حلم اي حد بيخطط لسفرية جديده هو انه يعرف يلاقي ارخص تذكرة طيران للوجهة اللي هيسافرلها . ده لان ببساطة ثمن تذكرة الطيران يعتبر اكبر جزء في ميزانية السفر … لكن من حسن الحظ فيه نصائح و استراتيجيات هتخليك تلاقي ارخص تذكرة طيران بكل سهولة …
زمان كنت لما بتبقي عايز تسافر كنت بتروح لمكتب شركة الطيران او شركة السياحة تقولهم عايز تذكرة لكذا يوم كذا و يتدفع و بتاخد التذكرة , دلوقتي في عالم الانترنت و مئات مواقع الحجز علي الانترنت بقي سهل اوي انك تلاقي ارخص تذكرة طيران , الفكرة كلها انك تكون عارف بتعمل ايه ….
في الدليل ده هقولك شوية نصائح هتفرق معاك جدا و انت بتخطط لسفريتك الجاية …
1- ابدأ دور علي التذكرة من بدري :
معظم شركات الطيران يتبدأ تعرض التذاكر للبيع من 11 شهر قدام , حاول دايما تعمل سيرش علي الأقل مره في الأسبوع عن التذكرة اللي في دماغك .
اسعار تذاكر الطيران بتتغير باستمرار علي حسب العرض و الطلب , علشان كده اول ما ييجي قدامك السعر اللي انت مرتاحله اشتري علي طول و متستناش .
ملحوظه مهمة :
دايما و انت بتعمل سيرش في مواقع الحجوزات امسح الكوكيز من متصفحك , او ادخل من وضع المتصفح المتخفي (Incognito Mode) , ده لأن مواقع شركات الطيران او مواقع الحجوزات بتحفظ بيانات بحثك عن الرحلات و لما تلاحظ انك بتعمل بحث عن رحلة معينه كذا مره بتعلي سعر التذكره , علشان كده لو عايز تلاقي ارخص تذكرة طيران يبقي متنساش النقطة دي و انت بتبحث .
2- ايه احسن وقت الاقي فيه ارخص تذكرة طيران؟
بص , فيه نظريات كتيييير اتعملت علي الموضوع ده , يعني مثلا في نظريات بتقول احسن وقت تحجز فيه التذكرة حوالي 11-12 اسبوع قبل ميعاد السفر , نظرية تانية بتقول ايام الثلاثاء و الأربعاء دايما ارخص أيام …
الفكرة كلها في انك لازم دايما تكون بتدور اونلاين و تقارن الاسعار في الأيام المختلفة , بس فيه حاجات لازم تخلي بالك منها … زي مثلا انك تبعد 7 ايام قبل او بعد الأعياد او المناسبات الرسمية زي الكريسماس مثلا , و دايما حاول تحجز في الشهور اللي مفيهاش اقبال سياحي كتير علي الوجهة اللي هتزورها زي مثلا لو مسافر اوروبا خليك في شهور مارس و ابريل او اكتوبر و نوفمبر زي ما شرحت في مقالة 5 نصائح تخليك تسافر بأقل التكاليف.
3- خليك دايما مرن و انت بتحجز :
اهم حاجه لو فعلا عايز انك تلاقي ارخص تذكرة طيران هو انك تكون مرن في ميعاد السفر , يمعني انك ممكن مثلا تلاقي تذكرة بنص الثمن بعد يومين او تلاته او حتي اسبوع من اليوم اللي انت ناوي تسافر فيه. انما لو مصمم علي يوم معين صعب اوي تلاقي نذكرة بتمن رخيص .
تاني نقطة هو انك تكون مرن في ميعاد السفر في اليوم , يمعني ان مثلا ممكن تلاقي شركة الطيران بتطلع 4 رحلات في اليوم للوجهة اللي عايز تسافرلها , هتلاحظ ان مواعيد الرحلات اللي بتكون بدري اوي او متاخر اوي في اليوم بتكون ارخص بشكل ملحوظ من الرحلات اللي بتكون في نص اليوم , و دي نقطة لازم تكون واخد بالك منها و انت بتحجز .
