دول شمال أفريقيا سواء مصر أو المغرب أو الجزائر أو بطلة مقالتي انهارده تونس ربنا وهبهم بكنوز كتير تخليهم وجهات سياحية عالمية … و للأسف أعلامنا فاشل لعدم اظهار جمال دولنا السياحي بالطريقة اللي دولنا تستحقها …
أنا كمصري أو أنت كمغربي أو جزائري او ليبي او سعودي او عراقي او اي مواطن عربي أكيد تعرف تونس و سمعت عنها … بس خليني أقولك أن فيه حاجات كتييييير متعرفهاش عنها و لو عرفتها هتحلم انك تزور تونس , أنا كل يوم بعرف حاجه حاجه جديدة عن البلد الجميلة دي و بحلم أزورها … علشان كده انهارده هقولك علي 7 أسباب خلوني و هيخلوك تفكر تزور تونس و تقضي أجازتك فيها .
1- أهم سبب انك تزور تونس هو الناس :
photo by Tung Nguyen Dan / Flickr
دايما كعادتي لما بتكلم عن بلد زرتها أو بفكر أزورها اني اتكلم عن مدنها او طبيعتها …الخ , ده كله هنتكلم فيه دلوفتي انما تونس بالذات أنا شايف ان أهم سبب انك تزورها هو أهلها و ناسها و ده اللي لازم ابدأ بيه..
الشعب التونسي شعب مثقف جدا , و ده تقدر تحس بيه لو اتكلمت مع أي حد تونسي , شعب طيب و مضياف , اسأل أي حد زار تونس هيقولك أد ايه حس بكرم و ضيافة أهلها و ان أي حد بيحاول يساعدك لو انت سائح او غريب عن البلد ..
أنا شخصيا بحب اللهجة التونسية “برشا” , بحب حب التوانسة للحرية و الثقافة , بحب حماسهم في الكورة , أي حد مصري بيعرف أن ماتشات الفرق المصرية مع الفرق التونسية بتبقي كأنها بطولة في حد ذاتها بسبب حماس الجماهير … علشان كده شايف أن عامل الناس مخلي تجربة السفر اللي تونس تجربة رائعة في بلد أكثر من رائعة.
2- الثقافة :
Photo Credits by Sara Dhaoui
الثقافة التونسية ثقافة غنية جدا , و ده لأن تونس بالرغم من صغرها كمساحة , إلا إنها عريقة كدولة , تعاقب الحضارات ما قبل الفينيقية و الفينيقية و الرومانية و العثمانية و العصر الحديث كل ده اسهم في جعل الثقافة غنية جدا و هتخلي تجربة انك تزور تونس تجربة فعلا رائعة
3- الشواطئ و البحر :
تونس عندها شواطئ من أجمل شواطئ شمال أفريقيا علي البحر المتوسط , من رمال بيضاء و بحر مياهه زرقاء شفافة , معظم المدن التونسية علي الشمال تقع علي البحر المتوسط و فيها شواطئ رائعة , جرب لما تزور تونس تجرب تزور مدينة الحمامات الساحرة بشواطئها و أنشطتها البحرية المشهورة ..
ده غير قرية سيدي بوسعيد الساحرة اللي تحس انها جزء من الجزر اليونانية من جمالها ..
و مينفهش مذكرش جزيرة جربة اللي تعتبر أكبر جزيرة في شمال أفريقيا , و تتميز برمالها البيضاء و بلدتها القديمة و منازلها البيضاء , مينفعش تزور تونس و متشوفهاش …
4- المدن التونسية و التاريخ :
لما تزور تونس هتحتار تزور مدن ايه وللا ايه من كتر ما كل مدينة ليها طعم , تونس العاصمة هي من أهم المدن التونسية اللي تعتبر عاصرت كل الحضارات اللي مرت بتونس , أسواقها و أزقتها القديمة هتخليك تحس انك في عالم تاني , في المدينة القديمة و اللي بتسمي “المدينة” بأبنيتها التاريخية و العمارة العربية و اسواقها القديمة ملهاش مثيل …
علي بعد 15 كيلومتر من العاصمة لازم تزور منطقة قرطاج التاريخية , اللي فيها أثار قرطاج الفينيقية و الرومانية اللي موجودة لغاية دلوقتي و اللي تعتبر موقع من مواقع اليونسكو التراثية ..
