ازاي تعمل مدونة سفر 2020 … دليلك الكامل من الألف إلي الياء

ازاي تعمل مدونة سفر ؟ … سؤال شغلني كتير من قبل سنة بالضبط من دلوقتي . زي دلوقتي من سنة بدأت مدونتي Passport Trails اللي كانت بالنسبالي حلم أخدت وقت كتير إني أنفذه .

طول السنين اللي فاتت من ساعة ما بدأت أسافر و كنت بلاحظ أن كل الناس اللي حواليا شايفين السفر مستحيل أو انك محتاج تكون غني جدا علشان تسافر أو أو أو … من أفكار كلها غلط بخصوص السفر .

وحتي في خلال السنين اللي فاتت , بالرغم من ظهور ناس كتير كانت بتدون في مجال السفر سواء في المدونات أو علي السوشيال ميديا .. للأسف كان أغلبهم كان بيحكي المواقف اللي بتحصل معاه في السفر بس … نادر جدا لما كانوا بيتكلموا ازاي بيسافروا و ازاي بيخططوا لسفرهم .

علشان كده قررت أعمل المدونة دي , و لكن لما قررت اجهز ليها كنت بدور عن اي معلومات عن ازاي اعمل موقع … معظم المصادر العربية اللي بتشرح الموضوع كانت للأسف رديئة بسبب انها كانت مترجمة من مواقع اجنبية , فلجأت للمواقع الأجنبية و اتعلمت ازاي ابدأ ..

و خدت عهد علي نفسي ان بعد مرور سنة علي المدونة لو نجحت هعمل مقالة هشرح فيها بالتفصيل ازاي تعمل مدونة سفر , لاني نفسي ننشر ثقافة السفر بين مجتمعاتنا ..

فالموضوع ده هيكون لأي حد نفسه يبدأ مدونة بصفة عامة و مدونة سفر خصوصا … و سامحني المقالة ممكن تبقي طويلة شوية , فتقدر تحفظها عندك بحيث ترجعلها في أي وقت و تكمل من النقطة اللي وصلتلها …

[lwptoc colorScheme=”inherit” backgroundColor=”” borderColor=”#dd8604″]

هل سهل اني أعمل مدونة سفر؟

للأسف في مجتمعنا العربي ناس كتير فاكرة أن عمل المدونة ده شئ سهل … يمعني انك تنسخ شوية مواضيع من مواقع تانية أو تترجم مقالات أجنبية و تحطها في مدونتك لمجرد انك تجيب زوار و تكسب فلوس من مدونتك كده بكل بساطة !

لو فاكر ان الموضوع بالسهولة دي يبقي أسمحلي أقولك بلاش تمشي في الموضوع ده … لأن الموضوع أصعب من كده بكتير .

انك تعمل مدونة دي أمانة … لأن كل كلمة بتقولها غيرك بيقرأها و بيصدقها و بيثق فيها … أنا مثلا مبكتبش كلمة في أي مقالة هنا علي مدونتي إلا لما أكون واثق منها مليون في المية … حتي الناس الكتير اللي بعتتلي باستفسارات تعرف اني لما كنت بجاوب كنت بجاوب بالحاجة اللي اعرفها و متأكد منها , و لو مش متأكد كنت بقول ده .

تاني حاجه اعرف كويس ان المدونة عايزة أستمرارية , بمعني لو من النوع اللي بيزهق بسرعة يبقي بلاش تعملها , لأن صدقني هييجي عليك وقت تحس انك زهقت , فلازم تقاوم الاحساس ده و صدقني هتفرح لما تلاقي حلمك الصغير ده بيكبر يوم بعد يوم.

نصيحة أخير قبل ما نقفل الجزئية دي … متستناس انك تكسب فلوس من مدونتك قبل سنة أو سنتين علي الأقل , بالعكس انك في أول سنتين هتصرف عليها , بس بعد كده هتقدر تخليها مصدر دخل و لو جانبي ليك … كل ده متوقف علي أد ايه بتديلها وقت و مجهود … و في الأخر مفيش حد بيتعب و ربنا مبيعوضوش في الأخر .

ازاي تعمل مدونة سفر ؟؟ بداية الطريق ..

قبل ما تبدأ مدونة سفر … اقعد مع نفسك و اسألك نفسك … ايه اللي عندي أقدر أضيف بيه للناس؟ هل عندي ماتيريال أو مادة أقدر أقدمها ؟

ايه تصورك لنوعية المواضيع اللي هتقدمها ؟ هتجيب منين أفكار للمقالات ؟ المدونات اللي علي الساحة حاليا بتتميز بأيه؟ طب انا لما اعمل مدونتي هتميز عنهم في أيه بحيث يجيلي زوار … و إلي أخره من الأسألة اللي تسألها لنفسك …

و من هنا نروح للنقطة اللي بعد كده …

إيه مجال السفر اللي هتتكلم عنه مدونتك ؟

قبل ما أعمل المدونة كنت فاكر أن أفضل شئ انك تعمل مدونة عامة بتتكلم عن كل حاجه , يعني مثلا تعمل مدونة سفر بتتكلم عن السفر الأقتصادي و السفر الغالي و السفاري و و و …إلخ

لكن أكتشفت ان ده غلط جدا , لو عايز مدونتك تتشهر و تنجح لازم تختار تخصص معين تكون مدونتك متخصصه فيه , ده اللي هيخليها تتصدر نتائج البحث علي محركات البحث بكل سهولة .

