فهرس المحتوي
لأول مرة من 2018, منتخب مصر راجع كأس العالم! و مش بس كده, المونديال السنة دي هيتعمل في أمريكا و كندا و المكسيك, يعني سفرية العمر لو قررت تروح تشجع الفراعنة هناك. بس السؤال اللي كل المشجعين بيسألوه دلوقتي هو: “هقدر أروح؟ و هتكلفني كام؟ و الفيزا الأمريكي صعبة؟”
في المقالة دي حبيت أكتب دليل كامل للمشجع المصري اللي ناوي يحضر كأس العالم 2026, من أول الفيزا و التذاكر لغاية الإقامة و التكلفة الكاملة بالجنيه المصري. خلينا نبدأ.
ملحوظة: كل الأسعار بالجنيه المصري في المقالة دي محسوبة على أساس 1 دولار = 50 جنيه مصري تقريبا (سعر الصرف مارس 2026). الأسعار ممكن تتغير حسب سعر الصرف و توقيت الحجز.
مصر في كأس العالم 2026: المجموعة و مواعيد المباريات
مصر وقعت في المجموعة السابعة مع بلجيكا و إيران و نيوزيلندا. مجموعة متوازنة و فيها فرصة حقيقية للتأهل لدور الـ 32 لو لعبنا صح. و دي المرة الرابعة لمصر في تاريخ المونديال بعد 1934 و 1990 و 2018.
مواعيد مباريات مصر في كأس العالم 2026 بتوقيت القاهرة:
الجولة الأولى: مصر vs بلجيكا
الاثنين 15 يونيو 2026, الساعة 10:00 مساء بتوقيت القاهرة
ملعب سياتل, الولايات المتحدة
الجولة الثانية: مصر vs نيوزيلندا
فجر الاثنين 22 يونيو 2026, الساعة 4:00 صباحا بتوقيت القاهرة
ملعب فانكوفر, كندا
الجولة الثالثة: مصر vs إيران
فجر السبت 27 يونيو 2026, الساعة 6:00 صباحا بتوقيت القاهرة
ملعب سياتل, الولايات المتحدة
ملحوظة مهمة: مصير إيران في البطولة لسه غير مؤكد بسبب الأوضاع الجيوسياسية الحالية. لو إيران انسحبت أو اتمنعت, هيتم تحديد البديل من الفيفا. تابع آخر الأخبار.
يعني لو ناوي تحضر كل مباريات مصر, محتاج تكون في أمريكا و كندا في الفترة من 15 لـ 27 يونيو 2026 تقريبا (حوالي 12 يوم). و لو مصر اتأهلت لدور الـ 32, محتاج تفضل لغاية أول يوليو تقريبا.
و دي مش معلومة ناس كتير واخدة بالها منها: فيه 7 منتخبات عربية في المونديال ده (مصر, السعودية, قطر, الأردن, تونس, الجزائر, المغرب). أكبر مشاركة عربية في تاريخ كأس العالم!
فيزا أمريكا للمشجعين المصريين 2026: ده أصعب جزء
خلينا نكون صريحين. فيزا أمريكا هي أصعب جزء في الموضوع كله. المصريين محتاجين فيزا سياحية B1/B2 لدخول الولايات المتحدة, و دي مش زي فيزا تايلاند أو ألبانيا. فيه مقابلة شخصية في السفارة و نسبة الرفض ممكن تكون عالية لو ورقك مش قوي.
تكلفة فيزا أمريكا من مصر 2026
– رسوم طلب التأشيرة: 185 دولار (حوالي 9,250 جنيه مصري) غير قابلة للاسترداد حتى لو اترفضت.
– رسوم نزاهة التأشيرات (جديدة من أكتوبر 2025): 250 دولار إضافية (12,500 جنيه).
– يعني إجمالي رسوم الفيزا: حوالي 435 دولار (21,750 جنيه) للشخص.
