الشوبنج في تركيا أو في أوروبا من أكتر الحاجات اللي بيحبها السائح العربي . مش بس لأن الحاجات بتكون أرخص بكتير من اسعارها في بلادنا , لأ كمان لأنك طبيعي انك بتلاقي أن جودتها أفضل بكتير من جودة السلع في بلادنا .
استكمالا لسلسلة مقالات ازاي تسافر بأقل التكاليف , و بعد ما اتكلمنا عن ازاي تسافر لأوروبا بأقل التكاليف , كان لازم أتكلم عن موضوع مهم ناس كتير متعرفش عنه و هو استرداد الضريبة علي المشتريات Tax free, و اللي هتوفر معاك جامد لو فكرت تشتري حاجه و انت في أوروبا .
[lwptoc numeration=”none” colorScheme=”inherit” borderColor=”#dd8604″]
ايه هو استرداد الضريبة علي المشتريات Tax free ؟
معظم دول أوروبا أو تركيا فيه علي معظم السلع ضريبة تسمي بضريبة القيمة المضافة VAT , و اللي هي مفروضة علي المواطن الأوروبي المقيم في أوروبا و اللي بيتم صرفها علي التعليم و الصحة و ما إلي ذلك …
بس أنت كسائح بتزور أوروبا , ليه تدفع الضرائب دي بما أنك مش مقيم في أوروبا و مش مستفيد من الخدمات اللي بتوفرها الحكومة لمواطنيها ؟
ده غير ان فكرة استرداد ضريبة القيمة المضافة للسائح الغير مقيم في أوروبا دي فرصة للأسواق الأوروبية للأنتعاش و جذب المشترين للسلع و البضائع الأوروبية .
و من هنا جت فكرة أن السائح اللي هيشتري سلعة معينة بحد أدني معين مثلا ٥٠ يورو في أوروبا أو حوالي ١١٨ ليرة تركية في تركيا ( بتختلف نسبة الحد الأدني من دولة لأخري )… ساعتها ممكن تكون مؤهل لاسترداد الضريبة علي مشترياتك Tax free
ايه متطلبات استرداد الضريبة اثناء الشراء؟
مبدأيا قبل ما تروح تعمل شوبنج لازم تتأكد أن باسبورك معاك , لأن صاحب المحل بيحتاج بياناتك في الباسبور و هو بيملالك استمارة ال Tax free .
كمان لازم تتأكد ان المحل اللي هتشتري منه بيسمحلك انك تسترجع الضريبة , في تركيا مثلا فيه محلات كتير مبتسمحلكش انك تسترجع الضريبة و انت مسافر .
كمان لازم تبقي عامل حسابك ان السلع اللي هتشتريها هتاخدها معاك بلد و انت راجع مش هتستخدمها في البلد اللي بتزورها … و طبعا زي ما قلنا تكون معدية الحد الأدني لل Tax free .
تعمل ايه و انت بتشتري ؟
بعد لما تشتري المنتجات اللي محتاجها بتطلب من البائع استمارة استرداد الضريبة و ساعتها هيطلب انه يشوف باسبورك و يملأ استمارة ال Tax free , و بيتأكد أن اجمالي ثمن السلع اللي اشتريتها اكتر من الحد الأدني اللي اتكلمنا عليه .
بتتأكد بنفسك بعد كده من القيم اللي كتبها في الأستمارة و بتتأكد من كل الفواتير انها معاك لأنك هتحتاجها بعد كده في الخطوة الأخيرة اللي هقوللك عليها دلوقتي .
اخر خطوة في استرداد ضريبة القيمة المضافة بتكون و انت مسافر من البلد اللي بتزورها :
Source : Oslo Airport Website
اخر خطوة بتكون ختم الأستمارة و استرداد الضريبة و دي بتكون في المطار قبل ما تسافر , و لازم تركز معايا علشان دي أهم نقطة …
قبل معاد سفرك لبلدك ب٣-٤ ساعات لازم تكون متواجد في المطار , و قبل ما تعمل Check-in يتتوجه لمكتب الجمارك او المكتب الخاص بال Tax free …
موظف الجمارك بيتطلع علي الفواتير و بيعاين بنفسه السلع اللي اشتريتها و بيتأكد انها نفس السلع اللي الفواتير و بيقوم بختم استمارة الضريبة , و بيرجعلك الضريبة اللي بتكون أما في صورة كاش … أو بيقوم بارجاعها للبطاقة الأئتمانية بتاعتك و ده بياخد من اسبوع لشهر .
أهم نقطة و اللي بأكدها عليك هي انك تتوجه لمكتب الجمارك قبل ما تودع شنطك لموظف شركة الطيران علي الطيارة , لأن لو موظف الجمارك مشافش السلع اللي اشتريتها مش هيقدر يرجعلك الضريبة و بالتالي مش هتسترد فلوسك .
