لو ملحقتش طيارتك او اتأخرت لأي سبب من الأسباب عن رحلتك الجوية ده بيخلي تجربة السفر صعبة جدا , أنا شخصيا من الأشخاص اللي ببقي حاسب حساب لكل حاجه و قبل ميعاد طيارتي بكون في المطار قبلها ب 3 ساعات و مبسيبش فرصة لأي حاجه تبوظ الخطط اللي عاملها , بس ده ميمنعش ان أي ظرف ممكن يحصل و يخليك تفوت ميعاد الطيارة ..
اتكلمنا قبل كده عن تعمل ايه لو طيارتك اتلغت او اتأخرت و عرفنا ايه حقوقك اللي من حقك تطالب بيها لو الغلط كان مش شركة الطيران …
في المقالة دي هنتكلم لو ملحقتش طيارتك لأي سبب من الأسباب , ايه اللي ممكن تعمله ؟ , هل ليك حقوق؟ و تتصرف ازاي؟
هل ليك حقوق لو ملحقتش طيارتك ؟
نظريا لأ ملكش أي حقوق لو ملحقتش طيارتك , بس هل ده معناه ان مفيش فايدة؟ أكيد لأ , فيه حاجات ممكن تعملها تخليك تقدر تسافر علي رحلة تانية ببلاش , او حتي بمبلغ قليل بدل ما تدفع ثمن تذكرة كاملة …
أينعم كل ده بيرجع لعوامل كتير منها شركة الطيران أو موظف الطيران أو ظروفك أو حتي طريقتك , كل ده هنتكلم فيه دلوقتي و عن اهم النصائح اللي تخلي بالك منها …
أعمل حساب كل حاجه و انت بتحجز :
لما تيجي تحجز الطيران دايما ركز في كل حاجه , زي ميعاد الطيارة و بعد المطار من مكان اقامتك , و هتركب ايه و انت رايح للمطار , و المسافة من مكانك للمطار هتاخد وقت أد ايه … الخ , لو عامل حساب لكل النقط دي صعب أوي تفوتك الطيارة …
مش بس كده , كمان لازم تاخد بالك و انت بتحجز ايه الرحلات اللي هتوصل لنفس المكان اللي هتروحه علشان لا قدر الله لو ملحقتش طيارتك تبقي عارف ايه الرحلة اللي بعد كده اللي ممكن تتفاوض عليها في الخطوات اللي بعد كده …
لو عرفت انك مش هتلحق رحلتك برضه روح المطار :
افرض مثلا حصل اي ظرف و ملحقتش تروح المطار قبل 3 ساعات من الرحلة زي ما بتنصح شركات الطيران , متقولش خلاص مش هلحق و متروحش , لا طبعا , روح المطار لأن أوقات كتيييير الرحلات بتتأجل أو بتتأخر , عشان كده يبقي الموضوع اتحل لوحده و مش هتروح عليك الطيارة…
كلم شركة الطيران في أسرع وقت :
أول حاجه تعملها لو ملحقتش طيارتك هي انك تكلم شركة الطيران , القاعدة في الموضوع ده انك كل ما تتواصل مع شركة الطيران بدري كل ما فرصتك انك تلاقي حل للمشكلة دي بأقل خساير هتكون كبيرة ..
في المطارات الكبيرة شركات الطيران ساعات بتتيح حجز عدد أكبر من الكراسي فوق العدد المتاح للطيارة , و لأن مشكلة شركات الطيران معاك لو ملحقتش طيارتك هي انك هتضيع عليهم كرسي فاضي , فبالتالي لو بلغتهم قبل ما البوابة تغلق فيه فرصة انهم يتيحوا الكرسي بتاعك للبيع , و بالتالي تعويضك مش هيكون فيه مشكلة ..
لكن هل الكلام ده مضمون؟ طبعا لأ … لكن مش هتخسر حاجه لو جربت لأن أوقات كتير نفع مع ناس كتير …
أهم حاجه طريقتك و حجتك لما تتكلم مع الموظف :
picture by WestportWiki
في شركات طيران كتير أحيانا بيكون للموظف السلطة انه يحجزلك في رحلة تانية مجانا , او حتي يعوضك بطريقة أو بأخري … بس الفكرة كلها في طريقتك في الكلام و التواصل معاه …
يعني لما تتكلم مع الموظف حاول تكون طريقتك ودودة و مؤدبة , لأن في الأول و في الأخر الغلطة غلطتك أنت مش غلطة الشركة , فبالتالي مش هتكسب حاجه لو زعقت او اتخانقت مع الموظف ..
و في نفس الوقت لازم تكون ليك حجه قوية , بمعني مثلا حصلك ظرف طارئ صحي مثلا او حصل حاجه في الطريق للمطار أخرك … ده بيزور فرصك في أخذ تعويض او انه يتحجزلك علي رحلة تانية أقوي ..
بمعني لو قلت للموظف ” معلش أصل راحت عليا نومة” أكيد بنسبة كبيرة هيقولك مفيش في ايدي حاجه أقدر اعملها … علشان كده خليك ذكي و انت بتتعامل في الموقف ده .
حجز تذكرة جديدة وللا غرامة التغيير؟ :
لو مثلا حصل معاك ظرف في رحلة الرجوع (كانت تذكرتك ذهاب و اياب) و كانت هتفوتك الطيارة , حاول دايما تشوف ايه الأرخص , هل الأرخص انك تدفع غرامة تغيير ميعاد الرجوع لرحلة تانية , و للا الأرخص انك تحجز تذكرة اتجاه واحد جديدة … لأن ساعات بتكون ثمن تذكرة اتجاه واحد أرخص بكتير من انك تدفع غرامة تغيير ميعاد رجوعك …
متنساش أبدا طريقتك في التعامل مع موظف الشركة :
دايما هعيد في النقطة دي , لما تتواصل مع الشركة سواء في التليفون أو علي الكاونتر في المطار علشان تحاول تشرحله ليه فاتتك رحلتك , حاول دايما تكون مؤدب و ذكي لانك عايزه يبقي في صفك …
طب افرض مثلا رفض او قاللك مفيش في ايدي حاجه … حاول بكل أدب تطلب انه يوصلك بالموظف اللي أكبر منه Supervisor أو حتي ممكن تدخل علي موقع الشركة أونلاين و تتواصل مع الدعم أو حتي علي أكاونت الشركة علي تويتر … كل دي طرق ممكن تخليك توصل لشخص له سلطات أكبر من الموظف اللي علي الكاونتر … بس في الأول و في الأخر مفيش أي حاجه مضمونة , انت بتعمل كل اللي تقدر عليه علشان تطلع بأقل خساير من الموقف ده ..
اتحطيت قبل كده في الموقف ده ؟ فاتتك طيارتك قبل كده ؟ شاركنا تجربتك في الكومنتات او صفحاتنا علي السوشيال ميديا ..
