ازاي تستخدم الكريدت كارد اثناء السفر …9 نصائح مهمة

تستخدم الكريدت كارد اثناء السفر وللا تستخدم الكاش ؟ , سؤال دايما بيكون في دماغ اي حد بيفكر يسافر . أكيد الدفع بالكريدت كارد له مميزات كتير جدا , لكن في نفس الوقت لازم تكون عارف شوية نصائح تخلي ان بالك منها . اتكلمنا قبل كده عن 5 نصائح تخليك تسافر بأقل التكاليف , انا بعتبر المقالة دي امتداد ليها لان النصائح دي من غيرها ممكن تخسر فلوس كتير اثناء سفرك .

هنبدأ نتكلم علي أهم النصائح و المحاذير اللي لازم تاخد بالك منها و اللي منها المفروض تعمله قبل ما تسافر و اللي منها تخلي بالك منه أثناء سفرك .

[lwptoc colorScheme=”inherit” borderColor=”#dd8604″]

1-ليه تستخدم الكريدت كارد اثناء السفر؟

استخدام الكريدت كارد و انت مسافر خصوصا لاوروبا او أمريكا هيسهل عليك كتير لانك مش هتكون محتاج تشيل فلوس كاش كتير .  ده غير ان اوقات استخدام الكريدت كارد بيكون شرط و ضروري زي مثلا لو حبيت تأجر عربية .

خلي بالك في نوعين من الكروت , فالكريدت كارد credit card مختلف عن الديبيت كارد debit card اللي بيكون مربوط بحسابك في البنك . فلازم تخلي بالك من النقطة دي و الفرق ما بينهم .

2-اتأكد من دفع فواتير الكريدت كارد بتاعك و حدك المتاح قبل السفر:

قبل ما تسافر خلي بالك كويس من اي فواتير مدفعتهاش للكريدت كارد بتاعك , لان اخر حاجه هتبقي عايزها و انت مسافر ان لاقدر الله تلاقي كارتك واقف او مثلا مفيش فيه فلوس متاحة .

3-كلم البنك بتاعك و قوله هتسافر فين قبل السفر:

النقطة دي مهمة جدا , قبل ما تسافر لازم تكلم البنك و تعرفه مدة سفرك و البلاد اللي هتسافرلها . ده ببساطة لأن بعض البنوك بتمنع استخدام الكارد خارج بلدك كحماية أمنية ليه , علشان كده لما تبلغ البنك ساعتها بيخليه متاح في الفترة اللي هتسافر في الدولة المعينة دي .

4-دايما متمشيش بأكتر من كريدت كارت في الشارع و انت مسافر:

لنفترض انك معاك اكتر من كريدت كارد , و انت مسافر أوعي تخرج و انت معاك اكتر من كارد , دايما حوال تحط كارد في الخزنة اللي هتبقي موجودة في غرفة الفندق أو الهوستل . و ده علشان لو لاقدر الله اتسرق الكارد اللي معاك , يبقي معاك كارد تاني .

5-اكتب بيانات البنك بتاعك و بيانات الفيزا في ورقة و خليها معاك في شنطتك و كمان احفظها علي أيميلك :

النقطة دي مهمة جدا , لنفترض ان كارتك اتسرق و انت مسافر , ساعتها تقدر تتصل ببنكك في اسرع وقت و تخليه يوقف الكارد , لان ده هيمنع حد من انه يستخدم الكارد في مشتريات او يسحب اي فلوس.

6-خلي دايما معاك شوية كاش:

دايما خد معاك مبلغ كاش , علشان مثلا تقدر تستخدمه في المحلات الصغيرة اللي مش متاح فيها فيزا , و احيانا بيكون فيه محلات صغيرة انت نفسك تخاف تستخدم الكريدت كارد اثناء السفر بتاعك , فساعتها تقدر تستخدم الكاش .

7-حاول دايما تشيل الكريدت كارد معاك في مكان أمن:

و انت خارج بره خلي الكريدت كارد دايما في جيب مخفي في الجاكت بتاعك , و حتي ممكن تشتري حزام اموال ده بيبقي حزام مخفي تحت هدومك تقدر تحط فيه فلوسك و كروتك بحيث يبقوا بعيد عن الحرامية . تجنب دايما الشنط اللي في الأيد او اي حاجه تلفت نظر اللصوص.

8- خلي دايما كارتك تحت نظرك :

متخليش مثلا الجرسون في المطعم ياخد كارتك بعيد عنك . خلي دايما كارتك تحت عنيك و انت بتستخدمه في الخارج .

9-دايما لازم تستخدم الكريدت كارد اثناء السفر في المشتريات مش الديبيت كارد :

تجنب استخدام الديبيت كارد في المشتريات في الخارج , استخدم دايما الكريدت كارد ﻷنه اامن , فمش امن انك تستخدم الديبيت كارد المربوط بحسابك في الشراء في الخارج .