اسطنبول
وجهات Destinations

اسطنبول أول مره ؟؟ كل اللي محتاج تعرفه قبل السفر لاسطنبول

on
نوفمبر 20, 2018

اسطنبول من أكتر مدن العالم اللي بيتكتب عنها في كل مدونات و مواقع السفر , و اللي زار اسطنبول هيعرف السبب .

ببساطة اسطنبول غير أي مدينة ممكن تشوفها , مدينة ليها مذاق خاص و فريد …

في المقالة دي هقولك علي كل حاجه هتحتاجها للسفر لاسطنبول أول مره …

 

 

ليه اسطنبول ؟

 

اسطنبول أول مره ؟؟ كل اللي محتاج تعرفه قبل السفر لاسطنبول 1

Photo Credits to Heyfa BhM

احنا كبشر مختلفين , كل واحد فينا ليه ذوقه في السفر , في مننا بيحب التاريخ , فيه بيحب الطبيعه و المناظر الخلابة , فيه مننا بيحب الزحمة و الناس , و فيه بيحب الأكل اللذيذ … اسطنبول من المدن القليلة في العالم اللي جمعت بين كل ده …

مش بس كده , اسطنبول من المدن اللي تعتبر رخيصه , تمتلك شبكة مواصلات ممتازه صعب أوي تتوه فيها حتي لو هتزورها اول مره …

 

مسجد السلطان احمد , اسطنبول

 

 

بعد ما تقرأ الدليل ده هتعرف كويس ان اسطنبول تستاهل تكون من الدول اللي لازم تزورها يوما ما …

 

 

الفيزا :

 

turkish visa

 

-مواطني تونس و المغرب و الأردن و لبنان : تقدروا تدخلوا تركيا من غير فيزا , فقط ختم دخول من المطار .

-معظم الدول العربية (بما فيها مواطني مصر تحت 18 سنة او فوق 45 سنة ) : تقدروا تطلعوا فيزا الكترونية اونلاين

-المصريين (من 18 ل 45 سنة) :لازم حصول علي فيزا تركيا من مكتب التأشيرات المتعاقد مع السفارة التركية .

 

متطلبات الفيزا التركية تشبه كتير فيزا الشنجن من حيث الحساب البنكي و جواب ال HR من مكان العمل  و غيرهم , ان شاء الله هنزل مقاله فيها كل ما يخص التأشيرة التركية + التصريح الأمني لان الموضوع فيه تفاصيل كتير .

 

تقعد فين في اسطنبول ؟ 

أسطنبول فيها أحياء كتير جدا , لكن فيه منطقتين رئيسيتين السياح بيفضلوا يقعدوا فيهم :

 

السلطان أحمد :

و دي المدينة القديمة , ده حي اسمه “فاتح” , المنطقة دي بتمتاز انها هادية جدا و فيها معظم الأماكن السياحية زي الجامع الأزرق و أيا صوفيا و قصر توبكابو و غيرهم كتير ….

 

اسطنبول أول مره ؟؟ كل اللي محتاج تعرفه قبل السفر لاسطنبول 2

منطقة بيوغلو (جالاتا):

من أشهر المناطق في اسطنبول بالنسبة للسياح , المنطقة دي فيها ميدان تقسيم الشهير و شارع الأستقلال و برج جالاتا …

 

istiklal street istanbul

 

فيه طبعا مناطق تانية زي شيشلي , بشكتاش و حتي الجانب الأسيوي , بس لو دي أول مره في اسطنبول خليك احسن في المنطقتين اللي فوق ….

 

 

الأقامة:

 

اسطنبول من المدن اللي ممكن تلاقي فيها فنادق أو شقق رخيصة جدااا … هديلك دلوقتي كذا سيناريو :

لازم تجرب ال couchsurfing  زي ما بقول دايما , غير ان حد هيستضيفك مجانا … انك تشوف اسطنبول بعيون ابن البلد احسن مليون مره من انك تشوفها بعيون السائح.

طبعا الهوستل من الحاجات اللي لازم تجربها و خصوصا في اسطنبول , في هوستلات جميلة جدا و تقييماتها رائعة ده غير ان اسطنبول مدينة عالمية و هتقابل مسافرين زيك من كل العالم و هتسفيد منهم..