4- شوف المطارات القريبة من المدينة اللي هتروحلها :
في 2016 و انا راجع من أيسلندا كانت محطتي بعد كده اوسلو في النرويج, كنت هوصل اوسلو عن طريق مطار اوسلو الرئيسي في منطقة جاردرموين (تبعد عن اوسلو ب 50 كيلومتر) , و انا بخطط للرحلة لقيت اني لو حجزت تذكرة خروجي من اوسلو للوجهة اللي بعد كده من مطار فرعي (مطار تورب ساندفيورد علي بعد 110 كيلومتر من أوسلو) هوفر اكتر من 70 يورو لأن المطار ده في شركات كتير رخيصة بتطير عن طريقه …
مطار تورب في الجنوب بعيد حوالي ساعة و اربعين دقيقة بالقطار , معظم شركات الطيران الرخيصة لاوسلو بتطير منه
علشان كده اتعود دايما لو مسافر اكتر من مدينة سواء في اوروبا او جنوب شرق اسيا , دايما دور في المطارات البديلة بالطريقة دي هتلاقي ارخص تذكرة طيران بسهولة .
ملحوظة مهمة جدا :
لو لقيت تذكرة رخيصة عن طريق مطار تاني بديل , دور الأول عن ازاي توصل للمطار ده من المدينة اللي انت فيها , لان ممكن مثلا تلاقي ان سعر الأتوبيس او التاكسي للمطار ده من المدينة اللي انت فيها اكبر من فرق السعر بين التذكرة دي و التذكرة التانية اللي كنت ممكن تحجزها من المطار التاني.
5- اختار وجهتك بناء علي العروض :
دي من النصائح المهمة جدا في السفر , لو مثلا عايز تسافر و لسه مقررتش هتروح فين , افتح موقع او برنامج skyscanner اللي عن طريقه ممكن تحط مدينتك و الشهر اللي نفسك تسافر فيه و هو بيرتبلك الدول من الأرخص للأغلي , و ده هيخليك تسافر لبلاد جديدة بأرخص تذكرة ….
شركات طيران رخيصة كتير زي RyanAir او WizzAir بيعملوا من وقت للتاني عروض مجنونة جوه اوروبا , مره سافرت علي رايان اير من ليتوانيا لأسبانيا (رحلة 3 ساعات) ب 14 يورو !! , و مره من الرحلة اللي ذكرتها فوق من اوسلو لميلانو في ايطاليا ب 9 يورو !! , علشان كده متخليش عروض زي دي تفوتك …
6- حاول تحجز ترانزيت طويل و توفر في تمن التذكرة :
و انت بتدور في التذاكر غالبا هتلاقي ان فيه تذاكر ترانزيت ارخص بكتير من التذاكر لو الرحلة دايركت … مش بس كده , انت ممكن تستغل التذكرة الترانزيت دي انك تعمل stopover و تزور بلد تانية بنفس سعر التذكرة او اكتر حاجه بسيطة…
في 2017 كنت مسافر لاتفيا من القاهرة , حجزت التذكرة علي الطيران التركي , كان الترانزيت في اسطنبول 8 ساعات , سألت الموظف اني عايز اعمل stopover في تركيا 4 ايام و فعلا قد كان و بنفس سعر التذكرة قدرت ازور اسطنبول 4 أيام و انا راجع من لاتفيا لمصر ….
