دايما بقول في مقالاتي أن السفر أمان جدا و بشجع الناس علي السفر … بس علشان السفر يبقي أمان لازم نبقي عارفين كويس أطرق النصب المشوره و ازاي نحمي نفسنا و احنا مسافرين ..
لما اتكلمنا قبل كده عن 10 غلطات حاول تتفاداهم لو هتسافر اول مره ,و قلنا انك لازم تبقي عارف اشهر طرق النصب في الدولة اللي هتروحها , في المقال ده هنتكلم عن طرق النصب و ازاي تتفاداهم و انت مسافر..
1-طرق نصب التاكسي:
دي من أشهر طرق النصب اللي ممكن تقابلك و انت مسافر , تركب تاكسي مثلا من المطار او اي مكان , و اول ما توصل السائق يقولك معلش العداد بايظ و مش شغال و يطلب منك مبلغ كبير .
او مثلا تركب و بعد ما توصل تلاقي العداد مطلع مبلغ كبير اوي اكتر من الطبيعي ده لأن السواق أخد طريق اطول عشان اجرته تبقي أكبر .
او مثلا “و ده مشهور في اسطنبول” ان مثلا تدي السائق 50 ليرة ياخدها و بعدين يرجع يقولك “دي 5 ليرة مش 50 ” , ساعتها تلاقي فعلا انها 5 ليرة و تفتكر نفسك اتلخبطت و تديله غيرها , ده لأنه بيبدل ال50 بال5 خصوصا ان لون الورقتين قريب جدا من بعض …
نصائح ازاي تتغلب علي ده :
-أولا لو لسه واصل المطار في اي دولة تجاهل سائقين التاكسي اللي هييجوا حواليك يقولولك “عايز تاكسي؟ محتاج تاكسي؟” لأن أغلبيتهم نصابين , في كل مطار فيه مكان أساسي للتاكسيات المرخصة اللي تقدر تركبها.
-لو جيت تركب اي تاكسي , اسأله إن كان العداد شغال وللا لأ , لو قاللك لأ , يبقي يا اما تسيبه و تشوف تاكسي تاني , يا أما تتفق معاه قبل ما تركب علي الأجرة اللي هتدفعها للمشوار اللي هتقوله.
-لما تيجي تدي السائق الفلوس , امسكها في أيدك و قوله مثلا” دي 50 ليرة” او “دي 20 دولار” علشان متديلوش فرصة يبدل الفلوس بفلوس اقل و تبينله انك واخد بالك .
2-البوليس المزيف :
حصلت معايا قبل كده في اسطنبول في شارع الأستقلال, و انت ماشي في الشارع عادي تلاقي واحد جاي عليك و يقولك “بوليس … وريني باسبورك و الفلوس اللي معاك” , طبعا انت من ممكن جدا تتخض من الموقف و متاخدش بالك انه مزيف و تطلعله الباسبور و الفلوس بياخدها يعدها و بخفة ايد ممكن ياخد منها حاجه في الوقت اللي انت فيه مش مركز
من حسن حظي اني كنت قريت عن الموضوع ده قبل كده و اول ما اتحطيت في الموقف ده سبته و مشيت و تجاهلته خالص , فضل ماشي ورايا دقيقة و هو بيقول “بوليس بوليس” و بعد كده مشي …
نصائح ازاي تتفادي ده :
-دايما تتبع حدسك , دايما خلي ليك نظره في الشخص اللي قدامك و حدد اذا كان بوليس بجد و لابس لبس بوليس و خد بالك من لغة جسده , وللا واحد متوتر بيتكلم بسرعة و بصوت واطي و مش واثق من نفسه.
-بلاش تمشي في شوارع فاضية بالليل في اي مدينة مهما كانت البلد اللي بتزورها أمان , خليك دايما في الأماكن الحيوية.
-اوعي ثم اوعي ثم اوعي تنزل بالباسبور بتاعك او بكل الفلوس اللي معاك , تسيب دايما الباسبور في الفندق و تنزل بس بصورة الباسبور و الفيزا و كذلك بالمبلغ اللي هتحتاج تصرفه فقط في اليوم ده مش أكتر من كده …
-بنسبة 99.9% مفيش ضابط شرطة هيوقفك كسائح و يقولك وريني باسبورك و الفلوس اللي معاك نهائيا , الا في حالة واحدة لو حصلت جريمة او شئ يستدعي ده , ساعتها تقوله دي صورة من باسبوري و الفيزا , والباسبور موجود في الفندق اللي اسمه كذا … علشان كده اوعي تقع فريسة للنصابين دول.
-النصيحة الأخيرة هي لو لقيت حد كده هو التجاهل التاااام , كأنك مش فاهم لغته , عمر ما حد هيمد ايده عليك في مكان عام وسط ناس , اخره انه يخوفك نفسيا بالكلام , علشان كده اعمل نفسك مش سامعه اصلا و كمل طريقك و هو هيزهق و يمشي.
3-الشحاتين و خصوصا الأطفال من اشهر طرق النصب .
و دي من أشهر طرق النصب اللي هتقابلها في أغلبية دول العالم , تلاقي طفل صغير بيقرب منك و بيطلب منك فلوس بطريقة بريئة تخليك تتعاطف أوي معاه و تطلع محفظتك و تديله فلوس.
