فهرس المحتوي
فيزا كرواتيا 2026 من أكتر المواضيع اللي بتتسأل عنها, و ده بسبب شهرة كرواتيا السياحية الكبيرة في السنين الأخيرة. لكن في تغيير جذري حصل من يناير 2023 لازم كل حد يكون عارفه: كرواتيا بقت رسمياً دولة شنجن, يعني مبقاش ليها فيزا منفصلة زي زمان. دلوقتي لو عايز تسافر كرواتيا محتاج فيزا شنجن عادية.
اتكلمنا قبل كده عن كرواتيا في مقالة تكلفة السفر إلى كرواتيا 2026 اللي فيها كل حاجة عن التكاليف و البرنامج السياحي, لو بتخطط تسافر كرواتيا يبقى اقرأها كمان.
هل فيزا كرواتيا شنجن؟
أيوا. من 1 يناير 2023 كرواتيا انضمت رسمياً لمنطقة الشنجن و كمان اعتمدت اليورو كعملة رسمية بدل الكونا. ده معناه:
- فيزا كرواتيا بقت هي نفسها فيزا الشنجن, مفيش فيزا كرواتيا منفصلة
- لو عندك فيزا شنجن سارية من أي دولة (فرنسا, ألمانيا, إيطاليا… إلخ) تقدر تدخل كرواتيا بيها
- لو طلعت فيزا شنجن عن طريق سفارة كرواتيا, تقدر تزور أي دولة شنجن تانية بيها
- بفيزا الشنجن المتعددة الدخول تقدر كمان تدخل البوسنة (لمدة 15 يوم), رومانيا, بلغاريا, قبرص, و تركيا
و ده معلومة مهمة جدا لأن لما تسافر جوا كرواتيا من سبليت لدوبروفنيك بالأوتوبيس, بتعدي على جزء من الأراضي البوسنية اسمه ممر نيوم Neum Corridor. عادةً مش بيكون فيه تفتيش صعب بس فيزا مالتي بتسهل الموضوع. و مينفعش تروح كرواتيا و متعملش رحلة يوم لـ موستار أجمل مدينة في البلقان.
خطوات الحصول على تاشيرة كرواتيا (الشنجن) 2026
بما إن كرواتيا بقت شنجن, فالخطوات هي نفس خطوات فيزا الشنجن العادية. اتكلمنا عنها بالتفصيل في مقالة فيزا شنجن للمصريين 2026, لكن هنا ملخص سريع:
لو بتقدم من مصر أو المغرب أو الجزائر أو الأردن أو السعودية, التقديم بيكون عن طريق مكتب VFS Global.
الأوراق المطلوبة لفيزا كرواتيا 2026
- أبليكيشن الشنجن: بتملاها بتأني و تمضيها, تقدر تملاها أونلاين من موقع VFS
- جواز سفر: ساري لمدة 3 شهور بعد تاريخ انتهاء الفيزا, و فيه صفحتين فاضيتين على الأقل
- صورة شخصية: خلفية بيضاء مقاس 3.5×4.5 سم
- تأمين سفر: يغطي منطقة الشنجن بتغطية لا تقل عن 30,000 يورو. اتكلمنا عن ده بالتفصيل في تأمين السفر 2026
- حجز طيران: مبدأي أو مؤكد. خد بالك من التواريخ إنها تطابق اللي في الأبليكيشن
- حجز فندق أو إقامة: يفضل تتواصل مع الفندق تتأكد إن الحجز قائم, السفارة ممكن تتواصل مع الفندق
- كشف حساب بنكي: لمدة 6 شهور, فيه حركات و مبلغ لا يقل عن 100 يورو لكل يوم هتقعده. اتكلمنا عن ده في كشف حساب بنكي للسفارة
- إثبات العمل: جواب HR فيه طبيعة شغلك و مرتبك و الإجازة و الغرض من السفر. لو طالب, شهادة قيد من مكان دراستك
تكلفة فيزا كرواتيا 2026
- رسوم تاشيرة الشنجن: 90 يورو (حوالي 4,700 جنيه مصري / 95 دولار / 355 ريال سعودي / 350 درهم إماراتي)
- رسوم مكتب VFS Global: حوالي 1,200 جنيه مصري (بتتغير, راجع الموقع)
- توصيل الباسبور للبيت (اختياري): من 150 لـ 300 جنيه حسب المكان
ملحوظة: الرسوم بتتغير, راجع موقع VFS Global الخاص ببلدك للأسعار المحدثة.
