10 حاجات لازم تعرفهم قبل ما تزور فالنسيا , اسبانيا

by Mohamed Hammad
11 minutes read

دايما بحس ان احلي المدن في اي دولة بزورها هي المدن اللي مش مشهورة اعلاميا , هتحس بده اوي لما تزور فالنسيا مثلا او اي مدينة اخري زيها …

أول ما تجيب سيرة اسبانيا لأي حد ييجي في باله علي طول مدريد أو برشلونة , و طبعا دول روعة و لازم يتزاروا , بس انهارده لما حبيت أتكلم عن اسبانيا حبيت ابدأ بمدينة فالنسيا … لأنها فريدة جدا وتستحق الزيارة …

في المقالة دي هنتكلم علي 10 حاجات لازم تعرفهم قبل ما تزور فالنسيا …

 

1-فين فالنسيا ؟

10 حاجات لازم تعرفهم قبل ما تزور فالنسيا , اسبانيا 15

فالنسيا او “بلنسية” زي ما بتنطق في اسبانيا و زي ما بحب اسميها  هي عاصمة اقليم فالنسيا و تالت اكبر مدينة في اسبانيا , بتقع في شرق اسبانيا علي البحر المتوسط , و كانت بتسمي “بلنسية” من ايام الحكم الاسلامي الأندلسي …

 

 

2-ازاي تزور فالنسيا ؟

لو حبيت تزور فالنسيا و بما انها مدينة كبيرة مفش هتلاقي مشكلة لأن فيه قدامك كذا اختيار بناء علي وجهتك و ميزانيتك :

-الطيران:

10 حاجات لازم تعرفهم قبل ما تزور فالنسيا , اسبانيا 16

فالنسيا فيها مطار فالنسيا (IATA : VLC)  و ده فيه شركات طيران دولية و محلية كتير بتطير منه و إليه , زي ما اتكلمنا قبل كده في مقالة : ازاي تلاقي ارخص تذكرة طيران   حاول تدور كويس من المدينة اللي هتكون فيها قبل ما تزور فالنسيا , ممكن تلاقي عروض حلوة جدا خصوصا علي شركات الطيران الإقتصادية في اوروبا …

-القطار:

ليه لازم تزور فالنسيا

محطة القطارات الرئيسية موجودة في وسط المدينة , قطارات كتير بتتحرك ما بين مدريد العاصمة و برشلونة و مدن كتير .

تقدر تحجز التذاكر اونلاين من موقع الشركة الحكومية الأسبانية للقطارات RENFE   , بس خلي بالك ان التذاكر الرخيصة السياحية بتخلص بسرعة , علشان كده حاول تحجز بدري قبل ما تزور فالنسيا .

-الأتوبيس:

10 حاجات لازم تعرفهم قبل ما تزور فالنسيا , اسبانيا 17

أنا شخصيا جربت الأتوبيس من مدريد لفالنسيا , فيه اتوبيسات كتيرة بتتحرك من معظم مدن اسبانيا ليها . المحطة الرئيسة للأتوبيسات موجودة علي ضفاف نهر توريا علي بعد حوالي 15 دقيقة مشي من وسط المدينة.

-مشاركة السيارة او ال Carpooling :

و دي انا كمان جربتها و هي مخصصة للمسافرين ال Backpackers  و اتلكمت عنها قبل كده في مقالة : 5 نصائح تخليك تسافر بأقل التكاليف  و هقتبس الجزء اللي كتبته قبل كده عن الموضوع ده :

10 حاجات لازم تعرفهم قبل ما تزور فالنسيا , اسبانيا 18

“في اسبانيا كنت عايز اسافر من مدينة بلنسية Valencia لمدينة أليكانتي Alicante , المسافة بينهم حوالي ساعتين و نص , تذكرة القطار كانت بحوالي 60 يورو , و الاتوبيس 30 يورو … ساعتها لجأت لBlabla car , موقع ظريف , فكرته ان اي حد مسافر في الوقت اللي هتسافر فيه بين المدينتين دول بعربيته بياخدك معاه مقابل انك تدفع جزء من تمن البنزين هو بيكون محدده .

بمعني , انا مثلا دخلت علي الموقع , عملت سيرش اني هسافر من بالنسية لأليكانتي اليوم الفلاني , لقيت ناس كتير , اخترت واحد و بعتله طلب , قال انه هيكون واقف في المكان الفلاني الساعة كذا , رحت لقيت في 3 غيري حاجزين معاه , ركبنا كلنا ووصلنا و كل واحد دفع 9 يورو بس !! , ايوه 9 يورو ووفرت حوالي 50 يورو لو كنت خدت القطار او 20 يورو لو كنت خدت الباص .

