واحة سيوة .. أو كما يطلق عليها واحة السحر و الجمال .. حاجه كده مختلفة خالص عن باقي مدن و مناطق مصر.
قبل كده لما اتكلمنا عن 10 أسباب تخليك لازم تزور مصر , قولنا ان مصر بلد غنية ثقافيا و تاريخيا , و انت كسائح سواء كنت مصري أو غير مصري , هتلاقي أشكال و الوان كثيرة للسياحات في مصر سواء التاريخية أو الشاطئية أو العلاجية أو حتي تشوف الحياة الأجتماعية للمجتمع المصري ..
بس انهاردة في المقالة دي هنروح لحاجه مختلفة خالص , لواحة هترجعك في الزمن لمئات بل الاف السنين , تشوف فيها أمازيغ مصر بعاداتهم و تقاليدهم ..
ده غير الطبيعة البكر و الهدوء و السكينة , أنهارده هقولك كل حاجه محتاج تعرفها عن واحة سيوة .. الجنة الأمازيغية في صحراء مصر الغربية .
[lwptoc colorScheme=”inherit” borderColor=”#dd8604″]
التاريح و أصل تسمية واحة سيوة :
الواحة ليها تاريخ طويل من أيام الفراعنة من ألاف السنين … كانت تسمي “سخت اّم” بما معناه أرض النخيل ..
أما في عهد البطالمة فسمت ب “واحة اّمون رع” , و لغاية العصر الروماني كان تعتبر مقصد للحجاج لزيارة معبد اللإله اّمون .. المعبد اللي زاره الأسكندر الأكبر و استشار فيه كهنة اّمون في حروبه و معاركه…
علي مدار الألفين عام اللي بعد كده تعرضت الواحة لهجمات البدو من وقت لأخر , لغاية ما جه العصر العثماني الذي ضمت فيه واحة سيوة لحكم والي ليبيا ..
و في سنة 1820 أرسل محمد علي جيش لضم واحة سيوة مرة أخري للمملكة المصرية ..
حاليا واحة سيوة يسكنها حوالي 35 ألف نسمة معظمهم من الأصول الأمازيغية ..
أهل سيوة لغتهم الأساسية هي اللغة السيوية أو التاسيويت .. و هي لهجة منشقة من اللغات الأمازيغية , و طبعا بيتكلموا اللغة العربية و اللهجة المصرية .
ابن خلدون اشار للواحة بأسم “تنسيوه” و هو اسم فرع من فروع قبائل الزنتانة في شمال أفريقيا .. و يرجح أنه اشتق منه أسمها اليوم “سيوة”
فين واحة سيوة و ازاي تروحها:
الواحة بتبعد عن القاهرة حوالي 800 كيلومتر و هي تبع محافظة مطروح و بتبعد عن مدينة مرسي مطروح حوالي 300 كيلومتر .
لو عايز تروح من القاهرة , بتركب أتوبيس غرب الدلتا من ميدان عبد المنعم رياض … و فيه مواصلات بين الواحة أيضا و بين مدن الأسكندرية و مرسي مطروح …
ده غير أن فيه شركات سياحة كتير بتنظم رحلات للواحة , بس أنت مش محتاج كل ده , تقدر بسهولة جدا تحجز و تروح بكل سهولة.
الأقامة في سيوة:
الأقامة في سيوة تعتبر رخيصة , ممكن تبدأ من أول 200 جنية (10 دولار) في الليلة أو أقل .. هتلاقي اختيارات كتير بين النزل و الفنادق و الكامبات و حاجات كتبر ..
تقدر تشوف و تحجز أحسن اقامة مناسبة ليك عن طريق بوكنج في الخريطة دي :
[booking_product_helper shortname=”siwa”]
و لو عايز استقلالية أو معاك اصحابك أو عيلتك , أرشحلك جدا Airbnb , اللي ممكن تأجر من عليه غرفة أو بيت سيوي كامل ليك لوحدك بأسعار أقل من سعر الفنادق .
لو لسه معملتش حساب , تقدر تسجل عن طريقي في موقع Airbnb , و هتاخد 34 دولار هدية تقدر تستخدمهم في أول حجز ليك في الموقع مجانا .
أشهر المزارات في واحة سيوة :
مدينة و قلعة شالي :
شالي هي المدينة القديمة في واحة سيوة , تقدر تشوف القلعة الشهيرة اللي اتبنت من الطوب اللبن في القرن 12-13 , و كان الهدف من بنائها هو حماية المدينة من هجوم القبائل العربية و البدو …
جبل الموتي:
الجبل بيقع علي بعد حوالي 2 كيلومتر من سيوة , هتلاقي فيه مقابر كتير فرعونية و يونانية/رومانية .
معبد الإله اّمون رع:
وده المعبد الشهير اللي زاره الأسكندر الأكبر سنة 331 قبل الميلاد , المعبد له أهمية تاريخية و لسه لغاية دلوقتي قائم تقدر تشوفه و هو علي بعد حوالي 4 كيلو شرق الواحة
عيون المياة الكبريتية و السياحة العلاجية:
مصر مشهورة جدا بالسياحة العلاجية في مجالات كتير في الطب , سيوة من أهم محطات السياحة العلاجية في مصر …
سيوة فيها أكتر من 200 عين من العيون الباردة و الساخنة و الكبريتية … المباة اللي بتطلع من العيون الحوفية دي بتستخدم في الزراعة و الشرب و العلاج
بعض العيون الكبريتية و الرمال الساخنة في الواحة بتستخدم في علاج أمراض زي الصدفية و الروماتيزم و امراض تانية كتير , لذلك الواحة مشهورة جدا بالسياحة العلاجية
من أشهر العيون عين كليوباترا , عين كيغار , عين واحد و غيرهم.
البحيرات المالحة و المحمية الطبيعية:
البحيرات المالحة برضه من الحاجات الجاذية جدا للسياحة في سيوة ,اشهرهم بحيرة فطناس و جزيرة فطناس اللي بتحدها المياه من كل النواحي.
و كمان بتشتهر بمحميتها الطبيعية بمساحة 7800 كم و بها كتير من الحيوانات و الطيور المهدد بالأنقراض و كتير من النباتات النادرة.
رحلات السفاري :
رحلات السفاري تكون ممتعة جدا , بتطلع بعربيات 4×4 و بتخيم في الصحرا و تستمتع بليالي السمر السيوية , تجربة متتعوضش.
الحرف اليدوية :
سيوة مشهورة جدا بالحرف اليدوية البدوية , من أهمها المنتجات الفخارية و الحلي و الأزياء البدوية الجميلة , لما تروح سيوة هتنبهر بأد ايه جميلة المنتجات اليدوية دي.
دي كانت أهم حاجات عن واحة سيوة , لو رحت سيوة قبل كده و حابب تشاركنا تجربتك , ياريت تشاركنا بيها في الكومنتات