7- اشترك في برنامج المسافر الدائم :
اي شركة طيران ليها ما يسمي في برنامج المسافر الدائم Frequent flyer program اللي بيه بتاخد نقاط علي الأميال اللي بتسافرها . و كل ما تجمع نقط كل ما تقدر تستخدمها في تخفيضات علي اسعار التذاكر او انك تقدر تدخل صالات شركات الطيران الخاصة في المطارات او انك تعمل ترقية لدرجة سفرك من سياحية لبيزنس …
كارت المسافر الدائم لشركة مصر للطيران
حتي لو كنت مبتسافرش كتير , اشترك في البرامج دي و استغل انه مجانية , خصوصا لو عملت حتي رحلة واحده بعيده مثلا لأمريكا او الصين ساعتها هتلاقيك جمعت أميال كتير من رحلة واحده …
8- اعمل كريدت كارد مرتبط بشركات الطيران :
فيه بنوك كتير بتعمل كروت ائتمانيه مرتبطه بشركات الطيران , البنك الأهلي المصري من فترة كان عامل كارت ائتماني مرتبط بمصر للطيران , و كذلك ال CIB , دور و شوف البنوك اللي عندها الكروت دي , و لو حبيت تعمل كارت ائتماني اعمله عن طريقهم …
فكرة الكارت ده ان الفلوس اللي هتدفعها عن طريقه في حياتك العادية هتاخد عليها نقط في برنامج المسافر الدائم بتاع شركة الطيران المتعاقدين معاها , فلما تيجي تسافر هتلاقي نقط كتير تقدر ساعتها تستخدمها في تخفيضات او ترقيات لدرجة تذكرتك …
9- خلي بالك من رسوم شركات الطيران :
شركات كتير رخيصه بتعمل اسعار مجنونة جوه اوروبا او اسيا , بس بتحط شروط زي مثلا انك لازم تسافر بشنطة واحده بابعاد معينه ووزن معين , يعني مثلا شركة زي RyanAir ممكن تلاقي عليها تذكرة مثلا ب 10 يورو , بس لو معاك اكتر من شنطة او وزن الشنطة او ابعادها عدوا الحد المسموح ساعتها بتدفع رسوم 50 يورو … علشان كده خلي بالك و انت بتحجز و اقرا كل شروط التذكره ..
10- أيه احسن موقع ادور عليه علي ارخص تذكرة طيران؟
بص مواقع حجز التذاكر كتير و المفروض علشان تحجز ارخص تذكرة طيران هو انك تدور في كذا موقع , عندك مثلا (kayak , Hipmunk , Google Flights , Momondo) , بس المفضل دايما بالنسبالي هو Skyscanner , سكاي سكانر فيه مميزات حلوة جدا , هو انه لو انت مرن في مواعيدك ممكن تختار شهر معين و هو بيقولك الايام اللي فيها ارخص تذكرة طيران و ساعتها ممكن تحجزها , هتلاقي نفسك وفرت جامد…
تجربة عملية للبحث عن ارخص تذكرة لاسطنبول شهر فبراير 2019 , ارخص يومين هو ذهاب يوم 11/2 و الرجوع 18/2 و تمن التذكرة 2800 جنيه بس !!
من التطبيقات اللي عجبتني جدا هو تطبيق Hopper لحجز الطيران او الفنادق , التطبيق عجبني فيه انك مثلا لو جيت تعمل بحث عن تذكرة طيران في تاريخ معين , التطبيق بيقولك ان كان من الأفضل تشتريها دلوقتي بالسعر ده وللا تنتظر لأن السعر متوقع انه ينزل.
كمان التطبيق بيقولك امتي متوقع السعر اللي انت شايفه ده يطلع او ينزل , التطبيق ده مفيد جدا عند التخطيط للسفر .
تطبيق Hopper متاح علي : iOS , Andriod
دي كانت بعض النصائح بخصوص حجز الطيران. مش صعب انك تلاقي تذكره رخيصه الفكرة كلها في انك تكون عارف بتعمل ايه ..
يا ريت لو عندك اي نصائح بخصوص الموضوع ده يا ريت تشاركني بيها في الكومنتات هنا او في صفحات السوشيال ميديا و هضيفها للدليل ده علشان تكون مرجع لأي حد نفسه يسافر بأقل سعر لتذكرة الطيران.