الموقع ده شغال في معظم دول اوروبا و تركيا و البرازيل و المكسيك , و كل شوية بيزودوا بلاد جديدة “

 

 

3-تقيم فين في فالنسيا ؟

بالرغم من ان اسبانيا تعتبر رخيصة مقارنة بدول تانية زي سويسرا او النمسا او ألمانيا … بس لما تزور فالنسيا هتلاقي فالنسيا أرخص بكتير من مدن زي مدريد او برشلونة .

هتلاقي بسهولة أسعار متماشية مع ميزانيتك سواء لفنادق او هوستلات , ابحث كويس قبل ما تسافر بفترة علشان تلاقي سعر كويس

[booking_product_helper shortname=”valencia”]

أنا شخصيا لما كنت هناك حجزت غرفة بحمام خاص في بيت عائلة من علي موقع Airbnb  , و كنت شرحت الموقع بالتفصيل في مقالة : Airbnb  دليلك الكامل لحجز ارخص و افضل اقامة 

10 حاجات لازم تعرفهم قبل ما تزور فالنسيا , اسبانيا 19

و لو كنت لسه معملتش فيه حساب , تقدر تسجل باللينك ده  و هتاخد كريدت 25 دولار تقدر تستخدمهم في أول حجز ليك لأي اقامة من علي الموقع

 

 

4-ساحة العذراء Plaza de la virgen :

و دي أكتر منطقة حبيتها في فالنسيا , هي ساحة في قلب المدينة القديمة , مليانة مباني تاريخية و طرق و شوارع قديمة يرجع تاريخها لأكثر من 2000 عام ..

ليه لازم تزور فالنسيا

أشهر ما فيها كاتدرائية سانتا ماريا The Cathedral of Santa Maria  , و دي كانت كانت كاتدرائية علي الطراز القوطي , تم تحويلها لمسجد عندما دخل المسلمين المدينة و بنوا المأذنة العملاقة في العصر الأندلسي , و بعد سقوط الأندلس تم تحويلها إلي كاتدرائية القديسة ماريا

10 حاجات لازم تعرفهم قبل ما تزور فالنسيا , اسبانيا 20

و هتحس جدا باختلاف الطرازات المعمارية في الكاتدرائية من الطراز الروماني و القوطي الفرنسي  و الأسلامي و عصر النهضة و الطراز الكلاسيك الحديث  .

و يوجد بداخل الكاتدرائية الكأس المقدسة للسيد المسيح .

10 حاجات لازم تعرفهم قبل ما تزور فالنسيا , اسبانيا 21

ده غير ان الساحة زيها زي معظم ساحات و شوارع المدينة القديمة مليانه كافيهات و مطاعم تقدر تجرب فيها كل الأطباق الأسبانية الفريدة , ده غير ان بالليل الساحة بيكون ليها مذاق تاني ..

 

 

5-مدينة العلوم و الفنون:

10 حاجات لازم تعرفهم قبل ما تزور فالنسيا , اسبانيا 22

و دي صرح فني ثقافي علمي رهيب في فالنسيا , بناه المعماري الفالنسي الشهير سانتياجو كالافاترا و اللي اتبني علي شكل هيكل عظمي عظيم لحوت .

المدينة الثقافية الضخمة دي بتهتم ب 3 مجالات .. الفنون و العلوم و الطبيعة . هتنبهر بالتصميم الفريد و كمية المعلومات اللي هتشوفها فيها … مدينة العلوم و الفنون دي أيقونة من أيقونات المدينة مينفعش تزور فالنسيا من غير ما تشوفها .

6-الباييا :

و دي في حد ذاتها سبب يخليك لاز تزور فالنسيا لو بتحب الأكل و الأكلات الشعبية في كل دولة , طبق الباييا هو طبق أسباني أندلسي مشهورة بيه جدا اسبانيا , ظهر في مدينة فالنسيا في العصر الأندلسي , مكون من الأرز و الدجاج او الأرانب أو ثمار البحر أو الخضراوات … طبق عمرك ما هتنساه لما تجربة ..

10 حاجات لازم تعرفهم قبل ما تزور فالنسيا , اسبانيا 23

مش هتلاقي أي صعوبة انك تتمتع بالمطبخ الأندلسي او الأسباني و لما تزور فالنسيا , أطباق كتير لازم تجربها غير الباييا زي مثلا الأرز الأسود Arròs negre  وده شبه الباييا لكن بيطبخوه مع الحبار , و بيستخدموا حبر الحبار لاعطاء الطبق اللون الأسود ..

10 حاجات لازم تعرفهم قبل ما تزور فالنسيا , اسبانيا 24

المطبخ الأسباني لذيذ جدا , و من المطابخ المميزة في اوروبا و منطقة البحر المتوسط .

