Advices نصائح

باسبورك ضاع و انت مسافر ؟؟ نصائح لازم تخلي بالك منها و ازاي تتصرف ..

on
فبراير 22, 2019

باسبورك ضاع منك و انت مسافر ؟؟ده أكتر موقف ممكن يخلي تجربة السفر كلها صعبة عليك و علي كل اللي معاك … اتكلمنا قبل كده في مقالة : 10 نصائح لسفر امن للبنات  عن انك بلاش تمشي بالباسبور في الشارع و انت مسافر … انهارده هكلمك بالتفصيل عن الموضوع ده و تعمل ايه بالضبط لو لا قدر الله لو باسبورك ضاع …

الناس دايما متخيله أنك و انت مسافر لازم يكون باسبورك معاك .. ان في أي وقت حد هيوقفك و هيقولك وريني باسبورك و تأشيرتك … اه ده ممكن يحصل نااااادرا جدا , بس حتي لو ده حصل يكفي جدا يكون معاك نسخة (صورة  ضوئية) من اول صفحة في باسبورك و من الفيزا , و لو حد سألك عليهم بتوريه الصورة و بتعرفه ان الأصل في الفندق … و بكده تطمن أن الباسبور هيكون في أمان و انت مسافر ..

 

خلينا نتكلم الأول علي نصائح تخلي بالك منها قبل السفر :

 

1-اعمل نسخة ضوئية من كل حاجه قبل السفر:

تعمل ايه لو باسبورك ضاع

علشان تبقي متطمن لو لا قدر الله باسبورك ضاع , لازم قبل السفر تعمل نسخ من الباسبور و مش بس كده , من أي ورقة مهمة ممكن تحتاجه زي وثيقة تأمين السفر أو كروت الائتمان او حجوزات الطيران و الفنادق …

مهم جدا ان يكون معاك نسخة من الباسبور و انت مسافر , و ده هتكلم عن سبب ده لما اقولك تعمل ايه لو باسبورك ضاع دلوقتي ..

 

2-خد معاك صور شخصية ليك :

مهم جدا تاخد معاك و انت مسافر صور شخصية ليك , علشان لو لاقدر الله باسبورك ضاع تقدر تطلع وثيقة سفر من اقرب قنصلية ليك , ساعتها هتحتاج الصور الشخصية دي … خلي بالك ان ابعاد الصور الشخصية المطلوبة للباسبور بتختلف من دولة لاخري , للمصريين الصور المطلوبة للباسبور بتكون 4×6 بخلفية بيضاء ….

 

3-اعرف اماكن اقرب قنصليات او سفارات لبلدك للمكان اللي هتسافره :

لو لاقدر الله باسبورك ضاع , لازم هتروح اقرب قنصلية لبلدك علشان تطلع وثيقة السفر , علشان كده قبل السفر و انت بتخطط للبلد اللي هتروحها لازم تدور علي عناوين و ارقام تليفونات سفارة او قنصلية بلدك علشان تبقي جاهز لأي ظرف مفاجئ ممكن يقابلك ..

للمصريين تقدر تشوف عنوان اي قنصلية او سفارة لمصر من الموقع ده 

للتوانسة تقدر تشوف عنوان اي قنصلية او سفارة لتونس من الموقع ده

للمغاربة تقدر تشوف عنوان اي قنصلية او سفارة للمغرب من الموقع ده

للجزائريين تقدر تشوف عنوان اي قنصلية او سفارة للجزائر من الموقع ده

للعراقيين تقدر تشوف عنوان اي قنصلية او سفارة للعراق من الموقع ده

للأردنيين تقدر تشوف عنوان اي قنصلية او سفارة للأردن من الموقع ده

للسعوديين تقدر تشوف عنوان اي قنصلية او سفارة للسعودية من الموقع ده 

لللبنانيين تقدر تشوف عنوان اي قنصلية او سفارة للبنان من الموقع ده 

4-تأمين السفر مهم جدا لو باسبورك ضاع :

بعض التأشيرات زي الشنجن او غيرها بيشترطوا انك يكون معاك تأمين السفر , معظم الناس متعرفش ان من حقك تطالب بأي تكاليف هتدفها في الاجراءات اللي هتعملها لو باسبورك ضاع … علشان كده متستهونش بأهمية وثيقة تأمين السفر ..

