البوسنة و الهرسك
Accomodation الأقامة

موستار , البوسنة و الهرسك …. ليه لازم تزور أجمل مدينة في البلقان

on
يناير 17, 2019

مدينة موستار في البوسنة و الهرسك من أجمل مدن البلقان , ثقافة غنية و تاريخ و طبيعة و مباني روعة .لو كنت ناوي تقعد كذا يوم او حتي تزورها يوم واحد , فهي فعلا تستحق الزيارة.

 

اثناء رحلتي لكرواتيا و خصوصا لمدينة دبروفنيك خدت قرار اني هزور موستار لقربها الكبير من دبروفنيك … و بالرغم من قناعتي ان البوسنة و الهرسك دولة تستحق زيارة بقية مدنها , لكن مكانش ينفع مستغلش فرصة اني أزور موستار خصوصا اني قريب منها … قضيت فيها يوم كامل , و انهارده هنتكلم عن كذا حاجه لازم تبقي عارفها قبل ما تزورها و ليه لازم تزورها …

 

موستار , البوسنة و الهرسك

 

 

فين موستار ؟

هي من أهم مدن البوسنة و الهرسك , هي عاصمة البوسنة و الهرسك الثقافية , و خامس أكبر مدينة في الدولة … تقع في الجنوب علي بعد حوالي 120 كم من مدينة دبروفنيك الكرواتية .

 

 

نبذة بسيطة عن تاريخ المدينة :

 

موستار , البوسنة و الهرسك .... ليه لازم تزور أجمل مدينة في البلقان 1

 

سنة 1468 المنطقة كانت تحت الحكم العثماني , سنة 1566 أمر السلطان سليمان القانوني بتحويل جسر المدينة الخشبي إلي جسر حجري , و فعلا تم بناء التحفة المعمارية جسر (ستاري موست) فوق نهر نيريتفا الخلاب …

موستار , البوسنة و الهرسك .... ليه لازم تزور أجمل مدينة في البلقان 2

عام 1992 أعلنت البوسنة و الهرسك استقلالها من الإتحاد السوفيتي ,  في 1993 تم تدمير الجسر أثناء حرب البوسنة .

في عام 1998 قامت اليونسكو بإنشاء لجنة دولية لتصميم و إعادة بناء و ترميم جسر ستاري موست علي غرار البناء القديم و التصميم الأصلي له , و فعلا تم بناؤه و افتتاحه عام 2004 , و بعدها بعام تم ادراج الجسر كموقع للتراث العالمي …

 

 

ازاي تروح موستار ؟

لو كنت بتلف البوسنة و الهرسك

و حبيت تسافر إلي موستار , ففي أتوبيسات كتير بتطلع بانتظام من سراييفو العاصمة و كذلك من معظم مدن البوسنة و الهرسك .

لكن لو عايز رأيي , أحسن طريقة تروح بيها المدينة من سراييفو هي القطار , المناظر الطبيعية اللي هتشوفها من القطار علي طول ضفاف نهر نيريتفا فعلا مش هتشوف زيها في اي حتة تانية …

الطريق إلي موستار بالقطار

الطريق إلي موستار بالقطار

لو كنت في كرواتيا

 فتقدر تاخد اتوبيس من زغرب العاصمة او مدينة سبليت او دبروفنبك لغاية المدينة , انا هتكلم هنا عن طريقة انك تسافرلها من مدينة دبروفنيك الكرواتية لأني شخصيا عملت كده  زي ما اتكلمنا قبل كده في كرواتيا : كل اللي محتاج تعرفه قبل السفر لعروس البحر الأدرياتيكي ..

أول طريقه قدامك من دوبروفنيك هي الأتوبيس , فيه 4 اتوبيسات بيطلعوا علي مدار اليوم من دبروفنيك .

تاني حاجه هي انك تأجر عربية و تسوق بنفسك لموستار.

تالت حاجه هي انك تطلع مع رحلة سياحية سواء جماعية أو حتي خاصة تبع شركة سياحة من دبروفنيك و بيكون معاك مرشد سياحي بيشرحلك كل حاجه و مش بس موستار , حتي بيوريك المدن و البلدات الصغير في الطريق .