 

7-شواطئ فالنسيا :

10 حاجات لازم تعرفهم قبل ما تزور فالنسيا , اسبانيا 25

Photo by Boris Dzhingarov / Flickr

لما تزور فالنسيا في الصيف , لازم تزور احد شواطئها الشهيرة , من أشهر شواطئها شاطئ مالفاروسا الشهير Playa de la Malvarrosa المشهور بالرمال الناعمة و المياه الصافية و متنزه طويل عليه مطاعم و كافيهات كتير …

 

8- السوق المركزي Mercado Central :

10 حاجات لازم تعرفهم قبل ما تزور فالنسيا , اسبانيا 26

Photo by Boris Dzhingarov / Flickr

دايما في أي مدينة كبيرة فيه سوق مركزي تقدر تقدر تشوف فيه الاكلات المحلية و تتعرف علي الثقافة المحلية للمدينة اللي بتزورها …

هتقدر تشوف ده في سوق فالنسيا المركزي التاريخي , مش بس هتشوف المنتجات الطازجة من الفواكه و الخضروات و اللحوم و اماكن بيع الباييا و المخبوزات , لكن هتتعرف علي الحياة اليومية المحلية في بالنسيا  و هتحس انها تجربة رائعة …

لو زرته فيوم من الأيام متنساش تجرب عصير البرتقال الطازج اللي مشهورة بيه جدا فالنسيا …

 

9-اعتزاز الأسبان بتراثهم الأندلسي:

قبل ما اسافر اسبانيا كنت متخيل ان الأسباني بيكرهوا تراثهم الأندلسي زي ما معظم المصادر العربية الأيام دي بتبين , بس لما رحت أكتشفت ان الأسبان معتزين و فخورين جدا بتاريخهم الأندلسي الأسلامي زي ما بيفتخروا بتاريخهم و تراثهم الكاثوليكي …

10 حاجات لازم تعرفهم قبل ما تزور فالنسيا , اسبانيا 27

في مدريد و فالنسيا و أليكانتي عملت ال Free tour  الخاصة بكل مدينة , و كان المرشد اللي بيشرح التاريخ كان بيتكلم عن فخره الأسباني بأجداده المسلمين في العصر الأندلسي اللي وصلوا لأكتشافات عظيمة في العلوم و الفنون و الموسيقي و الفلك و الأدب …

10 حاجات لازم تعرفهم قبل ما تزور فالنسيا , اسبانيا 28

انا فاكر كلمته لما كان بيتكلم أد ايه المسلمين الأندلسيين قادة عظماء في الحرب , قال ان المسلمين استولوا علي أسبانيا في خلال ما يقرب من 10 سنين , اما القادة الكاثوليك فأخدوا اكتر من 800 سنة علشان يرجعوا اسبانيا تاني .

ده غير ان معظم الأسبان بيشوفوا محاكم التفتيش هي وصمة عار في التاريخ الأسباني و انه حاجه غير اخلاقية او انسانية …

و مش هنسي برضه و انا في ال Free tour في فالنسيا لما المرشدة اللي بتعملنا الجولة عرفت اني مصري فرحت جدا و كانت لما بتشرح اي حاجه في التاريخ او الثقافة الأندلسية كانت بتسألني إذا كانت الحاجه دي لسه بنستخدمها في حياتنا كعرب او مسلمين و فعلا اكتشفت ان حاجات كتير جدا في الثقافة الأسبانية الحالية مصدرها التاريخ الأندلسي …

احنا حبيت اشرح النقطة دي باستفاضة علشان لما تيجي تقرأ عن التاريخ الأندلسي , حاول دايما متقرأش من المنظور العربي الحالي فقط لأن فيه غلطات كتير و تحيزات و من وجهة نظري عنصرية , حاول دايما تقرأ كل وجهات النظر هتشوف الموضوع من منظور اوسع , و هتكتشف ان الأسبان نفسهم فخورين بالتراث الأندلسي جدا و شايفين انه أعظم عصر في تاريخهم .

 

10-الجولات المجانية Free tours :

10 حاجات لازم تعرفهم قبل ما تزور فالنسيا , اسبانيا 29

و دي مش بس مهمة لما تزور فالنسيا , بل هي مهمة في اي مدينة هتزورها , دايما لما بزور اي مدينة اول حاجه بعملها هي الجولة السياحية المجانية دي .

لانها هتديك فكرة عن تاريخ المدينة و اهم الأماكن السياحية فيها و تاريخها . هتستفيد كتير جدا لما تعملها …

 

و هنهي المقالة دي بفيديو لمقتطفات من رحلتي لمدينة بلنسية الجميلة …

 

 

 

 

 

لو عجبتك المقالة ، يبقي هتعجبك المقالات دي

Leave a Comment

سبعة عشر − 2 =

This website uses cookies to improve your experience. We'll assume you're ok with this, but you can opt-out if you wish. Accept Read More