الأوراق المطلوبة لفيزا أمريكا B1/B2
– جواز سفر ساري لمدة 6 شهور على الأقل. لو جوازك قرب ينتهي, راجع مقالة الأوراق المطلوبة لاستخراج جواز السفر 2026.
– ملء نموذج DS-160 أون لاين على موقع وزارة الخارجية الأمريكية.
– صورة شخصية بمواصفات محددة (5×5 سم, خلفية بيضاء).
– خطاب من جهة العمل بالراتب و المسمى الوظيفي.
– كشف حساب بنكي حديث يثبت قدرتك المالية.
– سجل سفر سابق (فيزا شنجن سابقة أو سفريات لدول تانية بتساعد كتير).
– إثبات ارتباطك بمصر (ملكية عقار, شغل ثابت, عائلة).
نصائح مهمة لزيادة فرصتك في فيزا أمريكا
– قدم بدري جدا! وزارة الخارجية الأمريكية نفسها بتنصح المشجعين يقدموا حتى من غير ما يكون عندهم تذاكر مباريات أو حجز فنادق.
– أوقات الانتظار لمواعيد المقابلات في السفارة الأمريكية في القاهرة ممكن تاخد أسابيع لأشهر, فمتأخرش.
– لو عندك فيزا شنجن أو فيزا أمريكية سابقة, ده بيقوي موقفك جدا.
– من سبتمبر 2025, لازم تقدم في بلد إقامتك أو جنسيتك فقط.
عنوان السفارة الأمريكية في القاهرة: 5 شارع توفيق دياب, جاردن سيتي, القاهرة.
تذاكر مباريات كأس العالم 2026: الأسعار و طريقة الشراء
ده الجزء التاني المهم. تذاكر المونديال مش رخيصة و الطلب عليها خرافي. الفيفا استلم أكتر من 500 مليون طلب تذكرة, و إنفانتينو أعلن إن كل الـ 104 مباراة sold out رسميا!
أسعار تذاكر كأس العالم 2026
الفيفا بيستخدم نظام “التسعير الديناميكي” يعني الأسعار بتتغير حسب الطلب و المنتخبات و المدينة:
مباريات دور المجموعات: من 60 لـ 265 دولار (3,000 لـ 13,250 جنيه) حسب الفئة. فيه فئة جديدة اسمها “Supporter Entry Tier” بـ 60 دولار بس, بتتوزع عن طريق الاتحادات الوطنية على المشجعين الأوفياء.
دور الـ 32 و دور الـ 16: من 150 لـ 500 دولار (7,500 لـ 25,000 جنيه).
ربع و نصف النهائي: من 300 لـ 1,500 دولار (15,000 لـ 75,000 جنيه).
النهائي (ملعب ميتلايف, نيويورك/نيوجيرسي): من 600 لـ 6,730 دولار (30,000 لـ 336,500 جنيه!). أيوه الرقم صح, أغلى تذكرة للنهائي ممكن توصل لأكتر من 336 ألف جنيه.
إزاي تشتري تذاكر كأس العالم 2026؟
1) مرحلة “Last-Minute Sales” (أبريل 2026): دي المرحلة الجاية و هتكون على أساس الأول يحجز الأول (مش سحب عشوائي). لازم يكون عندك FIFA ID على موقع الفيفا.
2) منصة إعادة البيع الرسمية (FIFA Resale Marketplace): هتفتح تاني يوم 2 أبريل 2026. دي المنصة الوحيدة المعتمدة لبيع و شراء التذاكر بين المشجعين بأسعار منظمة. الفيفا بيحذر إن أي تذكرة من منصة غير رسمية ممكن تتلغي من غير استرداد.
3) الاتحاد المصري لكرة القدم: الفيفا خصص لكل اتحاد وطني عدد من تذاكر الـ 60 دولار للمشجعين الأوفياء. تابع موقع و صفحات الاتحاد المصري على السوشيال ميديا.