اللي حصل معايا اني و انا في دبروفنيك قررت فجأه اني هزور موستار , قعدت أدور كتير عن احسن الطرق لزيارتها , ساعتها كنت في شهر ديسمبر في الشتا و اللي مبيعتبرش موسم سياحي , ساعتها اتواصلت مع شركة سياحة محلية في دبروفنيك واخده تقييم كويس , صاحب الشركة اعتذرلي ان مفيش رحلات سياحية لموستار في وقتها لأن الموسم السياحي واقف بسبب الشتا , و عرض عليا لو حبيت ممكن اروح برحلة خاصة مع مرشد سياحي..

و مع اني دايما بحب المغامرة لوحدي , بس ساعتها وافقت و دي كانت حاجه كويسة لأن فعلا عرفت معلومات كتير أوي عن البوسنة و كرواتيا و موستار في الرحلة دي …

 

تقعد أد ايه في المدينة؟

انا من الناس اللي بفضل اقعد وقت طويل في المدينة علشان احس بيها و اتعرف علي ثقافتها , بس بالنسبة لموستار يوم واحد كافي جدا انك تشوفها …

موستار من المدن اللي عمرك ما هتنساها طول عمرك , بجوها و ريحتها و مناظرها و تاريخها و طبيعتها و أكلها و قهوتها … حاول توصلها بدري بحيث تستمتع بيها طول اليوم و يا حبذا لو عرفت تشوف غروب الشمس فيها من فوق الجسر , منظر خرافي..

لو حبيت تقضي ليلة في المدينة أو أكتر من ليلة فيه فنادق و هوستلات كتير في المدينة و اسعارها مختلفة بناء علي ميزانيتك

Booking.com

 

تعمل ايه في موستار؟

نيجي بقي لإجابة أهم سؤال , اعمل ايه هنا و ليه اصلا موستار تستاهل الزيارة؟ , أسباب كتير هحاول اسردها من وجهة نظري الشخصية …

 

جسر ستاري موست :

جشر موستار

مين فينا مشافش صور لموستار بجسرها الأيقوني و نهر نيريتفا التركوازي الساحر … الصور دي من زمان خلت عندي رغبة قوية أزور المدينة , لو بتحب التاريخ و الطبيعة صدقني هتقع في غرام المدينة دي .

فوق الجسر و حواليه لو بصيت في اي اتجاه هتلاقي مناظر ساحرة تخليك تاخد اروع صور ممكن تاخدها في حياتك …

 

المدينة القديمة :

موستار , البوسنة و الهرسك .... ليه لازم تزور أجمل مدينة في البلقان 3

علي بعد خطوات من الجسر هتلاقي نفسك ماشي في المدينة القديمة , طرقها معمولة من الحصي و مبانيها عريقة و مليانه بازارات و مطاعم و كافيها كلها علي الطراز القديم … هتحس انك ماشي في القرون الوسطي …

جامع محمد باشا كوسكي :

موستار , البوسنة و الهرسك .... ليه لازم تزور أجمل مدينة في البلقان 4

اتبني علي ضفاف نهر نيريتفا عام 1617 , و اللي لغاية دلوقتي محافظ علي زخارفه الداخلية و الوانه الرائعة, الجميل في الجامع ده انك لو صعدت لمنارته هتشوف احسن فيو للمدينة …

برج القناص و مباني موستار المهجورة :

مباني كتير مهجوره و عليها أثار الرصاص من أيام حرب البوسنة لغاية دلوقتي لسه موجوده بتحكي صفحة من صفحات تاريخ البلد دي , منها برج القناص اللي هو عباره عن مبني اصبح قاعدة للقناصين أيام الحرب , تقدر تستكشفه بنفسك و تشوف من فوق أحلي مناظر المدينة من أعلي …

الهدايا و التذكارات :

موستار , البوسنة و الهرسك .... ليه لازم تزور أجمل مدينة في البلقان 5

photo by Pero Kvrzika /Flickr

طول ما انت ماشي في السوق القديم هتلاقي بازارات كتير بتعرض تحف و تذكارات بوسنية و ملابس تقليدية و حلي و اواني قهوة … هتحس انك في متحف و تجربة فعلا غنية جدا

