كشف حساب بنكي للسفارة … البعبع اللي بيخاف منه كل اللي نفسه يقدم علي فيزا شنجن أو بريطانيا أو أمريكا . يمكن أكتر سؤال بتسأله دايما بيكون عن كشف الحساب .
يا تري هل لازم كشف الحساب؟ , يا تري احط كام في كشف حساب بنكي علشان اقدمه للسفارة؟ , أنا بسمع من علي النت ان لازم احط 200 ألف جنيه علشان يوافقوا عليا ؟؟ مين ممكن يضربلي كشف حساب علشان السفارة؟؟ و غيرها من الخرافات اللي بنسمعها ..
بعد ما تكون طلعت الباسبور , في المقالة دي يقي هحاول أقولك كل حاجه انا عارفها عن كشف الحساب البنكي اللي هتقدمه للسفارة , من واقع تجاربي مع السفارات المختلفة و تجارب اصحابي , او حتي من المعلومات اللي قريتها أونلاين و انا بخطط لسفرياتي.
مبدأيا لو لسه بتخطط لازاي تقدم علي فيزا الشنجن , فابدأ بقراءة المقالة دي : ازاي تضمن فيزا الشنجن بكل سهولة , الكلام اللي في المقالة دي ينطبق علي الشنجن و فيزا أمريكا و فيزا بريطانيا من حيث الأساسيات ..
انهارده هنتكلم بالتفصيل عن كشف الحساب البنكي اللي من غيره مينفعش تقدم علي فيزا
ليه كشف حساب بنكي من غيره مينفعش اقدم علي فيزا؟
ببساطة لأن كشف حساب البنك بتاعك هو الحاجه الوحيدة اللي القنصل في السفارة هيعرف حالتك المادية ايه .
خلينا متفقين علي حاجه و هي ان الشباب العربي بالنسبة للسفارات هو ناوي يهرب او يكسر الفيزا إلي ان يثبت العكس , و ده بسبب ان فعلا بتحصل بعد السلوكيات الغلط من شباب كتير بيكسر فيزا , و ده بيضر بقية الناس اللي بتقدم لأنهم زي ما قلت قدام السفارات مدانين إلي ان يثبت العكس.
علشان كده وجود كشف حساب بمواصفات معينة هنتكلم فيها دلوقتي ضروري علشان تضمن ان السفارة تطمن لك لما تيجي تقدم.
ايه مواصفات كشف الحساب البنكي اللي السفارات بتحبه ؟
1- انه ميكونش جديد : بمعني متكونش ناوي تقدم علي فيزا بكرة و لسه فاتح الحساب من شهر !! , معظم السفارات بتطلب انك تجيب كشف حساب بنكي لاخر 6 شهور , لذلك كشف الحساب لازم يكون علي الأقل مفتوح من أكتر من 6 شهور فاتو.
بمعني لو بتحلم تسافر و لسه معندكش حساب في البنك , مستني ايه؟؟ من بكرة انزل افتح حساب من اي بنك و حط حتي الحد الأدني مبدأيا لفتح الحساب اللي في مصر بيبقي في حدود 500 أو 1000 جنيه .
2- دخلك الشهري يكون بينزل فيه : و دي اهم نقطة اللي هتسهلك كتير أوي , لنفترض انك موظف حكومي او في القطاع الخاص , و بتقبض مرتبك سواء كاش من شغلك او بينزلك علي كارت فيزا المرتبات …
بكل سهولة هتروح للموظف الخاص بالحسابات او المرتبات في شغلك و تديله رقم حسابك البنكي و تطلب ان مرتبك يتحول علي حسابك في البنك .
الموضوع بيتم بكل سهولة , و بكده هتلاقي كل شهر بينزل في كشف حسابك البنكي مرتبك …
طب افرض انك freelancer و بتقبض اونلاين , او حتي موظف و مش هتعرف تحول فلوسك علي حسابك في البنك؟؟ بكل بساطة في الكام شهر قبل ما تقدم علي الفيزا هتعمل ايداع في حسابك بالمبلغ ده , كل شهر … بحيث يبقي كانه مرتب بينزل بالضبط .
ليه بقي كل الدوشة دي؟؟ لان ببساطة وجود دخل ثابت ليك في كشف الحساب ده دليل ان ليك روابط في بلدك و بتكون نقطة قوة ليك و لورقك و لكشف حسابك و انت بتقدم علي الفيزا.
3- يكون فيه حركات كتير: بص خدها قاعدة … عند السفارات الأجنبية لو كشف حسابك فيه 5000 جنيه بس بتعمل حركات سحب و ايداع و شراء بالكارت بتاعك ده أحسن ميت مرة من لو كان كشف حسابك فيه مليون جنيه بس مش عليه حركات و راكد !!