4) السوق الثانوي (StubHub و غيره): أسعار أعلى بكتير, متوسط السعر حوالي 2,341 دولار (117,000 جنيه). و أرخص تذكرة متاحة حاليا على المنصات دي من 92 دولار (4,600 جنيه).
تكلفة الطيران من مصر لأمريكا صيف 2026
تذاكر الطيران لأمريكا مش رخيصة أصلا, و في موسم كأس العالم الأسعار هتكون أعلى من المعتاد بكتير.
تذكرة ذهاب و عودة (القاهرة لسياتل أو نيويورك):
– في الموسم العادي: من 40,000 لـ 70,000 جنيه مصري.
– في موسم المونديال (يونيو-يوليو 2026): توقع من 50,000 لـ 100,000 جنيه أو أكتر.
نصائح لتوفير الطيران:
– احجز دلوقتي! كل يوم بيعدي الأسعار بتزيد.
– جرب تحجز القاهرة لنيويورك (أكبر مطار و أكتر رحلات), و بعدين طيران داخلي لسياتل.
– قارن بين طيران الإمارات, القطرية, التركية, لوفتهانزا.
– اتكلمنا قبل كده عن استراتيجيات توفير الطيران في مقالة السفر بميزانية محدودة 2026.
تكلفة الإقامة في أمريكا خلال كأس العالم 2026
و دي الصدمة الكبيرة. أمريكا مش زي تايلاند أو جورجيا. الإقامة غالية و بتغلى أكتر في موسم المونديال. فنادق في مدن المباريات بقت تتخطى 500 دولار في الليلة!
فنادق في سياتل و فانكوفر (مدن مباريات مصر): من 250 لـ 500+ دولار في الليلة (12,500 لـ 25,000+ جنيه).
بدائل أرخص:
– Airbnb: من 100 لـ 200 دولار في الليلة (5,000 لـ 10,000 جنيه), خصوصا لو بعيد شوية عن وسط المدينة.
– هوستيلات: من 50 لـ 80 دولار في الليلة (2,500 لـ 4,000 جنيه).
– شارك مع أصحابك: لو 2 أو 3 ناس اتشاركوا شقة Airbnb, التكلفة بتقل لكل شخص بشكل كبير.
الميزانية الكاملة: كام هتكلفك رحلة كأس العالم 2026 من مصر؟
خلينا نحسبها لشخص واحد, رحلة 14 يوم (لحضور 3 مباريات مصر في دور المجموعات + وقت حر):
فيزا أمريكا: حوالي 22,000 جنيه.
تذاكر طيران دولية (ذهاب و عودة): حوالي 50,000 لـ 80,000 جنيه.
تذاكر 3 مباريات (دور مجموعات, فئة متوسطة): حوالي 15,000 لـ 30,000 جنيه.
الإقامة (14 ليلة × Airbnb): حوالي 70,000 لـ 140,000 جنيه.
الأكل (14 يوم): حوالي 15,000 لـ 25,000 جنيه.
المواصلات الداخلية (طيران داخلي + أوبر + مترو): حوالي 15,000 لـ 25,000 جنيه.
مصاريف متنوعة (تأمين صحي, شريحة, هدايا): حوالي 10,000 لـ 20,000 جنيه.
إجمالي تكلفة رحلة كأس العالم 2026 من مصر (شخص واحد, 14 يوم)
ميزانية اقتصادية (هوستيل + أكل رخيص + أرخص تذاكر): من 150,000 لـ 200,000 جنيه مصري.
ميزانية متوسطة (Airbnb + أكل متنوع + تذاكر متوسطة): من 200,000 لـ 350,000 جنيه مصري.
ميزانية فاخرة (فندق + مطاعم + تذاكر فئة أولى): من 400,000 جنيه و أكتر.
أيوه الأرقام كبيرة, بس خلينا نكون واقعيين: دي أمريكا مش تايلاند أو جورجيا. لو عايز تعرف وجهات سفر أرخص, راجع مقالة دول بدون فيزا للمصريين 2026. و لو عايز تعرف تكلفة تايلاند بالتفصيل, راجع مقالة تكلفة السفر إلى تايلاند من مصر 2026.