المطبخ البوسني :

موستار , البوسنة و الهرسك .... ليه لازم تزور أجمل مدينة في البلقان 6

Photo by Jim McDonough / Flickr

الأكل البوسني فعلا لذيذ جدا , و ده هتحسه من أول ما تفتح المنيو في أي مطعم هتقعد فيه , المطبخ البوسني مشهور باللحوم المشوية و الكباب و المحاشي , مطبخ مميز و غني جدا , و خصوصا في موستار المطاعم اللي في المدينة القديمة او علي ضفاف نهر نيريتفا جوها العام حالم جدا خصوصا و انت بتجرب الأكل البوسني…

القهوة البوسنية :

موستار , البوسنة و الهرسك .... ليه لازم تزور أجمل مدينة في البلقان 7

القهوة البوسنية مش مجرد مشروب بتشربه و تقوم , القهوة البوسنية هي ثقافة دولة و ثقافة أمة , هي عادات و تقاليد , أنا شخصيا القهوة بالنسبالي عشق , و بركز جدا في أهمية القهوة في كل بلد بزورها , يعني مثلا القهوة في مصر غير القهوة في تركيا غير في إيطاليا غير في أيسلندا … كل بلد القهوة فيها مختلفة و قيمتها الثقافية مختلفة , في البوسنة و الهرسك القهوة من أساس الثقافة , هتحس ده جدا لما تزور البوسنة و الهرسك..

 

شوية نصائح خلي بالك منها :

موستار , البوسنة و الهرسك .... ليه لازم تزور أجمل مدينة في البلقان 8

-البوسنة رخيصة مقارنة بكرواتيا “اللي تعتبر رخيصة برضه مقارنة بغرب أوروبا” , العملة في البوسنة هي المارك البوسني , لو بتزور موستار من كرواتيا تقدر تدفع باليورو عادي “اليورو = 2 مارك” . و ممكن برضه تدفع بالكونا الكرواتية.

-البوسنيين مبيحبوش يتكلموا عن الحرب , هما بيشوفوا ان الفترة دي مؤلمة في تاريخهم , علشان كده متحاولش تضغط علي حد بوسني علشان يحكيلك عن تاريخه  لو حسيت انه مش حابب ده …

-البوسنيين مبيحبوش انك تسمي بلدهم البوسنة بس , اسمها البوسنة و الهرسك Bosnia and Herzegovina , الأول كنت بستغرب هما ليه بيتضايقوا , بس لما تفهم البوسنة و تاريخها و السياسة فيها دلوقتي هتفهم ان البوسنة مش بس مسلمين زي ما معظم الناس فاهمه . البوسنة حوالي 51% مسلمين لغتهم اللغة البوسنية , 30% صرب أرثوذكس و 16% كروات كاثوليك ده غير اقليات اخري

فيه مدن كاملة اهلها صرب و لغتهم صربية  وده شفته بعيني في الطريق لموستار , موستار نفسها شرقها معظمه بوسنيين مسلمين و غربها كاثوليك كروات … و لو زرت البوسنة هتحس بالفرق ده أوي بين الفئات دي.

-الشعب البوسني شعب طيب و مضياف جدا بكل طوائفه , انت نفسك هتستمتع جدا بالتجربة في البوسنة و الهرسك..

 

موستار , البوسنة و الهرسك .... ليه لازم تزور أجمل مدينة في البلقان 9

زرت موستار قبل كده؟ حابب تضيف حاجه للمقالة؟ عندك أي نصائح لزيارة المدينة؟ شاركنا بيها في الكومنتات أو في شبكات التواصل الأجتماعي…

TAGS
RELATED POSTS
Subscribe
نبّهني عن
guest
0 تعليقات
Inline Feedbacks
View all comments
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

0
حابب اعرف رأيك ، اترك تعليق :)x
()
x
تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

0
حابب اعرف رأيك ، اترك تعليق :)x
()
x