نصائح للأمان لو هتسافري لوحدك
Advices نصائح

لو هتسافري لوحدك : 10 نصائح للبنات لسفر آمن لازم تاخدي بالك منهم

on
يناير 7, 2019

لو هتسافري لوحدك أول مره , او بتحلمي تسافري و تجربي تستكشفي بلد جديدة ,بس دايما بتسألي نفسك : هل أمان اني اسافر لوحدي؟ , هل أقدر اقنع أهلي اني أخوض التجربة دي؟

الحلو في الموضوع انه أه … سهل جدا انك تسافري لوحدك و تكوني في أمان جدا , مش بس كده , الاحتياطات اللي بتاخديها في الطبيعي انك تحافظي علي أمانك جوه بلدك متختلفش كتير عن الأحتياطات اللي هتاخديها و انتي مسافره بره بلدك ..

اتكلمنا قبل كده عن  10 أسباب تخليك لازم تجرب السفر لوحدك   و 10 غلطات حاول تتفاداهم لو هتسافر أول مره   , المرادي موضوع ده مخصص للبنات اللي نفسها تسافر و خايفه من نقطة الأمان , البنات في العالم كله بيسافروا لوحدهم او مع صاحباتهم بكل أمان , بس فيه نقط معينه لازم تاخدي بالك منها , انهارده هقولك علي 10 نصائح للأمان لازم تاخدي بالك منهم لو هتسافري لوحدك …

 

 

1-لو هتسافري لوحدك خليكي دايما علي تواصل مع أهلك و اصحابك :

دي أهم نقطة في النصائح اللي لازم تاخدي بالك منهم , قبل ما تسافري و بعد ما تخططي لسفريتك اكتبي خطة سيرك و عرفيها لأهلك , و برضه أرقام تليفونات الفنادق أو الهوستل اللي هتنزلي فيهم ..

و انتي هناك دايما خليكي علي تواصل مع أهلك علي السوشيال ميديا , كل الخطوات دي هتطمنهم عليكي و هيكسر القلق اللي جواهم طول ما هما شايفينك كويسة و في أمان .

 

 

2-خططي كويس و اهتمي كويس جدا بتقييمات الأماكن اللي هتنزلي فيها :

لو هتسافري لوحدك يبقي اعرفي كويس أوي انك محتاجه تتعلمي ازاي تخططي صح لسفريتك (و ده هنتكلم عنه في موضوع منفصل) , بس أهم حاجه في التخطيط هو ازاي تلاقي الحاجه اللي تقييماتها كويسة .

في اي موقع من مواقع السفر زي بوكنج او AirBNB  أو couchsurfing أو Tripadvisor … أي غرفة أو خدمة هتحجزيها او اي حاجه بيكون ليها تقييم , تقييم الناس اللي حجزوا الحاجة دي قبل كده ..

لازم تقري كويس التقييمات دي و تختاري الحاجه اللي واخده تقييم عالي , و تركزي أكتر علي تقييمات البنات اللي زيك اللي جربوا الحاجه دي قبل كده …

 

 

3-بلاش تظهري بمظهر السائح :

دايما و انتي مسافرة حاولي متظهريش بمظهر السائح اللي ماشية ماسكه في أيديها selfie stick أو خريطة أو حاجه تبين انك سائحه , بالعكس اقري كتير عن المكان اللي رايحاه , و خلي طريقتك في المشي كأنك واحده عارفه هي بتعمل ايه…

ده هيخلي أي حد يفكر يعملك حاجه وحشة يفكر ألف مره قبل ما يعملها.. دايما الشخص اللي بيظهر بمظهر السائح او الغريب بيكون محط أنظار الناس , و انتي في غني عن ده..

 

 

4-دايما خدي النصائح من أهل البلد :

خدي نصائخ اهل البلد لو هتسافري لوحدك

لو هتسافري لوحدك لازم تسألي كويس عن النصائح اللي هتحتاجيها , قبل السفر مثلا حاولي تدخلي علي مواقع زي  tripadvisor Travel forum  أو Lonely Planet   و ادخلي علي القسم الخاص بالدولة اللي عايزه تروحيها و اسألي أي سؤال عن البلد دي و هتلاقي عشرات الناس من اهل البلد دي هيردوا عليكي , او حتي تصفحي اسألة الناس اللي سألتها قبل كده , صدقيني هتستفيدي كتير عن حاجات مكنتيش تعرفيها عن البلد دي..

و انتي هناك دايما اسألي موظف أو موظفة الفندق أو الهوستل اللي هتنزلي فيه عن اي نصائح محتاجاها او طرق النصب اللي لازم تاخدي بالك منها … الناس دي دايما بتكون ودودة و بتساعد أي حد .

 

 

5-اتعرفي علي بنات زيك في البلد اللي انتي رايحاها :

لو هتسافري لوحدك , حاولي تتعرفي علي بنت زيك من البلد اللي هتروحيها , انا دايما بفضل موقع Couchsurfing  الموقع غير انه بيتيح للناس تستضيف ناس تانيه , بس برضه بيتيح الناس تتعرف علي بعض و يتقابلوا .