سوسة و اللي تعتبر جوهرة الساحل زي ما بتسمي , مدينة ليها طابع خاص تاريخي و طعم خاص بيحسه كل اللي بيزورها سواء بسبب أسواقها او قلعتها أو بحرها الساحر
سوسة
photo by Ivan-Flickr
الميناء في سوسة
Photo credits to Heyfa Bhm
سور المدينة القديمة
photo Credits to Heyfa Bhm
ده غير مدينة المنستير الشهيرة الهادئة لو عايز تبعد شوية عن زحمة السياح , مدينة جميلة و اللي بيميزها ضريح بورقيبة الشهير , و حصنها الشهير (او ما يسمي بالرباط) اللي له فيو رائع علي البحر مينفعش متشوفهاش لما تزور تونس ..
مدينة القيروان التاريخية اللي تعتبر أهم مدن العالم الإسلامي , و جامعها التاريحي جامع عقبة , مدينة تستاهل الزيارة لما تزور تونس ..
ده غير مدن كتير لازم تشوفها لما تزور تونس زي صفاقس و المهدية و بنزرت الساحرة و مدينة الجم التاريخية اللي هتحس انك في روما لما تشوف قصر الجم الشهير اللي يشبه الكولوسيوم و غيرهم كتير …
عين دراهم و اللي بالنسبالي كانت أكتشاف لما عرفتها و ناوي ازورها في الشتا لأنها في الشتا بتكون حاجه تانية خالص , هتحس انك في النمسا او سويسرا , المدينة قريبة من الحدود الجزائرية و تعتبر جنة شتوية زي بالضبط مدينة افران الساحرة في المغرب … مينفعش تزور تونس في الشتا من غير ما تشوف عين دراهم الجميلة ..
5- الصحراء :
Photo Credits By Sarah Dhaoui
أنا شخصيا كنت عارف أن الجنوب التونسي يعتبر أغلبيته صحراء لكن مكنتش أعرف أد ايه الصحراء التونسية ساحرة , و انك مينفعش تزور تونس من غير ما تشوف الصحراء التونسية بعينك و تشوف واحاتها الخلابة
Photo Credits By Sara Dhaoui
الجنوب التونسي و الجنوب الغربي التونسي بيحتوي علي واحات و مدن ملهاش مثيل في حتت كتير زي توزر و دوز و نفطة … وللا الشلالات و النخيل و ينابيع المياة في واحات ساحرة زي تمغزة و الشبيكة .
Photo Credits by Sara Dhaoui
أو منطقة عنق الجمل اللي اتصور فيها الجزء الأول من سلسلة أفلام حرب النجوم Star Wars في السبعينات بسبب قببها الغريبة وسط الصحراء
عنق الجمل – Photo Credits by Sara Dhaoui
مينفعس تزور تونس من غير ما تزور الواحات و تشوف جمال الصحراء التونسية …
6- التكلفة :
حاجه تانية تشجعك انك تزور تونس هي أن تكلفة السفر و قضاء أجازتك في تونس هتبقي رخيصة لو هتقارنها بأوروبا مثلا … العملة في تونس هي الدينار التونسي , في تاريخ كتابة المقالة دي الدولار الأمريكي يساوي حوالي 3 دينار , و الدينار التونسي حوالي 5.7 جنية مصري … عشان كده السفر لتونس مش هيكلفك كتير خصوصا لو التزمت بالنصايح اللي قلناها في مقالة 5 نصائح تخليك تسافر بأقل التكاليف
7- المطبخ التونسي من أهم الأسباب علشان تزور تونس :
ده سبب لوحده كفيل يخليك تزور تونس و مترجعش 😀 , المطبخ التونسي من أشهر و أطعم المطابخ في حوض البحر المتوسط و شمال أفريقيا ..
اللبلابي Credits to Habib M’henni / Wikimedia Commons
مين فينا منفسوش يدوق البوريك وللا الطاجين التونسي و للا خبر الملا , وللا السلطة المشوية الشهيرة بجانب أطباق السمك (او الحوت بالتونسي) و للا اللبلابي الشهير
ده غير العصبان و الملوخية التونسية … أطباق كتير تخليك تزور تونس علشان تجرب أطباقها اللذيذة
العصبان
Credits to AmelGhouila / Wikimedia commons
أسباب كتير تخليك فعلا تفكر انك تزور تونس , تونس من البلاد اللي متحتمس أني أزورها جدا لأنها بالفعل مختلفة عن أي بلد تانية حتي الدول المجاورة بما فيهم مصر و الجزائر و المغرب …
زرت تونس قبل كده ؟ عندك أي نصائح أو حاجه حابب تشاركنا بيها ؟ شاركنا بيها في الكومنتات و صفحات التواصل الأجتماعي ..