نصائح ذهبية للمشجع المصري في كأس العالم 2026
1) ابدأ في إجراءات الفيزا فورا: مواعيد المقابلات في السفارة الأمريكية ممكن تاخد أسابيع لأشهر. قدم النهارده مش بكره.
2) تابع الاتحاد المصري: هيكون فيه تخصيصات تذاكر بأسعار مخفضة (60 دولار) للمشجعين الأوفياء. سجل اهتمامك من دلوقتي.
3) احجز الطيران و الإقامة بدري: كل يوم بيعدي الأسعار بتزيد. لو لسه مش متأكد من الفيزا, احجز حاجات قابلة للإلغاء.
4) فانكوفر في كندا: مباراة نيوزيلندا هتتلعب في فانكوفر بكندا. لو عندك فيزا أمريكا, محتاج كمان eTA (تصريح سفر إلكتروني) لكندا. ده بياخد دقايق أون لاين و رخيص (حوالي 7 دولار كندي).
5) التأمين الصحي واجب: العلاج في أمريكا غالي جدا جدا (زيارة طوارئ ممكن تكلفك آلاف الدولارات). تأمين صحي للسفر ممكن ينقذك من كارثة مالية.
6) فرق التوقيت: أمريكا ورا مصر بحوالي 7 لـ 10 ساعات حسب المدينة. يعني لو بتتابع من مصر, بعض مباريات مصر هتتلعب الفجر (4 و 6 صباحا بتوقيت القاهرة).
7) لو مش قادر تسافر: مفيش عيب خالص. تابع المباريات من مصر مع الأهل و الأصحاب. المهم إنك تشجع مصر من أي مكان!
أسئلة شائعة عن كأس العالم 2026 للمشجع المصري
مصر في أنهي مجموعة في كأس العالم 2026؟
المجموعة السابعة مع بلجيكا و إيران و نيوزيلندا.
فين مباريات مصر هتتلعب؟
مباراتين في سياتل (أمريكا) و مباراة في فانكوفر (كندا).
كام تذكرة مباراة كأس العالم 2026؟
مباريات دور المجموعات من 60 لـ 265 دولار (3,000 لـ 13,250 جنيه). النهائي ممكن يوصل لـ 6,730 دولار (336,500 جنيه).
هل المصريين محتاجين فيزا لأمريكا؟
أيوه, محتاج فيزا B1/B2 من السفارة الأمريكية في القاهرة. إجمالي الرسوم حوالي 435 دولار (21,750 جنيه).
هل محتاج فيزا لكندا كمان؟
أيوه محتاج eTA كندي (7 دولار كندي أون لاين) لمباراة فانكوفر.
إمتى كأس العالم 2026 بيبدأ و بينتهي؟
من 11 يونيو لـ 19 يوليو 2026. النهائي في ملعب ميتلايف, نيويورك/نيوجيرسي.
كام المنتخبات العربية في كأس العالم 2026؟
7 منتخبات: مصر, السعودية, قطر, الأردن, تونس, الجزائر, المغرب. أكبر مشاركة عربية في التاريخ!
في الآخر
كأس العالم 2026 فرصة تاريخية. مصر راجعة المونديال بعد غياب طويل, و البطولة هتتعمل في أمريكا اللي كلنا بنحلم نزورها. أيوه التكلفة عالية, بس لو بدأت تخطط من دلوقتي و ادخرت صح و حجزت بدري, الموضوع ممكن يتحقق.
و حتى لو مش هتسافر, المقالة دي فيها كل المعلومات اللي محتاجها علشان تتابع مباريات مصر بالمواعيد و التوقيتات الصح. شاركها مع أي مشجع مصري بيدور على المعلومات دي.
يلا يا مصر!
آخر تحديث: مارس 2026
مصادر:
