استخراج رخصة القيادة الدولية بعتبرها من أهم الخطوات اللي لازم تعملها قبل ما تسافر لو كنت بتعرف تسوق . و ده لأن قيادة السيارة من الحاجات الممتعة جدا و انت مسافر .
و أوقات كتير في بلاد معينة بتكون تكلفة تأجير السيارة أرخص بكتير من المواصلات زي ما قولنا قبل كده لما اتكلمنا عن ايسلندا , علشان كده هنتكلم بالتفصيل انهارده عن ازاي تطلع الرخصة الدولية .
من أكتر الحاجات الغلط اللي بسمعها ساعات , و هي “ان استخراج رخصة القيادة الدولية ملوش لازمة لأنك ممكن تأجر سيارة برخصتك الأصلية لو كان اسمك فيها مكتوب بحروف انجليزية” , و طبعا الكلام ده غلط جدا …
اه فيه مكاتب تأجير سيارات كتير في دول أجنبية ممكن تأجرلك سيارة عادي برخصة قيادتك المحلية عادي , لكن لازم تعرف ان ده غير قانوني و لو ضابط وقفك ساعتها هيكون فيه مشكلة … فبلاش تحط نفسك في الموقف ده و اعمل رخصة دولية من بلدك , الموضوع في قمة السهولة .
[lwptoc colorScheme=”inherit” borderColor=”#dd8604″]
ايه هي رخصة القيادة الدولية ؟
هي وثيقة تم تشريعها من قبل هيئة الأمم المتحدة , وفق اتفاقية تمت سنة ١٩٤٩ في جنيف , و اللي تسمح لحاملها بقيادة السيارة خارج بلده , و بيتم اصدارها بناء علي الرخصة المحلية .
في كل بلد في جهة رسمية مسئولة عن استخراج رخصة القيادة الدولية , بس عايز انبهك لنقطة مهمة : فيه مواقع الكترونية كتير بتتيح ليك استخراج رخصة القيادة الدولية لمدة ٥ و ١٠ سنين , كل ده نصب في نصب , لأن الرخص دي غير معتمدة .
طريقة استخراج رخصة القيادة الدولية من مصر :
في مصر الجهة الوحيدة المسئولة عن استخراجها هي نادي السيارات و الرحلات المصري , و طبقا للقانون لا يجوز لأي جهة غيره اصدر رخصة القيادة الدولية داخل مصر .
مقر نادي السيارات هو : ١٠ ش قصر النيل بوسط البلد – القاهرة .
النادي بيكون شغال من الساعة ٩:٣٠ صباحا و حتي ٢ ظهرا .. مع العلم ان اخر موقع لأخذ الطلبات هو الساعة ١:٣٠ مساء
المستندات المطلوبة :
١- أصل رخصة القيادة المصرية … بشرط ان تكون سارية علي الأقل سنة من تاريخ التقديم .
٢-صورة ضوئية من رخصة القيادة المصرية.
٣- صورة ضوئية من جواز السفر.
٤- ٢ صورة شخصية ٤x٦ .
٥-موافقة ادارة المرور علي صحة البيانات الخاصة برخصة القيادة , و تصدر من ادارة البحث الجنائي الموجودة داخل النادي .
٦-سحب طلب استخراج رخصة القيادة الدولية بعد دفع الرسوم المقررة (٥٦٠ جنية مصري في تاريخ كتابة المقالة).
تقوم بملئ الأستمارة و تتأكد ان اسمك مكتوب بالأنجليزي مطابق للباسبور , الأجراءات كلها مبتاخدش كتر من ربع ساعة , الناس كلها هناك متعاونة و محترمين جدا .
في شروط معينة لازم تاخد بالك منها :
-الرخصة الدولية سارية لعام واحد فقط .
-لا يجوز القيادة بالرخصة الدولية للمصريين داخل الأراضي المصرية .
-لا يجوز استخدام الرخصة الدولية إلا في الخارج و انت معاك تأشيرة سياحة , و لا يجوز استخدامها في دولية معاك ليها تأشيرة إقامة لأن في الحالة دي لازم تستخرج رخصة قيادة محلية داخل الدولة دي.
-يشترط ان السيارة اللي هتقودها تكون سيارة مؤجرة و مش بإسمك .
ازاي تعرف الجهة الرسمية لاستخراج الرخصة الدولية في بلدك ؟
طب لو انت تونسي او مغربي او سعودي او من اي بلد أخري , و حابب تعرف تطلع الرخصة منين , من الموقع ده تقدر تكتب اسم بلدك في البحث و هيطلعلك علي طول اسم و عنوان المقر لنادي السيارات في بلدك اللي تقدر تطلع منه الرخصة الدولية .