أوراق مش مطلوبة بس هتساعدك جدا في القبول
- Cover Letter: خطاب موجه للسفارة بتوضح فيه غرض السفر و خط سيرك. القنصل بيقيمك من ورقك, و الخطاب ده بيطمنه إنك فاهم و منظم. اتكلمنا عن ده بالتفصيل في إزاي تكتب Cover Letter للفيزا
- حجوزات أنشطة: صور من حجز طيران داخلي أو تذاكر أنشطة سياحية جوا كرواتيا
- لو متزوج و مسافر لوحدك: قدم صورة من قسيمة الزواج و شهادات ميلاد الأطفال. ده بيثبت إن عندك روابط في بلدك
- لو شهر عسل: قدم قسيمة الزواج أو أي إثبات للخطوبة
ما بعد تقديم الورق
بعد تقديم الورق في مكتب VFS, الإجراءات بتاخد حوالي 15 يوم عمل (أوقات أكتر حسب الضغط). ساعات السفارة بتتواصل معاك تليفونياً لو محتاجين معلومات أو نادراً بيطلبوك لإنترفيو. بعد كده بيرجع الباسبور للمكتب و بتروح تستلمه أو بيوصلك للبيت.
و مبروك الفيزا 🙂
نصائح مهمة لضمان فيزا كرواتيا 2026
- قدم قبل السفر بـ 45 يوم على الأقل علشان تلحق لو حصل أي تأخير
- كشف الحساب هو أهم ورقة. خلي الرصيد كويس و فيه حركات مستمرة, و ياريت ترجع لمقالة كشف حساب بنكي للسفارة
- لو أول فيزا شنجن ليك, يفضل تقدم من سفارة دولة نسبة القبول فيها عالية. اتكلمنا عن ده في فيزا شنجن للمصريين 2026
- اتعود دايما تكتب Cover Letter مع كل فيزا بتقدم عليها
- لو محتاج تصريح أمني متنساش تطلعه بدري
لو عايز تعرف تفاصيل تكلفة الرحلة كاملة و برنامج سياحي 7 أيام, ارجع لمقالة تكلفة السفر إلى كرواتيا 2026.
قدمت قبل كده على تاشيرة كرواتيا أو فيزا الشنجن؟ حابب تشاركنا بتجربتك؟ عندك أي سؤال أو استفسار؟ شاركني في الكومنتات أو على صفحات التواصل الاجتماعي :))
11 comments
انا اخدت رفض رقم 8لسفاره كرواتيا هل يوجد تظلم
الافضل تتصل بالسفارة علي رقمهم :
0227355815
و اسألهم انك خدت رفض و حابب تتظلم علي القرار و هما هيدلوك تعمل ايه بالضبط
سلام الله عليكم أنا من المغرب.اشكرك اخي العزيز على المعلومات.جازاكم الله خيرا.
العفو اخي العزيز ، و اهلا بيك و بكل اهل المغرب الغاليين 🙂
ممكن نسخة من البرنامج السياحي وكفر ليتر الى قدمته لسفارة كرواتيا
هعمل مقالة قريب جدا عن ازاي تكتب cover letter ، بس لو محتاج نموذج بشكل اسرع راسلني علي الموقع و هبعتلك نموذج تقدر تعمل زيه
تحياتي ليك
انا زوجي حصل على دعوة من اخوه المقيم في كرواتيا بالزيارة ولا ندرى كيف نحصل على موعد مقابلة وكيف نكتبcover letter ارجو المساعدة
اهلا بحضرتك
كل تفاصيل حجز الميعاد مكتوبة في المقالة و كذلك فيه مقاله منفصله عن ازاي تكتبي ال
Cover letter
بارك الله فيك جهد واضح ومعلومات قيمة
بل نسبة للمقيم في كرواتيا اقامة مؤقتة هل يحتاج فيزا للذهاب رحلة الى صربيا
وشكرا لجهودكم
اهلا بيك 🙂
لو معاك اقامة داخل كرواتيا تقدر تدخل صربيا و تقعد فيها لمدة ٩٠ يوم في فترة ٦ شهور من غير فيزا لصربيا.
شكرا جزيلا على افادتك وجهودك