لما تسأل أي حد ايه الحاجه اللي اللي مخلياك مش عارف تسافر؟ … الاجابة دايما بتكون : الفلوس .
الكل متخيل انك لازم تكون غني علشان تسافر , بالعكس الكلام ده غلط جدا , انت ممكن تسافر بأقل التكاليف و بسهولة جدا , السفر مش معناه انك لازم تكون غني
نقولها تاني .. السفر مش معناه انك لازم تكون غني دي من الحاجات اللي الناس عايزه تقنع نفسها بيها , بس الحقيقة غير كده خالص .
علشان كده النهارده هتكلم عن خمس نصائح لو خدت بالك منهم صدقني هتقدر تسافر بأقل التكاليف و في نفس الوقت مش هتحس انك صرفت كتير …
1- اختار وجهتك صح:
اول نصيحة في ازاي تسافر بأقل التكاليف هو ان الكل لما بيفكر يسافر بييجي في باله فرنسا .. سويسرا .. اسبانيا .. المانيا ..امريكا …الخ , متخيل ان هي دي احلي البلاد اللي ممكن تسافرلها سياحة .. بالعكس , زي ما البلاد دي جميلة في بلاد تانية مش مشهورة و احلي و ارخص بكتييير .
بص فيه دايما قاعده في اي قاره كل ما تروح ناحية الشرق هتلاقيها ارخص , يعني مثلا شرق اسيا معظم دوله رخيصه , اوروبا الشرقية رخيصه جددددا و مش بس كده جميلة جدا , دول الاتحاد السوفيتي السابق زي لاتفيا و ليتوانيا و استونيا رووعة , كرواتيا و سلوفينيا بلاد جميلة جدا ، و مثلا اللي هتدفعه مثلا في مدينة براتيسلافا في سلوفاكيا حوالي نص اللي ممكن تدفعه في مدينة زي فيينا في النمسا !
تاني نقطه هو امتي تسافر , دايما ابعد عن نص السيزون , يعني في شهور الصيف في اوروبا او في الكريسماس في الشتا … الخ , دايما سافر في الشهور زي المارس او ابريل او مايو دي احسن شهور ممكن تسافر فيها لاوروبا مثلا او اكتوبر و نوفمبر …و هتلاقي اسعار رخيصه جدا .
2- اقامتك ببلاش :
ايوه زي ما بقولك كده .. عايز تسافر بأقل التكاليف و الاقامة تبقي ببلاش؟ , موقع couchsurfing موقع عالمي بيتيحلك الفرصة دي , فيه ملايين من المشتركين في الموقع من كل انحاء العالم عندهم استعداد يستضيفوا مسافرين لمدة كام يوم ببلاش , كل الفكرة انك بتسجل في الموقع و تعمل لنفسك بروفايل و تكتب معلومات عن نفسك , و تشوف انت هتسافر فين و تشوف الناس اللي في المدينة اللي هتسافرلها و تبعتلهم رسالة لطيفة تطلب فيها انهم يستضيفوك و انت و حظك يوافقوا وللا لأ .
تجربة الكاوتش سيرفنج مش بس هتخليك تسافر بأقل التكاليف و ببلاش, هي كمان تجربة في حد ذاتها هتخليك تنغمس في ثقافة البلد اللي هتزورها لانك هتتعامل مع اهل البلد .
مش عاجبك النوع ده , يبقي جرب AIRBNB و ده موقع من خلاله ممكن تاجر شقة او ستوديو لوحدك , او لو عايز توفر اكتر ممكن تاجر اوضه في شقة مع حد , انا فاكر لما كنت في مدينة دبروفنيك في كرواتيا أجرت اوضه بحمام منفصل في شقة عايش فيها عيلة كرواتيه , كانت تجربة روعة و كررتها كتير في سفرياتي …
و طبعا مش هنسي ال Hostels , فكرة الهوستل انك بتنزل في اوضه مشتركة مع عدد اشخاص ممكن يبقوا 4 و ممكن يبقوا 16 علي حسب الهوستل . فيه ناس كتير متخيله انها تجربة صعبة انك تنام في اوضه مع حد غريب , لكن لما تجربها مره لازم هتكررها , لان كل اللي معاك في الاوضه مسافرين زيك بالضبط و سهل اوي تعمل صداقات و تعرف معلومات هتفيدك في السفر …
الحل الأخير و هو الفنادق , نصيحتي في الفنادق بلاش الفنادق اللي في وسط الاماكن السياحية , معظم الناس تقوللك انا عايز انزل في فندق باصص علي برج ايفل , او فندق جوه ميدان تقسيم في اسطنبول… صدقني متعة السفر بجد انك تركب مواصلات و تشوف الشوارع و الناس , اختار فندق يكون بعيد شوية و يكون واخد تقييم حلو هتلاقيه ارخص بكتييييير من فندق تاني قريب من الاماكن السياحية .