فأنت أول حاجه تعملها تقعد تفكر , حابب تخلي المجال الرئيسي اللي هتتكلم فيه في مدونتك يكون ايه …

أسم المدونة :

حاجه كمان هتتعذب فيها جدا هي الأستقرار علي أسم مدونتك .. أنت محتاج اسم مميز لمدونتك … الأسم اللي بعد كام سنة هيكون مشهور علي الأنترنت كمصدر من مصادر معلومات السفر .

خد وقتك كويس جدا في اختيار الأسم , ﻷن ده مش هيكون مجرد اسم لموقع , ده هيكون براند ليك في المستقبل ..

حاول دايما تبعد عن التقليد , خليك متفرد , انا بعتبر ان اصعب خطوة في خطوات ازاي تعمل مدونة سفر هي اختيار اسم ليها …

هل أعمل مدونة مجانية؟

نصيحتي ليك , بلاش .. بلاش تضيع وقت و مجهود في مدونة مجانية مستضافة علي موقع مش بتاعك سواء تبع wordpress او Blogger , لعدة اسباب منها مثلا ان جوجل دايما بيفضل المواقع المدفوعة فبالتالي هتعاني علشان مقالاتك تظهر في الصفحات الأولي في جوجل.

ده غير مش هتعرف تعمل براند لنفسك أو لمدونتك . لأن مثلا لو مدونتك مجانية هيبقي اسمها yourname.wordpress.com  وده اسم طويل و حتي مش مميز , اما لو مدونتك مدفوعة هيكون اسمها yourname.com , فطبعا فرق شاسع بين ده و ده .

ده غير ان المدونات المجانية مش بتتيح ليك كمية الأضافات و الأمكانيات اللي هتبقي متاحه ليك لو مدونتك مدفوعة , و ده بيفرق جدا في شكل موقعك.

ده غير ان تكلفة عمل المدونة حاليا مش غالية زي ما انت متخيل , و هنتكلم عن كل ده بالتفصيل دلوقتي ..

خلينا نبدأ خطوة خطوة عن ازاي تعمل مدونة سفر …

أولا الدومين , او عنوان موقعك الألكتروني :

دي أول خطوة هتبدأ بيها , خلينا نفترض انك استقريت علي أسم كويس لمدونتك , دلوقتي عايزين نشوف الأسم ده متاح وللا ﻷ ..الموقع اللي بفضله و اللي دايما بيكون فيه أرخص اسعار للدومينات هو  NameCheap .

طبعا فيه مواقع كتير تقدر تشتري منها دومين بس أنا عن نفسي اشتريت من الموقع ده بعد ما قارنته مع مواقع كتير و اللي يتعتبر أفضلهم .

هتدخل علي الموقع و تبدأ تعمل بحث علي اسم الموقع اللي حابب يكون لمدونتك , طبعا يفضل انك تبحث في واحد من الأمتدادات دي .com , .net. .blog

سعر الدومين ال .com المتوسط بتاعه 8 دولار في السنة , طبعا ممكن يزيد أو يقل علي حسب الموقع اللي بتشتريه منه أو العروض اللي بتتعمل من وقت للتاني علي أسعار الدومينات .

بعد لما تستقر علي الدومين اللي عايزه , هتشتريه من الموقع بعد ما تحط بياناتك و تدفع تمنه , و كده مبروك أول خطوة تمت بسلام .

ثانيا الأستضافة :

الأستضافة اعتبارها المساحة اللي بتأجرها علي الأنترنت اللي بتستضيف موقعك بملفاته و الصور اللي بترفعها و كل حاجه .

علشان كده لازم شركة الأستضافة اللي هتشترك معاها تكون شركة محترمة و سريعة لأنها لو شركة تعبانه هتلاقي موقعك بطيء جدا و مليان مشاكل .

أول ما عملت موقعي كنت مع شركة Hostgator , و لكن أول شهور عانيت معاهم مش بس بسبب بطئ الموقع وقتها , لكن كمان أوقات كتيييير الموقع كان بيقع من غير سبب , و لما كنت برجع للدعم مكانش حد بيفيدني .

علشان كده قعدت أقرأ كتير جدا عن أحسن شركات و أقرأ تقييم الناس أونلاين , و توصلت لشركتين هما أفضل شركتين من حيث الكفاءة و السرعة , ده غير تقييم الناس أونلاين .

أولا شركة FastComet , و اللي تعتبر شركة ممتازة بأمكانياتها و سرعتها و تققيمات الناس أونلاين ليها.