ممكن جدا تتعرفي علي بنت من الموقع ده و تتواصلي معاها و تسأليها علي أي حاجه عايزه تعرفيها عن البلد دي , و ممكن تبقوا اصحاب و تتقابلوا و توريكي مدينتها …

لكن أهم حاجه تتأكدي كويس جدددددا من تقييم البنت دي علي الموقع قبل ما تتواصلي معاها , و تقري التقييمات كويس علشان تبقي متطمنه انها شخص كويس و محل ثقة.

 

 

6-خلي بالك كويس علي حاجاتك الثمينة:

اهتمي كويس اوي بحاجاتك الثمينة و خبيها كويس , اي حاجه ثمينه تحطيها في الخزنة الخاصة بيكي في غرفتك في الفندق او الهوستل , و بلاش تلبسي اي مجوهرات لو هتسافري لوحدك او تعلقي اي شنطة علي كتفك بشكل ملحوظ و انتي ماشيه.

اعملي كذا نسخة من ورقك المهم زي الباسبور و الفيزا و التأمين الصحي و كل الحاجات دي ووزعيهم علي شنطك , و اعملي منهم نسخة رقميه علي أيميلك علشان لو لاقدر الله ضاعوا تعرفي تطبعي منهم نسخة

و بلاش تاخدي معاكي الباسبور و انتي خارجه , سيبيه في خزنة الفندق و خدي معاكي بس نسخة منه علشان لو لاقدر الله اتسرقتي متدخليش في مشاكل … أعرف كذا واحد اتسرق منه شنطته بما فيها الباسبور و الفيزا و طلع عينه علشان يعرف يعمل ورق يرجع بيه بلده …. علشان كده سيبي الباسبور في الفندق في الخزنة و امشي بنسخة منه .

و انتي خارجه لو معاكي فلوس مثلا او نسخ الباسبور و الفيزا و الكلام ده , حاولي تحطيهم في شنطة صغيره و البسيها تحت الجاكيت بتاعك او مكان مخفي في هدومك بحيث انه ميكونش ظاهر.

نصيحة برضه اتقالتلي لازم تعرفيها , خلي معاكي دايما شنطة صغيره او محفظة Fake , بمعني حطي فيها كرت ائتمان قديم مثلا مش شغال , او عملات صغيره زي 10 او 20 يورو مثلا , و اي ورق ملوش قيمة … بحيث ان لاقدر الله اتحطيتي في موقف و اتسرقتي … الحرامي المغفل يفتكر انه سرق حاجه ليها قيمة … النصيحة دي مهمة أوي و مسافرين كتير بيتسخدموها في سفرياتهم …

 

 

7-اعرفي كام كلمة من لغة أهل البلد و ارقام الطوارئ :

حاولي تتعلمي كام كلمة من لغة أهل البلد اللي هتروحيها زي (مرحبا , شكرا ,من فضلك , ساعدني , بوليس ….الخ) علشان لو هتسافري لوحدك لاقدر الله حصل أي حاجه تعرفي تتواصلي مع اهل البلد بلغتهم ..

و اكتبي ارقام الطوارئ زي البوليس و الأسعاف و رقم س

فارة بلدك و رقم الفندق او الهوستل اللي قاعده فيه , و يكونوا معاكي دايما .

 

 

 

8-لازم يكون معاكي خط تليفون و انترنت:

لازم أول ما تنزلي البلد اللي هتزوريها و انتي مسافره لوحدك تشتري خط تليفون يبقي معاكي فترة سفرك , او حتي فعلي التجوال من بلدك علي خطك بحيث يبقي معاك للطوارئ و برضه تقدري تتواصلي مع أهلك …

الأنترنت مش بس هيفيدك في التواصل , لكن انه يكون معاكي Google Maps  أو TripAdvisor علي تليفونك مهم جدا علشان تقدري توصلي لأي مكان عايزاه , او تشوفي مثلا أحسن مطعم او محلات في المنطقة اللي هتزوريها , او مثلا تحجزي تذاكر متاحف أو مواصلات أونلاين … الأنترنت هيكون ضروري جدا معاكي ..

 

 

9-متمشيش في الشارع بالليل و ابعدي عن الأماكن المشبوهة :

طبعا دي نصيحه مفروغ منها لو هتسافري لوحدك . تجنبي دايما تمشي في الشوارع بالليل متأخر , و خليكي بعيد عن اي مكان تحسي انه مشبوه … في بلاد كتير و مدن أمان جدا حتي لو بالليل , بس برضه تجنبي انك تمشي في الشوارع او تسافري بالليل , تحركاتك دايما تكون في النهار .

 

 

10-دايما امشي ورا حدسك :

دي أخر نصيحة و اهمهم , دايما تتبعي حدسك , لو حاسه مثلا ان سفرك للمدينة الفلانية هيكون كويس و هتكوني في أمان يبقي سافري , لو حاسه انك لو مشيتي في الشارع الفلاني هيكون خطر يبقي متعمليش ده …

دايما تتبعي حدسك , و اقري كويس و خططي كويس و تأكدي انك هتكوني في أمان طول ما انتي مخليا بالك من النقط دي …

 

 

سافرتي قبل كده بره و عندك نصائح حابه تشاركينا بيها؟ عندك أي سؤال بخصوص السفر؟ شاركينا بيه دلوقتي في الكومنتات او علي صفحات السوشيال ميديا …

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.