وجهات Destinations

10 بلاد مش معروفة سياحيا و تستاهل انك تزورها

on
مارس 16, 2019

أي حد بيفكر يسافر , دايما اللي بييجي في باله تركيا , فرنسا , ايطاليا, امريكا … إلخ . للاسف العالم فيه أكترمن بلد مش معروفة و مش واخده حقها علي الخريطة السياحية , في المقالة دي هقولك علي 10 بلاد مش معروفه لناس كتير و فعلا يستحقوا من وجهة نظري انك تزورهم , فيه منهم زرتهم و منهم اللي ناوي ازورهم …

 

1-أوزبكستان :

أوزباكستان

بصراحة انا كل الدول اللي اسمها منتهي ب “ستان” بالنسبالي رائعة و تستحق الزيارة , مثلا قرغيزستان , طاجيكستان , كازاخستان , باكستان… إلخ .و اللي معظمهم بلاد مش معروفة علي الخريطة السياحية بس فعلا يستاهلوا تشوفهم.

لكن حبيت انهارده ابدأ بأوزبكستان . الدولة العريقة اللي تاريخيا كانت من النقاط المهم علي طريق الحرير , مدنها التاريخية الساحرة زي طشقند , بخاري , سمرقند و خيوه (او اسمها التاريخي القديم خوارزم ) …

أوزباكستان

مش بس هتحس انك هتدخل التاريخ و انت بتزور البلد دي , بس كمان هتستمتع بالمطبخ الأوزبكي الفريد , و هتشوف طبيعة رائعة كعادة معظم دول هذه المنطقة من العالم ..

أوزبكستان مؤخرا طبقت نظام الفيزا أونلاين لأغلب الجنسيات العربية , يعني ملكش حجه هتقدم علي الفيزا اونلاين و في يومين تطلع و تسافر بكل سهولة …

 

 

2-تشيلي :

تشيلي

لما تيجي في بالك أمريكا الجنوبية علي طول بيروح فكرك للبرازيل او البيرو … لكن في بلاد مش معروفة سياحيا كتير في القارة دي تخليك لازم تفكر فيها ..

أنهارده أخترت في قائمتي من دولة تشيلي , تشيلي من البلاد اللي ممكن تشوف فيها كل الحاجات اللي بتميز دول أمريكا اللاتينية … من حيث الثقافة اللاتينية أو التاريخ أو المطبخ التشيلي أو حتي الطبيعة اللي ملهاش مثيل

منطقة بتاجونيا في الجنوب اللي بتتشارك فيها تشيلي مع الأرجنتين في من الوجهات اللي بحلم أزورها بسبب الطبيعة البكر اللي فيها و الحياة البرية اللي مش هتشوفها في حتة تانية .

تشيلي

تشيلي بتتميز بشواطئها الساحرة , ده غير صحراء أتاكاما اللي تعتبر أجف مكان علي سطح الأرض و اللي لو زرتها هتحس بأنه مكان فضائي … الصحراء قاحلة و لكن فيها واحات كتير و بحيرات فيها طيور الفلامنجو البديعة , و قري صغيرة هتحس انك في عالم تاني …

تشيلي من الدول الغالية , بس زي ما اتكلمنا في مقالات قبل كده زي : 5 نصائح تخليك تسافر بأقل التكاليف تكلفة اليوم في تشيلي ممكن تكلفك حوالي 50-70 دولار في اليوم شامله الأكل و المواصلات و الأقامة , ده كله بيختلف حسب تخطيطك انت للرحلة …

 

 

3- البوسنة و الهرسك :

البوسنة و الهرسك

من البلاد اللي حبيتها لما زرتها , بالرغم من انها بلد مش معروفة سياحيا بسبب الحرب في التسعينات و التبعيات بعد الحرب , بس حاليا البوسنة و الهرسك مختلفة كليا …

عملت قبل كده مقالة منفصلة عن مدينة موستار , لكن البوسنة و الهرسك من أول عاصمتها سراييفو لغاية أصغر قرية فيها ليها طابع خاص , ميكس بين الجانب العثماني التاريخي بعاداته و تقاليده و بين دفء المجتمع البلقاني و بين كونها دولة أوروبية …

الطبيعة في البوسنة و الهرسك رائعة , من شلالات و غابات و بحيرات … أينهم جارتها الشهيرة كرواتيا مستحوذه علي الخريطة السياحية في البلقان , لكن البوسنة و الهرسك تستحق أن تكون في قائمتك …

 

4-فنلندا :

فنلندا

من الدول اللي مش واخده حقها سياحيا , لو بتعشق الشتا و التلج زيي و نفسك تزور بلد  في جمال أيسلندا و النرويج بس أرخص شوية , يبقي عليك بفنلندا  …

فنلندا - بلاد مش معروفة

خصوصا اقليم لابي Lapland  اللي بيعتبره الناس Winter wonderland  , تقدر تسمتع هناك بالثلج و بأضواء الشفق القطبي في الشتاء , مش بس كده , ممكن تجرب العربات اللي بتجرها كلاب الهاسكي علي الثلج , و تقيم في فنادق و اكواخ ثلجية , هتقدر تستمتع بتجربة شتوية قطبية ملهاش مثيل.