ثاني شركة برشحهالك هي  Chemicloud و اللي عن تجربة شركة فوق الممتازة , و الغريب انك هتلاقي كل التقييمات أونلاين عنها كلها إيجابية جدا .

[the_ad id=”2821″]

تقدر تختار أي شركة منهم , ده غير أن فيه شركات كتييير جدا , أهم حاجه انك تقرأ كويس جدا التقييمات الخاصة بالشركات قبل ما تشترك معاهم .

طبعا هتلاقي كذا مستوي للأستضافة , مادام في الأول اختار أول مستوي اللي هيكون رخيص , مش هتحتاج أكتر من كده في الأول و بعد كده لما موقعك يكبر تقدر ترقيه زي ما انت عاوز .

أشتريت الأستضافة خلاص ؟ كده تاني مرحلة أنتهت بسلام 🙂

تركيب ال Wordpress :

بالنسبة للتدوين فيه منصات كتير زي Wordpress و Blogger و Joomla و غيرهم , بس أشهرهم و اسهلهم هي ال Wordpress .

بعد لما تشتري الأستضافة و تركب عليها الدومين و الموضوع بيكون بسيط و الدعم الفني لشركة الأستضافة هيساعدك في ده بكل سهولة , هتقوم بتركيب ال Wordpress علي موقعك  (طبعا تقدر تخلي الدعم الفني للأستضافة يساعدك في ده لو معندكش خبرة) .

اختيار تصميم ” Theme ” للمدونة :

كده الحمدلله خلصنا أغلب الخطوات فاضل اللمسات الاخيرة , دلوقتي محتاجين نختار ثيم مميز للمدونة بحيث تكون شكلها جميل …

دلوقتي قدامك خيارين .

الخيار الأول : تستخدم الثيمات المجانية اللي بتيجي مع الWordpress  , هي بتكون ثيمات بدائية و بصراحة شكلها مش مميز , بس بتفي بالغرض .

ممكن تبدأ بيه و في المستقبل تشتري ثيم مدفوع.

الخيار الثاني:أنك تشتري ثيم مدفوع , و الثيمات المدفوعة بيكون فيها أمكانيات رهيبة بتخلي موقعك جذاب جدا , ده غير انه بينزلها تحديثات باستمرار .

طبعا أفضل موقع تشتري منه ثيمات لموقعك هو Envato  ,  هتلاقي عليه ألاف الثيمات بكل الأشكال و الألوان و الأسعار … أختار اللي يناسبك و تقدر تركبه بسهولة علي موقعك .

لو احتجت شعار مميز لمدونتك , ارشحلك برنامج Canva علي الموبايل , برنامج سهل و ممتاز تقدر تصمم شعارك بكل سهولة.

بعد ما تركب الثيم , و كله تمام , ادخل من الووردبريس علي (اضافات —> اضف جديد) وقم بإضافة الأضافات اللي تفضلها , فيه أضافات كتير مهمة زي Yoast , google analytics , W3 total cache و غيرهم .

ابدأ الكتاية :

خلاص عملنا كل حاجه و دلوقتي الدور بقي عليك انك تبدأ تكتب . جوجل أكتر حاجه بيهتم بيها هو المحتوي , عمرك ما هتلاقي موقع علي الصفحات الأولي في البحث علي جوجل و محتواه مش مميز .

علشان كده لازم تهتم جدددددا بالمحتوي اللي بتكتبه .

حاجتين لازم تخلي بالك منهم و انت بتكتب :

أولا جودة المحتوي :

فيه ملايين المقالات و المدونات الخاصة بالسفر , علشان كده لازم تكتب محتوي مميز , فكر دايما و انت بتكتب , هل اللي بكتبه ده هيفيد حد فعلا وللا ﻷ , الأهتمام بجودة المحتوي الخطوة الأولي لنجاح مدونتك .

ثانيا الأستمرارية :

يعني مينفعش تكتب انهارده مقالتين , و بكرة مقالة  و تقعد اسبوع متكتبش و بعدين مقالة و بعدين شهر لأ … كل ده غلط .

حاول دايما تقعد تشوف انت ناوي تكتب كل أد ايه ,فيه مدونات بتنزل مقالة يوميا , فيه بينزلوا مقالتين في الأسبوع .

أنا مثلا لانشغالي دايما بحاول أكتب مقالة واحدة أسبوعيا , شايف ان ده اللي مناسبني ,

أهم حاجه يكون ليك ميعاد منتظم للكتابة .

دي كانت كل حاجه محتاجها علشان تعرف ازاي تعمل مدونة سفر و تبدأ مدونتك , ان شاء الله هيكون فيه مقالة تانية عن ازاي تنشر مدونتك و تشهرها و حتي ازاي تكسب و تعمل دخل من مدونتك . بس لأن الموضوع طويل هنتكلم عنه بالتفصيل في مقالة أخري .

لو عندك أي استفسار متترددش انك تبعتلي و هكون مبسوط جدا أني أساعدك علشان تبدأ أولي خطواتك في مجال تدوين السفر 🙂