فيه اوبشن انك تأجر أوضه في بيت حد تبع برنامج AIRBNB , او انك تأجر استوديو او شقة لوحدك.

اخر اوبشن هو الفندق , و فيه فنادق كتييير رخيصة و تناسب كل الميزانيات , ادخل علي بوكنج و اعمل سيرش علي حسب ميزانيتك , بس نصيحة بلاش تحجز فندق التقييم بتاعه أقل من 8 , و نفس الكلام عن الهوستلز.

 

المواصلات :

اللي بيسافر كتير هيعرف ان شبكة المواصلات في اسطنبول من افضل شبكات المواصلات مقارنة بمدن كتير حول العالم …

ازاي تروح من المطار لوسط اسطنبول؟

 

فيه مطارين في اسطنبول:

 

مطار أتاتورك:

 

-بالتاكسي : و ده أغلي حاجه , من المطار لتقسيم بحوالي 55 ليره , و للسلطان أحمد يحوالي 70 ليرة .

 

اسطنبول أول مره ؟؟ كل اللي محتاج تعرفه قبل السفر لاسطنبول 3

 

-بالباصHAVABÜS: و ده بيطلع كل 30 دقيقة من المطار و تذكرته 11 ليره , و ده هيوصلك لغاية ميدان تقسيم , و لو عاوز تروح السلطان احمد من تقسيم ساعتها ممكن تاخد تاكسي ب 12 ليره , او تركب المترو F1 taksim/ kabatas , و بعدين تنزل و في نفس المحطة تاخد الترام من كبتاش لمحطة السلطان أحمد .

 

اسطنبول أول مره ؟؟ كل اللي محتاج تعرفه قبل السفر لاسطنبول 4

 

-بالمترو+الترام : و ده أول ما تطلع من المطار هتلاقي المترو قدامك , ده هيوديك لغاية ميدان تقسيم , و لو عاوز تروح للسلطان أحمد , فانزل في محطة أكسراي و خد منها الترام للسلطان أحمد .

 

اسطنبول أول مره ؟؟ كل اللي محتاج تعرفه قبل السفر لاسطنبول 5

 

مطار صبيحة جوكشين:

 

-بالتاكسي : طبعا غالي لأن المسافة كبيرة ,  حوالي 115 ليره لتقسيم , او 130 ليره للسلطان أحمد.

 

-بالباصHAVABÜS: بحوالي 14 ليره لتقسيم , و طبعا لو عايز تروح السلطان احمد يبقي هتعمل زي ما مكتوب فوق بالضبط  تركب المترو F1 taksim/ kabatas , و بعدين تنزل و في نفس المحطة تاخد الترام من كبتاش لمحطة السلطان أحمد .

kabatas tram

 

 

ده بالنسبة للانتقالات من المطار للمدينة و العكس … طب بالنسبة للمواصلات بصفة عامة ؟

اسطنبول زي ما قلت فيها شبكة مواصلات رائعة من مترو و اتوبيسات و ترام و معديات في البسفور و تاكسي …

أحلي اختراع اتعمل بقاله كام سنة هو كارد اسطنبول Istanbul Card , و ده لازم تشتريه من اي كشك او سوبرماركت او من اي محطة , تمنه 10 ليره و بيكون مشحون ب 4 ليره (يعني تمنه الفعلي 6 ليره) , و ده تقدر تركب بيه اي مواصله و بيديك خصومات بتوصل لاكتر من 50 % .

 

istanbul Card

 

استخدامه سهل كل اللي بتعمله انك بتمشيه علي اجهزه بتقرأ الكارد عند مدخل كل محطة و بتخصم تمن التذكره منه , و طبعا بتشحنه وقت ما بتحتاج , اشحنه مثلا اول مره ب 20 ليره و بعد كده ابقي اشحنه لو احتجت  و طبعا بتشحنه في ماكينات مخصصه موجوده في المحطات …

اسطنبول أول مره ؟؟ كل اللي محتاج تعرفه قبل السفر لاسطنبول 6

 

 

 

تاكل ايه في اسطنبول ؟ 

 