واحيانا بيكونوا ستات حوامل او عواجيز او عائلة تقولك احنا مغتربين و مش معانا فلوس ناكل و هكذا …
المشكلة هنا ان اغلبية دول بيكونوا شغالين مع عصابات بتشغلهم و تاخد منهم حصيلة الفلوس اخر اليوم , و احيانا ممكن حد يكون واقف بعيد يشوفك بتحط محفظتك فين و انت بتدي للطفل و يمشي وراك و ينشلك في اقرب فرصة …
نصائح ازاي تتفادي ده:
لو قابلك حد من الناس دي لو حبيت تساعده يبقي تشتريله أكل او لبس او اي حاجه هو يستفيد بيها مش العصابة اللي مشغلاه بالسخرة … او انك تتجاهله خالص …
4-اسورة مجانية في ايدك :
و دي مشهورة في بعض دول اوروبا , و انت ماشي تلاقي واحدة بتبيع حلي مصنوعة يدويا , تحط في ايدك واحده منهم و تقولك “دي هدية ليك” و بعد ما تلبسهالك تطلب منك فلوس و لو رفضت تعلي صوتها و تزعق و تخلي الناس كلها تتفرج عليك علشان تضطر تدفعلها ..
نصائح ازاي تتفادي ده:
متسمحش لحد يلبسك اي حاجه سواء حلي او لبس او اي حاجه , ارفض بهدوء و كمل في طريقك , قول “No” بحزم و ثقة و محدش هيقدر يقرب منك.
5-عرض المساعدة:
حصلت معايا مرتين مره في مطار كرواتيا و مره في اسطنبول , كنت ماشي في الشارع بالشنط اللي معايا , و قرب عليا واحد بيعرض انه يساعدني في شيل الشنط …
طبعا اللي ممكن يحصل هنا انه بسهولة ممكن ينشلك مثلا , او اضعف الأيمان انه يضحك عليك و يقنعك بمطعم او فندق مثلا اسعاره غالية مقابل انه بياخد عمولة علي اي حد بيجيبه ..
ازاي تتفادي ده :
اي حد يعرض عليك مساعدة ارفضها بكل حزم “No thank you” , متقفش و تتكلم و كمل في طريقك عادي جدا ..
6-طرق نصب تأجير السيارات او الدراجات النارية :
في بلاد كتير بيكون التنقل ارخص لو أجرت سيارة , او مثلا في جنوب شرق أسيا رخيص جدا انك تأجر سكوتر او دراجة نارية … فمثلا تأجر سيارة و لما ترجعها صاحبها يقولك انك كسرت الجزء الفلاني فيها او عملت التلفيات دي و انت مش فاكر اصلا انك عملت حاجه و تضطر تدفع مبلع كبير لاصلاحه
ازاي تتفادي ده :
-دايما أجر من شركة او اشخاص مضمونين , و اتاكد من تقييماتهم علي النت , اوقات كتير الشركات المحلية بتكون اسعارها اقل بكتير من الشركات العالمية لتأجير السيارات , بس لازم تتأكد من تقييمهم علي النت , في أيسلندا كنت محتاج أأجر عربية علشان اعرف ادور علي الأورورا بحرية ,
دورت كتير لقيت شركة محلية في ريكيافيك العاصمة اسعارها ارخص بكتييير من الشركات المشهورة عالميا لتاجير السيارات , و تقييماتها كانت عالية جدا , و فعلا لقيت تعاملهم راقي جدا , علشان كده اهتم بالتقييم و انت بتختار الجهة اللي هتأجر منها.
-لما تستلم العربية أو الدراجة النارية , صور كل جزء فيها في حضور صاحبها , علشان تثبت حالتها في وقت الأستلام , و متديلوش فرصة ينصب عليك.
7-الصديق الودود:
ممكن و انت ماشي تلاقي واحد بييجي يكلمك بود و بيتعرف عليك و بيسألك عن بلدك و بيعرض عليك تقعد معاه علي كافيه مثلا …
او ممكن بنت جميلة تجيلك تتعرف عليك , و تعرض عليك انك تعزمها مثلا في مطعم معين, و انت تصدق و تروح تعزمها … و في الأخر تتفاجئ بأسعار خيالية في الفاتورة للحاجات اللي طلبتها و هتبقي مضطر ساعتها تدفع غصب عنك .
الفكرة ان الأشخاص دول نصابين متفقين مع المطعم او البار ده انه يجيب زبون مغفل يضحكوا عليه و ينزلوله فاتورة بأسعار غالية جدا و يخلوه مضطر يدفع و يسرقوا فلوسه.
ازاي تتفادي ده:
حاول متستجيبش لأي محاولات تقرب منك بالطريقة دي , خليك دايما حذر جدا في تعاملك مع الغرباء.
8-تذاكر المواصلات المزيفة:
لو مثلا رايح تشتري تذكرة مترو او اتوبيس و فيه صف واقف , يقرب منك واحد و يقولك “انا معايا تذكرة مش محتاجها و هبيعهالك بتمن اقل ” , ساعتها تفرح و تشتريها منه , و تتفاجئ بعد كده انها مزيفة و يكون هو اختفي بفلوسك.
ازاي تتفادي ده:
دايما تشتري اي تذاكر للمواصلات من مكاتب البيع الرسمية , أو احيانا من السوبرماركت في دولة زي لاتفيا مثلا , دايما اسأل منين اجيب التذاكر و متشتريش غير من الأماكن الرسمية .
طرق النصب كتير بس صدقني طول ما انت متبع حدسك و في نفس الوقت قريت و متوقع ايه اللي ممكن يحصل و تتصرف ازاي ساعتها هتبقي في أمان …
هل اتنصب عليك قبل كده او عندك حاجه حابب تضيفها عن طرق النصب أثناء السفر , ياريت تشاركنا بيها و هنضيفها في المقال …