التخطيط للسفر بطريقة صحيحة هو المفتاح لنجاح أي سفرية , لما اتكلمنا قبل كده عن 10 غلطات حاول تتفاداهم لو هتسافر أول مره كانت اول غلطة هي انك متخططش كويس …
و بما ان كلنا بقي استخدامنا للموبايلات بقي شئ اساسي في حياتنا , علشان كده انت كمسافر لازم تستغل الموبايل اللي معاك علشان تخطط صح لسفريتك و خصوصا ان فيه مئات من التطبيقات الخاصة بالسفر اللي تعتبر مفيدة جدا
أنهارده انا مش هتكلم عن Booking أو Airbnb أو Skyscanner أو Kayak أو غيرهم و غيرهم من التطبيقات اللي كلنا عارفينهم و بنستخدمهم علي طول اثناء التخطيط للسفر , لأ انهارده انا هقولك علي أفضل 7 تطبيقات للموبايل غير معروفين و لا غني عنهم أثناء التخطيط للسفر من وجهة نظري الشخصية …
1-TripAdvisor :
من وجهة نظري ده أهم تطبيق و الأب الروحي لكل تطبيقات التخطيط للسفر , معظم التطبيقات اللي بتدي معلومات عن المدن بتركز فقط علي المدن الرئيسية في كل دولة , لكن تطبيق Tripadvisor ميزته انك ممكن تلاقي عليه معلومات عن اصغر المدن و البلدات في كل دول العالم , كان له الفضل اني عن طريقه عرفت قرية تشيرالي التركية و أماكن كتير مش مشهورة في البلاد اللي زرتها مفيش ناس كتير تعرفها …
التطبيق من خلاله تقدر تبحث فيه عن اي مدينة , و تقدر تعرف ايه الحاجات اللي ممكن تزورها , ايه أفضل المطاعم , ايه الجولات السياحية اللي ممكن تعملها , و تقدر تعرف اراء المسافرين الآخرين و صورهم و تجاربهم …
ده غير انه بيحتوي علي منتديات لكل بلاد العالم تقدر تدخل و تسأل اي سؤال محتاج تعرف اجابته عن اي بلد هتزورها و تعرف الأجابة من أهل البلد او المسافرين اللي سافروا البلد دي .. التطبيق فعلا مفيد جدا و لازم يكون علي موبايلك
التطبيق متاح علي :iOs ,Android
2-Google Trips:
التطبيق ده أسطوري بمعني الكلمة , التطبيق ده عن طريقه تقدر تخطط أي سفرية بكل احترافية و لا غني عنه في موبايلك … التطبيق ذكي جدا كعادة تطبيقات جوجل , لو مثلا عملت سيرش عن أي مدينة , و ضغطت بعد كده علي Things to do , تقدر ساعتها تتصفح حاجات كتير ممكن تعملها في المدينة دي من أول أفضل الأماكن اللي تتزار Top spots مثلا او الأماكن المناسبة لوجود أطفال Kid friendly , لغاية مثلا اماكن الفنون Art Destinations أو تدور في الحدائق Parks and Gardens …
اللي عجبني شخصيا في الموضوع ده ان الحاجات اللي ممكن تتصفحها عن الأنشطة في كل مدينة بتختلف من مدينة لأخري … يعني مثلا لو عملنا بحث عن الحاجات اللي ممكن نعملها في باريس مثلا , هتلاقي التطبيق بيقترح عليك تشوف أفضل أماكن اخد السيلفي في باريس … 
لو مثلا عملنا بحث عن مراكش في المغرب , هتلاقي التطبيق بيقترح عليك تشوف الحاجات اللي تتشاف في المدينة القديمة أو الأماكن الرومانسية في مراكش للعشاق أو افضل المطاعم اللي تجرب فيها الأكل المغربي الفريد …
مش بس كده , التطبيق بيتيحلك تحفظ الأماكن اللي مهتم بيها بحيث ترجعلها بعدين , و بيقولك علي مواعيد عمل الأماكن دي و كل المعلومات اللي هتحتاجها كمسافر …
الأفضل من ده كله انك مثلا لو كنت عامل حجوزات في اي دولة كفنادق او تذاكر طيران , البرنامج أتوماتيك ممكن ياخد البيانات دي من أيميلك و من Google Calendar و يحاول يديك اقتراحات لحاجات ممكن تزورها في الوقت اللي هتسافر فيك بحيث يساعدك في التخطيط للسفر بتاعك بكل احترافية
التطبيق متاح علي : (تحديث: تم إلغاء التطبيق)
3-Rome2Rio:
كام مره مثلا قلت انا عايز اسافر أسبانيا , و هزور مثلا مدريد و برشلونة , بس لما جيت تخطط متبقاش عارف هل هتسافر من مدريد لبرشلونة بأتوبيس و للا قطار وللا طيران , و ايه أرخص و أسرع ؟
التطبيق الرائع ده بيديك حل للمشكلة دي , كل الفكرة انك بتكتب في التطبيق النقطة A و النقطة B اللي ناوي تسافر بينهم سواء مدينتين او حتي اسماء شوارع او دول او اي حاجه , و الموقع هيقولك كل وسائل المواصلات المتاحة ما بينهم سواء طيران او قطارات او اتوبيس او تاكسي او حتي UBER
مش بس كده التطبيق بيقولك المسافة بين النقطتين اد ايه و الوقت المتوقع اللي هتاخده في كل مواصله بينهم , و كمان السعر التقريبي اللي هتدفعه …
الموقع لا غني عنه عند التخطيط للسفر ..