القنصل عايز يطمن انك واحد عايش طبيعي في بلدك عندك دخل و بتشتري و يتصرف فبالتالي لما تسافر بلده سياحه هتصرف عادي خالص …
انا هحكيلك موقف عمري ما هنساه …عمري ما هنسي القنصل في سفارة لاتفيا في الأنترفيو اول مرة ادخل فيها انترفيو لفيزا الشنجن … اول ما مسك كشف الحساب البنكي بتاعي مبصش حتي علي الرصيد النهائي خالص !! فضل يقلب في الحركات اللي كنت عاملها من مشتريات و سحب و ايداع و يشوف بصرف في ايه و بتعامل ازاي ….
علشان كده نصيحتي ليك , في الكام شهر قبل ما تقدم علي الفيزا اهتم اووووي بكشف حسابك عن طريق انك تستخدم كارت الديبيت المربوط بحسابك في اي شرا بتعمله … من السوبر ماركت … شحن الموبايل … شرا اللبس او اي شرا بتعمله , كل دي حاجات بتخلي كشف حسابك شكله حلو قدام قنصل السفارة .
4- ايه مصدر فلوسك : سفارات امريكا و بريطانيا و الشنجن بيكون دايما عندهم فضول رهيب يعرف مصدر فلوسك لو لقي رصيدك مش ماشي مع دخلك .
بمعني لنفترض ان مرتبك 2000 جنيه و حسابك في البنك فيه 500 الف جنيه … ساعتها بكل بساطة هيقولك ايه مصدر الفلوس دي ؟
ناس كتير مثلا بيكون عندها كشف حساب تاني بالدولار بيكون محوش فيه بالدولار و بيقدمه مع كشف حسابه الرئيسي و فاكر كده هيبقي حاجه حلوة , و يتصدم لما القنصل يقوله ايه مصدر الفلوس دي !!
علشان كده دايما خلي معاك ما يثبت مصدر اي فلوس لو كان المبلغ مش ماشي مع دخلك … عقد بيع أرض او شقة مثلا , ما يثبت انك ورثت المبلغ , ايصال تحويل المبلغ من حساب حد من قرايبك , مهما كان ايه المهم يبقي ما يثبت ده جاهز معاك لو اتسألت السؤال ده … انا شخصيا اعرف ناس اترفضوا لانهم مأقنعوش القنصل بمصدر الفلوس اللي معاهم في البنك .
5- ميكونش فيه ايداعات كبيرة قبل التقديم علي الفيزا:و دي اكتر غلطة 80% من اللي بيقدموا علي الفيزا بيقعوا فيها , و هي انه قرر كمان اسبوعين يقدم علي فيزا يروح كل يومين يعمل ايداع بمبالغ كبيرة علشان قال ايه يبقي ضحك علي السفارة 😀
حاول دايما تخطط من بدري و تخلي الأيداعات بمبالغ قليله علشان متبقاش ملفتة للسفارة ان فيه حاجه فيها غريبة .
6- ميكونش في الحساب ما يكفي السفر: و ده اكتر نقطة كل الناس بتفتي فيها للأسف … بص معظم المواقع الرسمية لفيزا الشنجن و مواقع السفارات دول شنجن بتقولك مبلغ يومي معين يكون موجود في حسابك لكل يوم هتقعده في البلد دي …
علشان نبسط الموضوع , خلينا نقول هتحط 100 يورو عن كل يوم ناوي تقعده , بحد أدني 500 يورو … يعني لو ناوي تقعد مثلا 10 ايام في سفريتك , يبقي في حسابك البنكي (بعد ما تكون حجزت الطيران طبعا) علي الأقل 1000 يورو…
ليه بقول علي الأقل ؟ علشان حط نفسك مكان القنصل … واحد متقدم و بيقول انه رايح سياحة و يتفسح و حسابه مفيهوش غير الف يورو بيقول انه هيروح يصرفهم و يرجع حسابه صفر ..! , هل ده منطقي ؟؟
فخلي دايما في حسابك مبلغ و لو بسيط اكبر شوية من المبلغ اللي هيكفي سفريتك , حتي لو هتستلفه من حد و ترجعهوله بعد ما تطبع كشف الحساب … دايما اهتم بشكل كشف حسابك.
7- يكون كشف حساب بنكي حقيقي مش مزور:اوعي ثم اوعي ثم اوعي تفكر انك تزور كشف الحساب … فيه ناس للاسف بتعرض انها تزور كشف الحساب !! فيه ناس كتير اتقبض عليها بسبب تزوير كشف الحساب لانها جريمة تزوير في اوراق رسمية … و اوقات كتير السفارات بتتواصل مع البنك بتاعك تتأكد من صحة كشف الحساب اللي انت مقدمه …
و في حالة تم اكتشاف التزوير بيبلغوا السلطات الأمنية , ده غير انك بتاخد بلوك من الشنجن أو البلد اللي انت مقدملها لسنوات طويلة.
8- لو تحت 18 سنة و معندكش كشف حساب بنكي : تقدر تقدم حساب والدك أو والدتك أو أي قريب من الدرجة الأولي , و تخليه يكتب خطاب للسفارة يتعهد فيه انه متكفل بمصاريف رحلتك دي .
