10 غلطات حاول تتفاداهم لو هتسافر اول مره

اول مره هتسافر بره بلدك و متحفز جدا , بس في نفس الوقت جواك قلق و خوف من المجهول اللي هتقابله ؟

لازم تعرف ان مفيش حد بيتولد و بيكون عنده موهبة السفر او بيتولد رحاله . في كل سفرية بتتعلم حاجه جديدة و درس جديد , انا فاكر انا ياما وقعت في غلطات و انا مسافر . و اتعلمت منها دروس مستحيل اني انساها .

عشان كده انهارده هقولك علي أكنر 10 غلطات تخلي بالك منهم لو هتسافر اول مره ….

1- متخططش كويس :

أكتر حاجه ممكن تتعبك في السفر لو هتسافر اول مره هي انك متخططش كويس للرحلة اللي هتعملها , لنفترض مثلا انك مسافر اسطنبول خمس ايام , و دافع فلوس طيران و فندق , هل مستني انك توصل هناك و متبقاش عارف هتروح فين او تعمل ايه؟

انا متعود قبل اي سفرية بذاكر البلد اللي هسافرلها و اقرأ عن كتير جدا , السفر متعة و لازم تكون مستعد ليها.

2- خد معاك لبس كتير :

دي من أكتر الغلطات اللي ممكن تقع فيها و دايما البنات بيقعوا فيها اكتر , انك تاخد الدولاب كله معاك في الشنطة . ايه الفكرة انك تاخد خمستاشر بنطلون و عشرين قميص و انت مسافر , انت مش هتهاجر ! 😀 , اتخيل نفسك كده و انت طالع اتوبيس او مترو و انت شايل شنطتين اتقل منك و عمال تخبط في الناس …

حاول بقدر الامكان تقلل اللبس اللي بتاخده معاك , صدقني هتستمتع اكتر بالسفر.

3- تلف مدن كتير في وقت صغير :

اول ما هتاخد فيزا الشنجن اول مره هتقول “بس بقي انا هلف ال 26 دولة دول في اسبوعين” 😀  , دي من الغلطات المشهورة اللي بيقع فيها الناس اللي بتسافر اول مره , اللي يقول مثلا هروح يوم في مدريد و بعدين يومين في باريس و يوم في امستردام … الخ .

صدقني هترجع من السفر و لا كأنك شفت حاجه و لا هتحس انك زرت المدن دي اصلا , انت كل لما بتقعد اطول في مدينة واحده ده بيخليك تعرفها اكتر و تتعمق في ثقافة البلد دي اكتر .

اول سفرية ليا قعدت شهر في مدينة أدرنه التركية في تبادل طلابي هناك , شهر كامل بشوف شوارعها و اكل من مطاعمها و اركب مواصلاتها , صدقني هتستمتع اكتر لما تتعلم تكون مسافر مش سائح … و فرق كبير بينهم.

4- تعتمد علي شركات السياحه :

اكتر حاجه بسمعها من اي حد عايز يسافر اول مره “ايه احسن شركة سياحه تطلعلي فيزا كذا , او تسفرني بلد كذا ” … و دي من اكبر الغلطات , متعة السفر من وجهة نظري في تخطيطك و ترتيبك انت , خطط و اقرا و اغلط و اتعلم , كل ده في حد ذاته متعه , و حتي ماديا هتوفر اكتر بكنير , جرب خطط لرحلة لاي مدينه في وقت معين و شوف لو حجزت انت بنفسك طيران و فندق هتدفع كام , و اتصل باي شركة طيران و قولهم احجزولي في نفس الفندق و رحلة الطيران دول , و شوف فرق السعر … شركات السياحه في الاول و الاخر عايزه تكسب , علشان كده اتعلم ازاي تحجز بنفسك و متخافش .

5- انك تخاف من اكل الشارع التقليدي للبلد اللي رايحها :

اكتر حاجه بتنرفزني انا شخصيا اني الاقي حد مسافر بلد معينه و يخلي كل اكله في ماكدونالدز او كنتاكي !! , السفر مش انك تركب طياره و تروح بلد تتصور جنب برج ايفل و ترجع , السفر هو انك بتشوف ثقافة جديدة و بتتوغل فيها …

و من اهم الحاجات اللي هتخليك تتوغل في اي ثقافه هي اكلها , اتعود دايما تاكل في المطاعم الشعبية الزحمة في اي مدينة هتزورها و جرب اكل الشارع , متخافش مش هيحصلك حاجه , بالعكس هتتعرف علي ثقافة البلد و هتستمتع اكتر.

6- تختار الارخص بغض النظر عن القيمة اللي هتاخدها :

اهم حاجه في التخطيط للسفر هي جودة الخدمة اللي هتاخدها سواء في المواصلات او الاقامة او غيرها مقابل الفلوس اللي هتدفعها .

يعني مثلا لو لقيت اوضة فندف في اليوم ب 10 دولار , متفرحش اوي و تحجزها من غير ما تقرأ اراء و تقييمات الناس اللي جربوا الفندق قبل كده , مش معني انك توفر في السفرية انه يطلع عينك و تكره اليوم اللي قررت تسافر فيه !

7- متعملش سيرش عن اكتر طرق النصب في البلد اللي هتروحها :

جرب كده و اعمل سيرش في جوجل عن اكتر طرق النصب في اي مدينة , هتلاقي بلاوي , مهم جدا تعرف طرق النصب دي و ازاي تتفاداها , و هعمل بوست بالتفصيل عن اشهر طرق النصب دي و ازاي متقعش فيها.

8- تتعامل في البلد اللي هتزورها كانك بتتعامل في بلدك :

دي برضه غلطة كبيره ناس كتير بيقعوا فيها , لازم تعرف ان كل بلد ليها عاداتها و تقاليدها انت كمسافر لازم تحترمها , اللي ممكن تفتكره عادي بالنسبالك ممكن يبقي اساءة في البلد التانيه , و دي حاجه لازم تاخد بالك منها.

9- متوزعش فلوسك علي شنطك :

من الغلطات المشهورة للي بيسافر اول مره انه يحط فلوسه كلها في مكان واحد و هو مسافر , و ده بيعرضك انك تفقد كل فلوسك لو الحاجه دي اتسرقت , اتعود دايما توزع فلوسك و كروتك الائتمانيه علي شنطك و سيب اكبر جزء دايما في الخزنة بتاعتك في الفندق او الهوستل اللي نازل فيه و اخرج بس باللي هيكفيك اليوم ده.

10- متقرأش عن ثقافة البقشيش في الدول اللي هتسافرها:

البقشيش يعتبر من الحاجات المهمة جدا اللي بتقابل اي مسافر , خصوصا ان ثقافة البقشيش مختلفة جدا من دولة لدولة … يعني مثلا في اليابان لو اديت بقشبش لجرسون في مطعم يعتبر ان دي اهانة , و العكس في امريكا لو مدتش بقشيش يعتبر ان دي اهانة او ان الخدمة معجبتكش , و دول تانيه زي نيوزيلاندا البقشيش بيكون ضمن السعر اللي بتدفعه  … علشان كده لازم تقرأ عن النقطة دي قبل ما تسافر

دول كانوا أكتر 10 غلطات لو هتسافر اول مره لازم تخلي بالك منهم, مش عيب اننا نغلط لاننا مش هنتعلم من غير ما نغلط , اقرأ و خطط و سافر و اغلط … لان في النهاية هتستمتع ..