التطبيق متاح علي : iOS , Android
4-Hopper:
من التطبيقات اللي عجبتني جدا لحجز الطيران او الفنادق , التطبيق عجبني فيه انك مثلا لو جيت تعمل بحث عن تذكرة طيران في تاريخ معين , التطبيق بيقولك ان كان من الأفضل تشتريها دلوقتي بالسعر ده وللا تنتظر لأن السعر متوقع انه ينزل.
كمان الموقع بيقولك امتي متوقع السعر اللي انت شايفه ده يطلع او ينزل , التطبيق ده مفيد جدا عند التخطيط للسفر .
التطبيق متاح علي : iOS , Android
5-Roomer Travel:
التطبيق ده انا بعتبره أكتشاف مذهل , كام مره حجزت فندق مثلا و كان الحجز غير مسترد , و اضطريت لأي سبب تلغي او تغير خططك … ساعتها قيمة الحجز كله هتروح عليك …
عن طريق التطبيق ده تقدر تعرض حجزك ده عليه للبيع بثمن أقل من اللي حجزته بيه بحيث انك تقدر تبيعه بدل ما يروح الحجز عليك
الميزة التانية ليك كمسافر انك ممكن تلاقي عروض تحفة , يعني مثلا تعالي نقول انك مسافر روما في شهر ابريل مثلا , ادخل علي التطبيق و اعمل بحث في روما في الشهر ده , ممكن مثلا تلاقي حد عارض ليله او اكثر في فندق 5 نجوم في روما بثمن 50 دولار لليلة بدل من 350 دولار ! … او مثلا غرفة في فندق ب 20 دولار بدل 90 !… إلخ
نزل التطبيق و جربه هتندم انك معرفتوش قبل كده بسبب كمية العروض و الفرص اللي عليه اللي ممكن تستفيد بيها و قد ايه هو مفيد جدا قبل التخطيط للسفر .
ملحوظة مهمة: حاول دايما لو حجزت من التطبيق ده أو حتي أي تطبيق زي بوكنج او أجودا او اكسبيديا او غيرهم انك دايما تتواصل مع الفندق عن طريق الأيميل او التليفون و تأكد حجزك علشان متلاقيش مفاجأت و تكون كل حاجه متظبطة صح .
التطبيق متاح علي : iOS , Android
6-TripIt:
من التطبيقات اللذيذة اللي بتساعد في التخطيط للسفر و هو فكرته انك لما تيجي تخطط لسفرية طبعا بتحجز كذا طيران و كذا فندق و كذا اتوبيس و هكذا , و بيجيلك كذا إيميل خاص بالحجوزات دي و بتحس بلخبطة و ممكن تنسي حجوزات في النص .
هنا تيجي فايدة التطبيق ده , بتنزله و بتعمل عليه حساب , و تربط بيه أيميلك في ال Gmail مثلا او تبعت أي أيميل جالك علي الأنبوكس خاص بأي حجز لسفرك سواء فنادق او طيران(Confirmation email) إلي عنوان بريد التطبيق ده : plans@tripit.com و سيب الباقي علي التطبيق ..
هتلاقي التطبيق نظملك كل حجوزاتك اللي حجزتها علي هيئة خط سير للرحلة بطريقة منظمة جدا تقدر تطبعها او تكون معاك علي موبايلك …
التطبيق انا مبقدرش أستغني عنه في أي سفرية
التطبيق متاح علي : iOS , Android
7-TripWhistle Global SOS:
التطبيق ده مهم جدا و انت مسافر , أينعم هو مش هيفيدك أثناء التخطيط للسفر , بس أنا تعمدت أكتبه لأنه لازم تحمله علي موبايلك لأهميته .
التطبيق بسيط جدا , فكرته انه عن طريق ال GPS بيتعرف علي البلد اللي انت فيها , و بيكتبلك أرقام الطوارئ سواء البوليس و الإسعاف و المطافئ , و برضه بيكتبلك العنوان اللي انت موجود فيه بالضبط بحيث تقدر تبلغها للطوارئ لو اضطريت لاقدر الله تكلمهم لأي حاجه تحصلك و انت مسافر …
التطبيق ضروري جدا يكون علي موبايلك و انت مسافر
التطبيق متاح علي : iOS
جربت أي تطبيقات جديدة مفيدة في السفر ؟ حابب تشاركنا بأي نصائح أو عندك أي سؤال ؟ شاركنا بيه في الكومنتات او صفحات السوشيال ميديا …
