غير بطاقة رقم قومي (بشهادة الميلاد بس) فالجواز بيطلع لمدة 3 سنوات فقط و لمرة واحدة, و بعدها لازم تطلع بطاقة رقم قومي.

لو كنت في سن التجنيد و طلعت الباسبور و مسافر, متنساش تطلع كمان تصريح السفر الالكتروني اللي اتكلمنا عنه بالتفصيل في مقالة: تصريح السفر الالكتروني في 6 خطوات بكل سهولة

و لو طلعت الباسبور و عايز تعرف تسافر فين من غير فيزا, راجع مقالة دول بدون فيزا للمصريين 2026 اللي فيها القائمة الكاملة.

الأوراق المطلوبة لاستخراج جواز السفر التونسي 2026

لو كنت مواطن تونسي عايش في تونس, فحسب الموقع الرسمي لوزارة الداخلية التونسية هتتوجه إلي مركز الأمن (شرطة أو حرس وطني) حسب مرجع النظر الترابي, و يكون معاك الأوراق دي:

1- استمارة طلب جواز سفر عادي مقروء آليا: هتملي البيانات و توقعها بصفة شخصية داخل الخانة المعدة للغرض.

2- بطاقة التعريف الوطنية: نسخة منها + الاستظهار بالأصل. و بالنسبة للقصر يقدموا مضمون ولادة.

3- صور شمسية: عدد 4 صور شمسية بخلفية بيضاء, حجم 3.5×4.5 سم, حسب المواصفات الرسمية.

4- بالنسبة للتلاميذ و الطلبة: تقديم وثيقة تثبت وضعية الدراسة.

5- بالنسبة للقصر: ترخيص الولي مصحوبا بنسخة من بطاقة تعريفه.

6- وصل خلاص رسوم الطابع الجبائي:
– 25 دينار تونسي بالنسبة للتلاميذ و الطلبة والأطفال دون سن 6 سنوات.
– 80 دينار تونسي للبقية.

7- جواز السفر القديم: بتقدمه في حالة التجديد.

8- طلب للاحتفاظ بالجواز القديم: في حالة الرغبة في الاحتفاظ بالجواز القديم, بتقدم طلب علي ورق عادي.

صلاحية جواز السفر التونسي: 5 سنوات.

مدة الإنجاز: بيتم إصدار الجواز الجديد في خلال 15 يوم من تقديم الطلب.

للتونسيين المقيمين بالخارج: نفس الأوراق تقريبا, بالإضافة إلى وثيقة تثبت الإقامة القانونية بالخارج. و بالنسبة للرسوم بتدفع ما يعادل المبلغ بالعملة الأجنبية. يتم إيداع الطلب في السفارة أو القنصلية التونسية في بلد الإقامة.

الأوراق المطلوبة لاستخراج جواز السفر المغربي 2026

لو كنت مغربي و عايش في المغرب, فحسب الموقع الرسمي لجواز السفر التابع لوزارة الداخلية المغربية passeport.ma, فالخطوات كالتالي:

1- شراء التمبر الإلكتروني: و ده إجراء إلزامي. ثمن التمبر 500 درهم مغربي لجميع الفئات العمرية. تقدر تشتريه إلكترونيا عبر موقع المديرية العامة للضرائب tax.gov.ma بالبطاقة البنكية, أو من خلال وكالات الخدمات المعتمدة زي “تسهيلات” أو “كاش بلوس”. بعد الشراء هتوصلك رسالة SMS أو إيميل فيها رمز مكون من 16 رقم, و ده هو التمبر الإلكتروني.

2- ملء استمارة طلب جواز السفر البيومتري: بتدخل على الموقع الرسمي passeport.ma, و بتختار الفئة المناسبة و تملي الاستمارة إلكترونيا و بعدين تطبعها على ورقة A4.

3- الأوراق المطلوبة:
– الاستمارة معبأة و مؤرخة و مطبوعة بعد شراء التمبر الإلكتروني.
– نسختان من بطاقة التعريف الوطنية الإلكترونية سارية المفعول.
– عدد 2 صورة فوتوغرافية شمسية حديثة, بحجم 3.5×4.5, بخلفية موحدة (بيضاء أو زرقاء أو رمادية).
– في حالة التجديد تقديم جواز السفر القديم, أو ما يبرر مصيره.
– في حالة ضياع أو سرقة الجواز, تقديم شهادة التصريح بالضياع أو السرقة من المصالح المختصة للأمن الوطني أو الدرك الملكي.

