قانون دخول الشنجن
Advices نصائح Visas تأشيرات

قانون دخول الشنجن .. ازاي تفهمه و ازاي تجنب نفسك الترحيل

on
يوليو 24, 2019

قانون دخول الشنجن من أكتر الحاجات اللي بتحير أي شخص أول ما بيحصل علي فيزا الشنجن و بيلاقي مثلا فيه تذكرة طيران لدولة شنجن تانية أرخص بكتير من تذكرة للدولة اللي خد منها الفيزا و بيبقي محتار يسافرلها وللا لأ الأول..

وزارة الخارجية المصرية الأسبوع ده طلعت تحذير للمصريين علي صفحتها علي الفيس بوك بتناشدهم فيها بالألتزام بقوانين تأشيرة الشنجن منعا للترحيل و الغرامة …

الفترة اللي فاتت المتابع هيلاقي ان فيه مصريين و جزائريين و توانسة و مغاربة تم ترحيلهم من مطارات أوروبية بسبب خرقهم لقانون دخول الشنجن , علشان كده قررت أكتب المقالة دي و أقولك ازاي تحمي نفسك و متعرضش نفسك للترحيل أو الغرامة …

 

الموضوع بيبدأ من التخطيط :

التخطيط

 

الحصول علي فيزا الشنجن في حد ذاته حلم لناس كتير , علشان كده 70% من الناس بيدور علي أسهل سفارة يضمن منها الحصول علي فيزا الشنجن , بس زي ما قررت تقدم علي فيزا من دولة زي ليتوانيا أو لاتفيا أو استونيا مثلا … فلازم تعمل حسابك انك هتدخل الشنجن من البلد دي , مينفعش تاخد فيزا لاتفيا مثلا و تدخل ألمانيا , ساعتها ضابط الجوازات سهل أوي يرحلك و يدفعك غرامة لأخلالك بقانون دخول الشنجن .

 

 

قانون دخول الشنجن كانوا متساهلين فيه قبل كده :

قانون دخول الشنجن

 

من كام سنة كان ضباط الجوازات في مطارات الشنجن متساهلين في تطبيق قانون دخول الشنجن خصوصا لو فيه حجوازات فنادق و انه بضمن انك داخل بغرض السياحة .. و خصوصا مع مواطنين الخليج أو الأشخاص اللي عندهم تأشيرات كثيرة علي جوازاتهم و يبان ان ليهم تاريخ سفر … بس بسبب المشاكل اللي بقت بتحصل من بعد الأشخاص أصبح هناك تطبيق صارم للقانون ده و بدأ تنفيذه علي أغلبية المسافرين ..

 

 

لازم تفهم القانون بينص علي أيه :

القانون بيقول انك تقدم علي فيزا الشنجن من سفارة الدولة اللي ناوي تقعد فيها أكبر مدة , بمعني لو مثلا ناوي تزور فرنسا و أسبانيا و هتقعد 3 أيام في فرنسا و بعدين 4 في أسبانيا يبقي لازم تقدم علي فيزا أسبانيا …

طب أفرض مثلا هتقعد 3 أيام في فرنسا و 3 في أسبانيا ؟ ساعتها هتقدم من سفارة الدولة اللي هتدخل منها منطقة الشنجن و بالتالي هي سفارة فرنسا في الموقف ده .

 

 

طب هل حد هيعرف لما هدخل الشنجن انا هسافر جوه فين و امتي؟

بص هو نظريا لأ , انت جو الشنجن بتكون حركتك حره لأن الشنجن كله كأنه دولة واحدة , الفكرة كلها و انت داخل علي الجوازات , بمعني و انت داخل بيكون معاك حجوزات الفنادق , ساعات ضابط الجوازات بيتصل بالفنادق دي و يتأكد فيه حجز قائم وللا لأ , و لو لقي ان الحجوزات دي وهمية ممكن بسهولة أوي يرفض دخولك و يلغيلك الفيزا و يرحلك ..

 

 

تعمل ايه لو حابب تلف بحرية جوه الشنجن و متبقاش ملتزم بأي حجوزات و في نفس الوقت تحمي نفسك من أي مشاكل عند الدخول؟

 

يبقي الحل انك لما تيجي تقدم علي فيزا شنجن من أي سفارة انك تعمل برنامج سياحي جوه البلد دي , و تحجز فنادق free cancellation  من Booking مثلا , و تخلي الحجز ده قائم لغاية ما تدخل الشنجن و تعدي الجوازات و بعد لما تدخل ابقي الغي حجزك ده و مش مشكلة تخسر أول ليلة , و تكون طبعا عامل حجوزات تانية في أي حتة جوه الشنجن براحتك , بس الفكرة كلها بتضمن انك ميحصلكش مشاكل و انت داخل و خصوصا انك التزمت ب قانون دخول الشنجن لأنك دخلت من البلد اللي تم أصدار فيزا الشنجن من سفارتها .. و لو حصل ووقفك اي ضابط لأي سبب في أي دولة شنجن تانية طول ما فيزتك سارية و معاك حجوزات فنادق فساعتها أنت مش عليك أي غلط نهائي ..

 

 

هل قانون دخول الشنجن ده ينطبق علي كل مره هدخل فيها الشنجن لو معايا فيزا متعددة الدخول؟

قانون دخول الشنجن

 

لأ اطلاقا , ده بينطبق علي أول مره تدخل بيها الشنجن بالفيزا اللي معاك سواء دخول واحد أو متعددة الدخول ..

بمعني لو مثلا معاك فيزا multiple entries من سفارة هولندا , فأول مرة تستخدم الفيزا لازم تدخل من هولندا مادام هي المقصدة الأساسي لسفرك و بعد كده في السفريات اللي بعد كده تقدر تدخل من أي بلد شنجن تاني بس يكون معاك حجوزات فنادق داخل الدولة دي .. علشان كده لازم تخلي بالك كويس في أول استخدام للفيزا …

من أكتر الدول الأوروبية اللي بترخم أوي في الموضوع ده هي ألمانيا و السويد  لأن عدد كبير من الأشخاص كان بياخد فيزا الشنجن من أي سفارة و بعدين يسافر علي ألمانيا أو السويد و يقدم علي لجوء , علشان كده دول كتير بقت بتنفذ القانون ده بصرامة  و بقوا يحطوا غرامة تصل ل 5000 يورو علي شركات الطيران اللي بتسمح لأي راكب مسافر لدولة شنجن و مش معاه فيزا من سفارتها و طبعا معاقبة المسافر الخارق للقانون بالترحيل و الغرامة , علشان كده خلي بالك كويس جدا و ألتزم بالقانون و اعرف اللي ليك و اللي عليك …

 

 

TAGS
RELATED POSTS

2
اترك تعليق

avatar
1 Comment threads
1 Thread replies
0 Followers
 
Most reacted comment
Hottest comment thread
2 Comment authors
Mohamed Hammadliliane zem Recent comment authors
  Subscribe  
الأحدث الأقدم الأكثر تصويتاً
نبّهني عن
liliane zem
ضيف
liliane zem

معلوماتك رائعة شكرا لك 😊

محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.