Cover Letter

ازاي تكتب Cover Letter للفيزا .. وليه لازم تقدمه مع ورق الفيزا

by Mohamed Hammad
4 minutes read

لو هقولك أكتر سؤال دايما بتسأله … هو ازاي تكتب Cover Letter لارفاقه مع أوراق فيزا الشنجن او اي فيزا بتقدملها … علشان كده قررت أعمل مقالة مفصلة عن ال Cover letter و ايه فايدته و ليه لازم تقدمه حتي مش مطلوب..

 

خلينا نتفق مبدأيا معظم السفارات دلوقتي بقت من غير انترفيو , فبالتالي انت بالنسبة للسفارة مجرد شوية ورق بيشوفهم القنصل , و بناء علي الورق ده يا أما يرفضك و أما يوافق عليك …

 

مين فينا مكانش كل ورقه جاهز و كله تمام و في اﻷخر خد رفض غير منطقي ؟ و برضه فيه اللي ورقه فيه حاجات كتير ناقصه و خد الفيزا في الأخر … عارف ليه؟؟

 

لأن الفرق بين الأتنين ان اللي خد الفيزا عرف يقنع القنصل انه فعلا رايح سياحة بطريقة أو بأخري , و انه لو روابط في بلده و مش هيهرب أو هيعمل مشاكل هناك …

 

و أهم حاجه علشان تعرف تقنع السفارة بنفسك و بجديتك , هو انك تعرف تعرض نفسك عليهم بطريقة شيك , مش مطلوب منك تكون غني و لا في شغلانة كويسة ولا اي حاجه من الحاجات دي علشان تسافر …لا خالص … مطلوب بس انك تثبتلهم انك رايح سياحة تتفسح و راجع تاني , و ده مش هييجي عن طريق Cover letter محترم تكتبه موجه للسفارة بتشرح فيه ازاي و ليه عايز تسافر بلدهم …

 

في الشهور اللي فاتت جالي أكتر من أيميل من قراء للمدونة بيطلبوا فيها نموذج لل Cover letter , كنت بديهولهم بس كنت دايما بقولهم أهم نصيحة … أقرأ كويس عن البلد و اكتب الجواب ده بعد ما تكون قريت كويس …علشان كده قررت أعمل المقالة دي علشان نفهم مع بعض يعني ايه الخطاب ده و ازاي تكتبه بنفسك بكل سهولة …

 

 

ايه هو ال Cover Letter ؟

ده خطاب بتكتبه موجه للقنصل او للسفارة اللي هتقدملها ورقك بترفقه مع بقية ورق التأشيرة . في الخطاب ده بتشرح للقنصل ايه سبب السفر و هتعمل ايه هناك و تشرح أي ورق مقدمه .

الفكرة من الخطاب ده متكونش شخص مبهم للقنصل , علشان لما ييجي يقيم ورقك يبقي فاهم نيتك و يطمنلك و بالتالي تزيد فرصك في قبول طلبك للفيزا .

بس قبل ما تكتب الخطاب لازم تحط نفسك مكان القنصل و تفكر ازاي تبقي مقنع في الخطاب اللي هتكتبه , و ده هنتكلم عليه بالتفصيل دلوقتي ..

 

 

 

 

اهم النقط اللي تخلي بالك منها قبل ما تكتب Cover Letter :

اهم نقطة هي انك تقرأ كويس أوووي عن البلد اللي انت رايحها , حاول تعرف كل حاجه محتاج تعرفها كواحد سائح هيزورها أول مرة , ده هيديلك ثقة و انت بتكتب الخطاب و ساعتها تطمن انك تقدر تكتب Cover Letter  مقنع لأي حد يقراه .

تاني نقطة هي انك تحاول علي أد ما تقدر تخلي ورقك و المستندات اللي هتقدمها كاملة و مرتبة , لان دايما القنصل هيحب يتأكد من الكلام اللي كتبته في الخطاب … هديك مثال ..

 

لنفترض انك فكرت تسافر كرواتيا , و بتجهز ورقك لفيزا كرواتيا  , و بعد ما خططت للسفرية قررت تزور زغرب و دبروفنيك مثلا. فاحجز مثلا اتوبيس أونلاين بين المدينتين في اليوم اللي انت حابه , و ارفق التذكرة دي مع الورق بتاعك …. و بعدين هتيجي في الخطاب تكتب انك في اليوم الفلاني هتزور دبروفنيك و انك حاجز اتوبيس الساعة كذا و مرفق التذكرة مع الورق …

فلما يقرا القنصل كده و يلاقي التذكرة دي حاجه هتطمنه انك فعلا مسافر سياحه و مخطط و عارف انت بتعمل ايه …

 

نصيحة تانية هو انك تكون علي طبيعتك و انت بتكتب , و في نفس الوقت اكتب ما قل و دل زي ما بيقولوا , خليك منظم في كلامك بحيث تدي انطباع كويس عن نفسك لما تيجي تكتب Cover Letter.

 

فيه مليون طريقة تكتب بيها الخطاب وي ما انت عايز , دلوقتي هحطلك نموذج بسيط للcover  letter  تقدر تفهم هو بيتكتب ازاي و تكتب زيه لما تيجي تقدم لأي سفارة .

 

 

ده نموذك لخطاب بسيط , تقدر تكتب زيه و ترفقه مع ورقك بعد ما تعدل بما يناسب رحلتك …

 

تكتب Cover Letter

 

 

و لو عندك اي استفسار او سؤال او حابب تشاركنا بتجربتك تقدر تشاركنا بيها في الكومنتات او صفحات السوشيال ميديا

لو عجبتك المقالة ، يبقي هتعجبك المقالات دي

4 comments

Ahmed يناير 26, 2020 - 6:45 ص

السلام عليكم اخي جزاك الله خيرا

Reply
Mohamed Hammad
Mohamed Hammad يناير 27, 2020 - 7:44 م

تسلم اخي ، تحياتي ليك 🙂

Reply
أحمد البساطي مايو 9, 2020 - 11:12 م

جميل الموضوع ده بارك الله فيك
مهم برضه تشرح و تضيف في الخطاب ده في الجدول نبذه بسيطه . عن خطة رحلتك و ده مطلوب في بعض الدول و أعتقد منها فرنسا.. التاريخ و المدينة و الأماكن اللي في الخطة زيارتها بشكل مختصر.. و حتى يمكن ده كان سؤال في بعض مقابلات السفارات
و شكرا على المدونة البسيطة و المعلومات

Reply
Mohamed Hammad
Mohamed Hammad مايو 12, 2020 - 5:16 ص

كلام حضرتك صح جدا لان ده هيطمن القنصل انك عارف هتعمل ايه و انت مسافر

، تحياتي ليك

Reply

Leave a Comment

1 + ثلاثة =

This website uses cookies to improve your experience. We'll assume you're ok with this, but you can opt-out if you wish. Accept Read More