دايما في كل مقالاتي بقول أهم حاجه في السفر هي التخطيط , ناس كتير نفسها تسافر بس مش عارفة تبدأ ازاي و للا تخطط ازاي , أو وجود عقبات زي مفيش فلوس أو هتسافر لوحدك و حاسس ان الدنيا مش واضحة …
في المقالة دي هقولك علي أرخص و أفضل 5 وجهات تزورهم في الشتاء القادم , بتاريخ كتابة المقالة دي لسه قدامك أكتر من 6 او 7 شهور تقدر تخطط فيهم و كمان تحجز بدري بحيث تستفيد من الأسعار الرخيصة بدري , , و كمان هراعي ان البلاد اللي هتكلم عنها هتبقي من أفضل الوجهات اللي سواء مش محتاجة فيزا , او فقط فيزا عند الوصول او حتي ليها فيزا بس سهلة , بحيث ان ميكونش ليك حجه وتاخد قرار السفر …
[lwptoc colorScheme=”inherit” borderColor=”#dd8604″]
1- نيبال :
أرض الهيمالايا و جبل أيفرست العظيم , نيبال تستحق تكون في بداية قايمتي أرخص و أفضل 5 وجهات تزورهم في الشتاء لأني من وجهة نظري نيبال من الدول المظلومة سياحيا و اللي انا شخصيا من الدول اللي حابب ازورها
البلد فيها حوالي 8 أماكن من أماكن اليونسكو للتراث , فيها ثقافة فريدة و غنية جدا , فيها أكتر من 35 جماعة عرقية مختلفة كل واحدة ليها ثقافات و عادات مختلفة تقدر تستكشفها بنفسك …
البلد رخيصة جدا , و الناس طيبين و كرماء جدا , و الطبيعة خلابة و مناظر الجبال ملهاش حل , نيبال هتكون وجهة سياحية ممتازة في الشتا لو قررت تسافرلها .
2- اندونيسيا :
مقارنة بتايلاند و ماليزيا … اندونيسيا برضه مش واخده حقها سياحيا , مع ان من وجهة نظري اندونيسيا تعتبر من أجمل دول اسيا للي بيدور علي الغني الثقافي و جمال الطبيعة …
Raja Ampat
بالرغم من انها اكبر الدول الأسلامية و ده بيخلي معظم الناس فاكره ان كل اندونيسيا مسلمين فقط , إلا ان اندونيسيا فيها عدد كبير من البوذيين و الهندوس و المسيحيين , كل فئة ليها عاداتها و تقاليدها و ثقافتها و ده اللي بيخلي اندونيسيا غنية جدا ثقافيا …
بركان جبل ميرابي
لو هتسافر اندونيسيا ابعد عن بالي , مش لأن بالي وحشة بالعكس بالي من احلي الوجهات السياحية و اشهرها عالميا , انما اندونيسيا فيها اماكن كتيييير مش مشهورة و احسن بكتير من بالي و ارخص كمان , زي جزيرة لومبوك مثلا أو راجا امبات , او تشوف بركان جبل ميرابي العظيم …
البلد كمان رخيصة جدا و الناس طيبين اوي , و المطبخ الاندونيسي يستاهل انك تجربه , علشان كده من وجهة نظري اندونيسيا من أرخص و أفضل 5 وجهات تزورهم لو حبيت تسافر في الشتا.
3- تركيا :
Photo Credits to Heyfa BhM
تركيا من البلاد اللي بحبها و أي حد سافرها هيعرف ان بيكون ليها حنين كده و هتبقي عايز تزورها تاني و تالت و رابع ..
تركيا في الشتا بيكون ليها طعم مميز اوي , سواء اسطنبول أو مدن الشمال زي طرابزون و اوزنجول , او مدن الجنوب زي أنطاليا … الخ , مش بس كده , الأسعار في الشتا بتكون أرخص بكتير لأن الموسم السياحي في تركيا بيكون في الصيف , انا زرت تركيا كتير في معظم فصول السنة , صدقني احسن وقت هتستمتع بيه في اسطنبول هو بعيد عن موسم الصيف , لأن اسطنبول مش هتكون زحمة و هتعرف تستكشفها كويس ..
معظم الدول العربية بيدخلوا تركيا من غير فيزا , المصريين لازم يحصلوا علي فيزا من السفارة التركية في مصر و كذلك تصريح أمني من مجمع التحرير … اتكلمنا بالتفصيل عن السفر التركيا في مقالة كل اللي محتاج تعرفه قبل السفر لاسطنبول ..
4- أوزباكستان :
الدولة العريقة اللي تاريخيا كانت من النقاط المهم علي طريق الحرير , مدنها التاريخية الساحرة زي طشقند , بخاري , سمرقند و خيوه (او اسمها التاريخي القديم خوارزم ) …
مش بس هتحس انك هتدخل التاريخ و انت بتزور البلد دي , بس كمان هتستمتع بالمطبخ الأوزبكي الفريد , و هتشوف طبيعة رائعة كعادة معظم دول هذه المنطقة من العالم ..
أوزبكستان مؤخرا طبقت نظام الفيزا أونلاين لأغلب الجنسيات العربية , يعني ملكش حجه هتقدم علي الفيزا اونلاين و في يومين تطلع و تسافر بكل سهولة … علشان كده من وجهة نظري برضه أوزباكستان تستحق تكون في قائمتي أرخص و أفضل 5 وجهات تزورهم في الشتاء الجاي.
5- مصر :
و الجزء ده لغير المصريين من قراء المقالة .. مصر من الدول اللي تستاهل تزورها في الشتا , قلتلك قبل كده عن 10 اسباب تخليك لازم تزور مصر, بس فعلا مصر بتكون روعة في الشتا خصوصا مدن زي الأقصر و أسوان , او منتجعات البحر الأحمر في شرم الشيخ و الغردقة و مرسي علم … أو حتي الأسكندرية بتكون ساحرة في الشتا …
مصر من الدول الرخيصة جدا في التكلفة , ده غير تنوع الحاجات اللي ممكن تشوفها أو تعملها في مصر سواء التاريخ أو الثقافة أو الشواطئ أو الشوبنج
شفشاون , المغرب
أما بقي لو أنت مصري , فتونس و المغرب من البلاد اللي تستاهل تتزار في الشتا , خصوصا انهم بيكون ليهم طعم تاني في الشتا , انا شخصيا في مدينتين منظر التلج فيهم في الشتا روووعة , الأولي هي أفران في المغرب , و الثانية هي عين دراهم في تونس … شمال أفريقيا من وجهة نظري فيه كنوز سواء في تونس أو المغرب أو الجزائر وللاسف مدن كتير منهم مش معروفة سياحية و تستحق اننا نشوفها و نكتشفها …
لو أول مرة هتسافر : اقرا 10 غلطات حاول تتفاداهم لو هتسافر أول مرة و كمان 5 نصائح تخليك تسافر بأقل التكاليف ..
سافرت قبل كده في الشتاء ؟ عندك اقتراحات لوجهات رخيصة و مناسبة للشتاء ؟ شاركنا بيها في الكومنتات أو صفحات السوشيال ميديا ..