 

 

5-ملاوي :

ملاوي

لما نجيب سيرة السياحة في أفريقيا , الكل بيفكر برضه في الدول الشهيرة سياحيا زي كينيا او جنوب افريقيا او بوتسوانا … بس فيه بلاد مش معروفة سياحيا كتير برضه يستاهلوا الزيارة زي موزمبيق او زيمبابوي او نامبيبيا او البلد اللي هتكلم عليها دلوقتي ملاوي ..

ملاوي بيطلق عليها “قلب أفريقيا الدافئ” , و ده بسبب طيبة أهلها و ترحيبهم بالسياح و الزائرين , مفيش حد زار ملاوي إلا و حس بأحساس الطيبة و الدفء من أهلها …

ملاوي أغلبيتها ريفية , الطبيعة فيها بكر , بحيرات خلابة و شواطئ رائعة , ده غير الرحلات البرية و السفاري …

 

 

6- سلوفينيا :

سلوفينيا

دولة مش واخدة حقها سياحيا للاسف بالرغم من روعتها , سلوفينيا تتميز بطبيعتها الخلابة و خصوصا بحيرة بليد الشهيرة , ده غير القلاع التاريخية التي تعود للقرون الوسطي و الغابات و الطبيعة البكر .

سلوفينيا متقلش جمال عن جارتها الجميلة كرواتيا , و تستحق منك الزيارة .

 

 

7-لاوس :

لاوس

طبعا جنب تايلاند او فيتنام او ماليزيا او اندونيسيا او حتي كمبوديا … بلد زي لاوس مش هتبقي واخده حقها سياحية للأسف بالرغم من انها تستحق تكون علي قائمة كل واحد هيزور جنوب شرق أسيا …

لاوس من البلاد الرخيصة جدا و ده بيخليها بلد محبب لل Backpackers حول العالم , الطبيعة فيها رائعة و الحياة المحلية فريدة من نوعها , لو من هواة الأكل عايز اقولك ان لاوس فيها أفضل الأكل الأسيوي اللي ممكن تجربه و ده بسبب موقعها الجغرافي بين تايلاند و فيتنام اللي خلي تاثير المطابخ دي يخلي المطبخ  فيها فريد من نوعه …

 

8- مالطا :

مالطا

مالطا للاسف برضه تعتبر زيها زي بلاد مش معروفة سياحيا كتير في أوروبا مش واخده حقها , مع انها فريدة في حاجات كتير …

مالطا جزيرة صغيرة في البحر المتوسط , تمتاز بالتاريخ و الثقافة اللي متاثرة بثقافات كتير منها العربية و الايطالية و اليونانية … , لو سمعت اللغة المالطية هتحس انك بتسمع حد بيتكلم عربي باللهجة التونسية الجميلة , ده لأن اللغة المالطية متأثرة جدا باللغة العربية …

مالطا فيها شواطئ ممتازه و الجو العام هتحبه أوي ..

الفيزا لمالطا هي فيزا شنجن تقدر تحصل عليها من سفارة مالطا في بلدك .

 

9-منغوليا:

منغوليا

نفسك تزور أكتر بلد في العالم فيها أقل كثافة سكانية؟ بلد جنكيز خان ؟ البلد اللي فيها مناظر طبيعية عمرك ما هتشوفلها مثيل في العالم … يبقي لازم تزور منغوليا مره علي الأفل في عمرك , كلنا قرينا عن المغول في التاريخ , لكن في القرن الواحد و العشرين ناس كتير متعرفش منغوليا و اد ايه هي جميلة و فريدة , و تستحق تزورها .

 

10- أوكرانيا :

من البلاد اللي مظلومة سياحيا , أوكرانيا بلد ليها تاريخ كبير و ثقافة غنيا جدا , المعمار في المدن الأوكرانية رهيب ده غير الطبيعة الخلابة في معظم مدنها …

معظم السياح بيتجهوا لروسيا او دول تانية في المنطقة , لكن أوكرانيا تستاهل منك الزيارة و اللي بعتبرها جوهرة مخفية في شرق اوروبا ناس كتير متعرفش اد ايه هي حلوة …

 

 

 

TAGS
RELATED POSTS
2 تعليقان
  1. Heyfa

    مارس 17, 2019

    A very informative article!! Thank you for enlightening us on the many treasures that our Earth shelters!

    • Mohamed

      مارس 23, 2019

      Thanks alot 🙂

Comments are closed.

محمد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.