طبعا السؤال ده ساذج جدا ببساطة لأن اسطنبول انا بعتبرها عاصمة الأكل في العالم 😀

هتلاقي كمية مطاعم كتير جدا و المطبخ التركي بطبيعته غني جدا و متنوع , اكتر حاجه هتدمنها هي سندويتشات الدونير (الشاورما) , ده غير انواع المشويات او المعجنات التركية الكتير جدا …

 

doner kebab

 

انا شخصيا بعشق سندويتش سمك او بالتركي Balik Ekmek و ده تنزل في محطة أيمينونو علي البسفور و تتمشي خطوات لغاية ما توصل لكوبري جالاطا الشهير , تحت الكوبري هتلاقي محلات و مطاعم كتير بتعمل السندويتش اللذيذ ده , مينفعش تروح هناك من غير ما تجربة .

 

اسطنبول أول مره ؟؟ كل اللي محتاج تعرفه قبل السفر لاسطنبول 7

balik ekmek او سندويتش السمك المشهور

 

اسطنبول أول مره ؟؟ كل اللي محتاج تعرفه قبل السفر لاسطنبول 8

تحت كوبري جالاطا فيه مطاعم كتير بتقدم السندويتش ده و باسعار رخيصة

 

طبعا زي ما بقول دايما , حاول دايما تحجز هوستل او فندق يكون شامل الأفطار لأن ده هيوفرلك في الأكل , بس بصفة عامة متشيلش هم الأكل في تركيا لأن الأسعار مش غالية خصوصا لو مخطط صح.

 

 

تزور ايه في اسطنبول ؟ 

 

اسطنبول أول مره ؟؟ كل اللي محتاج تعرفه قبل السفر لاسطنبول 9

قصر توبكابو

اسطنبول من المدن الدسمة بالنسبة للاماكن اللي ممكن تزورها او الحاجات اللي ممكن تعملها , لو انت بتحب التاريخ و الأثار , فهتحب أوي منطقة السلطان أحمد , المنطقة دي فيها أماكن كتير هتحبها زي متحف ايا صوفيا , الجامع الأزرق , قصر توب كابو الشهير اللي لما هتدخله هتحس انك رجعت للتاريخ العثماني الفريد , بجوارهم متحف الأثار بجوار حديقة جولهانه اللي فيها اثار كتير من العصر الفرعوني و الروماني و الاف الاثار من حول العالم …

 

اسطنبول أول مره ؟؟ كل اللي محتاج تعرفه قبل السفر لاسطنبول 10

قصر توبكابو من الداخل

 

و طبعا مينفعش متزورش قصر دولمابهشه اللي بناه السلطان عبدالحميد و اللي كان مركز الحكم في اوائل القرن الماضي , القصر فريد من حيث المعمار او الغرف او الحديقة اللي في الخارج , و تقدر تشوف الغرفة اللي كان عايش فيها مصطفي كمال أتاتورك مؤسس الجمهورية التركية …

 

اسطنبول أول مره ؟؟ كل اللي محتاج تعرفه قبل السفر لاسطنبول 11

قصر دولمابهشه

 

طبعا من علامات اسطنبول هو شارع الأستقلال , الشارع المزدحم اللي مليان محلات و مطاعم و ناس , شارع حيوي جدا و لو كنت من هواة الشوبنج فهتدمن الشارع ده , الشارع ده مبينامش …

 

istanbul

شارع الأستقلال

 

البازار المصري , و ده اتسمي بالأسم ده لانه اتبني سنة 1600 ميلاديه و كان بيتباع فيه البضائع اللي بتيجي من مصر عندما كانت تحت الحكم العثماني , هتلاقي في البازار ده أنواع كتييير من البهارات و الاعشاب , ده غير المعمار بتاعه اللي هيخليك ترجع بالتاريخ لمئات السنين.