4- إيداع الطلب: يتم إيداع الوثائق لدى الملحقة الإدارية أو القيادة أو الباشوية التابعة لمحل السكن. هيتم أخذ بصمات أصابعك و صورتك الرقمية لتحديث البيانات البيومترية. و عند إصدار الجواز, هتوصلك رسالة نصية أو إلكترونية لاستلامه.

صلاحية جواز السفر المغربي: 5 سنوات لمن فوق 18 سنة, و 3 سنوات للقاصرين تحت 18 سنة.

مدة الإنجاز: من 10 لـ 20 يوم عمل تقريبا حسب المدينة و عدد الطلبات.

جواز سفر مستعجل: في الحالات الطارئة جدا (سفر للعلاج, وفاة, بعثات), ممكن طلب جواز مؤقت برسوم إضافية ممكن توصل لـ 1000 درهم, و بيتم إصداره في خلال 24 لـ 72 ساعة.

للمغاربة المقيمين بالخارج: نفس الوثائق تقريبا, و يتم التقديم في السفارة أو القنصلية المغربية في بلد الإقامة. في حالة ضياع الجواز بالخارج, الرسوم بتوصل 1080 درهم.

الأوراق المطلوبة لاستخراج جواز السفر الجزائري 2026

لو كنت جزائري و عايش في الجزائر, فحسب الموقع التابع لوزارة الداخلية و الجماعات المحلية, الوثائق المطلوبة كالآتي:

استمارة معبأة و موقعة من مقدم الطلب, أو من ولي الأمر في حالة القصر, و مرفقة بالوثائق التالية:

– مستخرج خاص من عقود شهادة الميلاد (12 خ) و يسلم في مطبوع خاص.
– لو بتقدم أول مرة تقدم شهادة الجنسية.
– في حالة التجديد بتقدم جواز السفر المنتهي, مرفق بشهادة ميلاد الأب و الأم, و إن تعذر ذلك تقدم شهادة وفاة أحدهما.
– شهادة الإقامة بشرط أن يقل تاريخ إصدارها عن ستة أشهر.
– شهادة عمل, أو شهادة مدرسية للطلبة.
– عدد 4 صور شخصية, بخلفية بيضاء و بدون إطار.
– طابع جبائي أو قسيمة جبائية بمبلغ يماثل نوع الوثيقة المطلوبة.
– نسخة من بطاقة فصيلة الدم.

توضع الطلبات على مستوى الدائرة الإدارية أو دائرة الإقامة, و يمكن لمقدم الطلب متابعة الطلب عن طريق الموقع الرسمي لوزارة الداخلية.

صلاحية جواز السفر الجزائري: 10 سنوات للبالغين, و 5 سنوات للقصر (أقل من 19 سنة).

الأوراق المطلوبة لاستخراج جواز السفر السعودي 2026

لو كنت سعودي و عايش في السعودية, فالأخبار الحلوة إن إصدار و تجديد جواز السفر السعودي بقى رقمي بالكامل عبر منصة “أبشر”, من غير ما تحتاج تروح مكاتب الجوازات. و ده حسب المديرية العامة للجوازات التابعة لوزارة الداخلية.

أ‌- شروط الحصول على الباسبور لمن فوق 15 سنة:

1- الخصائص الحيوية تكون مسجلة بالنظام.
2- التسجيل بخدمة (أبشر).
3- التسجيل في العنوان الوطني.
4- تسديد رسوم استخراج جواز السفر إلكترونيا عبر نظام “سداد” أو القنوات البنكية المعتمدة.
5- موافقة أحد الأبوين على إصدار جواز السفر لمن عمره تحت الـ 21 عام, ويجوز التفويض عبر خدمة (أبشر).
6- الدخول على خدمة (أبشر), والتأشير على التعليمات والتعهدات, واختيار مدة الجواز (5 أو 10 سنوات), و تحديد طريقة الاستلام.
7- عند طلب باسبور بديل لازم تحضر الباسبور القديم.

ب- شروط الحصول على جواز السفر لمن هم تحت 15 سنة:

1- إضافة الأولاد في سجل الأسرة.
2- تسديد رسوم إصدار جواز السفر إلكترونيا.
3- موافقة أحد الأبوين على إصدار الجواز, ويجوز التفويض عبر خدمة (أبشر).
4- إحضار صورتين حديثتين, ملونة و بخلفية بيضاء.
5- تعبئة استمارة إصدار جواز السفر إلكترونيا عبر أبشر.