3- BlaBla Car:
في اسبانيا كنت عايز اسافر من مدينة بلنسية Valencia لمدينة أليكانتي Alicante , المسافة بينهم حوالي ساعتين و نص , تذكرة القطار كانت بحوالي 60 يورو , و الاتوبيس 30 يورو … ساعتها لجأت لBlabla car , موقع ظريف , فكرته ان اي حد مسافر في الوقت اللي هتسافر فيه بين المدينتين دول بعربيته بياخدك معاه مقابل انك تدفع جزء من تمن البنزين هو بيكون محدده .
بمعني , انا مثلا دخلت علي الموقع , عملت سيرش اني هسافر من بالنسية لأليكانتي اليوم الفلاني , لقيت ناس كتير , اخترت واحد و بعتله طلب , قال انه هيكون واقف في المكان الفلاني الساعة كذا , رحت لقيت في 3 غيري حاجزين معاه , ركبنا كلنا ووصلنا و كل واحد دفع 9 يورو بس !! , ايوه 9 يورو ووفرت حوالي 50 يورو لو كنت خدت القطار او 20 يورو لو كنت خدت الباص .
الموقع ده شغال في معظم دول اوروبا و تركيا و البرازيل و المكسيك , و كل شوية بيزودوا بلاد جديدة .
4- كُل زي أهل البلد:
مطعم ليدو من أشهر المطاعم الشعبية في ريجا عاصمة لاتفيا , مينفعش تزور ريجا و متجربش ليدو 😀
الأكل من الحاجات اللي دايما بتاخد جزء كبير من ميزانية السفر , و علشان تعرف تسافر بأقل التكاليف يبقي لازم تبقي ذكي , نصيحتي الاولي في الموضوع ده هو انك تاكل دايما من المطاعم الشعبية في اي دولة هتزورها و اللي دايما بتكون رخيصه و زحمة , ابعد عن المطاعم السياحية اللي بتكون دايما غالية و في نفس الوقت اكلها مش دايما بيكون حلو و دي اهم نصيحة ذكرتها لما كنت بتكلم عن اكتر 10 غلطات لازم تتفاداهم لو هتسافر أول مره…
تاني نصيحة و دايما بلاحظها , شوف المطاعم اللي بتكون جنب الجامعات , في اي حتة في العالم طلبة الجامعات ميزانيتهم قليله و دايما بتلاقي ان المطاعم حوالين الجامعات بتكون رخيصه جدا علشان تبقي مناسبة للطلبة .
تالت حاجه هي السوبرماركت , لو نازل في هوستل او حتي نازل في مكان مأجره من AIRBNB او حتي حد مستضيفك من Couchsurfing و فيه مطبخ تقدر تستخدمه , ممكن تجيب اي حاجه سهله من السوبرماركت و تعملها , هتلاقي نفسك بتوفر جامد .
5- الجولات السياحية المجانية :
صور من جولة سياحية مجانية عملتها في بالنسية في اسبانيا
العدد بيكون محدود و فعلا بتكون جولات مفيدة و ممتعة و مجانية !
خامس نصيحة في ازاي تسافر بأقل التكاليف هو انك تجرب تعمل جولة سياحية مجانية , حاليا في معظم دول العالم شركات سياحية كتير بتقدم جولات سياحية في مجانية في مدن كتير , انا جربت الجولات دي في كذا مدينة في بلاد زرتها و بتكون حلوة جدا .
كل اللي هتعمله انك مثلا هتزور مدريد , ادخل علي جوجل و اكتب (Madrid free tour) هتلاقي كذا شركة اختار واحده و احجز معاهم , تقدر تعمل ده في اي مدينة , بالطريقة دي هتلاقيك لفيت اشهر الاماكن في المدينة اللي هتزورها و ببلاش .
فيه حاجات كتير ممكن تعملها ممكن تخليك تسافر بأقل التكاليف , الفكرة كلها انك تقرأ و تخطط صح و صدقني حلم السفر تحقيقه من اسهل ما يكون…