 

5-كلم البنك بتاعك قبل ما تسافر و عرفه هتسافر فين :

معظم البنوك بتكون قافله كروت ائتمانك للأستخدام في الدول الأخري و ده لحمايتك من اي سرقة او نصب …

علشان كده قبل ما تسافر لازم تكلم خدمة عملاء بنكك و تعرفه انك مسافر دولة كذا علشان يتيحولك استخدام الكارت في الدولة دي …

 

6-كلم شركة الأتصالات قبل ما تسافر و اتأكد ان خدمة التجوال شغالة:

لو مش ناوي تشتري خط اتصالات في الدولة اللي هتسافرها , يبقي اوعي تنسي تكلم خدمة عملاء شركة الأتصالات اللي تابع ليها خطك و تتأكد ان خدمة التجوال شغالة قبل ما تسافر …

 

 

لما تخلي بالك من النصائح دي هتقدر الي حد ما تتفادي ضياع باسبورك , أو علي الأقل تبقي مستعد نفسيا لو حصل و باسبورك ضاع و تبقي عارف هتعمل ايه …

 

 

تعمل ايه لو باسبورك ضاع ؟؟

 

1-أول حاجه تهدأ جدا :

ضياع باسبورك مش نهاية العالم , اه انا عارف انه موقف وحش جدا و يضايق و بيبوظلك السفرية , لكن الموضوع عادي و بيحصل لمئات المسافرين حول العالم , اهم حاجه تكون عارف هتعمل ايه ..

 

2-أعمل بلاغ في أقرب قسم للشرطة بضياع او سرقة باسبورك:

دي أهم خطوة لازم تعملها لأنك هتحتاج ورقة محضر البوليس في اجراءات اصدار وثيقة السفر من قنصلية بلدك , او حتي هتحاجه لو حبيت تطالب بحقك في التعويض من شركة التأمين بعد كده …

 

3-توجه لأقرب قنصلية لبلدك :

زي ما قلنا قبل كده , انت محتاج تتوجه لأقرب قنصلية لبلدك علشان تطلع وثيقة سفر تقدر ترجع بيها لبلدك , هتحتاج يكون معاك أي اثبات شخصية ليك زي مثلا صورة ضوئية من باسبورك اللي فقدته (و هنا مهم جدا يكون معاك صورة ضوئية ليه , او حتي صورة ليه علي موبايلك مثلا)  او رخصة قيادة او بطاقة شخصية حكومية … و طبعا المستندات دي بتختلف من دولة لأخري علشان كده لازم تتأكد من الحاجات دي قبل ما تسافر …

 

للمصريين دي اجراءات اصدار وثيقة السفر :

1-     يتم توجيه كتاب الى السيد قنصل عام جمهورية مصر العربية (بالبلد اللي انت فيها) يتضمن البيانات الآتيه :

     أ-  الاسم الثلاثى.

    ب-  تاريخ الميلاد.

    ج-  محل الميلاد.

    د-   المهنة.

    ه-  العنوان بجمهورية مصر العربية.

    و-  اسم اقرب الاقارب وعنوانة فى جمهورية مصر العربية.

2-      يرفق بالطلب الآتى:

   أ-    أى مستند يفيد بالجنسية المصرية في حالة فقدان جواز السفر (صورة جواز سفر / صورة بطاقة شخصية – بطاقة رقم قومى / صورة رخصة حيازة سلاح)، وفي حالة انتهاء الصلاحية يتم موافاتنا بأصول المستندات.

   ب-   عدد 2 صورة شخصية ذات خلفية بيضاء.

بعد ما تصدر وثيقة السفر المؤقتة دي من قنصلية بلدك , تقدر تسافر بيها لبلدك و ترجع بيها عادي جدا , و أول ما ترجع تصدر جواز سفر جديد من بلدك …

لو حصل معاك الموقف ده قبل كده و حابب تحكيلنا تجربتك , يا ريت تشاركنا بيها في الكومنتات او علي السوشيال ميديا …

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.