رسوم جواز السفر السعودي 2026:
– 300 ريال سعودي لمدة 5 سنوات.
– 600 ريال سعودي لمدة 10 سنوات.

طريقة الاستلام: في 2026 أصبح الاستلام عبر البريد السعودي “سبل” هو الخيار الافتراضي. بيجيك موظف البريد يستلم الجواز القديم و يسلمك الجواز الجديد في خلال 3 لـ 5 أيام عمل, من غير ما تحتاج تروح إدارة الجوازات.

الأوراق المطلوبة لاستخراج جواز السفر الكويتي 2026

لو كنت كويتي و عايش في الكويت, فحسب البوابة الإلكترونية الرسمية لدولة الكويت و الإدارة العامة للجنسية ووثائق السفر, دي الإجراءات المحدثة:

الشروط الأساسية:
– أن يكون كويتي الجنسية و يحمل شهادة الجنسية الكويتية و لديه ملف جنسية فعال.
– أن يكون الشخص متواجد داخل البلاد.
– عند التقديم بيتم أخذ البصمة و التوقيع لكل شخص بلغ من العمر 12 سنة فما فوق. و يعفى من التوقيع الأشخاص الأقل من 10 سنوات, و من البصمة الأقل من 12 سنة.

الأوراق المطلوبة لاستخراج جواز سفر كويتي لأول مرة:
– عدد 4 صور شخصية حديثة مقاس 4×6 بخلفية زرقاء (مش بيضاء زي باقي الدول).
– البطاقة المدنية الأصلية و صورة عنها.
– صورة شهادة الميلاد (للأطفال).
– صورة عن آخر شهادة دراسية (إذا كان عمره 7 سنوات فما فوق).
– حضور الممثل القانوني و البطاقة المدنية (للقصر).

رسوم جواز السفر الكويتي 2026:
– 3 دنانير كويتية لمدة 5 سنوات.
– 6 دنانير كويتية لمدة 10 سنوات (لمن هم 30 سنة فما فوق).
– يعفى من الرسوم المواطنين من ذوي الاحتياجات الخاصة و المواطنين البالغين 65 سنة فأكثر.

إمكانية التقديم أون لاين: دلوقتي تقدر تقدم على تجديد الجواز الكويتي أون لاين عبر البوابة الإلكترونية لدولة الكويت, بشرط إن بصماتك تكون مسجلة في النظام من قبل, و الجواز الحالي مش تالف أو مفقود.

أماكن التقديم: لو محتاج تروح بنفسك, هتتوجه لأحد مراكز الإدارة العامة للجنسية ووثائق السفر حسب مقر سكنك:
– محافظة العاصمة: مركز خدمة الشامية
– محافظة حولي: مركز خدمة غرب مشرف
– محافظة الفروانية: مركز خدمة إشبيلية
– محافظة مبارك الكبير: مركز خدمة العدان ق 7
– محافظة الجهراء: مركز خدمة سعد العبد الله
– محافظة الأحمدي: مركز خدمة فهد الأحمد

مواعيد العمل: من الأحد للخميس (8 صباحا لـ 1:30 ظهرا), و السبت (9 صباحا لـ 2 ظهرا). الفترة من 8 لـ 10 صباحا بتكون أولوية للمسنين و ذوي الاحتياجات الخاصة.

في الآخر

دي كانت كل المعلومات المحدثة لسنة 2026 عن الأوراق المطلوبة لاستخراج جواز السفر اللي هتحتاجها لو كنت مصري, تونسي, مغربي, جزائري, سعودي أو كويتي لاستخراج جواز السفر و تبدأ أول خطوة في طريق السفر و استكشاف العالم.

لو طلعت الباسبور و محتار تسافر فين, ابدأ بمقالة دول بدون فيزا للمصريين 2026 و لو عايز تخطط سفريتك بميزانية محدودة راجع مقالة السفر بميزانية محدودة 2026.

لو عندك أي معلومات حابب تشاركنا بيها أو عندك اي استفسار يا ريت تشاركنا بيه في الكومنتات أو علي صفحات السوشيال ميديا للمدونة.

آخر تحديث: مارس 2026

مصادر:

• وزارة الخارجية المصرية, استخراج أو تجديد جواز السفر
• المصري اليوم, أسعار استخراج جواز سفر مستعجل 2026
• وزارة الداخلية التونسية, جواز السفر
• الموقع الرسمي لجواز السفر المغربي, وزارة الداخلية
• المنصة الوطنية السعودية, تجديد جواز السفر
• البوابة الإلكترونية الرسمية لدولة الكويت