 

و متنساش جولة البوسفور و دي لو نزلت لمحطة أيمينونو علي البوسفور هتلاقي مراكب كتير بتقدم الجولة دي بحوالي 12-25 ليره , علي حسب طول الجولة … و ممكن تاخد الفيري ferry للجانب الأسيوي و اللي هتلاقيه مختلف عن الجانب الأوروبي من اسطنبول و ليه طعم خاص …. و ممكن تاخد فيري برضه لجزر الأمراء و دي هنعرضها في مقالة لوحدها علشان ناخدها بالتفصيل …

 

اسطنبول أول مره ؟؟ كل اللي محتاج تعرفه قبل السفر لاسطنبول 12

 

طبعا فيه حاجات تانية كتير ممكن تتعمل في المدينة الرائعة دي , انصحك تدخل علي Tripadvisor و تقرأ اكتر عن الحاجات اللي ممكن تعملها في اسطنبول و هتختار الأنشطة اللي بتناسب اهتماماتك

بس اهم نصيحة هي انك لازم تعمل جولة مجانية free tour , كل اللي عليك انك تحجز مكانك في الجولة من موقع الشركة اللي بتعمل الجولة دي مجانا , و تقابل المجموعة غاليا بيكون قدام ايا صوفيا في منطقة السلطان احمد , و الجولة دي بتكون في حدود ساعتين بتعرفك معلومات قيمة جدا هتفيدك انك تعرف المدينة أكتر..

نيجي بقي لحاجه اخيره و دي للي عايز يشوف كل متاحف اسطنبول و يستفيد بخصومات كتير , فيه حاجه اسمها Istanbul pass , و دي بتكلفك حوالي 100-140 يورو (حوالي 2000 جنيه) و دي بتخليك تدخل معظم متحف اسطنبول + توصيل للمطار + تذكرة الاتوبيس المكشوف اللي بيخليك تشوف اسطنبول + انترنت مجاني معاك + جولات في البوسفور + حاجات تانية كتير كل ده لمدة 3-7 ايام حسب نوع حجزك , دي بتحجزها لو عايز تريح دماغك و كل حاجه تبقي متاحة , بس لو انت مخطط كويس و عارف هتزور ايه و هتعمل ايه , مش محتاجها و ادفع بس للحاجه اللي حابب تروحها …

 

 

هل اسطنبول أمان ؟ 

اسطنبول أول مره ؟؟ كل اللي محتاج تعرفه قبل السفر لاسطنبول 13

بالرغم من بعض التفجيرات القليلة اللي حصلت قبل كده في اسطنبول , إلا اني بعتبر اسطنبول من المدن الامان و اللي تعتبر سهلة بالنسبة للسائح , بعكس مدن تانية كتير او دول بصفة عامة مكانتش سهلة علي السائح انه يتنقل فيها او يتعامل فيها مع اهل البلد …

اهم حاجه دايما زي ما ذكرت في في مقالة 10 غلطات حاول تتفاداهم لو هتسافر اول مره  هي انك بلاش تمشي بالباسبور بتاعك في الشارع , خلي دايما الباسبور في خزنة الفندق او الهوستل و امشي بس بصورة من الباسبور و الفيزا بتاعتك , و لو خارج خد بس جزء من الفلوس اللي هتكفيك في الخروجة دي و سيب بقية فلوسك في الخزنة في غرفة الفندق او الهوستل بتاعك …

ده غير ان فيه طرق للنصب موجوده في اسطنبول و دي هسردها بالتفصيل في مقالة منفرده …

 

دي كانت أهم الحاجات اللي محتاج تكون عارفها قبل السفر لاسطنبول , هيكون فيه مقالات لحاجات تانية بخصوص اسطنبول هنتكلم عنها بالتفصيل .

اسطنبول أول مره ؟؟ كل اللي محتاج تعرفه قبل السفر لاسطنبول 14

عجبتك المقالة ؟ زرت اسطنبول و عندك نصائح حابب نضيفها للمقالة ؟ شاركنا بيها في الكومنتات او علي صفحات المدونة علي السوشيال ميديا ..

 

 

اسطنبول أول مره ؟؟ كل اللي محتاج تعرفه قبل السفر لاسطنبول 15

 

 

TAGS
RELATED POSTS
Subscribe
نبّهني عن
guest
0 تعليقات
Inline Feedbacks
View all comments
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

0
حابب اعرف رأيك ، اترك تعليق :)x
()
x
تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

0
حابب اعرف رأيك ، اترك تعليق :)x
()
x